IOANE 2
2
Ko te Fakaipoipoga i Kana
1I te tolu o aso mai tua ifo, e isi se fakaipoipoga ne fai i Kana i Kalilaia, kae ne i kona foki te matua o Iesu. 2Ne ami foki Iesu mo ona soko ki te fakaipoipoga. 3I te palelega o te uaina, ne fai mai te matua o Iesu ki a ia, “Ko palele te lotou uaina.” 4Ne tali atu a Iesu ki a ia, “Toku matua, se a tau mea tena e taumafai o fai mai ki a au? E seki oko ki toku taimi.” 5Muna a tona matua ki tavini, “Fai a mea katoa kola e fakatonu ne ia ki a koutou.”
6E ono fagu kele utu vai 'lasi ne tuku i kona mo te lotu o te Faka'maga i te faka-Iutaia, kati e tusa mo te lua sefulu ki te tolu sefulu kalone i te fagu kele e tasi. 7Ne fai atu a Iesu ki tavini, “Utu ke 'fonu a fagu kele kona ki vai.” Ne utu eiloa ne latou ke oko ki te gataga. 8Ne toe fai atu a Iesu ki a latou, “Asu ake ne mo vai kae avatu ki te pule o te 'kaiga.” Tela, ave ei ne latou. 9I te tamiga a te pule o te 'kaiga, ko liu uaina te vai, kae se iloa ne ia me ne aumai i fea, ka ko tavini kola ne aumai ne latou e iloa ne latou, kae ne kalaga atu te pule o te 'kaiga ki te tagata fatoa fakaipoipo, 10kae fai atu ki a ia, “A tino katoa e muamua eiloa o tufa te uaina 'lei, kae kafai ko inu malosi a tino ki ei, ko tufa mai ei te uaina masei; kae ne tausi ne koe te uaina 'lei ki te taimi tenei.”
11Ne fai ne Iesu a te fakailoga muamua tenei i Kana i Kalilaia, e fakaasi atu ei tona 'malu; talitonu ei foki ona soko ki a ia.
12 #
Mata 4.13
Fakamuli ifo ne olo atu a Iesu mo tona matua, ona taina, mo ona soko ki Kapanaumi, kae ne nofo malie i kona i ne mo aso.
Ko Fano a Iesu ki te Fale Tapu
(Mata 21.12-13; Male 11.15-17; Luka 19.45-46)
13 #
Eso 12.1-27
I te piliga ki aso o te 'Kaiga o te Paseka a Iutaia, fano ei a Iesu ki Ielusalema. 14Ne maua atu ne ia i loto i te Fale Tapu a tino e 'togi pulumakau, mamoe mo lupe, mo tino ei kola e faka'liu tupe e 'nofo mai i olotou laulau. 15Ne fai tena kini ki uka tua'liki, kae 'tuli ne ia keatea latou katoa mai te Fale Tapu, fakatasi mo mamoe mo pulumakau; kae 'ligi ne ia a tupe a tino faka'liu tupe; kae 'tule atu olotou laulau. 16Ne fakatonu atu ne ia tino fakatau lupe penei, “Ave keatea a mea konei; sa fai ne koutou a te fale o toku Tamana mo fale e fakatau ei koloa.” 17#Sala 69.9 Manatua ei ne ona soko te muna ne tusi i te Tusi, “A toku manako malosi ki tou fale e te Atua, ko oko eiloa.”
18Muna a tino Iutaia ki a ia, “Se a te fakailoga ka fakaasi mai ei ne koe ki a matou, ne ala ei o fai ne koe a te mea tenei?” 19#Mata 26.61; 27.40; Male 14.58; 15.29 Ne tali atu a Iesu ki a latou, “Ofa te Fale Tapu tenei, ke toe fakatu ne au i aso e tolu.” 20Muna a tino Iutaia, “E tusa mo te fa sefulu ono tausaga ne fai ei te Fale Tapu tenei, kae ka toe fakatu ake ne koe i aso e tolu?”
21Ne faipati a ia ki te fale tapu tela ko tona foitino. 22Kafai e toetu mai a ia mai te mate, ka manatua ei ne ona soko tena muna ne fai ki a latou; ka talitonu ei foki latou ki muna o te Tusi, mo te muna a Iesu ne fai atu ki a latou.
E Iloa ne Iesu a Tino Katoa
23I tena nofoga i Ielusalema i aso o te Paseka, e tokouke ne talitonu ki tena igoa, i te laveaga ne latou fakailoga ne fai ne ia; 24ka ko Iesu ne seki talitonu ki a latou, i te mea e iloa 'lei katoa ne ia tino. 25Ona ko te mea e iloa 'lei katoa ne ia loto o tino, e se manako ei a ia ki se tino ke fai sena molimau i uiga o te sua tino.
தற்சமயம் தேர்ந்தெடுக்கப்பட்டது:
IOANE 2: Tusi Tapu
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Tuvalu Revised Bible © Bible Society in the South Pacific
