Yohane 11
11
Nyifwa ya Lazaro
1Ndipo pakaŵa munthu yunji zina lakhe Lazaro uyo wakarwaranga. Iyo wakaŵa wa mu chikaya cha Betaniya kwawo kwa Mariya na mukuru wakhe Marita.#Luk 10.38-39 2Mariya uyu ndi mweneuyo wakaphakazga Fumu Yesu na mafuta ghakununkhira ndiposo na kufyura malundi ghakhe na sisi lakhe. Mudumbu wakhe Lazaro ndiyo wakaŵa murwari.#Yoh 12.3 3Ntheura ŵadumbu ŵakhe ŵakamutumira uthenga Yesu ŵakati, “Fumu, mubwezi winu uyo mukumutemwa ndi murwari.”
4Para Yesu wakapulika wakati, “Urwari uwu kuti wati wafwenge nawo chara, kweni vyachitika ntheura chifukwa cha uchindami wa Chiuta mwakuti Mwana wa Chiuta wachindikikiremo.”
5Yesu wakatemwa Marita, na munung'una wakhe Mariya, ndiposo na Lazaro. 6Ntheura wakati wapulika kuti Lazaro ndi murwari, wakatandarapo pa malo gheneghara mazuŵa ghaŵiri. 7Pamanyuma wakaphalira ŵasambiri ŵakhe wakati, “Tiyeni tiwerereso ku Yudeya.”
8Ŵasambiri ŵakhe ŵakati, “Musambizgi, mazuŵa ghachoko waka ghajumphapo apo ŵaYuda ŵakakhumbanga kumudinani na mawe, kasi sono mukukhumba kuwererakoso?”
9Yesu wakaŵazgora wakati, “Kasi ghalimo maora 12 mu zuŵa limoza chara? Usange munthu wakwenda na muhanya kuti wakukhuŵara chara, chifukwa wakuwona ungweru wa charu. 10Kweni para munthu wakwenda na usiku wakukhuŵara chifukwa ungweru mulije mwa iyo.”
11Yesu wakayowoya ntheura ndipo wakati kwa iwo, “Mubwezi withu Lazaro wagona tulo, kweni nkhuruta kuya kamuwuska.”
12Ŵasambiri ŵakati kwa iyo, “Fumu, usange wali mu tulo ipo wati wachirenge.”
13Sono Yesu wakayowoyanga na nyifwa yakhe. Kweni iwo ŵakaghanaghananga kuti wakuyowoya na kupumula mu tulo.
14Ntheura Yesu wakaŵaphalira pakweru wakati, “Lazaro wafwa. 15Kweni chifukwa cha imwe, ndakondwa pakuti nkhaŵako kura chara mwakuti mupulikane. Tiyeni tirutenge kwa iyo.”
16Tomasi, uyo wakuchemeka Wamaphaska,#11.16 Wamaphaska: Mu chiGriki ŵakuti, “Didimo”. wakaŵaphalira ŵasambiri ŵanyakhe wakati, “Tiyeni nase tirute kuti tikafwe nayo pamoza.”
Yesu ndi chiwuka na umoyo
17Ntheura para Yesu wakati wafika wakasanga kuti Lazaro wagonamo mu dindi mazuŵa ghanayi. 18Ndipo Betaniya wakaŵa pafupi na Yerusalemu, pakunji mtunda wa makilomita ghatatu. 19Ntheura ŵaYuda ŵanandi ŵakiza kwiza kakhuza Mariya na Marita pa nyifwa ya mudumbu wawo.
20Para Marita wakapulika kuti Yesu wakwiza, wakaruta kuya kamutemerera, kweni Mariya wakakhara pa nyumba. 21Marita wakati kwa Yesu, “Fumu, muŵenge pano mphanyi mudumbu wane wandafwe! 22Na sono wuwo nkhumanya kuti, chose icho muti murombe kwa Chiuta, wati wamupaninge.”
23Yesu wakati kwa iyo, “Mudumbu wako wati wawukengeso.”
24Marita wakazgora wakati, “Nkhumanya kuti wamkuwukaso pa chiwuka pa zuŵa la umaliro.”
25Yesu wakati kwa iyo, “Ine ndine chiwuka na umoyo. Yose uyo wakupulikana na ine, nanga wafwe, ndipouli waŵenge wamoyo. 26Ndipo yose uyo ngwamoyo ndipo wakupulikana na ine, kuti wati wafwenge chara. Kasi ukupulikana na ichi?”
27Marita wakati kwa iyo, “Inya Fumu. Nkhupulikana kuti ndimwe Mesiya, Mwana wa Chiuta, mweneuyo wakatenge wakwiza muno mu charu.”
Yesu wakulira
28Marita wakati wayowoya mazgu agha, wakawerera ku nyumba, ndipo wakamuchemera ku udesi munung'una wakhe Mariya wakati, “Musambizgi wiza, ndipo wakukuchema.” 29Mariya wakati wapulika ichi, wakawuka luŵiroluŵiro kuya kakumana na Yesu. 30Sono Yesu wakaŵa wandafike mu chikaya, wakaŵa wachali mu malo agho Marita wakakumana nayo. 31ŴaYuda awo ŵakaŵa mu nyumba kusanguruska Mariya, pakuwona Mariya wakufuma mu nyumba luŵiroluŵiro, nawo ŵakawuka na kumurondezga. ŴaYuda ŵakatenge wakuruta ku dindi kuya kalira kwenekura.
32Para Mariya wakafika apo Yesu wakaŵa na kumuwona, wakawa pasi pa malundi ghakhe, wakayowoya nayo wakati, “Fumu, muŵenge pano mphanyi mudumbu wane wandafwe.”
33Sono apo Yesu wakawona kuti Mariya wakulira ndiposo ŵaYuda awo ŵakiza nayo nawo ŵakulira, wakaŵa na chitima chikuru ndipo wakasuzgika mu mtima. 34Yesu wakaŵafumba wakati, “Mwamuŵika nkhu?”
Ŵakati kwa iyo, “Fumu, zaninge muwone.”
35Yesu wakalira. 36Ntheura ŵaYuda ŵakati, “Wonani umo wakamutemwera!”
37Kweni ŵanji ŵa iwo ŵakati, “Kasi wakatondeka uli munthu uyo wakajula maso gha wachiburumutira yura, kukanizga nyifwa ya munthu uyu?”
Yesu wakuwuska Lazaro ku ŵakufwa
38 Yesu wakakweŵekaso mu mtima ndipo wakiza ku dindi leneilo likaŵa mphanji iyo ŵakabenekererapo libwe. 39Yesu wakati, “Wuskanipo libwe.”
Marita mudumbu wa uyo wakafwa wakati kwa iyo, “Fumu, pa nyengo iyi wakwenera kununkha chomene, chifukwa wagonamo mazuŵa ghanayi mu dindi.”
40Yesu wakati kwa iyo, “Asi ndangukuphalira kuti, usange ukupulikana uti uwonenge uchindami wa Chiuta?”
41Ntheura ŵakawuskapo libwe. Yesu wakinuska maso ghakhe kuchanya ndipo wakati, “Ŵadada, nkhumuwongani pakuti mwandipulika. 42Nkhumanya kuti nyengo yose mukundipulika, kweni sono nkhuyowoyera chifukwa cha ŵanthu aŵa ŵali pano, mwakuti ŵapulikane kuti ndimwe mukandituma.” 43Wakati wayowoya mazgu agha wakachemerezga wakati, “Lazaro, fuma!” 44Ndipo munthu wakufwa yura wakafuma wakukakika na sanda mu malundi na mu mawoko, ndipo chisko chakhe nacho chikavungirizgika na salu. Yesu wakati kwa iwo, “Musutulani mumureke warutenge.”
ŴaYuda ŵakupangana kukoma Yesu
(Mat 26.1-5; Mrk 14.1-2; Luk 22.1-2)
45Ntheura ŵanandi ŵaYuda awo ŵakiza na Mariya ŵakati ŵawona icho Yesu wakachita, ŵakapulikana mwa iyo. 46Kweni ŵanji ŵakaruta ku ŵaFarisi ŵakaya kaŵaphalira vyose ivyo Yesu wakachita. 47Ntheura ŵasofi ŵarara pamoza na ŴaFarisi ŵakachema mphara na kufumbana kuti, “Kasi tichitechi? Pakuti munthu uyu wakuchita vimanyikwiro vinandi. 48Usange tamureka kuti warutilirenge ntheura, ŵanthu wose ŵati ŵapulikanenge nayo, ndipo ŵaRoma ŵati ŵizenge ndipo ŵazamkupoka malo ghithu ghakupatulika na fuko lithu.”
49Kweni yumoza wa iwo, Kayafa, mweneuyo wakaŵa Musofi Mukuru chirimika chenechira, wakati kwa iwo, “Imwe kuti mukumanya kanthu chara! 50Mukumanya kuti nchakwenerera kuti munthu yumoza waŵafwire ŵanthu mu malo ghakuti fuko lose limare?” 51Kuti wakayowoya mazgu agha pa iyo yekha chara, kweni pakuŵa Musofi Mukuru chirimika chira, wakachima kuti Yesu wakwenera kufwira fuko. 52Ndipo fuko pera chara, kweniso kuti wawunjike pamoza ŵana ŵa Chiuta awo ŵali kumbinikira kosekose.
53Ntheura kufumira pa zuŵa lira ŵarara ŵa ŵaYuda ŵakapangana na umo ŵangakomera Yesu. 54Ntheura Yesu kuti wakendangaso pakweru mu ŵaYuda chara. Kweni wakafumako na kuruta ku malo agho ghali pafupi na mapopa, wakiza ku muzi uwu ukuchemeka Efurayimu, ndipo kwenekura ndiko wakakharanga pamoza na ŵasambiri ŵakhe.
55Sono chiphikiro cha Paska cha ŵaYuda chikaneng'enera. Ndipo ŵanthu ŵanandi ŵakakwerera ku Yerusalemu kufuma ku charu chose kuti ŵakafiske maluso ghawo ghakujitozga pambere chiphikiro chindayambe. 56Ŵakapenjanga Yesu, ndipo apo ŵakimilira mu Nyumba ya Chiuta ŵakafumbananga kuti, “Kasi mukughanaghanachi? Kasi wati wize ku chiphikiro?” 57Ŵasofi ŵarara na ŴaFarisi ŵakalangula ŵanthu kuti yose uyo wangamanya uko Yesu wali wakwenera kwiza kaŵamanyiska mwakuti ŵamukore.
தற்சமயம் தேர்ந்தெடுக்கப்பட்டது:
Yohane 11: Tumbuka
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Bible Society of Malawi
