Matius 15

Em perénta i Amang Kasuruan wo ing kanaramen é tou Yahudi

(Mrk. 7:1-23)

1Awéan piraan tou Farisi wo sé makailek wutul in Torat an Yerusalem owo. Séra mai a si Yesus wo mamuéi, 2“Kéitu réén sé murit i Tuang ra'ica makiit ing kanaramen é apo-apo'ta? Séra kuman ra'ica mu'as ing kama.” 3Taan icua i Yesus, “Kéitu réén kamu ka'i ra'ica makiit im perénta i Amang Kasuruan asaloke' makiit ing kanaramen é apo-apo' miow? 4#Kel. 20:12, 21:17; Im. 20:9; Ul. 5:16; Mrk. 7:10 Ampa'paan aitaar i Amang Kasuruan: ‘Siriino mangé si amang wo si inangmu’, wo ‘Si séike' mangé eng kumutuk si amang kuma'pa si inangna, sia musti ukumen patén.’ 5Taan em pakua miow: Si séike' e makua a sé matu'ana, ‘Sapa e musti wééku a si amang wo a si inang, aiwéékuo a si Amang Kasuruan,’ 6ra'io sangali pandungenna eng kaperluan i amangna kuma'pai i nangna. Wo in taniitu, en taar i Amang Kasuruan ra'io pengakiiten iow, em pengakiiten iow asaloke' ing kanaramen iow. 7Éi camu tou punek! Wutulo sapa en aicua i Yesaya andumoro' icamu,

8 # Yes. 29:13; Mrk. 7:6-7 ‘Em ba'ba' é bangsa anio' marayo-rayo Yaku,

taan en até éra tayang a Yaku.

9Ra'ica wana en torona séra maapo' a Yaku,

ampa'paan en sususuien ipasusui éra a sé tou asaloke' makiit im perénta sé niéma' é tou.’ ”

10Wo towan i Yesus sé tou keli wo kumua ai séra, 11“Lingan wo wéan rékén sumama-sama' en icua-Ku anio'! Sapa e muntep am ba'ba' é tou, siitu ra'ica iméma' sé tou manajis, taan sapa eng kumesot am ba'ba' é tou, siitu e méma' sé tou manajis.”

12Wo mai sé murit-Na e mamuéi ai Sia, “Kailekan réén i Guru, sapaoka e nunuwu' i Guru itu sumakito in até é tou Farisi?” 13Isowat i Yesus, “Pakasa en tinanem sé ra'ica ayusew i Amang-Ku an sorga kémbuten oka akar in a'mu-a'mutna. 14#Luk. 6:39 Wayao mio' sé tou itu. Séra tou wola sé maakin sé tou wola. Sa sé tou wola maakin sé tou wola, séra in dua tantu lumepok oka an lo'beng.”

15Wo icua i Petrus a si Yesus, “Icua mai ai cami sapa eng kaa- ngéan in andéan itu.” 16Wo isowat i Yesus, “Ra'ipé' réén kaangéan iow en itu? 17Ra'ica réén kailekan iow sapaoka pakasa sé imuntep am ba'ba' tumumpa am poot wo itiya' ang kakus? 18#Mat. 12:34 Taan sapa en icumesot am ba'ba', en itu an até owo wo siituo e numajis in tou. 19Ampa'paan an até owo lumembo mai waya em bewerot léwo', mengapaté tou, mengasina, mengacabul, mengarombit, mengasairi in towo wo mengaojat. 20Sé ituo waya sé numajis in tou. Taan sa tou kuman wo ra'ica mu'as ing kama ra'ica iméma' sé tou manajis.”

Em paémanen i wéwéné Kanaan

(Mrk. 7:24-30)

21Si Yesus kumesot am bitu wo sumingkir an sangkum in Tirus wo in Sidon. 22Wo mai si esa wéwéné Kanaan si an sangkum itu owo wo kumua, “Icaupusai aku é Tuang, taranak i Daud, ampa'paan si toyaangku wéwéné rinasuk i sétang wo wenduo keli.” 23Taan si wéwéné itu wutu-wutul ra'ica niengkutan i Yesus. Wo sé murit-Na mai wo mangilek ai Sia, “Ru'du'o sia mangé, ampa'paan pengii-ngiitenna kita ang karapi imengangko-ngangko'.” 24Isowat i Yesus, “Yaku ayutus asaloke' a sé domba sé icatala asé tou Israel.” 25Taan si wéwéné itu rumuruke' taré mangé wo kumundu en sumiri' Sia wo kumua, “Tuang, tawangenai aku.” 26Taan isowat i Yesus, “Ra'ica patus mindo i roti si aitu'tul a sé toyaang wo iwéé a si asu.” 27Icua i wéwéné itu, “Wutul é Tuang, taan si asu itu icuman ing kakanen tela'u sé rumongkor an darem i méja i tuangna.” 28Wo icua i Yesus ai sia. “Éi inang, wangko' em paémanenmu. Mamualio ai co tanu ing kasalé'anmu.” Asi témpo ituke', si toyaangna itu imasama'o.

Si Yesus sumama' sé tou keli

29Kekawus in itu, si Yesus tumela'uo in tampa itu wo maya' an tembira in lour Galilea. Wo séra sumosor an tolaina wo lumukut am bitu. 30An tutuw itu keli en tou meréro-rérot maai ai Sia. Iwali éra mai sé tou késo', sé tou wola, sé tou kénto', sé tou wowo' wo keli ka'i en sakit walina, wo iweta' éra an dior i Yesus. Wo séra im baya sinama'-Na. 31Sé tou keli itu ka'i mangaya-ngaya'ka' isuméré sé tou wowo' maroma'o, sé tou kénto' masama'o, sé tou késo' mawaya'o, sé tou wola maséréo, wo irayo éra si Amang Kasuruan é Israel.

Si Yesus méé kanen a sé epat ngariwu tou

(Mrk. 8:1-10)

32Wo towan i Yesus sé murit-Na wo kumua, “En até-Ku mendam ing kaupusan a sé tou keli anio'. Ampa'paan teluo ngando séra mengii-ngiit Yaku wo séra ra'io wana kakanen. Ra'ica kiim-Ku rumu'du' séra maréng ang karapi i maarem, oréoka séra awéan e mapusing an lalan.” 33Icua é murit-Na ai Sia, “Guru, en tampa anio' lulu in tou, tumambisa kita makéré roti iwéé a sé tou keli anio'.” 34Icua i Yesus ai séra, “Pira réén eng kakeli i roti miow?” Isowat éra, “Pitu wo awéané' ka'i piraan sera' teké'.” 35Wo iru'du' i Yesus sé tou keli itu lumukut an tana'. 36Kekawus in itu indon-Na sé pitu roti wo sé sera' itu wo kumua makapulu'sama' wo te'bi-te'biin-Na wo yéké-Na a sé murit-Na wo yéké ka'i é murit-Na a sé tou keli. 37Séra im baya kuman akar imawesu. Wo umungen é murit i Yesus sé roti i matela'u itu eng kakelina mawuta am pitu wantang. 38Sé icumiit kuman epat ngariwu tuama, ra'ica icauntep sé wéwéné wo sé toyaang. 39Wo iru'du' i Yesus sé tou keli itu maréng. Wo Sia sumaké an londéi wo mangé an sangkum i Magadan.

தற்சமயம் தேர்ந்தெடுக்கப்பட்டது:

Matius 15: TNT

சிறப்புக்கூறு

பகிர்

நகல்