YOHANI 7
7
Yesu na abale ache
1Kubuluka penepo Yesu adafamba mu Galilea; iye hadafune pyakufamba mu Yudea tayu, thangwi akadamu a Chiyuda akhafuna pyakumpha. 2Ndzidzi wa Phwando ya Misasa ya Ayuda ukhali chifupi,#Lev. 23.34; Deut. 16.13. 3natenepo abale ache Yesu adalonga kuna iye mbati, “Bulukani kuno mbamuende ku Yudea, towera anyakukutewerani akaonembo pinthu pinachita imwepi. 4Munthu angafuna kuti aveke nkhabe bisa pimbachita iye tayu. Podi imwe mukuchita pinthu penepi pipangizeni mwekha ene kuna anthu onsene a padziko yapansi.” 5Podi na abale ache ene hadamkhulupire tayu.
6Yesu adalonga kuna iwo mbati, “Ndzidzi wanga wakuthema hudzati fika tayu, mbwenye ndzidzi onsene ngwakuthema kuna imwe. 7Anthu a padziko yapansi pano nkhabe kwanisa kukuzondani, mbwenye ambazonda ine pano, thangwi ndimbaapanga kuti makhaliro awo ngakudawika. 8Imwe ndokoni ku phwandoko. Ine nkhabe kwendako tayu,#7.8 Ine nkhabe kwendako tayu: Pyakulembwa pinango pyakale pyalongaIne sinaendako chinchino tayu. thangwi ndzidzi wanga wakuthema hudzati fika tayu.” 9Pidamala iye longa penepi, adasalira pyache mu Galilea.
Yesu pa Phwando ya Misasa
10Pikhadamala kwenda abale ache ku Phwando ya Misasa kule, iyembo adenda konthoko m'nduli mwawo. Iye hadende pakwecha tayu, mbwenye mwakubisika. 11Akadamu a Chiyuda akhamsaka-saka pa phwandopo mbavunza mbati, “Iye ali kupi?”
12M'mwinjimo mukhalongwa chiwere-were pikulu pya Yesu; anthu anango akhalonga mbati, “Iye ndi munthu wadidi.” Anangombo akhalonga mbati, “Waa! Nkhabe, iye ambanyengeza anthu.” 13Mbwenye nkhabe mbodzi adalonga pya iye pakwecha tayu, thangwi iwo akhagopa akadamu a Chiyuda ale.
14Phwando ile ikhali kati na kati pidenda Yesu ku Nyumba ya Mulungu mbatoma kufunzisa. 15Akadamu a Chiyuda ale adadodoma pyakwanga mbalonga mbati, “Pyakwanisika tani kuti munthu weneyu adziwe pyonsenepi, podi iye hadafunze tayu?”
16Yesu adatawira mbati, “Pimbafunzisa inepi, si pyanga pyene tayu, mbwenye pimbabuluka kuna Mulungu nyakundituma ule. 17Munthu ule anafuna kuchita pinafuna Mulungu, anadziwa ngakhala pinafunzisa inepi mphyakubuluka kuna Mulungu penu mphyanga pyene. 18Munthu ule ambalonga na utongi wache ene ambayesa kupisakira demelero, mbwenye ule ambafuna demelero ya ule adamtuma ngwakulonga pyakuonadi, pontho muna iye nkhabe pinthu pyakunama. 19Mose adakupasani mwambo, si tenepo tayu? Mbwenye nkhabe mbodzi pakati panu ambavera mwambowo. Apo mwatani mukuyesa-yesa kuti mundiphe?”
20Mwinji ule udatawira kuti, “Iwe una mzimu wakuipa. Mbani akuyesa-yesa kuti akuphe?”
21Yesu adatawira mbati, “Ine ndidachita chakudodomesa chibodzi, tenepo imwe monsene mudadodoma. 22Mose adakutongani kuti mugwande ananu achimuna nsonga yachimuna (podi kwene kuti penepi adatoma napyo si Mose tayu, mbwenye makolo anu), tenepo imwe mumbagwanda basi ananu pa Nsiku Yakupuma.#Lev. 12.3; Kut. 17.10. 23Ngakhala mwana ambagwandwa nsonga yachimuna pa Nsiku Yakupuma, towera mwambo wa Mose uleke kuswiwa, apo mwatani mwandizhangalira thangwi ndawangisa munthu monsene mwene pa Nsiku Yakupuma?#Yoh. 5.9. 24Lekani tonga mseru pakuyang'ana nkhope, mbwenye tongani mwakulungama.”
Yesu ndi Khristu
25Anthu anango a mu Yerusalemu adalonga mbati, “Ayi anayesa-yesa akadamu a Chiyuda kuti amphe ule, si weneyu tayu? 26Yang'anani! Iye akulonga pakwecha, apo iwo nkhabe longa chinthu na chibodzi chene kuna iye tayu. Kani penepa ndiye kuti iwo apidziwadi kuti weneyu ndi Khristu? 27Kwache tonsenefe tikudziwako kudabulukira munthuyu; Khristu angabwera, nkhabe munthu anamdziwa kunabulukira iye tayu.”
28Pikhafunzisa Yesu m'Nyumba ya Mulungu, adalonga mwakugaluza fala mbati, “Kadi imwe mumbandidziwadi, pontho imwe mumbadziwako kudabulukira ine? Ine sidadza na utongi wanga ene tayu. Nyakundituma ule ngwakuonadi. Imwe nee mukumdziwa tayu, 29mbwenye ine ndimbamdziwa, thangwi ndidabulukira kuna iye, pontho adandituma ndiye.”
30Tenepo iwo adapiyesa kumphata, mbwenye nkhabe munthu na mbodzi ene adamkhuya, thangwi ndzidzi wache hukhadadzati fika tayu. 31Mbwenye anthu azinji m'mwinjimo adamkhulupira mbalonga mbati, “Ayi Khristu angabwera, anachita pidzindikiro pizinji kupiringana pyachita munthu weneyu?”
Anyakulondali atumwa kamanga Yesu
32Afarisi adava chiwere-were chikhalonga mwinji ule pya Yesu, natenepo iwo pabodzi na a nyansembe akulu adatuma anyakulondali kamanga Yesu. 33Yesu adalonga mbati, “Ndinati ndikhale namwe ndzidzi pang'ono mbandidzati kwenda kuna adandituma ule. 34Imwe munandisaka-saka, kwache nee munandigumana tayu, thangwi imwe nkhabe kwanisa kwenda kunafuna ine kakhala.”
35Akadamu a Chiyuda adalonga okha ene mbati, “Nkhupi kunafuna iye kwenda kwakuti ife tinachimwana kumgumana? Ayi kunafuna iye kwenda nkhu mizinda ya Agriki, kule kunakhala anthu athu anango mbakafunzisa Agrikiwo? 36Iye akulonga kuti ife tinamsaka-saka, kwache nee tinamgumana tayu, pontho kuti ife nee tinakwanisa kwenda kunafuna kakhala iyeko tayu. Penepa anafuna kulonganji?”
Pya mikulo ya madzi akupasa moyo
37Pansiku ikululetu yakumalisa ya Phwando Yesu adaimira mbalonga mwakugaluza fala mbati, “Munthu anava nyota mbadze kuna ine dzamwa.#Lev. 23.36. 38Ninga munalongera Malemba kuti, ‘Munthu anakhulupira ineyo mikulo ya madzi akupasa moyo inakuka mumtima mwache.’ ”#7.38 Pansiku…mumtima mwache: Mafala a Yesu mu mavesi 37, 38 anakwanisa kuthumbusulwa tenepa: 37 “Munthu ana nyotayo mbadze kuna ine, pontho munthu anandikhulupirayo mbamwe. 38 Ninga munalongera Malemba kuti, ‘Mikulo ya madzi akupasa moyo inakuka kubulukira mumtima mwache.’ ” #Ezk. 47.1; Zek. 14.8. 39Penepo Yesu akhalonga pya Mzimu Wakuchena ule anafuna dzatambira anyakumkhulupira ale. Pandzidzi wenewo Mzimu Wakuchena hakhadadzati perekwa tayu, thangwi Yesu hakhadadzati tambira demelero tayu.
Magawikano pakati pa anthu
40Anthu anango m'mwinjimo adamva Yesu akulonga penepi, natenepo iwo adalonga mbati, “Munthuyu ndi Mprofetidi!”
41Anangombo adalonga mbati, “Iye ndi Khristu!”
Mbwenye anango adalonga mbati, “Khristu hanabulukira ku Galilea tayu! 42Malemba akulonga kuti Khristu anakhala chidzukulu cha Davite, pontho anabalwa muluwani ya Betelehemu, luwani ikhakhala Davite ile.”#2Sam. 7.12; Mik. 5.2. 43Tenepo pakhali magawikano pakati pa anthu m'mwinjimo, thangwi ya Yesu. 44Anango akhafuna kumphata, mbwenye nee mbodzi adamkhuya tayu.
Kukhonda khulupira kwa akadamu a Chiyuda
45Pidabwerera anyakulondali ale, anyansembe akulu na Afarisi adaavunza mbati, “Mwatani mwakhonda kudza naye?”
46Anyakulondali ale adatawira mbati, “Chipo nee munthu na mbodzi ene adzati longa ninga munthu weneyu tayu.”
47Afarisi adaavunza mbati, “Kani imwembo akunyengezani? 48Mbani mbodzi pakati pa Afarisi penu akadamu a Chiyuda adava imwe kuti adamkhulupira? Nkhabe! 49Mwinjiwo nkhabe dziwa mwambo wa Mose tayu, natenepo iwo atembererwa na Mulungu!”
50Mbodzi wa Afarisi penepo akhali Nikodemu, ule kale akhadenda kaonana na Yesu. Iye adalonga kuna anango ale mbati,#Yoh. 3.1, 2. 51“Ayi mwambo wathu umbatitawirisa kulonga kuti munthu akonwa tidzati kumva yekha ene kulonga penu kudziwa chachita iye?”
52Iwo adatawira mbati, “Kani iwembo ndiwe wa ku Galilea? Kawerenge mwadidi Malemba unakagumana kuti nkhabe mprofeti ambabulukira#7.52 nkhabe mprofeti mbabulukira: Bukhu yakale ibodzi yalonga kuti Mprofeti hanabulukira tayu. ku Galilea.”
Mkazi wakuphatwa na uputa
[53Penepo anthu ale adabwerera m'misa mwawo.
தற்சமயம் தேர்ந்தெடுக்கப்பட்டது:
YOHANI 7: SenaMw
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© Bible Society of Malawi
