Madius 21
21
1Eris wat ubutpotet pan Jerusalem ara an nuarin-pece Bedfeje, u nedoon Olivet, is abrai ohwat atimi atahaijeg yin is ero a Iesu, 2um ika ehele rau, Apan aijaurau an nuarin-pece an nuhup unyimirau, arupu idim ecetai nifo aijaurau er athai, im lep inhal o un: aihiyi aijaurau, um imyiapam ehelek: 3el et tas ehelemirau tah natimi, arumu ika aijaurau, Et merit vaig a Natimarid; etpu auroauro aien um atceijaig. 4Eris ago nitai iji eigki asega mika eri ehneijid intas ineig is upyi asaig a naprofeta, um ika, 5“Akumu ika aijaua ehele inhalav atahaig o Saion, Et apan ehelum a Natimarid unyum, et erop nedo o un, et ateuc an nifo aien, im lep inhakli nifo inhal o un.” 6Erus apan ahwat atimi atahaijeg yin erahki, um ago is idivaig is asaig ehele rau a Iesu, 7um imyiapan ehelen nifo im inhal o un, um atijai napelumai urau ira rau, um atijai yin iran. 8Eris ahled apelumai ura an nefalaig natimi is ahinag; eris lep esvi tiklai cai nahaiji ra, um esjaig an nefalaig: 9ara eris uhup ara, im lep ra eris apitac ara, eris ahlaig ara, um ika, Hosana vai Mapoi Tevit: Naaurineig vai yin et ham aien an nidai Natimarid; Hosana an nohatag ijinies acen. 10Is wat apan Jerusalem aien, is ehioehio inliinmopoi nup an nuarin-pece iyehki asega, um ika, Di neigki? 11Eris um ika natimi is ahinag, Iesu neigki, naprofeta an Nasared an pece Calili. 12Is apan a Iesu anliin neom ahlap o Atua, um ahlo pok ijo ra asega, eris ahtai itai ara um auarimtai itai an neom ahlap, um ahidaig afata o ilpu atimi ahtai mune, im lep itai ateuc o ilpu atimi ahtai alaupa, 13um ika ehele ra, Eris aged, mika, “Uhpu anvi nidan neom unyak par ika neom alaigaheni;” ja akis ika aijaua yi “uarin imi ilpu atimi ehneg itai” neom unyak. 14Eris apan ehelen anliin neom ahlap a ilpu atimi aupat nesganimtara, im ilpu atimi asvahteuc neduora; is ago cehcehe ra aien. 15Eris wat almoi a ilpu atimi ahlap esjilid im ilpu atimi esege, niji itai imyiali is ago aien, im ilpu halav eris ahlaig anliin neom ahlap ara, um ika, Hosana vai Mapoi Tevit; eris edemda ara, 16um ika ehelen, Na atahaijeg aiek intas era asaig ara sji eigki, ka o’o? Is um ika ehele ra a Iesu, Maiya; akis idim esvi intas ineig aijaua, ka o’o, eris ika, “As ati nimyiahpas aiek an nipjineucse ilpu halav im ilpu hadi”? 17Is ude ra aien, um ahes an nuarin-pece itaup um apan Bedane; um amen eahki. 18Is wat lahlah an nuhialeg is lep adumoij pan aien an nuarin-pece itaup, is um ehtele yin. 19Is ecetai nateg is ethi an nefalaig aien, um apan o un, um eti ecetai tah nohoan, nerin ache; is um ika aien, Etmu jim lep eteuc nohoam um yetpan irai iji adiat. Is um auroauro um mese nateg. 20Eris wat ecetai a ilpu atimi atahaijeg yin, eris imyiali ara, um ika, Ecetai nateg ineigki, et auroauro um mese! 21Is tas a Iesu, um ika ehele ra, Et inivaijec ineig ek asaig ehelemia ainyak mika, El eka imyiisjis ninivaijec aijaua, um eti imyiisjis nahcil, akupu ago nedo ineig aijaua ek mun ago ainyak an nateg ineigki; akupu lep ika aijaua va nedoon ineig yi apan an taka uarin, va uhpu ethaigse an jop; etpu ucco. 22El eka imyiisjis ninivaijec aijaua, akupu leh niji itai asega aijaua, eka ugni aijaua an nalaigaheni unyimia.
23Is apan aien anliin neom ahlap, um esege; eris asjapicnaig pan ehelen a ilpu atimi ahlap esjilid, im ilpu atimi tas alep an pece, um ika, Na ago nitai iji eigki aiek va intas alep u di? is alupai euc nemda ineigki a di? 24Is tas a Iesu, um ika ehele ra, Ekpu lep ahodai caua ainyak va nitai inyi ethi ache; el eka asuptecnaig ehelek aijaua, ekpu lep asuptecnaig ehelemia ainyak nemda unyak par ago nitai iji eigki: 25is ahes nabaptiso o Joanes eda? an nohatag, ka ehele atimi? Eris tas jipe ehele ra ara, um ika, El ta ika akaija, Is ahes an nohatag; etpu ika eheleija aien, Akis auri aijaua par eti imyiaiji intas o un? 26Ja el ta ika akaija, Is ahes ehele atimi; inta imtita atimi akaija; era ika atimi asega is idim aprofeta a Joanes. 27Eris tas ara, um ika ehele Iesu, Ecra eti ato aijama. Is um ika ehele ra aien, Inki ti asuptecnaig ehelemia ainyak nohu nemda ineig ek ago nitai iji eigki vaig ainyak.
28Eka ikha aijaua?
Natimi is ethi, is ero inhalav atamaig o un; is apan aien ehele inmetto, um ika, Ak inhal unyak, apan aiek, um auritai inpeig anliin nekaro vaine unyak. 29Is tas aien, um ika, Ek esjum ainyak; ja is lep aktaktai aien, um apan. 30Is apan aien ehele inharei, um asaig intas iyehki. Is tas aien, um ika, Ekpu apan ainyak, ak etmak; ja is eti apan aien. 31Is imyiaiji intas o etman a di ira rau? Eris ika ehelen ara, Inmetto. Is ika ehele ra a Iesu, Et inivaijec ineig ek asaig ehelemia ainyak mika, Era uhup a ilpu atimi akwanaham im ilpu takata ago ingaijid um apan an nelcau o Atua, eka apitac aijaua. 32Is apan ehelemia a Joanes par esege imi caua nedo atoh, ja akis eti imyiaiji intas o un aijaua; ja eris imyiaiji intas o un a ilpu atimi akwanaham im ilpu takata ago ingaijid: akis almoi nedo ura aijaua, jam eti aktaktai, um imyiaiji intas o un.
33Akumu atahaijeg intas ecsipece et eche aijaua:
Natimi alupas is ethi, is ahoaig vaine anliin nekaro o un aien, um ago nirahed o un, um ucji nehpanitai par ahtaijiraig nohoai vaine iran, um acta neom par asjeucjinaig, is um atceijaig aien imi ilpu atimi ahapol, um atga o un, um apan an pece itac acen: 34is wat metto nohoan, is abrai ilpu aheca o un aien mika eri apan ehele ilpu atimi ahapol ara, um leucse nohoai vaine iran. 35Eris arop irai ilpu aheca o un a ilpu atimi ahapol, um aredei is ethi, um atgei is ethi, um asji is ethi irai hat. 36Is lep abraig pan ehele ra aien ilpu aheca is eche, is ahinag iran ji ehki: eris lep ago nedo iyehki ira ra ara. 37Is epitpitac aien irai inhalav atamaig o un, um abraig pan yin ehele ra, um ika, Erupu ago nedo eccen ara vai inhal unyak. 38Eris wat ecet inhal o un a ilpu atimi ahapol, eris tas jipe ehele ra ara, um ika, Natimi ineigki etpu isjipigmoig etman aien; ti atgei yin akaija, um atoraliak uman. 39Eris arop iran ara an nekaro, um ethaig pan itac yin, um atgei yin. 40Et wit ham a natimi alupas ohuun nekaro vaine, etpu ago inhe aien irai ilpu atimi ahapol? 41Eris um ika ehelen ara, Etpu idim auahas ilpu atimi auatatimi iji ehki aien, um atceijaig nekaro vaine o un imi ilpu atimi ahapol inyi achei, va erupu alupai yin nohoai itai an naopan noho o un ara. 42Is um ika ehele ra a Iesu, Akis esvi intas ineigki aijaua an nitasvitai, ka o’o, nikavaig, “Inhat ineig eris esjum vaig a ilpu atimi acta neom, et hat esjilid ineigki an nesvi va neom: is ago nitai ineigki a Ihova, et itai imyiali ineig an nuhup uja”? 43Va nedo ineigki ek asaig ehelemia ainyak mika, Uhpu atipagki nelcau o Atua ehelemia, um alupai nup urai taka pece ineig erupu ohoai itai iran ara. 44Aien inyi eropjai an hat iyehki aien, etpu auhoig yi oplecoplec yin aien: aien inyi etjojai inhat ineigki iran, etpu ehtoplecoplec yin inhat. 45Eris wat atahaijeg intas ecsipece iji eigki o un a ilpu atimi ahlap esjilid im ilpu Farisi, eris ato ara mika is tas vai ra aien. 46Eris merit ara narop iran vaig, jam imtita atimi is ahinag, eris ika ara, Et aprofeta aien.
தற்சமயம் தேர்ந்தெடுக்கப்பட்டது:
Madius 21: ATY1863
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
historic text maintained by the British and Foreign Bible Society
