Bage oy fare 2
2
1Mbi jya̰ tene go: «Mbo, tare tuli ge dunya ne, ho̰ tene kaŋ ge kwaɗa ma.» No puy ɗe, a a̰me pe ne to. 2Mbi jya̰ tene go, Maam, a kaŋ dale ne baŋ, ke sḛ tuli mbar a̰me to. 3Mbi vḭ tene go, mbi ke mbi sḛ tuli ne oyo̰r jiya̰l, mbi bole kaŋ kerra ge naa ge dale ma ne, Amma mbi ka mborra zwama zi. Mbi ɓyare viya̰ ge wan kaŋ ge naa dasana ma ne ke ne ta pe ge kwaɗa ma katɗa ge nama ne suwar pal.
4 # 2:4-9 Ŋgay muluk ge Salomon ne ne na kaŋ ɓolla ma. Mbi ke kaŋ ge ɓaŋlaŋ ma: mbi sḭ tene zok ma, ne ɗḭ oyo̰r ma#1Gan 5:2-4, 10:10,14-27, 1Maa 29:25, 2Maa 9:22-27., 5Mbi nṵsi mbi gaaso ma, mbi ɗḭ uwara ge zamma ma hir ge daage nama zi. 6Mbi á baal ma, ne da pe nama mam ma ba ka wal mbi murum ge mbi uwara ge giya̰l ma ne ma. 7Mbi yá mo̰r ma, mbi ka ne dore ma ne kale ma, mbi ka ne nday ma ne gii ma gḛ waɗe nama ge a ne ka Ursalima pal mbi ndwara zḛ ma pet. 8Mbi kote fool kaal ma ne dinar ma gḛ ne mbi sḛ pe. Mbi ɓó kaŋ gan mbe ma da ne gan ma, ne naa ge mbi suwal lew go ma tok go. Mbi ka ne naa sonmo ma ne naa zaab ge siya̰le mbi ma, mbi ka ne kaŋ ge ke naa dasana ma sḛ tuli ma, ndwara go, gwale ma zuliya bindik. 9Mbi pate waɗe naa ge ne ka suwal Ursalima pal mbi ndwara zḛ ma pet. Go no puy ɗe, zwama ge mbi ne mbe ka mbi zi.#2:9 Ne v. 4-9 ŋgay pateya ge gan Salomon ne. Ndi 1Gan 5:2-4, 10:10,14-27, 1Maa 29:25, 2Maa 9:22-27. 10Mbi be wan tene ne kaŋ a̰me ta be kerra to bat, ko tuli ge sḛ duur ne, mbi be wan tene ne na ta to bat. Mbi zá̰ tuli temel ge mbi ne ke ma zi pet, no a kaŋ ge mbi ne ɓó na ne temel ge mbi ne ke zi ne. 11Go̰r go, mbi mbo ya é pe ndil kaŋ ge mbi ne ke ma pet, ne honna ge mbi ne ho̰ tene ndwara ke kaŋ mbe ma. Mbi ɓó go, kaŋ mbe ma no pet, nama a̰me pe ne to, na yan saam pe ne baŋ. Hamba ge ndu ne ɓol ne kaŋ kerra ge na ne ta suwar pal to#Kmb 62:10, Rom 8:20..
12Mbi ɓyare kwar hamba ge ndu ne ɓol na zwama ge na ne zi, be daal, ko dale ge na ne zi to. Mbi jya̰ tene go, ndu ge ne mbo er mbi dḛ ya hool gan pal, mbo ke kaŋ ge naa ge ne ka na ndwara zḛ zaŋgal ma ne ke na ko ɓa de.
13Mbi kwa go, kat zwama golgo waɗe kat daal, kwaya̰l golgo waɗe tṵ. 14Ndu ge zwama kwar viya̰ ge na ne he na kwa, amma ndu ge daal mbo ya tṵ zi. Go no puy ɗe, mbi kwa go, a fare ge ɗu ge ɓol nama ne jwak. 15Mbi jya̰ tene go, ne jo̰ pe aya ge mbi ne mbo kat dimma ne ndu ge daal ne go. A ma kaŋ hamba ge mbi ne ɓó ne zwama zi ne ɗaa? No uwale, mbi jya̰ tene go, a a̰me pe ne to.
16Swaga ge dam ne kale, naa vyale kaŋ ge ne ke ma vyale. Ndu ge zwama su dimma ca ne ndu ge daal go me. Ndu ge gwan dwat nama pal to. 17Swaga mbe go, mbi é pe kwane katɗa ge suwar pal. Ago kaŋ ge naa ne ke ne suwar pal ma pet nama hamba to, ne jo̰ kaŋ ma pet a a̰me pe ne to, a yan saam pe ne baŋ.
18Mbi kwane kaŋ ma pet ge mbi ne á tene tyatyat ke nama suwar pal, ne jo̰ mbi mbo ya̰ nama mbi go̰r go hon ndu ge ne mbo er mbi. 19A wuɗi kwa ne go, ndu mbe mbo kat zwama, ko kat dale ɗaa? Ago kaŋ ma pet ge mbi ne á tene tyatyat ke nama zwama ge mbi ne zi, na sḛ mbo gá katɗa nama pal ne. No iya uwale, a a̰me pe ne to.
20Kaŋ ma ge mbi ne ho̰ tene kerra suwar pal ma pet a ho̰ mbi dwatɗa baŋ. 21Ago kaŋ ma ge ndu ne ke nama ne zwama, ne kwarra, ne pool ge na ne zi, ya̰ nama hon ndu ge ne é na tok ke a̰me ɗu to pet. No uwale, a a̰me pe ne to, a tiiɗiya ge ɓaŋlaŋ ne.
22Go no ɗe, a ma kaŋ mam ge ndu dasana ne ɓol na, swaga ge ne hon tene ke kaŋ ma se babat suwar pal ne ɗaa? 23Dam ma mwaɗak, a ya iigiya zi, temel ge a ne ke gene ya yál nama pal baŋ. Ko ɗaal puy ɗe, nama dulwak fi se to. No uwale, a a̰me pe ne to#Ayu 5:7, 7:1-4, 14:1..
24Kaŋ ge kwaɗa ne ndu dasana pe, ago na zá, na njó, na ka buyya ne kaŋ ge na ne ke ma. Amma, go no puy ɗe, mbi kwa go, na mbo da ne Dok ta ya#3:12-13, 5:18, 8:15, 9:7.. 25Be mbi to, a wuɗi ge ne zam, ko ge ne njot ne ɗaa?
26Ago ndu ge Dok laar ne wa̰ na, Dok hon na zwama, ne kwarra ne sḛ tuli fafa̰y. Amma, ndu ge sone, Dok hon na viya̰ ge na kote kaŋ ma hon ndu ge na ge Dok laar ne wa̰ na. No ta uwale, a a̰me pe ne to, a yan saam pe ne baŋ#Ayu 27:16-17, 32:8, Frs 2:6, 13:22..
Iliyochaguliwa sasa
Bage oy fare 2: FGN2013
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
La Bible en langue Kim © Alliance Biblique du Tchad, 2013.