Lukë 13

Jesu ‑gbalaa' nyüü ü toro 'lɩ ‑balʋ ‑gälɩ

1'A 'ia 'taɩnlɩa 'mlɩ, nyüü ji Jesu wiili Pilatëa nʋa' Galileenyüü ‑gba ‑gbalakalɩ, 'sɩrɩ 'ɔ 'caklaa' 'üa ‑gbɔsamlaa ‑toru nyüütoru#13.1 ‑Gbɔ 'ü 'saa ɩ 'ünya jrälɩ 'üün, 'ünya 'blabla 'ümɩ.. 2Jesu nya ‑gbala 'üün: «'Ana plɛ nɩnɩa Galileenyüülü jäa' nɩ, 'ü kä ‑balʋ ‑gböösa 'ünya ‑si Galileenyüü ‑mülü 'wʋ; 'a 'iɛ 'ü 'jä ‑sʋɩ? 3‑Gbagblɛ bäsaa! 'N ‑gbala 'amɩ: 'ama 'nyɩ 'lɩ 'ana ‑balʋ ‑gälɩ ‑a toro nɩ, 'asɩ 'ana 'fɩɔ 'mä bɩa jä jä. 4'A 'iɛ 'ana plɛɛ nɩnɩa, nyüü ‑pʋ nyüü ‑uuntäälä kä ‑gälɩ 'wlitʋŋlɔnyuku kpaku blöa' Siloee ‑bɛ ü jäa' nɩ, 'ana plɛɛ 'üü kä ‑balʋ ü ‑si Jerusalɛɛmëa nyüü ‑mölööa 'fɩɔwʋ? 5‑Gbagblɛ bäsaa! 'N ‑gbala 'amɩ: 'ama 'nyɩ 'lɩ 'ana ‑balʋ ‑gälɩ ‑a toro nɩ, 'asɩ 'ana 'fɩɔ 'mä bɩa jä jä.»

Figietuua tapönänä

6'Ɔnya 'pala 'üün tapönänälä kʋa' ‑pɩ 'klɩ 'ɔnya ‑gbala 'üün: «Nyɔɔ 'dooa putu 'lɩ bä kä figietuu. 'Ɔnya mi 'ua 'wlia 'jaju 'sakalɩ, ‑maa 'ɔnyɩ 'lɩ dɛɛ ‑a jrä. 7'Ia ‑gʋ, 'ɔnya ‑gbala nyɔɔlɔ ‑fɛɛɛrɛa' putulua 'mlɩ 'jrʋpa: ‹Tɛlɩ, 'ia ‑sɩ tää 'saarɩ; 'asɩ 'n jöa' tuulu kʋa' ‑pɩa 'wli, ‑mää dɛɛ 'nyɩ jrälɩ ‑srɩɩ 'lɩ! 'Bö 'umɩ! 'Fʋflɛsa 'u dɔrɔ kʋfa 'wʋ!› 8‑Maa nyɔɔlɔ ‑nëma: ‹'Kamanyɔɔ, 'cɛrɛ 'uun ‑wälɩ ‑taa ‑sʋ 'lɩ, ‑bɛ 'mä 'ua ‑gba ‑go 'mä 'lɩ mlaanyri 'papa. 9Uma tʋ, 'i 'na, ‑maa uma 'nyɩ tʋ ‑a tʋ nɩ, ‑bɛ ‑mä 'uun 'ka.› »

Nyɔsʋaa 'kamaplälä bäa' ‑plɩɩ

10‑Srɩlɩ bäa' ‑fʋflʋpasrɩ nɩ, Jesu nya mi juifëa 'sraaplanyüköli 'kpɩara. 11‑Wusublaŋlʋʋ 'doo bä ɩ 'lɩ. ‑Wusu 'blaa' 'ɔɔn 'ia ‑sɩ ‑pʋ ‑sɩ ‑uunsɔɔ. ‑Balʋsusu 'kata 'ɔɔn 'ɔnyɩ 'nɩmɩ 'lɩ ‑a bɩa ɔ ‑gäklɩ. 12Jesu 'jäa' 'ɔɔn nɩ, 'ɔnya we 'ɔɔn, 'ɔnya ‑gbala 'ɔɔn: «'Ŋlʋʋ, ‑wusulu 'blaaa' ‑mɩ 'u 'a ‑mɩ ‑gälɩ sɔ!» 13'Ɔnya 'pie 'ɔɔn klʋgbë ‑gälɩ, 'a ‑plɩɩ 'ɔ kʋ 'ɔnya ‑gäklɩ, 'ɔnya 'bʋala Nyɔsʋaa 'nyrɩ.

14‑Maa nyɔɔlɔ bäa' 'sraaplanyukua 'wliklɩ nya ‑träärä Jesu 'crɛ ‑gba dɛɛlɛ kä ‑gʋ 'ɔ 'pʋɔa' 'ŋlʋʋlɔ ‑fʋflʋpasrɩ 'lɩ. 'A 'ia ‑gʋ 'ɔnya ‑gbala nyüü ‑maa: «A kä jrüü ‑uundoo, 'üa 'mlɩ a kä amä 'jrʋpa ‑fɛɛɛrɛ#13.14 Ɛgësɔɔdë 20.9-10; Deteronɔɔmë 5.13-14.. 'A 'ia jrüülüa 'mlɩ 'ba ji ‑wusu ‑futo, ‑maa 'a 'nɩ ji ‑fʋflʋpasrɩ 'lɩ!» 15'Iibäa' 'Pläkänyɔɔ nɩ: «‑Glagälɩsrörönyɔɔ! ‑Mää ‑fʋflʋpasrɩ 'lɩ 'ana 'mʋgbɛ 'a 'nɩ ‑jeje 'ana 'bre, 'aiɛ 'ana ‑sʋbre, ‑bɛ 'ünyɩ mi dɛɛji, 'kä 'anyɩ fa 'üün 'mlakalɩ? 16‑Maa 'ŋlʋʋlɔ kʋa' ‑pɩ, Abraamëa ‑glügböyrialɔ, ɔ Sataan kpasaa' ‑kpraalɩa ‑sɩ ‑pʋ ‑sɩ ‑uuntää nɩ, 'ɔɔ ‑nëmä ‑jejro ‑fʋflʋpasrɩ 'lɩ?» 17Wiili 'ɔ nʋa' ‑plɩɩ 'saa 'ɔ 'paa' nɩ, 'i 'blara 'ɔa 'nyüamlɩjraranyüü 'nyüsü. ‑Maa nyüü ‑mülü kä 'fɩɔ kʋa' ‑pɩ nɩ, 'mʋfagbili 'ɔ nöa', 'ia ‑gʋ dɔrʋ 'blaa 'ümɩ.

Mutarëdëa 'jajua tapönänä

Matiö 13.31-32; Marëkë 4.30-32

18Jesu ‑nëma 'sɔɔwʋ: «Dɛplɛɛ nyra Nyɔsʋaa 'kamaplä jajra le? Dɛplɛɛ a 'mrɛɛ amä 'ään 'klɩ 'papla le? 19'Ä ‑beere 'sɩrɩ nyɔɔ dɔrɔa' mutarëdëa 'jaju 'wʋ ‑bɛ 'ɔ plaa' 'ɔa putu 'lɩ. 'Ɛnya nʋ tuu kpaku#13.19 kpaku: ‑Taa waklüülü 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä., nyisie nya 'pala 'ua katëa 'mlɩ 'dëdrëë.»

Farinë nyra levurëa tapönänä

Matiö 13.33

20'Ɔ ‑nëma 'sɔɔwʋ: «Dɛplɛɛ ‑a 'papla ‑plɩɩ Nyɔsʋaa 'kamaplä 'klɩ le? 21'Ä ‑beere 'sɩrɩ 'ŋlʋʋ 'paa' farinëa kiloo ‑glʋ ‑bɛ ‑gbööa#13.21 kiloo ‑glʋ ‑bɛ ‑gböö: Grɛɛkëwii 'lɩ 'iibä «sata tää». Farinëa kiloo ‑glʋ ‑bɛ ‑gböööa 'samaa dɛɛ. 'Ia jijrɛ 'mrɛɛ ɛ 'fini nyüüa ‑glʋɩgböö 'klɩ. dɛrɩ levurë ‑bɛ 'ia 'fɩɔ 'jraaa'.»

Nyɔɔ 'plɛɛ 'mä Nyɔsʋaa 'kamapläa 'mlɩ pa le?

Matiö 13.33

22Jesu ‑srörö bätë kpakü nyra bätë jiea 'mlɩ, 'ɔ 'kpɩa nyüü ‑bɛ 'ɔ mö Jerusalɛɛmë. 23Nyɔɔ 'doo nya 'bete 'ɔɔn: «'Pläkänyɔɔ, nyüülü nëmäa' 'lɩmlɩwʋ nɩ, nyüü jie 'lee nëmä 'lɩmlɩwʋ?»

'Ɔnya ‑gbala nyüülü: 24«'Ba 'palɩ 'klü 'amä 'mëmla jɔa mlɩ ‑srörö. 'Cɩcasa 'n ‑gbala 'amɩ: nyüü 'kɔkɔmlɛ nya 'daa 'ümä 'lɩ ‑srörö, ‑maa 'ü ‑nëmä 'lɩ ‑a bɩa. 25'Taɩn nya jia 'kä nyukukänyɔɔ nya 'wʋsɔ kä 'ɔnya tatu 'pa. 'Amɔlü nɩ, ‑fälɩ 'a nëmä bä. 'Anya tatu bɔtɔ ‑bɛ 'anya 'daa: ‹'Pläkänyɔɔ, 'Pläkänyɔɔ, 'sa amɩ tatu 'klɩ!› ‑Maa 'kä 'ɔnya 'amɩ ‑gbala: ‹'Nyɩ 'ana sɔfa ‑a jre!› 26'A ‑plɩɩ 'anya 'bala ‑bɛ 'anya 'daa: ‹‑Mää amɔ nyra ‑mɔ ma 'nyɩ tara 'wʋ ‑bɛ ama 'nyɩ 'mlara ‑pɩɔ 'doo 'wʋ; ‑nya 'nyɩ ana ‑saplɛ 'lɩ 'kpɩara?› 27'Kä 'ɔnya 'amɩ ‑gbala ‑maa: ‹'Nyɩ 'ana sɔfa ‑a jre. 'Amɔlü kä 'fɩɔ bäa' ‑balʋkänyüü, 'ba tʋŋlɔ 'mɩ 'lɩdɛrɩ!› 28«'Taɩnlɩ 'amäa' Abraamë 'jä, 'amäa' Isaakë 'jä, 'amäa' Jakɔɔbë nyra nyɔsʋaamlɩpalanyüüa 'fɩɔ Nyɔsʋaa 'kamaplä 'lɩ 'järä, ‑bɛ 'amäa' ‑fälɩ tɩɔ nɩ, 'a ‑plɩɩ 'amä 'wloro, 'a ‑plɩɩ 'amä ‑gla jrörö. 29Nyüü nya ‑pɩɔa 'fɩɔ sɔa: 'bala 'jrʋa 'wʋsɔrɔfa 'wʋ, ‑a mi 'ua 'prerefa 'wʋ, ‑a sɔ 'jrʋa 'wʋsɔrɔfaa kʋmla 'pɛ nyra 'ua 'dupa 'pɛlɩ, nyüü nya 'lɩ sɔa 'kä 'ünya 'wʋtara Nyɔsʋaa 'kamapläa 'mlɩ. 30'Asɩ ‑mölöö bä 'ü 'palaa' dɛrɩtäa ‑tɔrʋpɩɔ, 'ünya ‑srɩɩ 'wliklɩ bäa, ‑bɛ ‑mülü bäa' 'wliklɩ, 'kä 'ünya ‑srɩɩ dɛrɩtäpa#13.30 Juifë nyra nyüülü 'nyɩa' juifë bä 'üü 'ü 'daa. Juifënyüülü nɩ, 'ü ma 'jä 'üa nyüfë, 'ü nɩnɩa 'ü 'ma Nyɔsʋa ‑gbakä 'ünya ‑si ‑mülü 'wʋ..»

'Sɩrɩ Jesu ‑waa' Jerusalɛɛmë

Matiö 23.37-39

31'Ia ‑srɩ#13.31 ‑srɩ: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: «'Ia 'taɩn 'lɩ nɩ». 'lɩ nɩ, Farisinyüü ‑mölöö nya jijrö Jesu ‑gba; 'ünya ‑gbala 'ɔɔn ‑maa: «Mi, sɔ ‑tɛ, Erɔɔdë 'bata 'ɔmä ‑mɩ 'bla.» 32'Ɔ ‑nëma nɩ: «'Ama mi nɩ, 'ba ‑gbala ‑taa yrʋkänyɔɔlɔ#13.32 yrʋkänyɔɔ: Grɛɛkëwiili 'ü nö: «mi ‑a ‑gbala ‑taa bʋbɔlʋ». Bʋbɔlʋlɔ nɩ, 'klʋɛɛa mrɛɛ bäsaa, 'u kä yrʋ.: ‹'Bala 'saarɩ ‑gälɩ ‑a mi ‑sraakäpɩ, 'a ‑plɩɩ 'mä domüüa pɛprɛkʋ bɩa, ‑bɛ 'mä nyüüa 'pɔpʋɔkʋ dɛrɩbɩa; jrüü tääa ‑srɩ 'lɩ 'kä 'nyaa 'na 'jrʋpa 'wlara.› 33‑Maa 'n kä ‑a 'nyɛ 'nyʋfɔ 'saarɩ, ‑sraakäpɩ nyra 'ia ‑srɩmɩadɛrɩ, 'mä Jerusalɛɛmë 'tɔ; 'be 'inyɩ 'na ‑a 'na 'kä nyɔsʋaamlɩpalanyɔɔ 'mä ‑pasa ‑pɩɔ järä 'ima 'nyɩ Jerusalɛɛmë ‑a bä.

34«‑Awɛɛ Jerusalɛɛmë, Jerusalɛɛmë, ‑mɔ 'blaaa' nyɔsʋaamlɩpalanyüü 'kä ‑kaakla nyüülü 'ü jaa' ‑mɩ 'täkë. 'Wʋ ‑srüplɛɛ 'wʋ 'n 'bata ‑na 'jüa ‑gbapaplakʋ ‑beere sapëgoolu papla 'ua 'jü 'ua ‑pëkateri le? ‑Maa 'anyɩ 'nyie ‑a 'nyie. 35‑Jää, 'ana nyuku nya ‑plɩɩ tɩɔa. 'Cɩcasa 'n ‑gbala 'amɩ, 'a ‑ka ‑nëmä 'mɩ ‑a 'jä 'jä 'kä 'anya ‑srɩɩ 'daa: ‹‑Jɔrʋ pala nyɔɔlɔ jröröa' 'Pläkänyɔɔa 'nyrɩklɩ#13.35 'Lɩbrɛrɛpɔɔkʋ 118.26.!› »

Iliyochaguliwa sasa

Lukë 13: Bakwé

Kuonyesha

Shirikisha

Nakili