Matio 4
4
Jesos ka k8ag8e 8agackibinagani8idj
(Inabin acitc Mak 1.12-13; Lok 4.1-13)
1Kegapitc Jesos ogi iji8inigon Mino Manidon ka iji pig8adakamiganig, kitci madji manidon kidji k8ag8e 8agackibinigodjin. 2Ka ick8a nimidana8egonaganig acitc nimidana taso tibik ega kegon egi midjigobanen, Jesos ki odji 8i 8isinigoban. 3Kitci madji manidon ogi pi nazikagon, kidji k8ag8e 8agackibinigodjin. Ogi igon dac: “Kicpin Kije Manido Og8izisan aiaa8ian, ijik igi asinig kidji ani pak8ejigani8i8adj.”
4Jesos dac ogi nak8e8ajian: “Mazinadeni oo8e Kije Manido Omazinaiganikag:
‘Ka8in pak8ejiganan eta kadagi odji pimadjiosi a8iag.
Panima onada8endanan kakina Kije Manido odanim8e8inan
kidji odji pimadjiodj,’ ” Deutéronome 8.3
ogi inan.
5Mina8adj dac kitci madji manido ogi iji8inan Jesosan Jerusalem odenakag, mi ii Kije Manidon ododenamini, acitc 8agidj Coda8inni kitci aiamiemigi8amikag ogi iji 8agidasan. 6Ogi inan dac: “Ack8e sa pinig8ackonin, kicpin Kije Manido Og8izisan aiaa8ian. Mazinadeni mega oo8e Kije Manido Omazinaiganikag:
‘Oga anonan odajeniman kidji nagadjiik8a.
Kiga midjiminigog dac,
ega 8a8adj kidji 8isagizidecinian asinikag,’ ” Psaume 91.11-12
ki ikido aa madji manido.
7Jesos dac ogi nak8e8ajian: “Mazinadeni acitc Kije Manido Omazinaiganikag:
‘Ka8in k8ag8e kadjinija8akegon
ka Tibendjigedj Kikije Manidomi8a
kidji abadjitodj omacka8izi8in.’ ” Deutéronome 6.16
8Mina8adj dac kitci madji manido ogi iji8inan Jesosan 8agidadin pik8adinani e kitci icpadinanig. Ogi 8abadaan kakina ogima8i8inan ooma akikag acitc adi eji kitci minonag8anigin. 9Ogi 8idama8an dac: “Kakina ini ogima8i8inan kiga minin, kicpin nibak8itaojian kidji icpenimijian.”
10Jesos dac ogi inan: “A8as 8edi ijan madji manido! Mazinadeni mega oo8e Kije Manido Omazinaiganikag:
‘Kiga icpenima8a ka Tibendjigedj Kikije Manidomi8a,
acitc 8in eta kiga anokita8a8a.’ ” Deutéronome 6.13
11Midac ka iji naganigodjin kitci madji manidon. Ajenig dac ogi pi nda nazika8a8an Jesosan acitc ogi pi nda 8idoka8a8an.
Jesos madjita kidji kagik8edj Galilee akikag
(Inabin acitc Mak 1.14-15; Lok 4.14-15)
12Apitc Jesos ka nodagedj egi takonagani8indjin Cabadisan, Galilee akikag ki ija. 13Ka8in dac odji nda tajikesi 8edi Nazaret odenakag. Tiegodj 8edi Kaponaom (Capernaüm) odenakag ki a8i tajike, pecodj Galilee sagaiganikag, 8edi akikag ka iji tajike8agobanen igi8e Coda8innig Sebilan (Zabulon) acitc Napitali (Neftali) ka odakanezi8adj. 14Midac kidji gi iji8ebanig ka ikidogobanen niganadjimo8inni Isaia:
15 “8edi Sebilan (Zabulon) akikag acitc Napitali (Neftali) akikag,
pecodj kitcigamikag ka tag8agin,
pinici k8ekagam Jourdain kitci sibikag,
mizi8e Galilee akig, taji ka odji8adj ega ka Coda8inni8i8adj,
16 igi8e a8iagog iima ka tajike8adj ka iji kacki tibikanig,
ogi odji 8abadana8a e pi kitci 8aseanig.
Igi8e odji ka iji kacki tibikanig akini ka tajike8adj,
nibo8ini ka iji tag8anig,
ki odji kitci tcakateni.” Ésaïe 8.23–9.1(9.1-2)
17Ii apitc Jesos ki madjitagoban kidji kagik8edj oo8eni: “An8endizok! Aja mega peconag8ani Kije Manido Odogima8i8in.”
Jesos onad8e8eman ni8in kigozike8innin
(Inabin acitc Mak 1.16-20; Lok 5.1-11)
18Meg8adj e pimosepan tcigagam Galilee sagaiganikag, Jesos ogi 8abaman nijin kigozike8innin e taji pagida8andjin. Simo Pien dac aa pejig ijinikazo, kodag dac mi ini o8idjiki8en, Andre ijinikazo8an. 19Jesos dac ogi inan: “Pijaok! Nosoneocik! Kiga 8abadainom dac adi ke todameg kidji pidji8ineg8a a8iagog ninikag.” 20Teci8ag dac ogi nagana8an odasabi8an. Midac ka iji nosone8a8adjin Jesosan.
21A8acic 8edi ki iji madja Jesos, acitc ogi 8abaman nijin naben e iji 8idjiki8emidindjin, Jak (Jacques) acitc John e ijinikazondjin, mi ini Zebedee og8izisan. Otcimani8akag te8agoban kigi odadami8an, e taji 8a8ejaasabi8agobanen. Jesos dac ogi nd8e8eman. 22Teci8ag ogi nagadana8a otcimani8a acitc odadami8an. Midac ka iji nosone8a8adjin Jesosan.
Jesos paba kikinoamage
(Inabin acitc Lok 6.17-19)
23Jesos ki paba ijagoban mizi8e Galilee akikag. Kikinoamageban pepakan Coda8inni aiamiemigi8amikag, e paba kagik8edj min8adjimo8ini ka odji kikendjigadenig Kije Manidon Odogima8i8ini, acitc okigeabanin kakina ka akozindjin adigotc ka inapinendjin. 24Jesos ki ani mikomagani8i mizi8e Siria (Syrie) akikag. Kakina dac ka akozi8adj pepakan ka inapine8adj ki pidji8inagani8i8ag Jesosikag kidji kigeigo8adjin. Nandam e taci8adj kitci 8isagendamobanig, nandam okigickago8abanin madji manidon, nandam majise8apinebanig, acitc nandam op8ana8itona8aban kidji pimose8adj. Jesos dac kakina ogi kigean. 25Kitci mane a8iagog onosone8a8agoban Jesosan. Galilee akikag odose8agoban, acitc Midatcin Odenan ka ijinikadenig akini, Jerusalem odenakag, Coda (Judée) akikag, acitc k8ekagam Jourdain sibikag.
Iliyochaguliwa sasa
Matio 4: ALGNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Algonquin New Testament © 1998 Canadian Bible Society
