Madius 11
11
1Is tas ehni a Iesu ehele ilpu atimi atahaijeg yin is twelv, ja par ahes eahki, um atga o un, um apan par esege imi atimi, um asuptecnaig intas irai iji uari-pece ura.
2Is wat atahaijeg a Joanes anliin neom ipjin va nauritai o Kristo, is abrai ohwat atimi atahaijeg yin is ero aien, 3um ika ehelen, Na atimi iyehki aiek, eris ika, Etpu ham aien, ka intupu aitgai yin akaija? 4Is tas a Iesu, um ika ehele rau, Apan aijaurau um asuptecnaig ehele Joanes nitai iji eigki erau atahaijeg aijaurau um almoi: 5Et lah nesganimtai ilpu atimi aupat nesganimtara, um atga a ilpu atimi asvahteuc neduora, um adicinadicin a ilpu atimi aleprose, um ahgei itai a ilpu atimi ucjapines intikgara, um anusjai a ilpu atimi emesmas, eh lep asuptecnaig intas-upene ehele ilpu ihki atimi. 6Et mun ahesmoij natimi ineig, et eti imyiehcamai nyak aien.
7Erus wat atga urau arau is tas a Iesu ehele atimi is ahinag vai Joanes, um ika, Akis apan aijaua an namasacen par almoi inhe? nieg is amaamai iran nimtinjop, ka o’o? 8akis idim apan aijaua par almoi inhe? natimi is aso yin an napelumai yilyil, ka o’o? ara era aso ra irai apelumai yilyil ara era amen ara irai eom o ilpu atimarid: 9akis idim apan aijaua par almoi inhe? naprofeta is ethi, ka o’o? Maiya, ek asaig ehelemia ainyak mika, et esjilid aien irai ilpu profeta: 10aien aigki, eris aged intas vai yin, um ika, “Ek idim abrai naheca unyak ainyak mika yi uhup iram, etpu ahped nefalaig imi euc aien, um uhup iram.” 11Et inivaijec ineig ek asaig ehelemia ainyak mika, Is eti eteuc tah ira atimi iji eigki eris apos ra a risira nesjilidvaig irai Joanes Natimi baptiso: ja et esjilid iran aien et upoupo aien an nelcau an nohatag. 12Eris miakaikai emda nelcau an nohatag an naopan iyehki is ehcohos pam a Joanes Natimi baptiso, um imyihum pam naopan ineig, era miakaikai a ilpu atimi emda. 13Is amen intas alep is aged a Moses im ilpu profeta asega, um esege um yetpan irai Joanes. 14El eka merit aijaua natovaig, Elaija mun eigki, eris ika, Etpu ham aien. 15Aien et eteuc intikgan aien par ahgei itai, etmu atahaijeg aien.
16Inki ika ainyak, era idivanhe natimi an naopan ineig? era idivaig ilpu halav ara, era ateuc ara irai tiptag, um ahlaig vai ilpu etoara, 17um ika, Ecra mun ahlai nau vai caua aijama, ja eka eti adikjai aijaua; ecra mun ehteigtaig imi caua aijama, ja eka eti taig aijaua. 18Is wat ham a Joanes, is eti hag aien um eti umwig, ja eris ika ara, Et amen iran a nagelo has. 19Is wat ham a Inhal o natimi, is hag aien um umwig, ja eris ika ara, Almoi natimi ineigki et hag alupas aien, um umni waina, et etoai ilpu atimi akwanaham aien im ilpu atimi auatatimi. Ja era ika a ilpu atimi arapakau, Et idim upene narapakau.
20Is ated nup urai uari-pece iji ehki aien is ago niji auritai esjilid o un is ahinag iran aien, va nedo ura, nikavaig, eris eti adumoij anliinmopura ara: 21A’a, auwe vai caua, ak nupu Koresin! a’a, auwe vai caua, ak nupu Bedseta! el eris ago nauritai esjilid iji eigki an nuhup u nupu Tairus im nupu Saiton eris mun ago an nuhup unyimia, el eris adumoij anliinmopura ara itu acen, um aso ra irai apelumai ucai, um ereuc an nohpa. 22Ek asaig ehelemia ainyak mika, Inyi idim tintin nohocred o nupu Tairus im nupu Saiton an nadiat almoijidjid, ja etpu idim esjilid nohocred unyimia. 23Ak nupu Kaperneum, eris atijai caua an nohatag, ja uhpu ethainse caua sepagko an naupat: el eris ago nauritai esjilid iji eigki an pece Sotom eris mun ago iramia, el et eteuc an naopan ineig. 24Ek asaig ehelemia ainyak mika, Inyi idim tintin nohocred o nupu Sotom an nadiat almoijidjid, ja etpu idim esjilid nohocred unyimia.
25An naopan iyehki is tas a Iesu, um ika, Ek naaurineig ainyak vai euc, ak Etmak, Natimarid an nohatag im nobohtan, va nitai ineigki, nikavaig, na adenaig nitai iji eigki aiek vai ilpu atimi arapakau, im ilpu atimi esjilid an nato itai, jam asuptecnaig ehele ilpu halav: 26maiya, ak Etmak: is idim ucco inliinmopom aiek. 27Is ati niji itai asega imi nyak a Etmak: et eti ato Inhal o Atua tah, Etmak ache; um eti ato Etmak tah, Inhal o Atua ache, im lep ra et merit a Inhal o Atua naniv yin vaig ehele ra.
28Akumu ahtag pam ehelek aijaua asega, eka auritai aijaua, et lep opouc nitai ahelwei unyimia, ekpu alupai caua nitai atumop iran ainyak. 29Akumu leh nitai ahelwei unyak aijaua, um idivai nyak; et eropse inliinmopok ainyak um upoupo: akupu leh nitai atumop iran imi nesgamia aijaua. 30Et tup upene nitai ahelwei unyak, um aiheucaiheuc nitai apos unyak.
தற்சமயம் தேர்ந்தெடுக்கப்பட்டது:
Madius 11: ATY1863
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
historic text maintained by the British and Foreign Bible Society
