Jean 4

Jesus azi katcha d’a Samari-d’a

1Suma Fariziyêna a hum ala Jesus nga mi fe suma hata ngola kal suma hi Jean-na, nga mi lazi batemba mi. 2Wani Jesus tamba ba nga mi lazi batemba d’i, wani ni mam suma hata. 3Kid’a Jesus mi wäd’u zla ndatid’a, mi ar Jude, mi hulong avo Galile. 4Mbeî mi hle lovot ta i kur ambas sa Samari-d’id’a.

5Kayam ndata, mi mba kur azì ma ngol ma Samari ma simiyêm ala Sikar ma go kasine ma Jakob mi hum mi goroma Josef-fâ. 6Ata yi máma, golonga hi Jakob-pa nga kua. Kayam Jesus mi kau abo tita, mi kak kä avun golonga kafata faleya.

7Atcha d’a Samari-d’a, ti mba á gul mbina. Jesus mi dat ala: Ndak hanï mbiyo do’, an tche. 8Mam suma hata a i wa hur azina á gus tena.

9Atcha d’a Samari ndata ti dum ala: Ang ma Juif-fâ, ni nana ba, ang tchenen an atcha d’a Samari-d’a mbiyo ma tched’a ge? Kayam Juif-fâ a nga zlap ki suma Samari-na d’i.

10Jesus mi hulong dat ala: Ladjï ndak we he d’a hawad’a hAlonid’a ki an ma ni dak ala: Ndak hanï mbiyo do’, an tche na ni, ni ndak ba mba tchenen mbiyo ma tched’a, an mba ni hak mbiyo ma he arid’ina mi.

11Atcha ndata ti djobom ala: Banana, golong ndata ni kä yiyik. Ang nga ki gan á gul mbina d’i, ang fe mbiyo ma he arid’ina ni lara ge? 12Abui ngolo Jakob ma hami golong ndatina, mam tamba ki groma ki d’uwar mama a tchad’u. Na ni ang ngola kalam zu?

13Jesus mi hulong dat ala: Sama lara pî ma tche mbiyo ma wanina, vunam mba mi so d’ei. 14Sama lara pî ma tche mbiyo ma an humzina, vunam dok so d’uo d’a, wani mbiyo ma an humzina mba mi mbut ir mbiyo ma laud’a kurum á hum ari d’a didinda.

15Atcha ndata ti dum ala: Banana, ang hanï mbiyo máma kayam vunan dok so d’uo d’a tala an hulongî ka hî á gul mbina d’uo d’a.

16Jesus mi dat ala: Ndak i yi ndjuvugu, ndak hulongîya.

17Atcha ndata ti hulong dum ala: An nga ki mandjuf fi.

Jesus mi dat ala: Ndak de nata yat ala: An nga ki mandjuf fuo d’a. 18Kayam ndak vik andjuveina woi vahl, wani ma ndak nga ki sed’em tchetchem wana ni ndjuvuk ki. Ka ndata, ndak de nata yad’u.

19Atcha ndata ti dum ala: Banana, an we angî ma djok vun Alona. 20Abuyomi ngolo a kud’or Alona ni yam ahina d’a wanda, wani agi Juif-fâ a nga dagiya ala: Mbeî a kud’uromî kur Jerusalem.

21Jesus mi dat ala: Atchad’azina, ndak hum zla manda. Yina nga mba, ata yi máma agi mba kud’urogi Abud’a ni yam ahina ndata d’i, d’oze avo Jerusalem mbuo mi. 22Agi Samari-na kud’urogi ni vama agi wum nga d’uo na. Ami Juif-fâ kud’uromi ni vama ami wuma, kayam suta ti tcholï nata Juif-fâ. 23Wani yina nga mba, ki tchetchemba, mi mba wa, ata yi máma, suma kud’or suma gagazina a mba kud’or Abud’a ni kur muzu’â ki gagazid’a mi, kayam Abud’a mi min ni suma hina na á kud’uromu. 24Alona ni muzu’â. Sumala a kud’uromu na, mbeî a kud’uromî kur muzu’â ki gagazid’a mi.

25Atcha ndata ti dum ala: An wala Mesi nga mi mba, ni ma a yum ala Christ-sâ. Fata mi mba wa ni, mba mi dami ad’u ahlena pet.

26Jesus mi hulong dat ala: An ma nga ni dak zlad’a wana, an ni mamu.

27Ata yi máma, mam suma hata a mba, a le atchap kayamba nga mi de zlad’a katchad’id’a. Wani sana tu ma djobom ala: Ang le ni me na, d’oze: Ni kayam me ba, ang de zlad’a ki sed’et ke na, nga d’i.

28Ata yi máma na wat, atcha ndata ti ar agel mata kä, ti i hur azì ma ngolâ, ti de mi suma ala: 29Agi mbeyegïya! Agi gologi sama wana. Mi dan ahlena pet suma an lazina. Mam mi Mesi zu? 30A buzuk kei kur azì ma ngolâ, a mba gen Jesus.

31Kid’a atcha ndata ti id’a, suma hata a tchenem ala: Ma hat suma, ang mbeï te nde tua.

32Wani mi dazi ala: An nga ki te ma agi wum nga d’uo na.

33Suma hata a de tazi ala: Na ni sa mi hum wa vama te zu?

34Jesus mi dazi ala: Te mana ná le minda hi mam ma sununïna, ná ndak vun sun mamba mi. 35Agi nga dagi ala: Tilâ ar fid’i á duta tua d’uo zu? Gola! An nga ni dagiya, agi hlagi iragi akulo, agi gologi awu ma kur asinenina mi ne wa á duta. 36Sama duta nga mi fe wurak mamba, nga mi tok ira ni yam ari d’a didinda, kayam sama zara ki ma duta a zlap le furîd’a tu. 37Kayam zla d’a a dat ala: Sana tu ni ma zara, sana tu ni ma duta mi d’a ni zla d’a irata. 38An sunugi á fet awuna kur asine ma agi lagi nga sunda kua d’uo na. Suma dingâ a le wa sunda kua da’, agi tchugugi ni kur sun mazid’a.

39Suma kur azì ma ngol ma Samari mámina ablaud’a a he gagazid’a yam Jesus yam glangâsâ hatchad’a ma ti dazizi ala: Mi dan ahlena pet suma an lazina na. 40Kayam ndata, suma Samari-na a mba gevemu, a tchenem ala mi kak ki sed’eziya. Jesus mi kak ki sed’ezi burâ mbà. 41Suma dingâ ablaud’a a he gagazid’a yam zla mamba. 42Azi de matcha ndata ala: Ki tchetchemba, ami hami gagazid’a ni yam de maka hol li, wani ami tami humumiya, ami wami gagazi mam mi Ma sut suma kur duniyad’ina.

Jesus mi sut ma sunda hamulîna goroma

43Bugol bur ma mbà máma, Jesus mi tchol sa hî, mi i yam ambas sa Galile-d’a, 44kayam Jesus tamba, mi de woi ala: Ma djok vun Alona, suma a nga hum ngola kur ambazam mbi. 45Kid’a mi mbaza Galile-d’a, suma Galile-na a vum ataziya, kayam azi wahlena pet suma mi lazï Jerusalem ata yima vun tilîna, kayam azi i vun til máma mi.

46Kayam ndata, Jesus mi hulong kur Kana d’a Galile-d’a, ata yima mi mbut mbina süma kuana. Sama sunda hamulîna goroma mi nga tugud’eid’a avo Kapernayum. 47Kid’a sa máma mi hum ala: Jesus mi tcholï Jude, mi mba wa Galile d’a, mi i gevemu, mi tchenem ala mi i avo hatam mi sud’um goroma, kayam goroma mi ar go á matna.

48Kayam ndata, Jesus mi dum ala: Le ba agi wagi ahle suma simata kahle suma atchapma d’uo ni, agi nga hagi gagazid’a d’i.

49Ma sunda hamulîna mi dum ala: Ma hat suma, kid’a gorona nga bei matna tua d’a wani, ang mbeï avo hatanu.

50Jesus mi dum ala: Ang iya, gorongâ mi tchol wa akulo.

Sa máma mi he gagazid’a yam zla d’a Jesus mi dumzid’a, mi iya. 51Kid’a nga mi i avo hatamba, azungeî mama a ngavamu, a dum ala: Gorongâ mi tchol wa akulo.

52Kayam ndata, mi djobozi yam yima goroma mi tchol akulo kuana. Azi dum ala: Kama kafata lenga, tugud’ei mamba aramu. 53Ata yi máma, gorâ abum mi wala ni yima Jesus mi dum kua ala: Gorongâ mi tchol wa akulo na. Mi he gagazi ki suma avo hatama pet.

54Wana ni vama simat ma mbà ma Jesus mi lum kid’a mi tcholï Jude mi mba kur Galile-d’a.

Iliyochaguliwa sasa

Jean 4: BA

Kuonyesha

Shirikisha

Nakili