Madius 17
17
1Is wat ti pan itac nadiat is siks is leh Pitrus, im Jakobus, im Joanes etoan, a Iesu, um echim imyiapan ehtaij ache an nedoon ijinies is ethi; 2is um eche nohun aien an nuhup o ehtaij: is ememina nesganimtan is idivaig nagesega, um ahi napelumai iran is idivaig inlah. 3Erus ehcohos pan ehele ra a Moses im Elaija, um tas ehelen. 4Is tas a Pitrus, um ika ehele Iesu, Ak Natimarid, et upene vai caija namenvaig igcaki: el et merit aiek, ektijmu ago neom inyi eseij igcaki aijumtaij; yi ethi imi euc, um ethi imi Moses, um ethi imi Elaija. 5Is wat tas aien, is taluopni pam ehtaij nepeig ememina: is ahes an nepeig nohran tah, um ika, Inhalav cop unyak ineigki, ek imyiacitak yin ainyak; ahtijmu atahaijeg yin aijautaij. 6Ehtijis wat atahaijeg ahtaij atimi atahaijeg yin erahki, ehtijis imtitaig alupas ahtaij um eropse. 7Is um apan a Iesu um atcei pan ehtaij, um ika, Atidai aijautaij, um jim imtitaig. 8Ehtijis wat atidaijai ahtaij, ehtijis eti ecet tah natimi ahtaij, Iesu ache. 9Eris ahes an nedoon iyehki ara um asuol, is acaiji ehtaij a Iesu um ika, Jim asuptecnaig ehelen tah nitai ineig ehtaij mun almoi aijautaij an naopan ineig, um uhum pan naopan iyehki inyi nusjai a Inhal o natimi vai inmas o un, ja par asuptecnaig. 10Ehtijis ahodai yin ahtaij atimi atahaijeg yin erahki, um ika, Era auri a ilpu atimi esege par ika, inyi uhup a Elaija um ham? 11Is tas a Iesu, um ika ehele ehtaij, Inyi idim uhup a Elaija um ham, um lep ehteduo niji itai asega: 12ja ek asaig ehelemitaij ainyak mika, is idim ham a Elaija, eris eti ato yin ara, eris ago iran ara niji itai asega eris merit ara: etpu idim ucco etpu ohocred a Inhal o natimi vai ra. 13Ehtijis ato ahtaij atimi atahaijeg yin erahki, nikavaig, is tas ehele ehtaij aien vai Joanes Natimi baptiso.
14Eris wat apan ara ehele atimi is ahinag, is apan ehelen natimi is ethi, um atpuse an nuhup o un, um ika, 15Ak Natimarid, aiheuc vai inhalav atamaig unyak aiek; et ahnag aien, um ohocred alupas: et ehcahinag etjojai aien an cop, um ehcahinag etjose an wai: 16ek mun imyiapan yin ainyak ehele ilpu atimi atahaijeg euc, ja era auatialidi ara nago cehcehe yin vaig. 17Is tas a Iesu, um ika, Ak ilpu atimi imyiisjis nahcil im ilpu atimi auatatimi, kis amen ehelemia ainyak is itu irak, um eropse inliinmopok ainyak vai caua um itu irak: imyiapam yin igcaki ehelek aijaua. 18Is acaiji nagelo has a Iesu, is um atceijai yin aien: is um cehcehe inhalav an nuarin-nadiat iyehki. 19Eris apan ehele Iesu a ilpu atimi atahaijeg yin an echim amen o un, um ika, Ecra auatialidi aijama nahlo yin vaig vanhe? 20Is um ika ehele ra a Iesu, Va nimyiisjis nahcil unyimia: et inivaijec ineig ek asaig ehelemia ainyak mika, El et eteuc nimyiisjis ninivaijec unyimia et idivaig nupsi mustart, aku wit tas ehele nedoon ineig aijaua, mika yi atga um apan an tah anuarin; el et par apan; el et ti ehka vai caua tah nitai: 21ja er ahlo ilpu agelo has idivaig ineig va nalaigaheni ache im natwakam.
22ERIS wat amen Calili ara, is um ika ehele ra a Iesu, Uhpu ati Inhal o natimi irai ikma atimi: 23erupu atgei yin ara, ja et wit ti pan itac nadiat inyi eseij etpu lep nusjai aien. Is ohocred alupas inliinmopura ara.
24ERIS wat apan Kaperneum ara, eris apan ehele Pitrus a ilpu atimi asjapicnaig mune, um ika, Et ahtai mune a natimi esege unyimia, ka o’o? 25Is ika aien, Maiya. Is wat apan aien anliin neom, is upyi tas a Iesu, um ika, Nai ikha aiek, ak Saimona? era leucse mune ka akwanaham ehele di a ilpu atimarid an nobohtan? ehele ilpu dualep ura, ka ehele nup urai taka pece? 26Is um ika ehelen a Pitrus, Ehele nup urai taka pece. Is ika ehelen a Iesu, Era eti ahtah a ilpu dualep ura: 27jai vai tu jim auahas inliinmopura akaijau, apok aiek an jop, um atise incaueij, um leh numu ineig inyi upyi hup um apam; na wit asalgei nipjineucsen aiek, napu ecetai aiek nuari-mune yi ethi: anum leh aiek, um alupai ra vai caijau.
தற்சமயம் தேர்ந்தெடுக்கப்பட்டது:
Madius 17: ATY1863
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
historic text maintained by the British and Foreign Bible Society
