Mat 7

Fʋfʋ ɩya ‑bhlɔlʋ 'la cɩa wɔlɩ

(Luk 6.37-42)

1«A 'la ‑plaa a 'ye 'tɩtɩ, ɩya ma 'la ka anyɩ 'tɩtɩpla. 2Sa, 'tɩtɩa a cɩ 'ka 'lɛ a 'ye ‑pla na, ɩmɩ ma cɩ 'ka 'lɛ anyɩ ‑pla ɩya ‑bɩɔlʋʋa a 'ka 'lɛ 'ma, a 'ka a 'ye ‑bɩɔ na, ma 'kʋʋ 'ma ɩya ma 'ka anyɩ ‑bɩɔ. 3'Lɩsaa 'la gbʋ, ‑n kopea 'lɛ fʋfʋa ‑ʋ ‑kʋ ‑n bholi 'la 'cia nɩkplaan na 'ciin 'nyɩ ‑n 'ta 'lɛ ‑bhlɔlʋa ‑ʋ ‑kʋ 'lɛ ‑mɔ 'titi ‑naa 'cia nɩkplaan na, ‑jlɛ bha? 4Na, ‑bhlɔlʋa ‑kʋɔ 'lɛ ‑sa 'ciin ‑bhlɛ na, 'nsasa ‑n cɩ 'kaa 'lɛ mino ɩya ‑n ka 'lɛ ‑n bholi 'cla lebhe: Kʋ 'cɩɩ ɩya n 'kɔɔ fʋfʋa 'ciin ‑sa bha? 5Gbɩgbɩnyɔ, ‑sa ‑ncɩ ‑bhlɔlʋa 'ciin ‑bɛɛ ɩya ‑n ka salɩ ɩya ‑n ka sɛnɩ ‑n bholi fʋfʋa 'ciin ‑sasa cibhlili.

6Lʋʋa ‑ʋ ‑glɩ 'lɛ Laagɔ 'la lʋʋ na, a 'la 'nyɩʋ goye. A 'la paa ala cɩzʋzʋlɩɩa bhuzi, ɩ 'la kasɩɩ 'kʋ clecleli ɩya ɩ 'la ka kwlacala, ɩ 'la ka anyɩ mlimlini.

A 'clalɩ Toa

(Luk 11.9-13)

7A 'clalɩ, ‑ma ma cɩ anyɩ 'nyɩ. A 'matɩ, ‑ma a cɩ 'lɩ. A bhuti gbinea, ‑ma ma cɩa anyɩ kalɩ. 8‑Masa, ncaatʋtʋʋntʋa ‑ɔ 'clalɩ 'lɛ na, ma nyɩɔ, ɔmɔa ‑ɔ 'matɩ 'lɛ na, ɔ lɩ 'nyɩ ɔmɔa ‑ɔ bhuti 'lɛ gbine na, ma cɩɔ ma kalɩ. 9Anyɩ sidiin, ‑anɔsaa, ɔla 'cʋ ‑kɔɔ 'lɛ 'flawo 'clalɩ 'nyɩ ɔ cɩ 'kɔɔ 'lɛ cokwie 'nyɩ bha? 10‑Aana ɔ ‑kɔɔ ‑zlii 'clalɩ 'nyɩ ɔ cɩ 'kɔɔ 'lɛ tlɛ 'nyɩ bha? 11Na, anyɩa ‑ɔ ‑nyu 'lɛ na, a ‑ka ala 'cuo ‑lɩɩ 'nanɩ 'nyɩsa ‑ci na, 'nsasa a Toa ‑ɔ ‑kʋ 'lɛ ‑laagɔɔn na, 'ɔ cɩ 'taa 'lɛ ‑lɩɩ 'nanɩ, maa ‑ɔ 'clalɩɔ 'lɛ mɩ na, 'nyɩ bha?

12Na, ɩmɩa ‑tɛtɛa a ‑wa 'lɛ lebhe ncɛlɩ nʋ ɩya ma 'nyɩ anyɩ na, anyɩ 'titi a nʋɩ ɩya a 'nyɩ maa. Ɩmɩ ‑jlɩmaa ɩya Laagɔnekʋnyɩtɛnyaa* 'clalɩ 'lɛ.

A bleli gbinicoa neen

(Luk 13.23-24)

13A bleli gbinicoa neen. Sa, gbinea ɩya ‑gugwiea ‑ɩ fa 'lɛ 'kwɩ neen na, ka ɩ ‑lɛlɩɔ 'lɛ neen 'nyɩ maa ‑ɔ 'plɩlɩ 'lɛ 'yɛpɩ na, maa ‑ɔ ‑zu 'lɛ. 14‑Ma jabhʋa 'la gbinea ‑glɩ -lɩɩ co 'nyɩ ʋla ‑gugwiea ‑mɛmɛnɩɔ 'lɛ cɩ. Maa ‑ɔ lɩɛ 'lɛ na, ma 'ta ‑zu.

Saa su ‑kʋ 'lɛ na, sɛɛ ʋla 'ca kʋ 'lɛ

(Luk 6.43-44)

15A zʋlʋ yooyo Laagɔnekʋnyɩtɛnyaa ‑ɔ cili 'lɛ anyɩ 'bɩɩn 'bhlabhlɩku nɩkplaan 'nyɩ maa 'titi ‑glɩ 'lɛ danyunokɔɔngoye na, pɔlɛ 'kʋ. 16Mala 'caa ma cɩ 'ka 'lɛ 'ma ɩya ma 'ka 'lɛ maa cibhlili. Ka ma salɩ ‑ghlɛzɛɛnca 'ŋubhlukpo 'ciin bha? ‑Aana 'figica, 'ŋusu 'ciin bha? 17‑Ghɛɛ, su 'nanʋ, 'ca 'nana ʋ tlʋ 'lɛ 'nyɩ su ‑nyunyu tlʋ 'lɛ 'ca ‑nyinyi. 18Su 'nanʋ, 'ʋ cɩ 'ta 'ca ‑nyinyi tlʋ 'nyɩ su ‑nyunyu, 'ʋ cɩ 'ta 'ca 'nana tlʋ. 19Su 'tʋtʋʋntʋa ‑ʋ tlʋ 'ta 'lɛ 'ca 'nana na, ka ma dɩʋ 'lɛ 'nyɩ ma ‑pʋʋ 'lɛ ‑kosuun. 20Na, yooyo Laagɔnekʋnyɩtɛnyaa 'la 'caa a cɩ 'ka 'lɛ 'ma ɩya a 'ka 'lɛ maa cibhlilili.

Gɩlɩnyaa 'titi

(Luk 6.46, 13.25-27)

21‑N 'ta 'na ‑Kwlenyɔ, ‑Kwlenyɔ 'la lalɩɛ bhlobhlo ‑ɩ cɩ 'ta 'lɛ anyɩ ‑laagɔɔn 'la Nyɩbhɛlɩdua* nɩkplaan fa. ‑Ma ɩ ‑fata lebhe a nʋ n Toa ‑ɔ ‑kʋ 'lɛ ‑laagɔɔn na 'la pɔɔsa. 22‑Bhutukpa cɩ 'kaan, 'dɛ 'la clɩɩa 'kʋ 'cla lebhe: ‑Kwlenyɔ, ‑Kwlenyɔ! ‑N 'ta ‑naa 'ŋlɩa nɩkplaan ‑a 'ta 'lɛ Laagɔ 'la wɔlɩa nyɩtɛlɩ bha? ‑N 'ta ‑naa 'ŋlɩa nɩkplaan ‑a 'ta 'lɛ 'wugwi ‑nyinyia 'tlili bha? ‑N 'ta ‑naa 'ŋlɩa nɩkplaan ‑a 'ta 'lɛ 'ciinzizielɩlobholi ‑bhutukpaa nʋnʋ bha? 23Na, n cɩ 'ka maa 'cla lebhe: 'Na 'ci ‑mɔsɔ 'ta ka ‑azla anyɩ 'lɩ. A 'wlʋlʋʋn cɩɩn, ‑abhɔlɛnyanyɩ!

‑Palɩ ‑mɔsɔ 'la ‑nyandla

(Luk 6.47-49)

24Na, ncaatʋtʋʋntʋa ‑ɔ nu 'lɛ wɔlɩ ‑naa, n wlʋ 'lɛ nyɩtɛda 'nyɩ ‑ɔ 'plɩlɩɩ 'lɛ 'kʋ na, ɔla gbɩa ‑kʋ le dɩgalɩnyɔa ‑ɔ 'slalɩ 'lɛ ɔla ‑palʋa cokwie 'kʋ na. 25'Nyu ya bhla, 'nyidɔlɩa ya ye, ɩ ya kɔlɔ, ‑bubo ya ci, ɩ ya ‑palʋ ‑naa 'sɛpɛlɩ, ‑ma ʋ 'ta bhli, sa ʋ 'slalɩɔ ‑dʋdʋ 'tɛtʋ 'kʋ na. 26‑Ma ncaatʋtʋʋntʋa, ‑ɔ nu 'lɛ wɔlɩ ‑naa n wlʋ 'lɛ nyɩtɛda 'nyɩ ‑ɔ 'plɩlɩ 'tɩɩ 'lɛ 'kʋ na, ɔla gbɩa ‑kʋ le ‑badaaglunyɔa ‑ɔ ya 'lɛ ɔla ‑palʋa 'nyonu 'kʋ 'slalɩ na. 27'Nyu ya bhla, 'nyidɔlɩa ya ye, ɩ ya kɔlɔ, ‑bubo ya ci, ɩ ya ‑palʋ ‑naa 'sɛpɛlɩ, ʋ ya bhli 'nyɩ 'ʋ 'fɩan ya gbʋgbɔlʋ.»

Zozii 'la calɩɛa ‑ka 'tɛtɩ

(Mak 1.22; Luk 4.32)

28Daa Zozii nyɩtɛ 'lɛ 'nyɩ ɔ ‑bhle 'lɛ na, ɔla cacawɔlɩa ya ncɛlɩa 'fɩan nikpoosla. 29Ɔ nʋ 'taa ‑jlɩmaazienyaa* 'bhisa, ‑ma ka ɔ caa 'lɛ le nclɔɔa ‑ɔ ‑ka 'lɛ 'tɛtɩ na.

Iliyochaguliwa sasa

Mat 7: NTLD13

Kuonyesha

Shirikisha

Nakili