Awˬ hkuiˉ puiˍ ve li‸ 12
12
Gʼuiˬsha Aˍbranˍ hta‸ kuˬ ve
1Gʼuiˬsha Aˍbranˍ hta‸ kʼoˆ piˇ ve, Nawˬ ve mvuhˇmiˬ, nawˬ ve awˬ ceuˬ awˬ hkʼaˇ teˇ hpaˍ hta‸ teh taˉ leh ngaˬ maˍ laˇ tuˬ ve mvuhˇmiˬ lo kʼai-o. 2Ngaˬ nawˬ hta‸ awˬ ceuˬ awˬ hkʼaˇ maˇ maˇ piˇ laˇ leh, yawˇ hui lehˬ chaw ceuˬ lonˉ teˇ ceuˬ hpeh‸ la tuˬ yoˬ. Ngaˬ nawˬ hta‸ awˬ bon na‸ laˇ leh, shu hta‸ awˬ bon te piˇ gʼa htaˇ hkʼa gaˬ nawˬ ve awˬ meh hta‸ ngaˬ taˍ uiˍ taˍ mvuh laˇ tuˬ yoˬ.
3Nawˬ hta‸ bon na‸ laˇ ve chaw hta‸ ngaˬ awˬ bon kʼaw‸ na‸ piˇ leh,
nawˬ hta‸ hkeu ve chaw hta‸ ngaˬ kʼaw‸ hkeu piˇ tuˬ yoˬ.
Nawˬ hta‸ cuˇ leh chaw ceuˬ hkʼa peu-eˬ hta‸ ngaˬ awˬ bon na‸ piˇ tuˬ yoˬ, teh‸ kʼoˆ piˇ ve yoˬ.
4Gʼuiˬsha kʼai tcuh ve hkʼe, Aˍbranˍ tu leh kʼai ve yoˬ. Lawˇtaˍ htawˇ yawˇ geh kʼai ve yoˬ. Aˍbranˍ lehˬ Haˍranˍ venˇ hkʼaw tawˆ kʼai htaˇ, yawˇ ve a sha‸ 75 hkʼaw‸ gaˬ peuˬ. 5Aˍbranˍ lehˬ yawˇ ve awˬ miˇ ma Saˍrehˇ, yawˇ ve awˬ shaˍ paˍ Lawˇtaˍ, yawˇ ve awˬ ceˬ paˍ teˇ hpaˍ leh yawˇ ve hpu shi mawˇ jeˬ hta‸ yuˬ veu leh Hkaˍnanˍ mvuhˇmiˬ lo kʼai ve yoˬ.
6Aˍbranˍ mvuhˇmiˬ oˇ ve lo gaˬ htaˇ, Sheˍhkenˍ teh‸ kʼoˆ ve da‸ kehˬ ve chehˇ kuiˬ lo cawˬ ve Mawˇreˍ ve maˉ kuˇ cehˬ lo chehˇ taˍ ve yoˬ. (Awˬ yanˇ oˇ ve awˬ hkʼaw lo mvuhˇmiˬ chi ve hkʼaw, Hkaˍnaˍniˆ chaw hui chehˇ taˍ ve yoˬ) 7Oˇ htaˇ, Gʼuiˬsha Aˍbranˍ geh laˬ leh, Mvuhˇmiˬ chi teˇ tawn ngaˬ nawˬ ve awˬ ceuˬ awˬ hkʼaˇ teˇ hpaˍ hta‸ piˇ laˇ ve yoˬ, teh‸ kʼoˆ piˇ ve yoˬ. Hkʼe te leh, Aˍbranˍ lehˬ Gʼuiˬsha yawˇ geh laˬ ve chehˇ kuiˬ lo, Gʼuiˬsha hta‸ tuˉ tanˇ kuiˬ teˇ maˬ te ve yoˬ. 8Oˇ ve hkʼaw‸ nawˉ, yawˇ awˬ gʼuˇ suhˍ kʼaw‸ kʼai leh, Beˍteˍlaˆ venˇ mvuhˇ nyi tawˆ hpawˇ, Beˍteˍlaˆ leh Aˍiˆ venˇ awˬ kaˍ lo cawˬ ve chehˇ kuiˬ teˇ kaˬ lo yawˇ aˉ po kʼo te leh chehˇ taˍ ve yoˬ. Oˇ kaˬ lo yawˇ Gʼuiˬsha hta‸ tuˉ tanˇ kuiˬ teˇ maˬ kʼaw‸ te leh Gʼuiˬsha geh bon lawˬ ve yoˬ. 9Oˇ ve hkʼaw‸ nawˉ, yawˇ lehˬ teˇ kaˬ peuˬ teˇ kaˬ kʼaw‸ jiˆ chehˇ leh, Hkaˍnanˍ mvuhˇmiˬ awˬ hawˉ teˇ tawn lo gaˬ la ve yoˬ.
Aˍbranˍ Eˇjiˇtu‸ mvuhˇmiˬ lo kʼai ve
10Oˇ htaˇ, Hkaˍnanˍ mvuhˇmiˬ hkʼaw meu‸ lonˉ kaˆ lonˉ gaˬ la ve pa taw, Aˍbranˍ lehˬ Eˇjiˇtu‸ mvuhˇmiˬ lo teˇ hkui teˇ yanˇ gʼa ca hpaw chehˇ ve yoˬ. 11Eˇjiˇtu‸ miˬ tcuhˉ lo gaˬ htaˇ, Aˍbranˍ lehˬ yawˇ ve awˬ miˇ ma Saˍrehˇ hta‸ chi hkʼe kʼoˆ piˇ ve yoˬ. Nawˬ lehˬ da‸ jaˇ ve yaˇ miˇ hpeh‸ ve yoˬ. 12Eˇjiˇ tu‸ chaw teˇ hpaˍ nawˬ hta‸ mawˬ htaˇ, yaˇ miˇ chi lehˬ chaw chi hpaˇ ve awˬ miˇ ma hpeh‸ ve yoˬ, teh‸ kʼoˆ leh ngaˬ hta‸ tiˇ pehˍ laˇ tuˬ yoˬ. Nawˬ hta‸ lehˬ maˇ tiˇ pehˍ taˬ. 13Chi hta‸ pa taw, Nawˬ lehˬ ngaˬ ve awˬ nyi ma hpeh‸ ve yoˬ, teh‸ kʼoˆ piˇ-oˆ. Oˇ hkʼe te ve kʼo, nawˬ hta‸ pa taw ngaˬ ha lehˬ ha kʼa gʼa chehˇ leh, ngaˬ ve a sha‸ gʼa ponˬ tuˬ yoˬ, teh‸ kʼoˆ piˇ ve yoˬ. 14Aˍbranˍ Eˇjiˇtu‸ mvuhˇmiˬ lo gaˬ ve teˇ yanˇ, yaˇ miˇ chi da‸ jaˇ ve hta‸ Eˇjiˇtu‸ chaw teˇ hpaˍ gʼa mawˬ ve yoˬ. 15Jawˇmawˇ ve a ma‸ lonˉ teˇ hpaˍ htawˇ, yaˇ miˇ chi da‸ jaˇ ve hta‸ gʼa mawˬ leh, jawˇmawˇ hta‸ ca kʼoˆ piˇ ve yoˬ. Hkʼe te leh, shu yawˇ hta‸ hawˉ yehˬ lo shiˍ kʼai ve yoˬ. 16Jawˇmawˇ lehˬ yaˇ miˇ chi hta‸ pa taw, Aˍbranˍ hta‸ hkʼa deh‸ ga piˇ leh yawˬ, aˉ che‸, nuˇ, piˉlaˬ, awˬ ceˬ paˍ leh kaˍlaˍoˆ teˇ hpaˍ piˇ ve yoˬ.
17Jawˇmawˇ lehˬ, Saˍrehˇ hta‸ shiˍ kʼai ve pa taw, Gʼuiˬsha lehˬ jawˇmawˇ leh yawˇ ve hawˉ yehˬ hkʼaw chehˇ ve chaw hkʼa peu-eˬ hta‸ kawˆ tuˬ uiˍ ve a naˍ lonˉ teˇ hpaˍ tawˆ la piˇ ve yoˬ. 18Oˇ htaˇ, jawˇmawˇ Aˍbranˍ hta‸ kuˬ leh kʼoˆ piˇ ve, Aˬ hto‸ ma pa taw yawˇ lehˬ nawˬ ve awˬ miˇ ma hpeh‸ ve yoˬ, teh‸ ngaˬ hta‸ maˇ kʼoˆ laˇ ve le. 19Ngaˬ yaˇ miˇ chi hta‸ gʼa heuˆ tuˬ, aˬ hto‸ ma pa taw yawˇ hta‸ ngaˬ ve awˬ nyi ma hpeh‸ ve yoˬ, teh‸ kʼoˆ laˇ ve le. Chi beu‸ yaˇ miˇ chi hta‸ shiˍ leh tawˆ kʼai-o, teh‸ kʼoˆ piˇ ve yoˬ. 20Jawˇmawˇ lehˬ, Aˍbranˍ, yawˇ ve awˬ miˇ ma leh yawˇ hkʼa cawˬ taˍ ve awˬ ceuˬ hkʼa peu-eˬ hta‸ yuˬ leh tawˆ kʼai tcuh tuˬ, yawˇ ve chaw teˇ hpaˍ hta‸ tawˇ piˇ ve yoˬ.
Iliyochaguliwa sasa
Awˬ hkuiˉ puiˍ ve li‸ 12: LHBE
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Lahu Bible Edited © Thailand Bible Society and Bible Society of Myanmar, 2010, 2020.