Luka 2
2
Kufyalwa kwi Yesu
(Mt 1:8-25)
1Nga chali um-manda yalye, ichilangaso chifuma kwi Kaisali Augusto, ukuti ayantu yoshi aya kuno ukushi yaandikwe amashina yao, nu kusoloshiwa. 2Ukusolosha kwali ukwa ntangulo ukwandikwa, pano Kilenio wali unndâsi wa Silia. 3Antu yoshi ukuyu wandikwa, chila ntu uku nsi wakwe.
4Yosefu nawe wafumile uku Galilea un-nsi wa Nazaleti, wapitu ukuya uku Yudea, wafika um-nsi wi Daudi uno yatangi Betleemu; kuno uwa ng'anda nu luko lwi Daudi. 5Ukuti uwaandikwe ponga na Malia unchi, wino wimile, nawe wali ninda.
6Nga chali walangi yachili yatensi kuo kwene, amanda yaakwe yafika ukuti apape. 7Wafyala umwana wiyele, wamswika imyenda ya chana, yanndalika umushuwa cha kulyila ing'ombe, kuno yatawine ukwa kulala un-ng'anda ya eni.
Achemi na yamalaika
8Ngu munsi iyo kwene mwali achemi yikalanga un-nchundu, yalolelanga ufyo wao usiku. 9Malaika wa Mwene waya suwa nukulu wa Mwene wayayengesela koshi koshi, ingofi shiyalema nkani. 10Malaika wayanena, waati: “Mutachopa, kuno namuletela amaswi masipe aya kuchimba nkani uku yantu yoshi. 11Kuno ilelo umunsi wi Daudi watafyalwa uku nndantu wino, Unkulushi, ali Klisto uMwene. 12Ni chilangilisho kuli mwemwe ali chi: mwamnsana umwana uncheche aswikiwe imyenda ya chanche, awisi un-chisandiko cha kulyila ing'ombe.” 13Liyo kwene iumba ikulu lya mwiyulu lyali ponga na malaika wiyo, angi yalutesha Leesa nukuti:
14“Utensho kuli Leesa umwiyulu,
na kuno ukunsi uwelesho kuli yano yamsipila.”
15Walangi pano yamalaika yao yapita umwiyulu, achemi yao yatondoshana, yaati: “Lelo tuye uku Betleemu, tukalole fino chichiwa, chino Mwene watumanyisha.” 16Nga yapita suwa, yasana Malia na Yosefu nu mwana uncheche awisi un-chisandiko. 17Pano yanndola, yayalandila ifintu fya ku mwana wiyo, fino yanenilwe. 18Yoshi yano yapulika, yasunguka uku ifintu fiyo fino yalandilwa na achemi. 19Leelo wene Malia wantusha fiyo kwene, angalwelengula um-mweso wakwe. 20Achemi yao yapiluka angi yalulumbanya Leesa nu kumtensha uku ifintu fyoshi, fino yapulika nu kufilola, ndi fino yanenilwe.
Yatemela Yesu ishina
21Na pano yafika amanda nnane aya kumchita ichibalu, yamtemela ishina lyaakwe, yaati: i Yesu; ndi fino watemilwe na malaika, pano achili asendwe inda.
Simeoni na Ana
22Nga pano amanda ya kuswepa kwao yafika, ndi fino iNtambi yi Mose ili, yamtwite uku Yelusalemu, kuti yamwike uku Mwene. 23Ndi fino chaandikwe un-Ntambi ya Mwene: umwana wensi uwiyele kuli nyina, alwitwa unswefu uku Mwene. 24Yakafime na mawila ndi fino chanenilwe un-chilangaso cha Mwene, inkunda ziili nanti imisusu yili iya nkunda.
25Nga lola uku Yelusalemu kwali untu ishina lyaakwe i Simeoni, nawe untu wa chumi, wachindika Leesa nu kulolela utekesho wa Islaeli, nu Mweso Nswefu wali ponga nawe. 26Nawe walile wanenwa nu Mweso Nswefu, fino atalulola infwa, lino achili alole Klisto wa Mwene. 27Nga awiza un-ng'anda-nkulu-iyi-Leesa akolelilwe nu Mweso Nswefu. Nga afyasi yatwala umwana Yesu mwenemo, kuti yamchitile fiiyane ni Ntambi. 28Unkola kwene wampokelile um-makasa yaakwe, watesha Leesa, wati:
29“Apa kasalaka Mwene,
aleke umuofi wako apite lumi,
ukuyana niswi lyako.
30Kuno amaso yane iyalola ufyusi wako,
31uno wawika apa maaso ya antu yoshi.
32Mwengelela wa kuswefesha akulukuwa,
nu ukulu kuuantu yako, Islaeli.”
33Nga isi na nyina yasunguka apa ifintu fino fyafwangwa apa mwana wiyo. 34Simeoni ayapepelela, anena Malia nyina, ati: “Lola, wi wawikilwa kupona nu kukatusha ainji umwi Islaeli, nu kuwa chilangisho chino chilupashanyiwa. 35Newe wenkola impanga ilwingila um-mweso wako — ukuti yaloleke amelenguzi ya myenso tupu.”
36Nga pali ilau umwanachi, ishina lyaakwe i Ana, mwana wi Fanueli, uwa luko lwi Aseli. Wali uwa myaka iminji, wikashile niya imyaka saba fuma usungu wakwe. 37Nawe unshimbe wa myaka amakumi nnane na ini, nawe atatinanga un-ng'anda-nkulu-iyi-Leesa, wapepanga usiku nu nsanya, nu kuishilisha ichakulya angi alupepa. 38Nawe wingile liyo kwene wasamalisha Leesa ponga, wataka pali yoshi yano yalolelanga ukulushi wa Yelusalemu.
39Nga pano yamala fyoshi fino fiine ni Ntambi ya Mwene, yawela ukumwao uku Galilea, uku nsi wa Nazaleti.
Yesu un-ng'anda-nkulu-iyi-Leesa
40Umwana wiyo akula wawa na maka, washula amano, ni nkumbo shi Leesa shyali kunali.
41Nga afyazi yaakwe yayanga imyaka yoshi uku Yelusalemu uku wanda ukulu uwa Pasaka. 42Nga pano wawa uwa myaka ikumi na ili, yapitile-ko ukuyana ni ntambi ya wanda ukulu. 43Nga pano amanda yasila apa kuwela, mwana wiyo Yesu ashala ichishila uku Yelusalemu, leelo afyazi yatamanyile. 44Nayo yatangi ali ponga naanji undwendo, yapita lîla, nayo yanshitanga unjanina na yano yamanyine nayo. 45Nga pano yaula ukunndola, yawela uku Yelusalemu, na kuno yalunshita. 46Walanga pano amanda yatatu yasila, yanndola un-ng'anda-nkulu-iyi-Leesa, atensi apakasi iyaKasambilisha, aluyapulikisha nu kuyatondosha. 47Na yoshi yano yampulika, yasunguka uku mano yaakwe nu ku ufwange wakwe. 48Yasungwike pano yanndola, na nyina wannena ukuti: “Mwanane, uku nichani watuchita fi? Lola, so nene twali tulukushita ni myenso itinwama!” 49Nawe wayanena, waati: “Kuni chani mulushita? Chene! mutamanyile fino ichintu chiyo ichakuti mbwe un-ng'anda yi Tata?” 50Nayo yatamanyile iswi liyo lino wayanenile. 51Nga awela ponga nayo fika nu ku Nazaleti; nawe wayachindike. Na nyina watuzishe angi amanyile fyonsi um-mweso wakwe.
52Nga Yesu wakula um-mano ni lingo, angi asipile Leesa na antu.
தற்சமயம் தேர்ந்தெடுக்கப்பட்டது:
Luka 2: FNT1988
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
New Testament in Fipa © United Bible Societies, 1988. Bible Society of Tanzania.
