Yoane 1
1
Iswi lyawa untu
1Apa ntangulo pali Iswi ni Iswi lyaliko kuli Leesa, nalyo Iswi lyali Leesa. 2Liyo intangulo lyali kuli Leesa. 3Fyoshi fyaombike kuli wiyo na apasi wiyo chitali chiombeke chimwi chino chaombeka. 4Unkasi munali umuno mwali upuma, nao upuma wali umwengelela uku yantu. 5Nao umwengelela ukuluswefya un-nchanda, ni chanda chitangi chiusimye.
6Kwisile untu atumilwe ukufuma kuli Leesa, isiina lyaakwe Yoane. 7Wiyo wisile ukuti alande umwengelela, ukuti yoshi yasumile kuli wenewe. 8Wiyo atali umwengelela, leelo wisile ukuti alande umwengelela. 9Kwali umwengelela unkola uno ulukosa antu yoshi, ulwisa kuno ukusi.
10Iswi lyeliko kuno ukushi, nukushi kwene kwaliko kuno lili, leelo akusi yatammanyile. 11Wisile ukwakwe, leelo ayali yaakwe yatammulile. 12Leelo yoshi yano yammulile. wayapile amaka ayakuwa ana yi Leesa, ayano yasumile ishina lyaakwe. 13Yano yatafilwe uku wasi, nanti uku kukasama kwa mwili, nanti uku kukasama kwa antu, leelo kwi Leesa.
14Nalyo Iswi lyaombike umwili, likala kuno tuli, neswe twaulola ukulu wakwe, ukulu ndi kuti uMwana wenga wino afumile kuli Tata, uwa nkumbu ni chumi. 15Yoane wannansile, awangula ukwiswi lyaakwe, wati: “Alawi uwino natasile amaswi yaakwe, wino alwisa uku chisila chane, waliko inkolelo yane.” 16Kuno uku winji wa nkumbu shaakwe, sweswe swensi twapokelile inkumbu apa nkumbu. 17Kuno Ntambi yafimilwe uku makasa yi Mose, leelo inkumbu ni chumi sisile ukwikasa li Yesu Klisto.
18Kusi untu wino watana walola Leesa nanti limwi; uMwana wi Leesa wino ali pa chifuwa chi Tata, wafilwe wenga, uwino watulangilile.
Usyuta wi Yoane
(Mt 3:1-12; Mk 1:1-8; Lk 3:1-18)
19Nau uli usyuta wi Yoane. Ayudea pano yantumile yakapela na aLevi ukufuma ku Yelusalemu, ukuti yamtondoshe, waati: “Wewe wini?” 20Nawe wasumile, atachili akane, wasumile fino wene asi Klisto. 21Yamtondosha, yaati: “Nga wewe wini, fwandi? We Elia?” Wafwanga, waati: “Asi nene.’ “Wewe ilau lili?” Wafwanga, waati: “Awe!” 22Nga yannena, yaati: “Wewe wini? Ukuti tukanene yano yatutumile. Wemwi apa lwako ulutuli?” 23Waati: “Nemwi nene iswi lya ntu lino lilulaizya un-nyika: Ololini ishila ya Mwene; ndi fino ilau Isaya watasile.”
24Na yaya yano yatumilwe yafumile uku aFaliseo. 25Yamtondosya nu kunnena, yaati: “Nga fino ulubatisha, ndi asi wewe Klisto, nanti Elia, nanti ilau liye?” 26Yoane wayanena, waati: “Nene ndubatisha uku mashi. Pali mwemwe awimilile wino mutammanile mwemwe. 27Uwino alwisa uku chisila chane, wino nene ntalingine ukutolompola imikowa ya nfwato shaakwe.”
28Ifintu vi vyaombike uku Betania, umbalama yi Yodani, kuno Yoane wali angi alubatisha.
Mwana-nfwele wi Leesa
29Uwanda wa uwili alola Yesu alwisa kuno ali, walanda, waati: “Lolini, uMwana-nfwele wi Leesa, wino alutisya amaifyo ya kushi. 30Wiyo uwino nafwashile amaswi yaakwe, ukuti: alwisa untu uku chishila chane, wino ali inkolelo yane, kuno waliko inkolelo yane. 31Nene kwene ntammanyile, leelo kuti amanyike uku Islaeli, ichino nene nishile ndubatisha uku masi.”
32Kaili Yoane wafwasile, ukuti: “Nalola uMweso Nswefu uluwika wa nkunda ukufuma umwiyulu, nao wawa pano ali. 33Nene kwene ntammanyile, leelo wino wantumile ukuyubatisha uku masi, uwino wanenile, waati: Wino walola Mweso wamwikila, nu kwikala panali, wiyo uwino alubatisha uku Mweso Nswefu. 34Nene nalola nu kulanda fino wiyo uMwana wi Leesa.”
Alondeshi ya ntangulo
35Na kaili uwanda wa uwili, Yoane wimilile ponga na alondeshi yaakwe yaili. 36Alola Yesu alupita, afwanga, wati: “Lolini, uMwana-nfwele wi Leesa!” 37Yaya alondeshi yaili yapulika alufwanga, yanlondela Yesu. 38Nga Yesu apepela ayalola yanndondile, ayanena, ati: “Mulusita chani?” Yannena, yaati: “Labi, (alikuti: Kasambilisha) ukuluikala kwi?” 39Wayanena, waati: “Nguni, mwampalola.” Nga yaya yalola pano akuluikala, yikala ukwakwe uwanda uo. Nalyo lyalile ilila.
40Andelea unnina wi Simoni. Petlo, walipo pali yaili yano yampulike Yoane nu kulondela Yesu. 41Intangulo kwene wiyo wawine Simoni unnina, wannena, waati: “Twalola Mesia (alikuti: Klisto).” 42Nga amtwala kuli Yesu, nawe Yesu anndolekesha, afwanga, wati: “Newe uli Simoni, umwana wi Yoane; nakutema we Kefa” (alikuti: Petlo nanti ifinga.)
43Nu wanda wa uwili wakasime ukuya uku Galilea, nawe alola Filipo. Yesu wannena, waati: “Ndondela.” 44Na Filipo ukumwao uku Betsaida, unkola nsi ponga na Andelea na Petlo. 45Filipo alola Natanieli, annena, wati: “Twalola wino waandikilwe na Mose um-Maandiko na muli kalakula: Yesu, umwana wi Yosefu, untu wa ku Nazaleti.” 46Natanieli wannena, waati: “Chingawela iswi lisipe ukufuma uku Nazaleti?” Filipo wannena, waati: “Nguna, ulole.” 47Nga Yesu alola Natanieli alwisa kuno ali, wafwanga nu kunnena amaswi; yaakwe, waati: “Lolini, alawi umu-Islaeli ningo, unkasi kakwe asi nu-chenjesu.” 48Natanieli wannena. waati: “Wammanya uli?” Yesu wannena, waati: “Pano Filipo achili akwite, pano walu uli umwisika ya nsanfu, nali nkuwine.” 49Natanieli wannena, waati: “Labi, wewe uli Mwana wi Leesa, we Mwene wa Islaeli.” 50Yesu wannena, waati: “Kuno nakunena, nati: Nali nkuwine umwisika ya nsanfu, wasumila? Ululola ifintu ifikulu ukuluta efi.” 51Wannena, waati “Umwenemo, umwenemo, ndumunena: Mululola iyulu lyalepuka na yamalaika yi Leesa yalukwela nu kwika apa Mwana-ntu.”
தற்சமயம் தேர்ந்தெடுக்கப்பட்டது:
Yoane 1: FNT1988
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
New Testament in Fipa © United Bible Societies, 1988. Bible Society of Tanzania.
