KEJADIAN 1
1
Etus antom le anfatan neno tunan ma pah pinan
1Anbi un-unun, fe Uisneno anfatan ma anmepu neno tunan ma pah pinan nok in nesan, 2pah pinan fe ka mahuma fa ma ka mamasa fa, ma ka maloitan ma ka mabalab fa. Tasi naek le an oki ma anpes, es ankub ma tobe nan ale sa'-sa', ma nahenu nok mes'okan mes alkun smanaf Uisneno es na'oin-oin son anbi oe in fafon. 3Uisneno namolok nak, “Anmu'i meosine nai!” Oke te meusine anbol esan. 4Uisneno anmalin leka In nit lasi nane. Oke te In anbeti meosine nane na'ko mes'okan, 5ma In nakanab meusine nane “Manas” ma mes'okan nane “Fai”. Fai ankon ma nok-noka anbol. Le nane neno ahunut.
6-7Nalali te Uisneno namolok nak, “Kubat mese anhake nai he nati' anbeti oe nane anfani nua, ma an eka anfani bale nua le anbaitsok.” Oke te lasi nane anbol onan. Uisneno anmo'e kubat nane le anbati oe le anbi kubat in nupun na'ko oe le anbati in fafon. 8In nakanab kubat le nane nak “Neno tnanan”. Fai ankon ma nok-noka anbol. Le nane neno nua.
9Nalali te Uisneno namolok nak, “So' oe le anbi neno in nupun nane ansai ma nabua anbi bale mese, talantia atkiso tit nain.” Oke te lasi nane anbol onan. 10Uisneno nakanab nain nane “Pah meto”, ma oe le In nabua nane In nakanab “Oe tasi”. Ma Uisneno In nekan anmalin leka In nit lasi nane. 11Uisneno namolok anteni nak, “So nain nane napoitan ale luet, esle' masaf le napoitan fini ma masaf le napoitan fuan.” Oke te lasi nane anbol onan. 12Onle nane nain napoitan ale luet. Ma Uisneno In nekan anmalin leka In ankiso nit lasi nane. 13Mes'okan ankon ma nok-noka anbol. Nane neno tenu.
14-15Nalali te Uisneno namolok nak, “So anmu'i sa'-sa' apinat anbi neno tnanan he nati' antana pah pinan, he nati' anbatis manas ma fai, he nati' naton ma anfatan neno, ton, ma neno naek neu to ma nonot afnekat ma apalsait.” Ma lasi nane anbol onane. 16Uisneno anmo'e atana anaek nua, esle' manas he nati' ankuas ne-neno, ma funan he nati' ankuas fa-fai, ma nessi na'ko nane In anmo'e afkun-afkun amsa. 17Uisneno antao atana-atana nane anbi neno tnanan he nati' antana pah pinan, 18ma ankuas manas ma fai, ma an eka meusine ma mes'okan. Ma Uisneno In nekan anmalin leka In ankiso nit lasi nane. 19Fai ankon ma nok-noka anbol. Le nane neno ha.
20Nalali te Uisneno namolok nak, “So anmu'i ale mu'it masnasa le nane'o anbi oe in nanan, ma ale kolo at'eles abit neno tnanan.” 21Es nane to Uisneno anmo'e mu'it-mu'it anaek anbi tasi, ma ale mu'it masnasa le anmoni anbi oe in nanan, ma ale kolo. Ma Uisneno In nekan anmalin leka In ankiso nit lasi nane. 22Uisneno anfe tetus neu sin oke ma In anfe plenat neu ale mu'it masnasa le anmoni anbi oe in nanan he nati' anpe' ma namfau ma nahenu oe tasi, ma neu ale kolo-kolo he nati' ansato ma namfau piut. 23Fai ankon ma nok-noka anbol. Le nane neno nima.
24Nalali te Uisneno namolok nak, “So pah pinan napoitan ale mu'it fui ma aem anaet ma abaut.” Oke te lasi nane anbol onan. 25Uisneno In anmo'e sin onane ma In nekan anmalin leka In ankiso nit lasi nane.
26Nalali te Uisneno namolok nak, “Tabu le i Hit of atmo'e mansian le of anfani ma namas on Hit amsa. Sin of ankuas ale ika, ale kolo, ma ale mu'it bian, leka he fui ai he aem, ai leko he anaet ai he a'baut.” 27Uisneno anmo'e mansian onane, ma In anmepu sin onle In aon anmes kun. In anmo'e sin atoni ma bife. 28Nalali te In anfe nanin sin tetus nok molok nak, “Misuf ma mimfau nai he nati' hi sufam ma hi ka'um nane natua ma ankuah pah pinan anfunam natef. Au fe neu ki sutais he nati' ampinote ale ika, ale kolo, ma ale mu'i fui. 29Au fe ani neu ko ale luet, esle' ale masaf le napoitan fini ma ale masaf le napoitan fuan anfani on ho mnahat. 30Mes neu ale kolo ma mu'it fui bian, Au fe ani hun ma hau in non anfani sin amnahat.” Ma lasi nane anbol onane. 31Uisneno ankiso ale sa' le In anmepu nalali nane naleko ma namas. In namlil. Fai ankon ma nok-noka anbol. Le nane neno ne'.
தற்சமயம் தேர்ந்தெடுக்கப்பட்டது:
KEJADIAN 1: AOZ
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்