Mateo 1

Sa Kapuun Hi Cristo Jesus

(Mateo 1:1-17; Lucas 3:23-38)

1Iyan haini mga gin-apuan hi Cristo Jesus. Si Jesus kaliwat hi David sa kaliwat daan hi Abraham.

2Si Abraham amay hi Isaac. Si Isaac amay hi Jacob. Si Jacob amay hi Juda daw hu mga suled din. 3Si Juda amay hi Fares daw hi Zara ha iyan inay dan si Tamar. Si Fares amay hi Esrom. Si Esrom amay hi Aram. 4Si Aram amay hi Aminadab. Si Aminadab amay hi Naason. Si Naason amay hi Salmon. 5Si Salmon amay hi Boaz daw sa inay hi Boaz iyan si Rahab. Si Boaz amay hi Obed daw sa inay hi Obed iyan si Ruth. Si Obed amay hi Jesse. 6Si Jesse amay hi Harì David.

Si David amay hi Solomon daw sa inay hi Solomon iyan sa asawa su anay hi Urias. 7Si Solomon amay hi Roboam. Si Roboam amay hi Abias. Si Abias amay hi Asa. 8Si Asa amay hi Josafat. Si Josafat amay hi Joram. Si Joram amay hi Usias. 9Si Usias amay hi Jotam. Si Jotam amay hi Acaz. Si Acaz amay hi Esekias. 10Si Esekias amay hi Manases. Si Manases amay hi Amon. Si Amon amay hi Josias. 11Si Josias amay hi Jeconias daw hu mga suled din ha maama. Duun taena ha panahun inuwit sa mga kaliwatan hi Israel payanaen diyà ta Babilonia.

12Su diyà en sidan ta Babilonia namatà pa gayed sidan. Si Jeconias amay hi Salatiel. Si Salatiel amay hi Zorobabel. 13Si Zorobabel amay hi Abiud. Si Abiud amay hi Eliakim. Si Eliakim amay hi Asor. 14Si Asor amay hi Sadoc. Si Sadoc amay hi Akim. Si Akim amay hi Eliud. 15Si Eliud amay hi Eleasar. Si Eleasar amay hi Matan. Si Matan amay hi Jacob. 16Si Jacob amay hi Jose ha iyan asawa hi Maria ha inay hi Jesus. Si Jesus iyan tagngaranan ki Cristo.

17Sampulù daw haepat ha kaliwatan sugud diyà ki Abraham payanaen en diyà ki David. Sugud daan diyà ki David payanaen hu pag-uwit kandan diyà ta Babilonia sampulù daan daw haepat ha kaliwatan. Sugud taena payanaen hu kabataa ki Cristo Jesus sampulù pa daan daw haepat ha kaliwatan.

Sa Kabataa Ki Jesus

(Mateo 1:18-25; Lucas 2:1-7)

18Iyan haini tultulanen mahitenged hu kabataa ki Cristo Jesus. Sa inay din ha si Maria su makagunan en ki Jose na su hurà pa sidan makag-asawa agkabedes en haena pinaagi hu Balaan ha Ispiritu. 19Tumenged ta matareng ha etaw si Jose daw harì din agkabayaan ha magayhaan si Maria nahenhenaan din ha magsuwayà sidan ha harì matun-an hu mga etaw.

20Ba su taghenhenaayen hi Jose haena huminiwal diyà ta kandin sa balinsuguen hu Dios pinaagi hu damugu ha tagyanaen, “Jose sa kaliwat hi David, harì ka tagduwa-duwa hu pagpangasawa ki Maria ta sa igkabedes din pinaagi dà hu Balaan ha Ispiritu. 21Saena ku ibatà asem maama gayed daw sa ingaran nu duun iyan si Jesus ta sa mga etaw ha agsunud kandin aglibriyen din duun hu mga salà dan.”

22Nahitabù haena ta daw matuman sa lalang hu Dios pinaagi hu prupita ha tagyanaen, 23“Amin asem mabedes ha laga ha sa batà din maama daw sa ingaran duun Emanuel” ha sa kahulugan taena, “Uminamul en kanuy sa Dios.”

24Su mapukaw si Jose binuhat din sa inikagi taena ha balinsuguen hu Dios. Inasawa din si Maria 25ba hurà gayed bul-ug mag-ubay duun ku asawa din su hurà pa haena magbatà. Su mauma sa panahun ha magbatà en si Maria su batà pigngaranan dayun hi Jose ki Jesus.

தற்சமயம் தேர்ந்தெடுக்கப்பட்டது:

Mateo 1: bkd

சிறப்புக்கூறு

பகிர்

நகல்