Yohane 9
9
Yesu wakuchizga munthu uyo wakababika wa chiburumutira
1Apo Yesu wakadumulanga, wakawona munthu uyo wakababika wachiburumutira. 2Ŵasambiri ŵakhe ŵakamufumba ŵakati, “Musambizgi, kasi wakananga ndi njani, munthu uyu, panji ŵapapi ŵakhe kuti wababike wachiburumutira?”
3Yesu wakaŵazgora wakati, “Kuti wakananga ndi munthu uyu chara, panji ŵapapi ŵakhe, kweni kuti Chiuta warongore milimo yakhe mwa iyo. 4Nkhwenera kuchita milimo ya uyo wakandituma apo kuchali muhanya. Usiku ukwiza apo munthu kuti wakumanya kuteŵeta mlimo chara. 5Apo ndichali mu charu, ndine ungweru wa charu.”#Mat 5.14; Yoh 8.12
6Wakati wayowoya ichi, Yesu wakafunyira mata pasi pa dongo na kukonkha thope na mata. Wakaphaka thope mu maso gha munthu yura. 7Wakamuphalira kuti, “Ruta ukageze mu chiziŵa cha Silowamu.” Zina ili likung'anamula kuti kutumika. Ntheura munthu yura wakaruta wakaya kageza ndipo wakawerako wakuwona.
8Sono ŵazengezgani ŵakhe na ŵanthu awo ŵakamuwonanga kale kuti ngwa kupemphapempha, ŵakati, “Asi uyu ndi munthu yura wakakharanga pasi na kupemphapempha?”
9Ŵanji ŵakati, “Ndi mweneyuyu.” Ŵanji ŵakati, “Chara, kweni wakukozgana waka nayo.”
Kweni mwenecho wakati, “Ndine nadi.”
10Ŵakati kwa iyo, “Kasi maso ghako ghakajurika uli?”
11Wakaŵazgora wakati, “Munthu uyo ŵakuti Yesu wangukonkha thope na kuphaka mu maso ghane ndipo wanguti kwa ine, ‘Ruta ku Silowamu ndipo ukageze,’ ndipo ndanguruta. Ndipo ndati ndageza, nkhasanga kuti ndawona.”
12Ŵakati kwa iyo, “Kasi wali nkhu?”
Iyo wakati, “Nkhumanya chara.”
ŴaFarisi ŵakupenjerezga umo wachizgikira
13Ŵakiza nayo ku ŵaFarisi munthu uyo wakaŵa wachiburumutira. 14Pakaŵa pa zuŵa la Sabata apo Yesu wakakonkhera thope pakumujula maso. 15Ntheura ŵaFarisi ŵakamufumbaso munthu yura na umo wakajurikira maso ghakhe. Iyo wakati kwa iwo, “Wanguphaka thope ku maso ghane, ndipo ndanguya kageza, ndipo nkhuwona.”
16ŴaFarisi ŵanji ŵakati, “Munthu uyu wakuchita ichi kuti ngwa kufumira kwa Chiuta chara. Pakuti wakusunga zuŵa la Sabata chara.”
Kweni ŵanji ŵakati, “Kasi munthu wakwananga wangachita uli vimanyikwiro nga ndi ivi? Ntheura pakaŵa kugaŵikana mukati mwawo.”
17Ntheura ŵaFarisi ŵakamufumbaso wachiburumutira ŵakati, “Iwe ukuti uli na za iyo, pakuti wajula maso ghako?”
Wakaŵazgora wakati, “Iyo ndi nchimi.”
18Kweni ŵaYuda ŵakapulikana chara kuti munthu yura wakaŵapo wachiburumutira ndipo sono wakuwona, mpaka ŵakachema ŵapapi ŵakhe. 19Ŵakaŵafumba ŵakati, “Kasi uyu ndi mwana winu? Kasi ndiyo mukuti wakababika wachiburumutira? Chifukwa uli sono wakulaŵiska?”
20Ŵapapi ŵakhe ŵakaŵazgora ŵakati, “Tikumanya kuti uyu ndi mwana withu na kuti wakababika wachiburumutira. 21Kweni kuti tikumanya chara umo wakulaŵiskira sono, nanga nkhumanya munthu uyo wangumujula maso ghakhe. Mufumbani, ndi munthu murara, wati wajizgorere yekha.” 22Ŵapapi ŵakhe ŵakayowoya ntheura, chifukwa ŵakopanga ŵaYuda pakuti ŵakapangana kale kuti, usange munthu wazomerezgenge kuti Yesu ndi Mesiya, ŵakenera kumusezga mu nyumba ya kusoperamo. 23Ndicho chifukwa ŵapapi ŵakhe ŵakati “Ndi murara, mufumbani mwenecho.”
24Ntheura ŵakamuchema kachiŵiri munthu uyo wakaŵapo wachiburumutira, ŵakati, “Urape panthazi pa Chiuta kuti uyowoyenge unenesko. Ise tikumanya kuti munthu uyu ngwakwananga.”
25Iyo wakaŵazgora wakati, “Kwali ngwakwananga, nkhumanya chara. Kweni chinthu chimoza pera icho nkhumanya nchakuti, nangauli nkhaŵa wachiburumutira, sono nkhuwona.”
26“Wanguchitachi kwa iwe? Wangukujula uli maso ghako?”
27Iyo wakaŵazgora wakati, “Ndangumuphalirani kale ndipo kuti mwangupulika chara. Chifukwa uli mukukhumba kupulikaso? Kasi namwe mukukhumba kuŵa ŵasambiri ŵakhe?”
28Penepapo ŵakamutuka ŵakati, “Iwe ndiwe musambiri wakhe, kweni ise tili ŵasambiri ŵa Mozesi. 29Ise tikumanya kuti Chiuta wali kuyowoyera mwa Mozesi, kweni munthu uyu kuti tikumanya chara uko wakafuma.”
30Munthu yura pakuŵazgora wakati kwa iwo, “Chifukwa, ichi nchakuzizwiska, kuti imwe mukumanya chara uko wali kufuma, kweni iyo wandijula maso! 31Tikumanya kuti Chiuta wakupulika ku ŵakwananga chara, kweni wakupulika kwa uyo wakusopa Chiuta na kuchita khumbo lakhe. 32Umo charu chikayambira chindapulikwikepo chara kuti munthu yunji wajula maso gha uyo wakababika wachiburumutira. 33Munthu uyu warekenge kufuma kwa Chiuta mphanyi wachitapo kanthu chara.”
34Pakumuzgora ŵakati kwa iyo, “Iwe ukababika na kukulira mu zakwananga. Kasi ndiwe ungatisambizga ise!” Ndipo wakamuchimbizgira kuwaro.
Uchiburumutira wa mu mzimu
35 Yesu wakapulika kuti ŵaYuda ŵamuchimbizgira kuwaro ndipo wakati wamusanga, wakati kwa iyo, “Kasi ukupulikana mwa Mwana wa Munthu?”
36Iyo wakazgora wakati, “Fumu, kasi ndi njani, kuti ine ndipulikane mwa iyo?”
37Yesu wakazgora wakati, “Wamuwona ndipo ndi mweneuyo wakuyowoya nawe.”
38Iyo wakati, “Fumu, nkhupulikana,” ndipo wakamulambira Yesu.
39Yesu wakati, “Nkhiza muno mu charu kwiza keruzga, mwakuti awo ŵakureka kulaŵiska ŵalaŵiske, ndipo awo ŵakulaŵiska ŵazgoke kuŵa ŵachiburumutira.”
40ŴaFarisi ŵanji awo ŵakaŵa pafupi nayo ŵakapulika ichi ndipo ŵakati kwa iyo, “Kasi ise nase tili ŵachiburumutira?”
41Yesu wakati kwa iwo, “Muŵenge ŵachiburumutira mphanyi mulije njuŵi ya kwananga. Kweni sono chifukwa mukuyowoya kuti mukuwona, ipo njuŵi yinu ya kwananga yichali kumudemererani.”
தற்சமயம் தேர்ந்தெடுக்கப்பட்டது:
Yohane 9: Tumbuka
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Bible Society of Malawi
