KEJADIAN 9
9
Allah nen Nuh wene waretikhe wene
1Allah nen Nuh ebe inom, againafuri inom, fanorinafi logolik, yi'nogo yagaisasikhe: ”Hit hinebe inom, hiren tagongge mene inom, o kweangma yi awi ti awi mondogat logobagaigen he, hinagainafuri taginafik, it inagainafuri hinombalak taginafik laga logolik mondok hokhorogo wialaga logoino o.#Kej. 1:28 2Yirue-tirue inom, yi ikan ti ikan inom, wam, paik, yi mene ti mene enggi lek werek mene inom, mondogat hit hinenggiba were'ma, hirat inailot hinafi logouwago. 3Andi mene mondogat inom, yi engga ti engga muli fano mene wokhisigi andi inom, mondogat ninggi logouwageluk wokhisigi o. 4A'nogo meneat he, wam, sue, paik, yi mene ti mene kurik elonggoma mep werek mene andi, meben eluk welagarek andi nen he, elonggoma mep werek mene halok nogoin mondok lego.#Im. 7:26-27, 17:10-14, 19:26; Ul. 12:16, 23, 15:23 5Afuni nen inom, wam, sue, paik en inom, afuni inebe inoasugun halok inebe lombok An nen wene inoba fembik mondok inoasigin o. 6Nen, afuni inebe re, An nebe hangge elalinafigi andi nen he, afuni inoasugun mene andi, it afuni ekhe nen it inoasugun aro.#Kej. 1:26; Kel. 20:13
7Hit hinebe inom, hiren tagongge mene inom, o kweangma mondogat logobagaigen he, hit hinagainafuri taginafik, it inagainafuri hinombalak taginafik, laga logombik mondok hokhorogo wialaga logoino o,” iluk yagaisasikhe.#Kej. 1:28
8A'nogo yagaisasikhesik, ekhe Nuh ebe inom, againafuri inom, mel yagaisasikheat: 9-10”An nen hit hinebe inom, hiren tagongge mene inom, yirue, tirue inom, wam, paik yi mene ti mene enggi lek werek kweangma mene hit hinom kapal elema nen wulibi wagep mene mondogat inom, wene ekhe wathisagain o. 11Wene hit wathisagain andi ebe re yi: An nen hit hinebe inom, eluk welagarek mene inom, yi mene ti mene inom, mondogat hobuk iba ekhe hinoasigin mondok lego. Nen, iba nen kweangma weagetfagain mene ekhe wesigin legaro. 12-13Hit hinebe inom, yi mene ti mene eluk welagarek mene inom, kweangma yoma nen hobuk ekhe lek hilingisogo fagain mondok lek, iluk nendawinggen wenggelogo uare ohenaba figi ari o. 14-15An nen hundik-handik pogot andi ohenaba unggulasu salogo figi halok, uare andi lagunem hineilenggen yethikhi logogun o. Yethugunem, An nen hit hinebe inom, yi mene ti mene eluk welagarek mene mondogat inom, hobuk iba hinoasigin mondok lek iluk yagahisigi mene yi, hobuk nendawimo eberek mondok logogin o. 16Uare andi ohenaba pogot sap palek oba lagagunem, An neilenggen haluk he, yi mene ti mene kweangma eluk welagarek mene, hit hinebe inom, yi mene ti mene inom, wene ninom hundik mondok logogun mene wato andi nendawimo nen eberek mondok logogin o. 17An nen yi mene ti mene kweangma eluk welagarek mene hit hinebe inom, yi mene ti mene inom, mondogat hinendawimo wenggelogo wene wathisigi andi aro,” iluk yagaisasikhe.
Ap Nuh againafuri inomen hilingitukwa wene
18Nuh againafuri inom kapal elema nen wulibi wagaukwa andi inenu re yi: Sem inom, Yafet inom, Ham inom andem. (At Ham andi re, ap Kanaan eisena). 19Ap Nuh againafuri inebe henagan andi re, afuni o kweangma mondogat welagaikharek mene inambu-inombalak he, it andem.
20Ap Nuh andi re, ebe yabu eise logolik wanhi lagaikhe mene ma re, yabu anggur yabu attak-attagat waganogo yatikhe andi. 21A'nogo yakfesikhesik anggur amusu nasikhesik he, obakheindok palagaikhesik asu ninggi'nonggok hogo lakfesikhesik alfulukwa kogougat o sabumo nogo ikhi lagaikhe. 22A'nogo nogo ugunem, at Ham Kanaan eisena a'nogo, eilenggen hasikhesik he, pikhit wulifikhesik, wene a'nogo agaila'lak inebe pire aremnogo yagaisa lagaikhe. 23Yagaisa lagaikhemo, it Sem Yafet emberegen su jubah endakwe labetarek mene inomoloba salogo waluk inanggelekwe o sabu wuri'mo a'nogo kwisukwasik ineisena alfulukwa kogougat welagaikhe a'nogo nineilenggen hogo hanogo iluk inelokhe kwanirek logolik salogo fesukwa. 24A'nogo salogo fesukwama, at Nuh anggur amusu nasikhesik obakhe palagaikhesik welagaikhe mene a'nogo obabut hebelagaikhesik, amlogo elabo mene nen hilingitikhe mene a'nogo elu agaikhesik, 25homan oba ikfesikhe:
”Kanaan, ebe weak asuago.
At agaila'lak kain werek kwelek, at enek he,
inamingmingengge higit asuago.
26-27Sem eisena Allah enupogot andi fogerati logouwago.
Kanaan ebe re, Sem inom, Yafet inom, emberek
inamingmingengge hilinglasuago.
Nen, Yafet he, at Allah nen fano mene
hokhorogo wogeti logolik,
o longgo hokho mene wogosuago.
At Yafet en tagongge mene inom
Sem en tagongge mene inom
misik kwe logouwago,” iluk homan figik,
fanorinafik, isikhe andi.
28I fu andi wagaikhesik oba nen at Nuh ebe umur 350 tahun inom welagaikhe. 29A'nogo welagaikhesik, at ebe umur 950 tahun asi lagaikhesik ebe wa'lagaikhe.
தற்சமயம் தேர்ந்தெடுக்கப்பட்டது:
KEJADIAN 9: inohap
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்