Génesis 2
2
1Tsënöpam Teyta Dios kamar usharirqan ciëluta y ciëluchö kaqkunata, kë patsata y kë patsachö kaqkunatapis. 2Llapanta kamarirnam qanchis kaq junaqchö Teyta Dios jamakurirqan.#Éxo. 20.11; Heb. 4.4, 10. 3Tsënö jamanqanpitam Teyta Dios tsë junaqta bendisïkurqan sagrädu kananpaq.#Éxo. 20.11.
Edén huertachö Adánwan Eva täräyanqan
4Këchömi qellqarëkan ciëlutawan kë patsata Teyta Dios kamashqan.
Kë patsata y ciëluta kamarirpis 5Teyta Dios manaran tamyatsimurqanraqtsu. Tsëmi ima qorapis ni ima montipis karqanraqtsu. Jina manam nunapis karqanraqtsu chakrachö uryananpaq. 6Tsë witsanmi patsapita yaku yarqamur#2.6 O pukutë shärirmi. jinantin patsata oqurqan.
7Tsëpitanam nunata allpapita Teyta Dios rurarir kawananpaq senqanchö pükarqan. Tsënöpam kawaq nuna kananpaq kamarqan. 8Pëtam Edénchö jatun huertaman churarqan tsëchö yachananpaq. Tsë huertataqa kikin Teyta Diosmi inti yarqamunan läduchö rurarqan. 9Tsë huertachömi Teyta Dios winatsirqan tukïläya shumaq montikunata. Tsë montikunapa wayïninqa mikukï munëmi karqan. Huerta chöpinchömi juk monti karqan wayïninta mikur imëyaqpis nuna kawananpaq.#Apoc. 2.7; 22.2, 14. Tsënöllam juk monti karqan wayïninta mikur alli kaqta y mana alli kaqtapis nuna musyananpaq.
10Jinan Edén huertapitam juk mayu yarqamurqan tsë huertata oqünanpaq. Huertapita yarqurmi tsë mayu chuskuman rakikarqan. 11Punta kaq mayupa shutinmi karqan Pisón. Tsë mayum pasan Havilapa. Tsëchömi kan atska qori. 12Tsëchö qoriqa qori pürum këkan. Tsënöllam tsëchö këkan alläpa pukutaq montipa weqin y alläpa shumaq ónice nishqan rumikunapis. 13Juk kaq mayupa shutinnam karqan Gihón. Tsë mayum tumëkämun Cuspa. 14Juk kaq mayupa shutinnam karqan Tigris. Tsë mayuqa Asiriapita inti yarqamunan kaq lädupam pasan. Juk kaq mayupa shutinnam karqan Éufrates.
15Kamanqan nunatam Edén huertaman Teyta Dios churarqan tsëchö uryar shumaq cuidananpaq. 16Tsëpitanam nunata nirqan: <<Kë huertachö montikunapa wayïninqa llapanpis mikunëkipaqmi. 17Tsënö kaptinpis ama mikunkitsu alli kaqta y mana alli kaqta musyatsikuq montipa wayïnintaqa. Tsëta mikurqa wanunkim>>.#Rom. 6.23.
18Tsëpitanam Teyta Dios nirqan: <<Japallan kar nuna ankupëpaqmi këkan. Tsëmi yanaqin rurashaq>>.
19Tsëpitanam allpapita kamanqan tukïläya animalkunata y päriqkunata#2.19a Wakin nunakunaqa bolaqkunata niyanmi. Adán#2.19b Hebreo idiömachö Adán ninanqa nuna ninanmi. kaqman Teyta Dios aparqan shutinkunata churananpaq. Adán churanqanllam llapanpapis shutinkuna këkan.
20Tsënöpam shutinkuna Adán churarqan wätana kaq y mana wätana kaq animalkunapata y päriqkunapatapis. Tukïläya kaptinpis nunapa yanaqinpaqnöqa manam karqantsu. 21Tsëmi Teyta Dios Adánta wanïpa punukäratsir juk costillanta jorqurirqan. Jorqurirnam kanqantanölla kutirkatsirqan. 22Tsë jorqushqan costillapita warmita rurarirmi nuna kaqman pusharqan. 23Warmita rikëkurnam Adán alläpa kushir nirqan: <<¡Këqa tullüpita ëtsäpita rurashqam këkan! Ollqupita rurashqa karmi pëqa warmi këkan>>.
24Tsëmi mamäninpita tëtanpita ollqu yarqukun warminwan mana rakikëpa täkuyänanpaq. Tsënö täkurmi ishkanpis jukllëllanö kayanqa.#Mat. 19.5; Mar. 10.7-8; 1Cor. 6.16; Efe. 5.31. 25Ishkan qalapächu këkarpis manam mëqan penqakuyarqantsu.
Iliyochaguliwa sasa
Génesis 2: qwhB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018, Wycliffe Bible Translators, Inc. All rights reserved.