Mateusi 6
6
“Ivo tekoua rupi tapeiko”, e'i mã'ẽ
1Jesu poromo'e jẽ. Ivo tekoua rè oporegeta iko ky'y. Kee e'i:
– Oiko jane kõ ivo katu maevo sõ tite mãe kõ. Jane kõ rovake tè ivo maevo sõ tite kupa. Ãwĩ kõ vo tapeiko e'ã, e'i. A'evo mãe kõ poroporijauesa maevo sõ tite. Poropãtavõ rã'ãga kõrijõ tè kupa. A'evo sõ peiko remẽ, jane kõ pè kõrijõ tè pejimoe'eokatà ãmẽ. Ajamã'ẽ Janejare'e yvapewarà napemoe'e'ãi ãmẽ. “Ivo ekoi mã'ẽ tè”, ne'i'ãi peupewarà mõ ãmẽ, e'i.#Mat. 23.5 2Oiko ike rupi Janejare'e werovija rã'ãga mãe kõ, e'i. A'e kõ nimoma'ei mãe kõ opãtavõ rã'ãga ipi. Janejare'e ayvu rè jimo'ea retã kõ pè poroporijauesa rã'ãga kupa ipi. Ãmõ, jane kõ rovake teve. Omoe'ea opota kupa. Ajawyi a'evo ekoi kupa. A'evoa rè ãmõ kõ omã'ẽ remẽ, “Haa! Ikatuay si ãwĩ kõ ekoi!” e'i titetà ikuwa e'ã kupa. Ãwĩvo poroporijauesa rã'ãga mãe kõ ipi. 3Ajawyi a'e kõ vo tapeiko e'ã, a'e pejẽ. Aje ywete tapeporijauesa ãmõ kõ ereko ipi. Nimoma'ei mãe kõ mõ pepãtavõtà remẽ, jane kõ rovake rõwã tapepãtavõ kõ ipi. Pemoe'ea tapeãrõ e'ã. Ava mõ peporijauesa remẽ, ãwĩvoa tapemome'u e'ã teve erokwa. Ava mõ nejimorypa teipe remẽ, ajamã'ẽ tapemome'u e'ã ijupe. 4Pepy'a pè kõrijõ tè ãwĩvoa pekuwatà. Ãmõ, Janejare'e kõrijõ teve okuwatà ãwĩvoa. Ãwĩvo remẽ tè, Janejare'e ory katutà pene. Owaray penerekotà ãmẽ, e'i Jesu ijupe kõ.
Janejare'e pè moregetaa rewarà
(Rukasi 11.2-4)
5Ãmẽ e'i jẽ Jesu poromo'e:
– Janejare'e pè peporegeta tarà mẽ, e'i rã'ãga mãe kõ vo tapeiko e'ã. Napeã'ã'ãi apijarerà. A'e kõ oporegeta remẽ, Janejare'e ayvu rè jimo'ea retã kõ pè tè opõ'ã oporegeta kupa ipi, jane kõ rovake. Ãmõ, pee mytery pè a'evo ekoi kupa. Opy'a pè rõwã oporegeta Janejare'e pè kupa ajamã'ẽ. Ojuru pupe tè kõrijõ tè oporegeta kupa ipi. Omoe'ea rã rè kõrijõ tè oja'a wyi a'evo ekoi kupa ipi. Omoe'eawerà opyypa wepykwerà rõmõ ãmẽ kupa ky'y. Nomoe'e kõ'ãi ãmẽ Janejare'e. Aje ywete aepo a'e pejẽ.#Ruk. 18.10-14 6Tãwĩvo e'ã ikõ pejẽ ãmẽ nẽ.
– Janejare'e pè peporegetatà remẽ, penetã wyry pè tè ikõ tapejiovapy peporegeta ijupe ipi nẽ. Jane kõ rovake rõwã. Ãmẽ sõsi Janejare'e kõrijõ tè omã'ẽtà pene. Wenu katutà peporegeta ãmẽ ky'y. Owa katutà penerekoa a'evo peikoa repy rõmõ ãmẽ. 7Janejare'e rupi tekoua nokuwai mãe kõ oporegeta rã'ãga ijupe remẽ, nojipy'amogetai 'ete ee kupa ipi. Opy'a pè noporegetai kupa. Oporegeta pukuay teywete ojuru pupe kupa. “Maevo Janejare'e orytà eayvu rè, aporegeta puku ijupe remẽ”, e'i tite oupe kupa ipi. Ãwĩvo Janejare'e rupi tekoua nokuwai mãe kõ ekoi ipi. 8Ta'evo e'ã ikõ pejẽ nẽ. Okuwa katupa teãmã Janejare'e pepy'a pewarà, peporegeta e'ãve. Okuwapa ve peporijau ee mãe rã kõ.
9– Ajawyi peporegeta Janejare'e pè remẽ, kee tapejẽ ipi:#6.9-13 Aã pè karai kõ “O Pai Nosso” e'i.
“Papa, yvapewarà, pirujẽ jane kõ tanemoe'e nemomojy ipi. [Ene ywesõ neayvukasiay wete mã'ẽ rõmõ neiko.]
Jo'arà kytywarà tè ene. Ãmõ, ivo katuay teãmã mã'ẽ tè ene.
10Pirujẽ jane kõ tanemoẽoka o'arà kyty. ‘Janejare'e rõmõ'ĩte Janerõvijã rõmõ ekoi’, te'i neupewarà mõ kupa.
Ãmõ, neremimota rupi katu toroiko.
Ãwitõ neremĩgwai yvapewarà kõ neremimota rupi katu tè ekoi ipi, tãwĩvo oroiko.
11Oreremi'õ rã eesaoka oreupe kõ'ẽ jawe jawe ipi.
12Oroitypypyipaoka oreaiwererà neupe remẽ, ‘awyjepa’ ere oreaiwererà pè.
Ãwitõ ‘awyjepa’ oro'e oremoaiarà kõ pè, tãwĩvo ve ere oreupe.
13Nivoi tekoua rè orojitupi tite oroiko remẽ,
oremokasi jẽ rejupa, ivo tekoua rupi toroiko jẽ.
Orerã'ãa pè remẽ teve oremokasi jẽ rejupa,
‘aje ipõ’ toro'e tite e'ã nivoi mã'ẽ rõvijã pè.
(Ene ywesõ Jõvijã wasu rõmõ neiko. Ene ywesõ nekasiay wete mã'ẽ rõmõ neiko. Ene ywesõ temimoe'e rõmõ neiko.)”#6.13 Kareta karamoe remẽwarà kõ pè jamã'ẽ remẽ, ãmõgwerà kõ pè ( ) pupe ojikusiwa mã'ẽ uve. Ãmõgwerà kõ pè nuvei.
Aepo tapejẽ Janejare'e pè, peporegeta ijupe remẽ.
14E'i jẽ Jesu jane kõ pè:
– Koivo kõ pemoai remẽ, “awyjepa” pejẽ kõrijõ ijupe kõ. Tapejimoearai kõrijõ ãmẽ pemoaiawerà wyi. Ãwĩvo peiko remẽ, ãmẽ sõsi Janejare'e yvapewarà ojimoearai tevetà peaiwererà wyi. Noja'a'ãi aekwerà rè ky'y. [Napemomorijau'ãi teve eewarà mõ.] 15Ajamã'ẽ “awyjepa” napejẽi sõ remẽ, Papa yvapewarà aepo ne'i'ãi teve peaiwererà pè. Omo'y jẽtà pene, e'i Jesu ijupe kõ.#Mak. 11.25
Nojimi'ui rã'ĩ Janejare'e pè oporegeta remẽwarà
16Ãmẽ Jesu e'i jẽ poromo'e:
– Juteu poromo'e mãe kõ nojimi'ui rã'ĩ rã'ãga iko Janejare'e pè oporegeta kupa remẽ ipi. Jane kõ rovake tè a'evo ekoi kupa ajamã'ẽ. Kee e'i jane kõ rovake kupa. Ijãgyoay rã'ãga ojimi'u e'ãa rè kupa. Nojimogãtarõi rupi ekoi kupa. Nojawykyi teve kupa. Ojaparity rã'ãga kõrijõ kupa. Jane kõ rovake tè a'evo kupa ajamã'ẽ, “temoe'e kupa”, e'i tite kupa rewarà mõ. Ajawyi Janejare'e nomoe'e kõ'ãi kãramõ. Opyypa wepykwerà ike yvy pè kupa. Aje ywete aepo a'e.
17– Pejẽ ãmẽ, a'e kõ vo tapeiko e'ã, a'e pejẽ. Aje tapejimi'u e'ã Janejare'e pè peporegetatà remẽ. Kee tapeiko. Tapejaparity e'ã. Tapejimogãtarõ gatu jome teve. Tapejiovakusu katu teve, e'i. 18Ãwĩvo remẽ, ãmõ kõ pè nojikuwa'ãi napejimi'ui rã'ĩ peiko remẽ. Pejẽ kõrijõ tè pekuwatà. Ãmõ, Janejare'e ãwĩvoa okuwatà. Ãwĩvo peiko remẽ, ãmẽ sõsi Janejare'e oryvaytà pene ky'y, e'i.
“Pema'e kõ rè tapenako'i e'ã ipi”, e'i Jesu mã'ẽ
(Rukasi 12.33-34)
19E'i jẽ Jesu:
– Kee a'e teve pejẽ. Tapeja'a ywete e'ã ikõ pema'e kõ moatya rè penako'i ipi nẽ, a'e pejẽ. Opatà mã'ẽ tè moma'e ike yvy rupiwarà. Kupi'ĩ omopupupatà mã'ẽ tè. Ijupatà mã'ẽ tè. Ãmõ, imona mã'ẽ weraapatà mã'ẽ teve.#Tku. 5.2-3 20Ajamã'ẽ Janejare'e rena pè peiko karuarua rã rè ywesõ peja'a remẽ, a'e sõsi nopa'ãi. Kupi'ĩ nomopupupa'ãi imoai. Niju'ãi teve. Ãmõ, imona mã'ẽ manyvo ne'i'ãi peiko karuarua rã rè omona rõmõ.#1Pe. 1.4 21Omoma'e moatya rè ywesõ oja'a mã'ẽ noja'ai Janejare'e remimota rè ãmẽ. Aje emimota rè ywesõ tapeja'a. Ãmõ, ipyri peikoa rã rè ywesõ tapeja'a, e'i Jesu ijupe kõ.
“Janejare'e remimota janeroupa”, e'i mã'ẽ
(Rukasi 11.34-36)
22Jesu poromo'e jẽ. Kee e'i:
– Aje Janejare'e remimota rè ywesõ tijaiko ipi. A'evo jaiko remẽ, eapyo katu mã'ẽ vo 'ejẽ jaiko. Emimota janeroupa janerereko. Ãwitõ janerea ikatu remẽ, oyape katu janepirà rupi ipi. Ãwĩvo 'ejẽ Janejare'e remimota janeroupa remẽ. 23Na'evoi Janejare'e remimota rè noja'ai mã'ẽ. Naeapyoi mã'ẽ vo 'ejẽ ekoi. Pãtõmimi pupe tui mã'ẽ vo 'ejẽ ekoi. Nikatu miti'ãi ãmẽ ijupe. A'evo tapeiko e'ã ajawyi, a'e pejẽ, e'i Jesu ijupe kõ.
“Ni'ei mõrijõ jamojõvijã remẽ”, e'i mã'ẽ
(Rukasi 16.13)
24E'i jẽ Jesu:
– Pe'ĩte jamojõvijã jane'arà kytywarà rõmõ ipi. Mõrijõ jamojõvijã remẽ, nivo'ãi ãmẽ. Ãmõ janerõvijã ywesõ jaautà ãmõ janerõvijã wyi ãmẽ. Pe'ĩte jarovija katutà ijayvu mã'ẽ. A'e ayvu rupi tè jaikotà ãmẽ ky'y. Ãmõ ayvu nijarovija'ãi ãmẽ. Ãwĩvo ve pema'e rè ywesõ peja'a Janejare'e wyi remẽ, Janejare'e napemoe'e'ãi ãmẽ. Ajawyi pe'ĩte tapemoe'e penõvijã rõmõ. Janejare'e tè a'e, e'i Jesu poromo'e.
Wyra kõ rè tè Jesu poromosã'ãga remẽwarà
(Rukasi 12.22-31)
25– Ajawyi kee a'e pejẽ. Tapejimopirai e'ã pepirà rè, penemi'õ rã rè, ãmõ, peyru rã rè. Ajawyi, “Moma'e põ a'utà kãramõ? Moma'e põ apypytà?” tapejẽ e'ã peiko ky'y. Janejare'e rupi tekoua rè ywesõ tapeja'a peiko. [Janejare'e tè oja'a katu janere ipi. Janerereko katua okuwa teãmã.] Ajawyi tapejimopirai e'ã, a'e pejẽ.
26– Pemã'ẽ gatu rã'ĩ wyra kõ reko rè. Nojimopirai wemi'õ rè kupa ipi. Nikooi teve ipe kupa ipi. Wemi'õ rã mõ nomoaty amãtejẽi ipi. Ajamã'ẽ Papa yvapewarà oja'a katu ee kõ ipi. Omoigooka emi'õ rã kõ ijupe kõ ipi. A'e kõ rè oja'a katu remẽ, tysi tõ pene oja'a katutà tè penereko. Pene ywesõ okãte'ã teve iko ipi.
27– Ãwĩvo ve tapejimopirai e'ã pemãnõa rã rè. A'evo ipe peiko remẽ, pemãnõ jẽtà kãramõ. Manyvo napejẽ'ãi peiko puku rõmõ, e'i Jesu.
28– [Ãwĩvo ve tapejimopirai e'ã penemipypy rã rè. Janejare'e okuwa katupa janererekoa rã ipi.] Ka'a potyry rè pemã'ẽ. Noposikoi epe oyru reinõa rè ipi, e'i. Oyru rã rè nojimopirai teve ipi, e'i. Ajamã'ẽ ikatuay jẽ ipi. Janejare'e oja'a teãmã ee kõ ta'evo, e'i. 29Emã'ẽ. Karamoe remẽ tãmõ Saromão imoma'e ywete mã'ẽ teipe. Tyru e'eay jarà teipe. Ajamã'ẽ ka'a potyry ywesõ ikatuay wete Saromão ryru e'eay epy wete mã'ẽ wyi. Ãwĩvo aje ywete Janejare'e oja'a katutà pene teve.#1To. 10.4-7
30– Aje ywe'e nija'ei ka'a kykyrerà kõ pè ipi. Jamopapai tepe'yte tosinĩ tokai ipi. Ajamã'ẽ Janejare'e ikatuay omoigooka kõ ipi. Oja'a katu ee kõ ipi. A'e rè oja'a katu remẽ, tysi tõ pene oja'atà tè. Ajawyi penemipypy rã rè tapejimo'eai e'ã peiko. Janejare'e rè kuwasi penako'i peiko. 31Ajawyi tapejipy'amopirai e'ã peikoa rã rè, a'e pejẽ. “Moma'e põ kovi a'utà?” tapejẽ e'ã. “Mape wyi põ ekamisa rã apyytà?” tapejẽ e'ã peiko. “Naiko'ãi eremi'õ rã. Naiko'ãi e'ywa rã kovi”, tapejẽ tite e'ã. 32Janejare'e rupi tekoua nokuwai mãe kõ tè aepo e'i ipi. Ajamã'ẽ Papa yvapewarà okuwa amãtejẽ peporijau ee mãe rã kõ, e'i. 33Janejare'e rè ywesõ tapeja'a penõvijã ywete rõmõ. “Emimota rupi katu taiko”, tapejẽ peporegeta peiko. Ipy'a rupi katu tapeiko. A'evo peiko remẽ, oja'a katutà ãmẽ pene ipi, e'i. 34Ajawyi koviwarà rã rè tapejipy'amopirai e'ã, a'e pejẽ. Age'ewarà rè kõrijõ tè tapeja'a. Janejare'e kõ'ẽ jawe jawe penereko katu ipi. Ajawyi penemikuwa e'ã tapeapyrasa e'ã, e'i Jesu imo'e kõ.
தற்சமயம் தேர்ந்தெடுக்கப்பட்டது:
Mateusi 6: oymNT
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2013, Wycliffe Bible Translators, Inc. All rights reserved.
