Luka 22

Yuda wasumila ukufima Yesu

(Mt 26:1-5; Mk 14:1-2; Yn 11:45-53)

1Ngu wanda ukulu uwa mikate-isi-ninsasho, uno yakuluti iPasaka, walile iupalamila. 2Nga ikolo iyakapela na yakaandika yasitanga insila ya kumumola, kuno yopanga antu. 3Nga Shetani awingila muli Yuda, wino yakuluti Iskaliote, nawe uwa pali yaya ikumi na yaili. 4Nga apita, aya avwanga na ayikolo iyakapela na akulu ya asalifi, ivyakuti amfime kuno yali. 5Yachimba, yalayana ukumpa impia. 6Wasumila, asita lino angamfima kuno yali, pano kusi iumba.

Kuteya iPasaka

(Mt 26:17-25; Mk 14:12-21; Yn 13:21-30)

7Ngu wanda wa mikate-isi-ninsasho ufika, ali wanda uno wazipile ukufyula infwele ya Pasaka. 8Nga atuma Petlo na Yoane, ati: “Yangini mukatuteyanyishe iPasaka kuti tulye.” 9Yannena, yaati: “Ulusita tuteyanye kwi?” 10Ayanena, ati: “Lolini, pano mwingila un-nsi mwaukomengana nu monsi, asenzile ichaluzi cha mansi. Nnondelini mkingile un-ng'anda ino wingila. 11Nga munnene unkola-ng'anda, muti: ‘Kasambilisha alukunena, ati: Ichumba cha eni chilikwi, kuti ndye iPasaka mwenemo ponga na alondeshi yane?’ 12Nawe wammulanga ichumba ichikulu cha piyulu, ichiteye; teyanyini-mo.” 13Nga yapita, yaya yasana fino ayanenile; yateyanya iPasaka.

Chakulya cha Mwene

(Mt 26:26-30; Mk 14:22-26; 1 Akoli 11:23-25)

14Nga pano chafika, awikala apa chakulya unkola ponga ni mitume. 15Nga ayanena, ati: “Nakunda nkani ukulya iPasaka ii ponga nemwe, inkolelo ya machulo yane. 16Kuno ndumunena fino ntalulya kaili, kufika na lino ilufikilila um-wene-wi-Leesa.”

17Atola untonto, asamalisha, ati: “Tolini uu mulekanile mwensi. 18Kuno ndumunena, fino ukufuma li kwene li ntalunwa mansi ya fisêke vya nzabibu, kufika na lino uwene-wi-Leesa ulwisa.” 19Atola unkate, asamalisha, aukunyola, ayapa, wati: “Alau uli mwili wane, [uno wafimwa uku nnandu wino; muchite fi kwene uku kungisukila.” 20Nu ntonto fiyo kwene pano yamala ukulya, wati: “Untonto uu ali Upangano upya uku wasi wane, uno witika uku nnandu wino.]

21“Lelo lolini, ikasa li wino alunfima, lili pa ponga nene apa meza. 22Kuno uMwana-ntu wapita ishaakwe ndi fino waandikilwe, leelo akalanda uku ntu wino wamfima.” 23Yatampa ukutondoshana yonga uwini pali yeneyo, wino wanchita ichintu chiyo.

Kushi kulâsa leelo kuombela

24Ngu lupaka lukatuka pano yali, ngu wini wino aluloleka alusile anina. 25Ayanena, ati: “Aene ya akulukuwa yakuluyalâsa, na yamaka kuno yali yakulwitwa akasungula. 26Leelo kuli mwemwe chisi fiyo, leelo wino unkulu pali mwemwe, awe wa mwanche, na wino amukolelile, ndi fino wino alumuombela. 27Kuno wino amulusile uwini? Wino ali apa chakulya nanti uwino aluomba? Asi wino ali apa chakulya? Leelo nemwi pali mwemwe indi wa momfi. 28Nemwe ali yano mwali ponga nene um-masosho yane. 29Ichino nene namuwikila uwene, ndi fino Tata wambwikila nene. 30Kuti mulye nu kunwa apa meza yane um-wene wane, nu kwikala apa visumbi vya ukulu, angi muluputula imilandu ya nko ikumi na siili isha aIslaeli.”

Yesu walanda fino Petlo wammkana

(Mt 26:31-35; Mk 14:27-31; Yn 13:36-38)

31Nga ati: “Simoni, Simoni, lola, Shetani wamusita mwemwe, kuti amwele ndi fino yakulwela ingano. 32Leelo ntikupepela, kuti usumilo wako utachepa. Newe pano waseleuka, ukomye anyonko.” 33Nga annena, wati: “Mwene, ntisumila ukupita ponga newe nanti uku nyololo nanti uku nfwa!” 34Nga annena, wati: “Ndukunena Petlo, nkolwe asulamula ilelo fika na lino wankana amaila yatatu, ukuti utanmanyile.”

35Nga ayatondosha, wati: “Chene! pano namutumile mutakwite mbeti nanti kwende nanti nfwato, mwaulilwe chani?” Yaati: “Nanti chimwi.” 36Nga ayanena, wati: “Lelo kasalaka wino akwite imbeti, atole, na kwende kwene, na wino atakwite ulupanga, akashe umwenda wakwe, akakale. 37Kuno ndumunena, lino lyandikwe, litaula ukufikilila kuli nene, fino: wuminkanyiwe ponga na yasulamasunde. Kuno ifintu fino findungime, vyafikilila.” 38Nayo yaati: “Mwene, lola pa pali impanga siili.” Ayanena, ati: “Sashini!”

Yesu um-Getsemane

(Mt 26:36-46; Mk 14:32-42)

39Nga afuma, apita uku mwamba wa Mizeituni ndi fino wachitanga, alondeshi yaakwe yalondekana nawe. 40Walangi lino wafika penepo, ayanena, wati: “Pepini kuti mutingila um-masosho.” 41Wene unkola afuntuka uche, utali waakwe ndi fino apa kusugusa ifinga, afukama, apepa, wati: 42“Tata, ndukasime ntisisha untonto uu, leelo asi kukunda kwane, leelo ndi fino ukasi fiombeke.” 43[Malaika ukufuma umwiyulu aya ampa maka. 44Nawe fino walile aluwaika nkani nga lusha nkani ukupepa. Ngafuma ni minosi lya wazi, lilupona pansi.] 45Nga pano wakatuka pano alupepa, awiza uku alondeshi yaakwe, ayasana yawisi utulo uku chikonko. 46Nga ayanena, wati: “Nga fino umulala? Katukini mupepe, mutachimwingile um-masosho.

Yalema Yesu

(Mt 26:47-57; Mk 14:43-50; Yn 18:3-11)

47Nga pano achili alufwanga, lolini, iumba lya antu na wino yatangi Yuda, nawe uwa pali yaya ikumi na yaili, atayakolelela, apalamila pali Yesu, kuti amtonswele. 48Yesu annena, wati: “Yuda, wafima uMwana-ntu uku kumtonswela?” 49Na yano yali pipi nawe, pano yalola chino chamwa, yaati: “Mwene, tuyakome ni mpanga?” 50Wenga pali yeneyo akoma unsha wi Kapela nkulu, wamsesula ikutwi lya kwi lunji. 51Yesu wanena, waati: “Mutachichita chimwi uku chintu chi.” Annemekela ikutwi, amposha.

52Nga Yesu anena ayikolo iyakapela na ikolo ya ng'anda-nkulu-iyi-Leesa nakombe yano yamwisile, ati: “Chene! mwisile muli ni mpanga ni nonga, kuti mululema ukulupokafya-antu? 53Manda yoshi nali ponga nemwe un-ng'anda-nkulu-iyi-Leesa, mutakatwishe amakasa mundeme. Leelo kasalaka insaa ino na amaka ya chanda yamufikila.”

Petlo wakana Yesu

(Mt 26:57-58, 69-75; Mk 14:53-54, 66-72; Yn 18:12-18, 25-27)

54Nga yannema yamsenda, yapita nawe uku ng'anda yi Kapela-nkulu. Na Petlo wannondile lwa patali. 55Nga pano yapemba umoto apa nsolo apakasi, yikala ponga, na Petlo kwene watensi ponga nayo. 56Ngu nsungu umwi annola atensi apa mwengelela, amkundwila amanso, wati: “Nawi kwene wali ponga nawe.” 57Nga akana, wati: “We, mwanachi, ntammanyile!” 58Akasimbo untu unji anndola, wati: “Newe kwene we wa pali yao.” Leelo Petlo wati: “Untu we, asi nene!” 59Kaili insaa yonga untu unji alemasha, wati: “Umwenemo, na wi kwene wali ponga nawe, kuno nawe kwene untu wa ku Galilea!” 60Nga Petlo ati: “Ntu we, ntamanyile chino uluvwanga!” Na liyo kwene pano achili aluvwanga, unkolwe alamula. 61Umwene aseleuka, alolekesha Petlo. Petlo awisukila iswi lili ilya Mwene, lino wannenile, waati: “Ilelo pano nkolwe achili alamula, wankana amaila yatatu.” 62Nga afumila apashi, alila monsosi.

Yasoweka Yesu nu kumuma

(Mt 26:67-68; Mk 14:65)

63Nga antu yano yalemile Yesu yamsoweka, yamuma. 64Yamkuwa uku maaso, nga yamtondosha, yaati: “Lausha, uwini wino wakuma?” 65Yamfwansha amaswi amanina tupu aya kuntuka.

66Nga pano kwacha, iumba lya akombe nayikolo yakapela, na yakaandika, yanndeta apitengo lyao, yaati: 67“Utunene ndi wewe uli Klisto.” Wayanena, wati: “Nanti namunena, mususumila awe. 68Kaili nanti namutondosha, musunena chimwi. 69Leelo ukufuma li kwene, uMwana-ntu aluwa tensi ulusansa lwikasa lilunji li Leesa uwa maka.”

70Nga yoshi yafwanga, yaati: “Fwandi, wewe uli mwana wi Leesa?” Nga ayanena, ati: “Mwemwe mulutaka fino inene kwene.” 71Nga yaati: “Tulusitila chani kaili ushutila? Kuno swe yakola twapulika amaswi ukufuma un-nndomo wakwe.

தற்சமயம் தேர்ந்தெடுக்கப்பட்டது:

Luka 22: FNT1988

சிறப்புக்கூறு

பகிர்

நகல்