- उत्पत्ति 12
12
यहोवा परमेसुर की कोद से अब्राम हों बुलाओ जाबो
1यहोवा परमेसुर ने अब्राम सें कई, “अपनो देस, अपने कुटुम्बियों और अपने बाप के घर हों छोड़कें ऊ देस में चलो जा, जो मैं तोहों दिखाहों। 2मैं तोए सें एक बड़ी जाति बनाहों, तोहों आसीस दैहों, तोरो नाओं महान करहों और तें आसीस कौ मूल हुईये। 3जो तोहों आसीरवाद दें उनहों मैं आसीस दैहों; और जो तोहों कोसे, ऊहों मैं स्राप दैहों; और पृथ्वी पै रहबेवारी सबरी जाति तोरे सें आसीस पाहें।”
4यहोवा परमेसुर के ई बचन के अनसार अब्राम चलो, और लूत भी ऊके संगै चलो; हारान नगर सें कड़त बेरा अब्राम पचहत्तर साल कौ हतो। 5ई तरहां अब्राम अपनी घरवारी सारै, अपने भतीजे लूत हों और जो धन उनोंरन ने इकट्ठो करो हतो, और जो मान्सन उनोंरन ने हारान में पाए हते, सब हों लैकें कनान देस में जाबे हों कड़ो; और बे कनान देस में आ गए। 6ऊ देस के मजारें जात भए अब्राम शकेम में, जितै मोरे नाओं जागां में तारपीन कौ पेड़ आय, पोंचो। ऊ बेरा ऊ देस में कनानी जनें रैत हते। 7तब यहोवा परमेसुर ने अब्राम हों दरसन दैकें कई, “जौ देस मैं तोरे बंस हों दैहों।” और ऊने ऊतै यहोवा परमेसुर के लाने, जीने ऊहों दरसन दओ हतो, एक बेदी बनाई। 8फिन उतै सें आगूं बढ़कें ऊ बेतेल के पूरब कुदाऊं पहड़वावारी जागां में आओ, और अपनो तम्बू ऊ जागां में ठांड़ो करो जीके पच्छिम की कोद तौ बेतेल और पूरब की कोद ऐ नगर आय। उतै भी ऊने यहोवा परमेसुर के लाने एक बेदी बनाई और यहोवा परमेसुर सें बिन्तवाई करी। 9अब्राम आगूं बढ़कें दक्खिन देस की कोद कड़ गओ।
मिस्र देस में अब्राम
10ऊ देस में अकाल पड़ो: ई लाने अब्राम मिस्र देस हों चलो गओ कि ऊ उतै परदेसी होकें रए, कायसे देस में भयंकर अकाल पड़ो हतो। 11फिन एैसो भओ कि मिस्र के लिगां आकें; ऊने अपनी घरवारी सारै सें कई, “सुन, मोए पता आय कि तें एक सुन्दर बईयर आय; 12और जब मिस्री तोहों देखहें तब कैहें, ‘जा ऊकी घरवारी आय,’ ई लाने बे मोए हों तौ मार डालहें, परन्त तोए हों जीयत रख लैहें। 13सो जौ कईयो, ‘मैं ऊकी बहन आंव,’ जीसें तोरे कारन मोरो भलो होए, और मोरे प्रान तोरे कारन सें बचें।” 14फिन एैसो भओ कि जब अब्राम मिस्र में आओ, तब मिस्रियों ने ऊकी घरवारी हों हेरो कि जा बेजा सुन्दर आय। 15राजा फिरौन के हाकमों ने ऊहों हेरकें फिरौन सें ऊकी तारीफ करी; ई लाने बा बईयर फिरौन के घर में पोंचाई गई। 16ईलाने फिरौन ने ऊके कारन अब्राम कौ भला करो; और ऊहों गाड़र-छिरियां, गईया-बैला, दास-दासियां, गदहा-गदईयां और ऊंट मिले।
17परन्त यहोवा परमेसुर ने फिरौन और ऊके घराने पै, अब्राम की घरवारी सारै के कारन बड़ी-बड़ी बिपदा डालीं। 18तब फिरौन ने अब्राम हों टेरकें कई, “तेंने मोरे संगै जौ का करो? तेंने मोहों काए नईं बताओ कि बा तोरी घरवारी आय? 19तेंने काए कई कि बा तोरी बहन आय? मैंने ऊहों अपनी घरवारी बनाबे के लाने लओ; परन्त अब अपनी घरवारी हों लैकें इतै सें चलो जा।” 20फिरौन ने अपने जनों हों ऊके बारे में हुकम दओ और उनोंरन ने ऊहों और ऊकी घरवारी हों, सबरी संपत्ति समेंत जो ऊकी हती, बिदा कर दओ।
தற்சமயம் தேர்ந்தெடுக்கப்பட்டது:
- उत्पत्ति 12: BHB
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators