BOTHUBO 11
11
Babel Ghukhea
1Atughuloye ayeghiqhalo atsa lakhie eno aphiphi shi kuptsalu cheke. 2Ike panonguno kipela kudauno iqesusu chekelo Shinar ghakhulo phijoleyi keua lakhilo ighilu, panonguye tilehi kughuna ache. 3Panongu lakhino lakhi vilo ishipi, “Ighilo, ningu itatu mlape ami lono ghuni nolo.” Ikehu panonguno atu zuqhu itatu mla eno alkatra tano meda kepushi mlae. 4Tileno panonguno pi, “Ighilo, ningu sala aphughi lakhi shi puzu tile aghukheano atsutsu toni keshi shini nolo. Eno ningu je haumo kepu shinie, ti kumoaye ayeghiqha kumtsu kathasusu ningu apanaghave nosake.”
5Ikelo timi tipaqono mlakeu phughi ngo aghukhea ishi junike AMPEU no iqie. 6Tile AMPEU no pi, “Julepi, timi hipaqo lakhi kehu eno atsa lakhi kehu panonguye hitoi shithuveni chenie. Hinguno hilauye panonguno kiu shiniepi kumsuluveni keno kiumu panongu launo suchile mlaveni chenie. Kiunomu panongu lakha luni chemoe. 7Ighilo, ningu aqhou iqino panongu tsa kubangu vetsuni nolo, tishianguno panongu lakhino lakhi tsapi ithi pemonie.” 8Ikehu AMPEU no tipa-a lono panongu hapesu ayeghiqha kumtsu apanagha puwuve eno panonguye aphughi hu shipisheve. 9Tighenguno tipau-a pesu Babel ipi cheni, kughengu Ampeu no tilehino timiqo tsa kubangu vetsuke, eno AMPEU no ayeghiqha kumtsu shou panongu apanagha hapupove.
Shem Lagha
10Hipaqono Shem ti kughukoqoe. Azuyimi ighikeu ampe kini thiu Shem no ampe 100 shiakelo panu Arpakshad lhoe. 11Arpakshad punu kethiu Shem ye ampe 500 xue eno atianuli kutau ghi lhoe. 12Arpakshad no ampe shighi pungu shi akelo Shela punue 13eno Shela punu kethiu Arpakshad ye ampe 403 xue eno atianuli kutau ghi lhoe. 14Shela no ampe shighi shi akelo Ibri lhoe, 15eno Ibri punu kethiu paye ampe 403 xue eno atianuli kutau ghi lhoe, 16Ibri no ampe shighi bidi shi akelo Peleg punu 17eno Peleg lho kethiu paye ampe 430 xue eno atianuli kutau ghi lhoe. 18Peleg no ampe shighi shi akelo Reu punu 19eno Reu punu kethiu paye ampe 209 xue eno atianuli kutau ghi lhoe. 20Reu no ampe shighi kini shi akelo Serug punu 21eno Serug punu kethiu paye ampe 207 xue eno atianuli kutau ghi lhoe. 22Serug no ampe shighi shi akelo Nahor punu 23eno Nahor punu kethiu paye ampe 200 xue eno atianuli kutau ghi lhoe. 24Nahor no ampe mukutoku shi akelo Tera punu 25eno Tera punukethiu paye ampe 119 xue eno atianuli kutau ghi lhoe. 26Tera no ampe lhotsuni shive kethiu Abram ngo Nahor ngo Haran ishi lhoe.
27Hipaqono Tera tikughukoqoe. Tera no Abram ngo Nahor ngo Haran ishi lhoe. Haran no Lot papu ke, 28ike Haran ye papuh Tera no xuaphi lono pano Khaldiami ghakhulo Ur phughi lono thive. 29Abram ngo Nahor pamaye anipu luve, Abram nipu jeno Sarai eno Nahor nipu jeno Milka, liye Haran no nga eno Haran ye Iska papu ke. 30Sarai ye anuha kehu atianuli kuhae.
31Ike Tera no panu Abram ngo pa ti-nu Lot, ti Haran no nu eno Abram nipu pamukishiu Sarai ishi sasu pa gholono Kanan ghakhulo wunike ghenguno Khaldiami yeghilo Ur phughi qhive. Panonguno Haran phu kutolo ighino tile kughunache. 32Tera ye ampe 205 xu puzu Haran lono thive.
தற்சமயம் தேர்ந்தெடுக்கப்பட்டது:
BOTHUBO 11: SUMIBSI
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.