Matiu 4

E Satan e torohani e Iesu

(Mak 1:12-13, Luk 4:1-13)

1Tara pöata teka u Namnamei tere Sunahan e peigi menai e Iesu tara makum a palaka tegona torohana menaien e Satan. 2E Iesu ema nouei ta kannou e antunaia turu tohats u maloto u lan na u tohats u maloto a bong. Ba i murinen ba nonei e bes koruna. 3Be Satan emi torohane nen me poeiena i tanen, “Tego Pien uu lö tere Sunahan, ba lö te rangam, bu hatu teka te palis uar tara beret.”

4Kaba e Iesu e ranga palis uu i tanen me poeiena, “Turu Buku u Göagono tere Sunahan i koloto hasiin, ‘A beret peisa ema antunan hala nanei a nitöatöa tara katuun. E möa. A katuun te kukutiena a man raranga tere Sunahan nonei e luenou a nitöatöa.’”

5Nonei e mar ranga uu teka, be Satan e lu mena neien tara taun i Jerusalem, mena hatuole nen iasa koru i pungana tara Luman Lotu Pan. 6Ba nonei e poeiena tere Iesu, “Tego Pien uu lö tere Sunahan, ba lö te kurapa uam i puta. Taraha, turu Buku u Göagono i koloto hasiin,

‘E Sunahan e ranga mera nou u angelo i tanen tegi tara kap menaien lö.

Na nori e pile sei nariou lö,

ba u hatu tema tatei toke roi a mou mölö.’”

7Be Iesu e ranga menen me poeiena, “Turu Buku u Göagono i koloto hasiin, ‘Alö goma torohanei a Tsunono. Nonei e Sunahan i tamölö.’” 8Be Satan e lu mena neien turu töa u pokus iasa koru. Ba nonei e haröte neien a man han hoboto i puta na mamanaka a niga i taren. 9Be Satan e poeiena tere Iesu, “Te hatukun moa lö bate hatsunono uaiem i tar, ba lia te hale goi lö a mamana han hoboto teka.” 10Be Iesu e ranga menen me poeiena, “Satan, alö go laba naiou lia! Turu Buku u Göagono i koloto hasiin, ‘Alö go hatsunono uu tere Sunahan. Nonei puku a töa a Tsunono i tamölö tego kukuti lö.’” 11Be Satan e laba nanen. Ba u angelo e la rima memi taguheier e Iesu.

E Iesu e hatanieia a toukui i tanen i Galili

(Mak 1:14-15, Luk 4:14-15)

12Pöata te hengo naia e Iesu u raranga ti haka menai e Jon tara karabus, ba nonei e lana i Galili. 13Ba nonei e laba nena i Nasaret mena kana tara taun i Kapenium i rehina a Ramun a Perperere i Galili.#4:13 A Ramun a Perperere i Galili e pan koruna. A ningahangaha i tanen e antunana tara 21 kilomita, na nitataabala i tanen e antunana tara 10 kilomita. I Kapenium e kaia tara pala turu Sebulun na u Naptali, a huol a pala turu Jiu. 14A ka teka e butu sil tega kato hamana menaien u raranga te ranga naia e Sunahan tere propet Aisaia i manasa. 15Ba nonei e poeiena,

“U katunura turu tsiktsiki i Sebulun na turu tsiktsikina i Naptali,

te ka ria tara maroro pan te la uana i tasi na turu tsiktsiki te kana i hapalana ramun i Jodan,

na turu tsiktsikina i Galili te ka has ria u katuun tema Jiu ri.

16U katuun ti kaia turu kuhil,

nori i tara hakapi u ualesala pan!

Na pala ti kaia turu tsiktsiki turu kuhilina tara tou mate,

u ualesala pan e alesala uanou i taren.”

17Nonei tara pöata teka, e Iesu e tanian habulunganein a man raranga i tanen ba e poeiena, “Alimiou go palis ba naiam a man markato a man omi! Taraha, a Nipepeito tere Sunahan e sukusuku hakapa.”

E Iesu e ngör u katunun tsitsilo tutuun

(Mak 1:16-20, Luk 5:1-11)

18Pöata te tataalaia e Iesu i kotolana tara Ramun a Perperere i Galili, ba nonei e tareiena e Saimon ti ngö hase ii e Pita na e toulanen e Endru, bate hagala ria i ramun, taraha nori u katunun hagala. Nori i holei a kannou i taren a iena. 19Be Iesu e poeiena i taren, “La gono memu moulia, ba lia te hatuts ragoui limiou temar sooho merari u katuun.”#4:19 E Iesu e ngilin hatutsir u katunun tsitsilo i tanen tego lu merameien u katuun i tanen ba nori te katunun tsitsilo has uariou i tanen. 20Ba nori e laba ner u abe i taren, me kukuteier e Iesu.

21Ba nonei e gamon la lenina me tarena u taina u mun toulana ere Jemis mere Jon, a galapien tere Sebedi. Nori i kaia tara tolaala#4:21 A tolaala a tetenei teka i katoeia a kaan hagala. E antunan hosei a maloto na tolima tsi u huol u maloto tara katuun. i taren bate sugeier a man abe i taren, ba nonei e ngö ranen egi la gono meien. 22Ba nori e laba ner e tamaren na tolaala na u tsonun kui. Ba nori a huol e la gono meier e Iesu.

E Iesu e hihatutsia turu katuun me kato haniga pouts ranen

(Luk 6:17-19)

23E Iesu e hula laia tara man han hoboto i Galili, me hihatutsna tara man luman lotu turu Jiu. Nonei e hihatutsin u Bulungana u Niga tara Nipepeito tere Sunahan bate kato haniga pouts has raiena u katuun ti ka mei a mamana mar siki. 24Ba u katunura tara mamana han hoboto tara provins i Siria e hengo ner a toukui na u hihatuts te katoe e Iesu. Ba nori e la merarima u katuun hoboto ti ka mei a mamana mar siki, u katuun ti sagohi a mamana mar kamits, na u katuun u popolöana, nu katuun u kotskotsibong, nu katuun u matekata. E Iesu e kato haniga hoboto pouts raien. 25Bu katuun u parpara koru e kukutier e Iesu: u katunura i Galili na i Dikapolis na i Jerusalem na i Judia na turu tsiktsiki i hapalana a ramun i Jodan.

Iliyochaguliwa sasa

Matiu 4: HLA 2020

Kuonyesha

Shirikisha

Nakili