Mateusi 7
7
“Peaiwererà rè ypy tapemã'ẽ ãmõ kõ aiwererà wyi”, e'i mã'ẽ
(Rukasi 6.37-38,41-42)
1E'i jẽ Jesu poromo'e:
– [Janejare'e rõmõ'ĩte ivo janereko omosã'ãga esa mã'ẽ. Ajawyi kee a'e pejẽ.] Koivo kõ reko tapemosã'ãga e'ã iko ipi nẽ. Ãmẽ tè peneko nomosã'ãga'ãi ãmõ kõ ipi. 2Ãwitõ ãmõ kõ pereko, ãwĩvo ve Janejare'e penerekotà kãramõ.#Mak. 4.24 3Manyvore põ peaiwererà rè jẽsi napejimo'eai peiko? Moma'e rã põ koivo kõ aiwererà règà pejimo'eai? Peaiwererà rè ypy kuwasi pejimo'eai itypypyi! Tea rè tè poromosã'ãgatà pemotekokuwa rõmõ. Manyvore põ koivo rea pè yvy oo remẽ, “Taekyi nerea pe wyi”, pejẽ? Ajamã'ẽ penea pupe yvy mitirõwã mã'ẽ oo remẽ, napejimo'eai. Penea rè ypy kuwasi pejimo'eai mijã. Manyvore põ a'evo peiko? 4-5Yvy oo janerea pupe remẽ, nijamã'ẽi ipi. Nojisai. Ajawyi aje si yvy oo koivo rea pè remẽ, “Eeru nerea taky'a'o. Yvy taekyi ene”, pejẽ kuwa põ koivo pè? Ãnĩ! Mokoi ivoa rã'ãga mãe kõ. Ajawyi penea rè ypy pejimo'eai. Aja paire tè koivo rea rè tapejimo'eai ipi. Ãmẽ tè peneapyo katutà iky'a'oa rè ãmẽ. Ãwĩvo ve peaiwererà peitypa remẽ tè kuwa koivo kõ aiwererà rè pemo'eai kuwa, e'i Jesu ijupe kõ.
“Epy wete mã'ẽ vo Janejare'e rupi tekoua”, e'i mã'ẽ
6E'i jẽ Jesu poromo'e:
– Janejare'e omojikuwaoka pejẽ mã'ẽ tapemome'u e'ã noenu tari mãe kõ pè, jawarà vo 'ejẽ ekoi kupa rewarà mõ. Ajawyi noenu tari Janejare'e ayvu kupa. Nojimotekokuwaoka'ãi ijupe. A'evo ve karakuri moeta jame'ẽ sõ tajausĩ pè remẽ, opãrõma kõrijõ tè kuwa i'aryvo, nokuwai epy wete mã'ẽ tè rewarà mõ. A'evo 'ejẽ noenu tari mãe kõ. Janejare'e rupi tekoua pè “epy wete mã'ẽ” ne'i kupa, e'i Jesu ijupe kõ.
“Janejare'e oja'a katu janere ipi”, e'i Jesu mã'ẽ
(Rukasi 11.9-13)
7E'i jẽ Jesu poromo'e:
– [Janejare'e oja'a katu janere ipi. Ajawyi moma'e rè peporijau remẽ, tapeporanu ijupe ãmẽ.] Peporanu ee maekwerà ome'ẽtà peupe ãmẽ. Moma'e mõ peeka eka sõ tite iwyi remẽ, penemiekakwerà wesaokatà peupe. Ãmõ, ãwitõ tetã rovapyka pemotãtã remẽ, ajaire ijarà oovapyjavotà pejẽ, ãwĩvotà penereko. 8Kee rewarà mõ. Ava mõ, “Ema'e rè eporijau mã'ẽ eme'ẽoka ije”, e'i sõ Janejare'e pè remẽ, aje ome'ẽtà aekwerà ijupe. Ãmẽ ava mõ, “Aeka tite sipõ ema'e rè eporijau mã'ẽ”, e'i sõ ijupe remẽ, aje wesaokatà ijupe. Ava mõ, “Papa, epãtavõ rejupa”, e'i remẽ, aje ywete Janejare'e opãtavõtà. Oja'a katu janere ipi, e'i.
9– Jane janeãkarãgwerà kõ rè jaja'a katu ipi. Tysi tõ Janejare'e oja'a katutà tè janere. Ma'e. Pena'yry mõ, “Papa, meju apota”, e'i sõ remẽ, takuru peme'ẽ kuwa põkõ ijupe to'u? Ãnĩ! Meju tè peme'ẽ kuwa ijupe. 10Ãwĩvo ve, “Papa, eamyay, pira ajuwei”, e'i sõ remẽ, moe peme'ẽ kuwa põkõ ijupe to'u? Ãnĩ! Pira tè peme'ẽ kuwa ijupe. 11Emã'ẽ pejẽ. Peja'a katu jẽ peãkarã kõ rè ipi, ãwisõ nivoi mãe kõ teipe pejẽ remẽ. Tysi tõ Papa yvapewarà. Moma'e ikatuay mã'ẽ tẽ tesõ ome'ẽtà joupe, japoranu ijupe remẽ. 12A'evo ve, ãwitõ pepota koivo kõ penereko katu ipi, ãwĩvo ve ikõ pereko katu kõ ipi nẽ. A'evo peiko remẽ, aje Janejare'e ayvu Tãmõ Moisesi pè okusiwaoka maekwerà rupi katu peikotà, e'i. Ãmõ, wayvu mojenuarà kõ pè okusiwaoka maekwerà rupi katu teve peikotà, e'i Jesu ijupe kõ.#Ruk. 6.31
Pee wasu vo sõ mã'ẽ rewarà
(Rukasi 13.24)
13-14E'i jẽ Jesu poromo'e:
– Janejare'e rape rupi tè tapeo. Janejare'e rape jinõga e'e tè nojisa ywe'ei mã'ẽ rupi oo. [Ajawyi kejõ kejõgà jane kõ oo upi. Ajamã'ẽ pee e'e tè a'e.] Ajawyi aty wasu kõ rupi tapeo tite e'ã, a'e pejẽ. Jimomorijau wasua rena kyty tè sikaepo oo ywe'e tite kupa. [“Ikatuay wete janerape”, e'i ywe'e tite kupa. “Ojisa katu janerape rã ky'y. Niwaype'ãi peo upi”, e'i tite kupa.] A'e kõ rupi ikõ tapeo e'ã ajamã'ẽ nẽ, e'i. Waypea mã'ẽ rupi kõrijõ tè ikõ tapeo nẽ, e'i. Ãmẽ sõsi Janejare'e rena pè pevãetà peiko karuaru, e'i Jesu ijupe kõ.
Janejare'e ayvu mojenuarà rã'ãga kõ rewarà
(Rukasi 6.43-45)
15E'i jẽ Jesu:
– Tapejireko katu ikõ Janejare'e ayvu rè poromo'e rã'ãga mãe kõ wyi nẽ, e'i. A'e kõ kee e'i: “Janejare'e ayvu mojenuarà tè ije”, e'i kupa. Ajamã'ẽ ojimowari tè aepo javo jane kõ pè kupa. Ipojy ai ywete mãe kõ tè ãwĩ kõ. Nopotari peo Janejare'e rena pè kupa. Ajawyi tapejireko katu iwyi kõ ikenẽ, a'e pejẽ. 16[Pemã'ẽ gatu a'evo ekoi kupa remẽ. Weko ai kõ rupi ojikuwa kupa.] Ãwitõ moma'eyva'y o'akwerà rupi tè ojikuwa, ãwĩvo. Ma'e. Moma'eyva e'eay jajuwei remẽ, i'y kyty tè jaatà ipo'o iwa. Ava noo'ãi joõ'y kyty tè moma'eyva e'eay po'o iwa. Ojikuwa teãmã ja'u e'ãte a'e. Yvyra'a'y rè tè i'akwerà mõ jaesa kuwa ipi. Ãwĩvo ve jane kõ ojikuwa, e'i.
17– Moma'eyva rè tè poromosã'ãgatà tapekuwa sa'u. Kee a'e. Moma'eyva'y ikatuay mã'ẽ i'a katu ipi. E'ẽ gatu ipi. Moma'eyva'y nikatui mã'ẽ ãmẽ ni'a katui ipi. Iro i'akwerà ipi.#Mat. 12.33-34 18Temitã ikatu remẽ, ni'ai nikatui mã'ẽ rõmõ ipi. Ãwĩvo ve moma'eyva'y nikatui remẽ, ni'ai ikatu mã'ẽ rõmõ ipi. Nikatui mã'ẽ rõmõ kõrijõ tè i'a. I'akwerà weru o'y ipi. 19Ajawyi jaeta kõrijõtà imomo tokaipa ipi. Moma'eyva'y ikatu mã'ẽ nijamopai ipi, i'a katuay ipi rewarà mõ, e'i.#Mat. 3.10; Ruk. 3.9 20Ãwitõ pekuwa moma'eyva nikatui mã'ẽ i'akwerà rupi, ãwĩvo ve Janejare'e ayvu mojenuarà rã'ãga kõ pekuwatà nivoi ekoi mã'ẽ rupi, iposikoa ai kõ rupi, e'i. Ajawyi tapejireko katu iwyi kõ, a'e pejẽ, e'i Jesu.#Mat. 12.33
“Akuwa eremĩgwai e'e kõ eremĩgwai rã'ãga kõ wyi”, e'i mã'ẽ
(Rukasi 13.25-27)
21E'i jẽ Jesu poromo'e:
– Ava mõ, “Erõvijã ywete Jesu”, e'i eupewarà mõ remẽ, Papa remimota rupi toiko ajawyi. A'evo mã'ẽ sõsi Papa omoẽokatà o'arà kyty. Ajamã'ẽ ava mõ Papa remimota rupi rõwã ekoi remẽ, Papa nomoẽoka'ãi o'arà kyty ipi. Ajawyi noo'ãi ipyri oiko karuaru, e'i. 22Poromoe'yia 'arà mẽ, ijatyraytà mirà kõ kee e'i tarepe ije: “Erõvijã, Janejare'e ayvu oromojenu jenu erokwa neayvu rupi maekwerà teve ore ipi!” e'i titetà. “Ãjãg kõ oromoẽ teve neayvu rupi jane kõ pupe wyi maekwerà teve ore ipi!” e'i tite tary ve ije. Ãmõ, “Mãrãnà jikuwa e'ã oroinõ jane kõ rovake neayvu rupi maekwerà teve ore ipi!” e'i titetà ije kupa. Ojimoe'e ipetà aepo javo kupa. 23Ãmẽ sõsi kee a'età a'e kõ pè: “Ije noporokuwai. Papa remimota rupi napeikoi maekwerà tè pejẽ”, a'età. “Nivoi mãe kõ tè pejẽ! Ajawyi pejisyry ewyi peo!” a'e kõrijõtà ijupe kõ ãmẽ, e'i.#Jĩg. 6.8
Tetã reinõa rè tè Jesu poromosã'ãga mã'ẽ rewarà
(Rukasi 6.46-49)
24E'i jẽ Jesu poromo'e:
– [Ajawyi kee a'e pejẽ. Peenu katu eayvu erovija ajawyi.] Ava mõ eayvu wenu katu erovija mã'ẽ a'evo ve tetã reinõgarà otekokuwavay mã'ẽ. A'e weka katu rã'ĩ tetã rena rã ikatu mã'ẽ, yvy ãtã gatu mã'ẽ. Ãmẽ wesa ena rã remẽ, a'e pè kõrijõ tè tetã oinõtà. Wakari'y kõ omõ'ãgãtãay, a'e i'ãma. 25Ajaire tetã nokuta'ãi ijyvytu ai remẽ. Ãmãnusu oky ipe remẽ, nomopypyru'ãi teve eraa, yy apo wasu okwa ipe remẽ. Ãtã gatu oinõ, ajawyi, e'i. Ãwĩvo ve eayvu werovija e'e mãe kõ, e'i.
26– Ãmẽ eayvu noenu tari mã'ẽ, a'evo ve tetã reinõgarà notekokuwai mã'ẽ. A'e noeka rã'ĩ tetã rena rã ikatu mã'ẽ. Oinõ te'ĩte tetã. Aje ipe sõ omõ'ã wakari'y mijã. Nomõ'ãmãtãi teve. Noypymotutui. 27Ajaire ãmãnusu oky. Yy tãnẽ. Ijyvytu ai remẽ, omopypyrutà ity, wakari'y nomõ'ãmãtãi rewarà mõ. Ajawyi otuità yy etã mopypyru eraa. A'evotà eayvu noerovijai mãe kõ, e'i. Notekokuwa ywe'ei tite. Ajawyi noerovija ywe'ei tite eayvu, e'i Jesu poromo'e.
Jesu ayvukasia rewarà
28Awyjepatà rã'ĩ Jesu aty wasu mo'ea rè ky'y, [yvytyry yke pè wapy poromo'e remẽ]. Omoãgyo kõ tesõ aepo wenu kupa remẽ.
– Haa! A'evo sipõ! e'i enu kupa. 29Ãwĩ ywesõ otekokuwavay Janejare'e ayvu rè poromo'e. Nãwĩvoi tãmõ Moisesi remikusiwarerà rè poromo'e mãe kõ poromo'e remẽ! Jesu ywesõ otekokuwavay iwyi kõ! e'i kupa.#Mak. 1.22; Ruk. 4.32
தற்சமயம் தேர்ந்தெடுக்கப்பட்டது:
Mateusi 7: oymNT
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2013, Wycliffe Bible Translators, Inc. All rights reserved.
