Malko 12
12
Alimi ni chalo cha mizabibu
(Mt 21:33-46; Lk 20:9-19)
1Atampa ukuyavwanzya uku milumbe: “Untu wenga wapezile ichalo cha mizabibu; apindilila, awimba ichilina cha kukamila, akula ichipanda, awika alimi, ampita. 2Na pano vyacha, atuma umuofi kuli yalye alimi, ukuti aulile uku yalimi visêke vya mizabibu. 3Yannema, yamuma, yamwinga minwe. 4Atuma unzya unji kaili kuno yali, nawe yamuma uluma lwa vilonda uku ntwe, yankang'antizya. 5Nga watuma unji na wiyo yamumola, na yanji ainji; yamwi yayuma na yamwi yayumola. 6Nga asyala wenga, umwana nkundikwa; wiyo nawe ichisila amtuma kuno yali, avwanga, ati: ‘Yamchindika umwanane.’ 7Leelo alimi yao yanenana, yaati: ‘Umpyani wi; tumumole, ngu upyani wusyale uwitu.’ 8Nga yannema yamumola, yansumbila ukunzi ya chalo cha mizabibu. 9Alu nkola chalo cha mizabibu, angachita uli? Alwiza nu kuyumola alimi yao ni chalo cha mizabibu alupa anji. 10Nanti Ilyandiko li, mutachili musome:
‘Ifinga lino yakakula yasula,
ilino lyawa ifinga ikulu ulya kumbali.
11Iswi li lifumile uku Mwene,
nalyo lyatuzungusya apa maaso yitu.’ ”
12Nga yasita kuti yanneme, leelo yopa iumba; kuno yamanyile fino unnumbe uo ayumile akola. Nga yansya yampita.
Kulipa Kaisari ikodi
(Mt 22:23-33; Lk 20:20-26)
13Nga yantumile yamwi aFaliseo na yaYelodi, kuti yanneme uku maswi. 14Pano yafika yannena, yaati: “Kasambilizya, tumanyile fino wewe wa chumi, kuno utalondile uwikolo wa antu, nanti ukulola usyu wa antu, leelo ululangilila inzila yi Leesa ningo. Chiile ukupa Kaisali ikodi nanti awe? Tumpe, tutachimpa?” 15Wene fino amanyile ufi wao, ayanena, ati: “Uku chani mulungesya? Ndetelini ihela njilole.” 16Yaileta. Ayanena, ati: “Usyu wini u, na maandiko ya?” Yannena, yaati: “Uwi Kaisali.” 17Nga Yesu ayanena, ati: “Kaisali mpini ivyaakwe, na Leesa ivyi Leesa.” Iyazunguka nkani.
Apa ututuluko
(Mt 22:23-33; Lk 20:27-40)
18Nga aSadukeo, antu yano yakuluti: kusi ututuluko wa yantu, yaya kunali, yamtondosya, yaati: 19“Kasambilisya, Mose watulembela ukuti untu ndi wafwa, nawe ali nunnina, wasya unchi asi nu mwana, unnina apyane unchi wiyo, kuti avyale nawe ana. 20Nga kwali aliyonga saba, isilenzi apindula, afwa, atasya ana. 21Nu wa uwili amtola, afwa atasya ana. Nu wa utatu fiyo kwene. 22Apalinji yoshi saba, yatasile ana. Ichisila chi yoshi nawe umwanachi wiyo wanfwa. 23Apa kututuluka kwa yafwi, aluwa inka wini pali yao. Kuno yoshi saba yamtozile.” 24Yesu ayanena ati: “Chene! Mutalowa kuli chi. Kuno mutamanyile aMaandiko nanti amaka yi Leesa? 25Kuno pano yalututuluka uku yafwi, yatalupindula nanti ukupindukwa. Leelo yaluwa wi yamalaika ya mwiyulu. 26Nu ku maswi ya yafwi ukuti yalututuluka: Mutachili musome un-chitabu chi Mose, unnyango wa katûtu, fino Leesa wannenile, waati: ‘Nene ndi Leesa wi Ablaamu na Leesa wi Isaka na Leesa wi Yakobo?’ 27Wene asi Leesa wa yafwi, leelo uwa yapuma. Fiyo mululowa nkani.”
Ichilangaso ichikulu
(Mt 22:34-40; Lk 10:25-28)
28Na pali yakaandika, kaandika umwi awiza apulika yaluvwanga, nawe amanya fino wayazumilizya ningo, amtondosya, ati: “Apa vilangaso vyonsi, ichilangaso cha ntangulo ichili kwi?” 29Yesu annena, ati: “Icha ntangulo ichi: ‘Pulikini mwe yaIslaeli. uMwene Leesa witu, ulu Mwene wenga. 30Newe ukunde uMwene Leesa wako uku mweso wako wonsi nu ku upuma wako onsi nu ku mano yako yoshi, nu ku maka yako yoshi.’ 31Ni cha uwili ichi: ‘Ukunde nnyonko ndi fino waukunda.’ Kusi chilangaso chinina ichikulu ukuluta vi.” 32Kaandika wiyo wannena, waati: “Umwenemo Kasambilizya, walanda ningo, ukuti Leesa ali wenga nanti kusi unnina leelo wenga. 33Nu kumkunda ukumweeso wako wonsi nu ku mano yoshi na maka yoshi nu kukunda unnyonko ndi fino wauuunda wenkola, kwazipa kulusile uwila wa kuocha nu uwila onsi.” 34Nawe Yesu pano wawine fino wavwanga ningo uku mano, wannenile, waati: “Wemwi usu kutali nu wene-wi-Leesa.” Na kutali untu wino wachili amtondosye kaili iswi kufuma pao.
Mwana nu Mwene wi Daudi
(Mt 22:41-46; Lk 20:41-44)
35Nga Yesu pano alusambilizya un-ng'anda-nkulu-iyi-Leesa, ayanena, ati: “Yakululanda uli yakaandika ukuti Klisto umwana wi Daudi? 36Daudi unkola wavwanzile uku Mweso Nswefu, ati:
‘uMwene wanenile uMwene wane, ati:
Uwikale ukwikasa lyane lya kwi lunji,
fika na lino nacha nawika asiluembu yako
apansi apa mulu yako.’
37Daudi unkola atile: ‘uMwene,’ nga wawa umwana uli?” Niumba ikulu lyampulikisyanga ku kuchimba.
Yesu wasokezya antu kuli yakaandika
(Mt 23:1-36; Lk 20:45-47)
38Ayanena um-masambilizyo yaakwe, ati: “Chenjelelini yakaandika yano yakunda ukupitana yazwite imyenda imitali nu kulaulwa um-masokoni. 39Nu kwikala uku nkolelo un-ng'anda zyi Leesa, nivisumbi vya nkolelo umvyakulya. 40Ayano yalulya ing'anda zya yasimbe nu ku uchenjezu wao uipe, yakusalika insala yalundulula; yao yaluputwilwa uputuzi unwamu nkani.”
Wila wa umwanachi umpina
(Lk 2:1-4)
41Nawe awikala apipi ni mbokosi ya mpia, alola fino iumba lilutela impia um-mbokosi; asavi ainji yatela ivivuzu. 42Awiza umwanachi wenga unsimbe, nawe umpina, watela isenti ziili, ali hela yonga. 43Nga awita alondeshi yaakwe, ayanena, ati: “Umwenemo ndumunena, unsimbe umpina wi, watatela ukuluta yoshi yano yalutela um-mbokosi ya mpia. 44Kuno yao yoshi yatezile simwi kufuma ku uvuzu wa usavi wao. Leelo wi um-upina wakwe, watela vyonsi fino ali navyo. Ali vyonsi vyaakwe na swe.”
தற்சமயம் தேர்ந்தெடுக்கப்பட்டது:
Malko 12: FNT1988
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
New Testament in Fipa © United Bible Societies, 1988. Bible Society of Tanzania.
