Kushangumuka 14
14
Avilama ovola Lote
1A matangwa a Mwene Amalafela wa ku Mbambilone, na Mwene Alyoke wa ku Elasale, na Mwene Kendoleome wa ku Elame, na Mwene Tindale wa ku Ngoime, 2ava vimyene vawana valizivasanene kukalwisa vakwavo vimyene vatanu, mazina avo, Mwene Mbela wa ku Sondoma, na Mwene Mbilesha wa ku Ngomola, na Mwene Shinambe wa ku Andema, na Mwene Shemembele wa ku Zemboime, na mwene wa ku Mbela, ikeyo nganda ya Zowale. 3Ava vimyene vatanu valizivasanene kulinga vimunga vya nzita mu Cimbongo ca Sindime, eci vatumbula ololo ngwavo Mema a Kalunga a Kutsa. 4Co vakevo vavashwanene kuli Mwene Kendoleome a myaka likumi na ivali, oloni mu mwaka wamulikumi na itatu vamutengulukilile nakumulwisa. 5Mu mwaka wamulikumi na iwana, Mwene Kendoleome na vasamba vendi vezile na mashwalale, co vafungulwile vaLefaime mu Ashetelote Kalenaime, na vaZuzime mu Hama, na vaEmime mu cana ca Kilyataime, 6na vaHoli mu minkinda ya Endome. Vavashekele nakuvetesa ku Elepalane ku shongo ya mambo. 7Co vatengulukile nakwiluka ku Kandeshe, a simbu ije vaitumbwile ngwavo Enemishepate. Vafungulwile lifuti lyoshe lya vaAmaleke nakufungulula vaAmoli vaje vakele mu Hazazone Tamale.
8Vaje vimyene vatanu, Mwene Mbela wa ku Sondoma, na Mwene Mbilesha wa ku Ngomola, na Mwene Shinambe wa ku Andema, na Mwene Shemembele wa ku Zemboime, na mwene wa ku Mbela, Mbela ikeyo nganda ya Zowale, vezile na mbunga ya mashwalale vavo nakulwila mu Cimbongo ca Sindime. 9Co valwisile vimyene vaje vawana, Mwene Kendoleome wa ku Elame, na Mwene Tindale wa ku Ngoime, na Mwene Amelafela wa ku Mbambilone, na Mwene Alyoke wa ku Elasale. Ava vimyene vatanu valwisile vimyene vaje vawana. 10Cimbongo ca Sindime cashulile na viteke vya tala, omo vimyene va ku Sondoma na Ngomola vesekele kutewa nzita, co vawililile mu viteke, oloni vaje vimyene vakwavo vatatu vavandele ku minkinda. 11Co vaje vimyene vawana vambatele vyuma vyoshe vya mu Sondoma na Ngomola, na vyakulya vyoshe. 12Co Lote, muna shongo ya Avilama, uje wakele mu Sondoma, vamukwatele nakwambata vivala vyendi vyoshe.
13Oloni munalume umo waputumukileko, co wanenele vukaleo vwoshe kuli Avilama kaHevelu, uje wakele kuyehi na miti yakujela ya Mamele kaAmoli. Mamele na vandolome vendi Eshekole na Anele vapwile vasamba va Avilama. 14Omo Avilama wazivile ngeci vanakwata Lote muna shongo yendi nakumupwisa cinzinda, co wasanene vanalume voshe vaka-kulwa nzita va mu cilombo cendi. Voshe vapwile 318, co vashekele vaje vimyene vawana nakuvetesa ku Ndani. 15Co Avilama waangunwine vanu vendi mu vimunga, nakulwisa vitozi a simbu ya vutsiki, ngeci vavafungulwile. Co wavashekele kweta na ku Homba ku kunto ya lifuti lya Ndamasiku, 16co velukile na vufuko vwoshe vuje vuvapukwile. Ngecivene, Avilama wezile na Lote muna shongo yendi na vivala vyendi, amo na vanakazi na vinzinda vakwavo lalo.
Melekizendeke avezikisa Avilama
17Omo Avilama welukile kuje kwakahyanene Mwene Kendoleome na vimyene vakwavo, co mwene wa ku Sondoma waile nakuliwana nendi mu Cimbongo ca Shave, eci vatumbula lalo ngwavo Cimbongo ca Mwene. 18Melekizendeke, wapwile mwene wa ku Saleme, ikeye lalo wapwile muka-kukombelela kuli Njambi wa Akamwa ya Akamwa, wanenele makende na vinyu kuli Avilama. 19Co wavezikisile Avilama, nakwendeka ngwendi, “Njambi wa Akamwa ya Akamwa, uje watangele lilu na asi, avezikise Avilama! 20#VaHe 7:1-10 Njambi, wa Akamwa ya Akamwa, uje wakwanene nzili yakufungulula vitozi vove, apwe wakushangazala!”
Co Avilama waanene kuli Melekizendeke camulikumi ku vyoshe vije vyakapukwile.
21Mwene wa ku Sondoma wendekele kuli Avilama ngwendi, “Ambata evi unakapukula vyoshe, oloni njiilwisile vanu vange voshe.” 22Oloni Avilama wamukumbulwile ngwendi, “Njilisinga ku mesho a Shukulu Kalunga, Njambi wa Akamwa ya Akamwa, uje watangele lilu na asi, 23ngwange, yange kunjambata cuma cimo kuli yove, nameme kamukole, nameme kacipapa ka a n̄aku yove, kutewa ukendeka ngwove, ‘Yange njinafukisa Avilama.’ 24Kunjambata cuma cimo, kuvanga lika vyakulya vije vivalile vanu vange. Oloni vasamba vange va Anele, na Eshekole, na Mamele, vaje vanjaile navo, vaane litambelo lyavo.”
Iliyochaguliwa sasa
Kushangumuka 14: MBB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Mbunda ©The Bible Society of Zambia, 2006