ମାଥିଉ 10
10
ଯୀଶୁର୍ ବାରଗଟ୍ ଚେଲା
(ମାର୍କ ୩:୧୩-୧୯; ଲୁକ ୬:୧୨-୧୬)
1ଯୀଶୁ ନିଜାର୍ ବାରଗଟ୍ ଚେଲାମ୍ନ୍କେ ତାର୍ ଲ୍ଗେ କୁଦ୍ଲା ଆର୍ ସେମ୍ନ୍କେ ବୁତ୍ଆତ୍ମା ଚାଡାମ୍କେ ଅଦିକାର୍ ଦିଲା, ଆରେକ୍, ସ୍ବୁ ପର୍କାର୍ ରଗ୍ ଆର୍ ସ୍ବୁ ପର୍କାର୍ ବେମାର୍ ବ୍ଲ୍କ୍ରୁକେ ଅଦିକାର୍ ଦିଲା। 2ସେ ବାରଗଟ୍ ହ୍ଟାଇଲା ଚେଲାମ୍ନ୍କାର୍ ନାଉଁ, ହ୍ର୍ତୁ ଶିମୋନ୍, ଯାକେ ପିତର୍ ବ୍ଲି କ୍ଉତି, ଆରେକ୍ ତାର୍ ସାନ୍ବାଇ ଆନ୍ଦ୍ରିୟ, ଜେବଦୀର୍ ହଇସି ଯାକୁବ ଆର୍ ତାର୍ ସାନ୍ବାଇ ଯୋହନ୍, 3ଫିଲିପ୍ପ ଆର୍ ବାର୍ଥଲମୀ, ଥୋମା ଆର୍ ସିସ୍ତୁ ଆଦାଇକ୍ରୁ ମାଥିଉ, ଆଲଫିର୍ ହଇସି ଯାକୁବ ଆର୍ ତଦ୍ଦିୟ, 4ଦେଶ୍ ସେବାକ୍ରୁ ଶିମୋନ୍ ଆର୍ ଇଷ୍କାରିୟତ୍ ଯିହୁଦା, ଯେ ଯୀଶୁକେ ଶ୍ତ୍ରୁ ଆତେ ସ୍ହ୍ରିଦିଲା।
ବାରଗଟ୍ ଚେଲାକେ ହ୍ଟାଇଲା
(ମାର୍କ ୬:୭-୧୩; ଲୁକ ୯:୧-୬; ୧୦:୪-୧୨)
5ଯୀଶୁ ଇ ବାରଗଟ୍ ଚେଲାକେ ହ୍ଟାଉତା ବ୍ଳ୍ ସେ ସେମ୍ନ୍କେ ଆଦେଶ୍ ଦେଇକ୍ରି କଇଲା, “ଯିହୁଦି ଚାଡି ବିନ୍ଜାତିର୍ ଲକ୍ମ୍ନ୍କାର୍ ଦେଶେ ଜାହାନାଇ, ଆର୍ ଶମିରୋଣୀୟ ମ୍ନାର୍ ସ୍ହରେ ଜାହାନାଇ, 6ମ୍ତର୍ ଇସ୍ରାଏଲ୍ ଦେଶାର୍ ଲକ୍ମ୍ନ୍ ମେଣ୍ଢା ହର୍ ଆଜ୍ଲାଇ ଆତ୍ତି ସେମ୍ନ୍କାର୍ ଲ୍ଗେ ଯାହା। 7ଆରେକ୍, ଜ୍ମ୍ ଜ୍ମ୍ ସେମ୍ନ୍କେ ପର୍ଚାର୍ କ୍ରି କ୍ଉଆ, ସ୍ର୍ଗ୍ ରାଇଜ୍ ଲ୍ଗେ ଆଇଲିବେ ବ୍ଲି। 8ବେମାରି ଲକ୍ମ୍ନ୍କେ ବ୍ଲ୍ କ୍ରା, ମ୍ଲା ଲକ୍ମ୍ନ୍କେ ଜୀବନ୍ ଦିଆସ୍, କୁଷ୍ଟରଗି ମ୍ନ୍କେ ବ୍ଲ୍ କ୍ରା, ବୁତ୍ଆତ୍ମା ଡ୍ସ୍ଲା ଲକ୍କେ ବୁତ୍ ଚାଡାଉଆ। ତୁମିମ୍ନ୍ ଜୁଇ ଅଦିକାର୍ ତ୍ନେ ତ୍ନେ ହାଇଆଚାସ୍, ସେରି ବିନ୍ ଲକ୍ମ୍ନ୍କେ ହେଁ ତ୍ନେ ତ୍ନେ ଦାନ୍ କ୍ରା। 9ତୁମାର୍ ଜ୍ଙ୍ଗିଆର୍ ମଣାଇ ସନାର୍ ଅଦ୍ଲି କି ରୁହା ଅଦ୍ଲି କି ତାମ୍ବାର୍ ଅଦ୍ଲି ନିଆନାଇ, ଆରେକ୍ ବାଟେ ଜାତାବ୍ଳ୍ ମଣା ନିଆନାଇ, 10ତୁମିମ୍ନ୍ ଗଟେକ୍ ଆଙ୍ଗି ହ୍ଜି ଜାହା, ହାଣ୍ତାଇ କି ଡାଙ୍ଗ୍ ହେଁ ଦ୍ରି ଜାହାନାଇ, କାଇତାକ୍ ଜୁଇଲକ୍ କାମ୍ କ୍ର୍ତି ସେ ଲକ୍କେ ନିଚୟ୍ କାମ୍କେ କାଦି ମିଳେଦ୍। 11ଆର୍ ତୁମିମ୍ନ୍ ଜୁଇ ସ୍ହରେ କି ଗାମେ ହେଁ ହୁରାସ୍, ସେତି କୁଇଲକ୍ ବ୍ଲ୍, ସେରି କଜା ଆର୍ ସେ ଗାମ୍ ଚାଡି ଜାତା ହ୍ତେକ୍ ସେ ଗ୍ରେ ସେ ରିଆ। 12ଆର୍ ତୁମି ଜୁଇ ଗ୍ରେ ହୁରାସ୍, ତ୍ବେ ସେ ଗ୍ର୍କେ ଆଶିର୍ବାଦ୍ ଦେଇକ୍ରି କ୍ଉଆ ଇଶ୍ଵରାର୍ ଶାନ୍ତି ତୁମାର୍ ଉହ୍ରେ ଆସ। 13ଯଦି ସେ ଗ୍ରାର୍ ଲକ୍ ସେ ଶାନ୍ତି ହାମ୍କେ ଯଗ୍ୟ ରେଇଦ୍ ତ୍ବେ ସେ ଶାନ୍ତି ସେମ୍ନ୍କାର୍ ଉହ୍ରେ ଆସେଦ୍, ଯଦି ସ୍ର୍ଗେ ଶାନ୍ତି ହାଉତା ଲକ୍ ନ୍ରେତି ତ୍ବେ, ସେରି ଶାନ୍ତି ତୁମାର୍ ଲ୍ଗେ ଲେଉଟିକ୍ରି ଆସେଦ୍। 14ଆରେକ୍, ଯେ କେ ତୁମୁକେ କୁଇ ଗ୍ରାର୍ ଲକ୍ କି ସ୍ହରାର୍ ଲକ୍ ତୁମୁକେ କୁଦି ନ୍କେର୍ତି କି ତୁମାର୍ କ୍ତାଶୁଣି ନ୍କେର୍ତି, ତ୍ବେ ସେତି ତୁମାର୍ ହାଦାର୍ ଦୁଡି ହାହଡି ଦିଆସ୍। 15ମୁଇ ତୁମୁକ୍ମ୍ନ୍ ସ୍ତ୍କ୍ରି କ୍ମ୍ଲେ ଯେ, ଶେସ୍ ବିଚାର୍ ଦିନ୍ ଇଶ୍ୱର୍ ସଦୋମ୍ ଗମୋରା ଗାମାର୍ ଲକ୍ମ୍ନ୍କାର୍ ଡ୍ଣ୍ଡ୍ ତ୍ଇହ୍ଣି ଅଦିକ୍ ଡ୍ଣ୍ତ୍ ଇ ସ୍ହରାର୍ ଲକ୍ମ୍ନ୍କେ ଦେଇଦ୍।”
ଆସ୍ତା ଦିନାର୍ ତାଳ୍ନାର୍ କ୍ତା
(ମାର୍କ ୧୩:୯-୧୩; ଲୁକ ୨୧:୧୨-୧୭)
16“ଦ୍କା, ମୁଇ ତୁମୁକ୍ମ୍ନ୍ ହୁଣ୍ଡାଳ୍ ମ୍ନ୍କାର୍ ଲ୍ଗେ ମେଣ୍ଢା ହର୍ କ୍ରି ହ୍ଟାମ୍ଲେ, ତ୍ବେ ତୁମିମ୍ନ୍ ସାହ୍ ହ୍ର୍ ବୁଦିମାନ୍ ଆର୍ ହାରୁଆ ହର୍ ଦ୍ରମ୍ ଅଉଆ। 17ମ୍ତର୍ ମାନାଇମ୍ନ୍କାର୍ ତ୍ଇହ୍ଣି ଜାଗ୍ରତ୍ ଅଇରିଆ, ବ୍ଲେକ୍ ଲକ୍ମ୍ନ୍ ତୁମୁକ୍ ବାନ୍ଦିକ୍ରି ବିଚାର୍ କ୍ର୍ତା ପରିଷଦ୍ ତ୍ଇ ନେତି ଆର୍ ଯିହୁଦିମ୍ନ୍କାର୍ ପାର୍ତେନା ଗ୍ର୍ଲ୍ଗେ କ୍ର୍ଡା ସ୍ଙ୍ଗ୍ ମାର୍ତି। 18ଆରେକ୍, ତୁମିମ୍ନ୍ ମକେ ବିଶ୍ବାସ୍ କ୍ଲାସ୍ ଲାଗି ଲକ୍ମ୍ନ୍ ତୁମୁକେ ଶାସନ୍କ୍ର୍ତା ମ୍ନ୍କାର୍ ଲ୍ଗେ ଆର୍ ର୍ଜାମ୍ନ୍କାର୍ ଲ୍ଗେ ଆଣି ବିଚାର୍ କ୍ର୍ତି। ତ୍ବେ ଅନ୍କାର୍ ତୁମିମ୍ନ୍ ସେମ୍ନ୍କେ ଆର୍ ଯିହୁଦି ଚାଡି ବିନ୍ଜାତିର୍ ଲକ୍ମ୍ନ୍କେ ଇଶ୍ଵରାର୍ ସୁବ୍କ୍ବର୍ କ୍ମ୍କେ ସୁଜଗ୍ ହାଉଆସ୍। 19ମ୍ତର୍ ଜ୍ଡେବ୍ଳ୍ ସେମ୍ନ୍ ତୁମାର୍ ବିଚାର୍ କ୍ର୍ତି, ସ୍ଡେବ୍ଳ୍ ତୁମିମ୍ନ୍ କାଇରି କଇନ୍ଦ୍ ଆର୍ କ୍ନ୍କ୍ରି କଇନ୍ଦ୍, ଇ ସ୍ବୁ ବିଷୟ୍ ଚିନ୍ତା କ୍ରାନାଇ, କାଇତାକ୍ ଟିକ୍ ସମୟ୍ ଅଇଲେକ୍ ସେରି ଇଶ୍ଵରାର୍ ଆତ୍ମା ତୁମୁକେ ଜାଣାଇ ଦେଇଦ୍। 20ବ୍ଲେକ୍ ତୁମିମ୍ନ୍ ନିଜେ କାଇରି କ୍ମ୍କେ ନ୍ହେଳେ, ମ୍ତର୍ ଉବା ଇଶ୍ଵରାର୍ ପବିତର୍ ଆତ୍ମା, ଯେ କି ତୁମାର୍ ମ୍ନ୍ ବିତ୍ରେ କ୍ତା କ୍ଉତି, ସେ ସ୍ବୁକ୍ତା କଇଦ୍। 21ମର୍ ଉହ୍ରେ ବିଶ୍ବାସ୍ କ୍ଲାଲାଗି ଲକ୍ମ୍ନ୍ ତାକାର୍ ନିଜାର୍ ବାଇ ବେଣିମ୍ନ୍କେ ମ୍ର୍ନେ ମାରୁକେ ଲକ୍ମ୍ନ୍କାର୍ ଆତେ ଶ୍ହ୍ରି ଦେତି, ଆର୍ ଉବାଦି ହେଁ ତାକାର୍ ହିଲାଜିଲାମ୍ନ୍କେ ସେନ୍କ୍ରି କ୍ରେଦ୍। ହଇଦି ଜିଦିମ୍ନ୍ ହେଁ ତାକାର୍ ଆଇସିର୍ ଉବାସିର୍ ବିରୁଦେ ଉଟିକ୍ରି ସେମ୍ନ୍କେ ମ୍ର୍ନେ ମାର୍ତି। 22ଆର୍ ମକେ ବିଶ୍ବାସ୍ କ୍ଲାସ୍ ଲାଗି ସ୍ବୁ ଲକ୍ମ୍ନ୍ ତୁମୁକେ ଆର୍ଲା କ୍ର୍ତି, ମ୍ତର୍ ଯେ ସ୍ରାସ୍ରି ହ୍ତେକ୍ ସାସ୍ ଦ୍କିକ୍ରି ରେଇଦ୍, ସେ ହ୍କା ଉଦାର୍ ହାଇଦ୍। 23ମ୍ତର୍ ସେମ୍ନ୍ ଜ୍ଡେବ୍ଳ୍ ତୁମୁକେ ଗଟେକ୍ ଗାମେ ଲିନ୍ଦା କ୍ର୍ତି, ତ୍ବେ ଆର୍ଗଟ୍ ଗାମେ ହ୍ଳାଇ ଜାହା, ମୁଇ ତୁମୁକ୍ମ୍ନ୍ ସ୍ତ୍କ୍ରି କ୍ମ୍ଲେ, ଇସ୍ରାଏଲାର୍ ସ୍ବୁ ଜାଗାଇ ପର୍ଚାର୍ ନ୍ସେର୍ତା ଆଗେ ମୁଇ ମାନାଇ ହିଲା ଆସିନ୍।
24ଗୁରୁ ତ୍ଇହ୍ଣି ଚେଲା ବ୍ଡ୍ଅଇ ନ୍କେରେ ଆର୍ ଦାସ୍ ସାଉକାର୍ ତ୍ଇହ୍ଣି ବ୍ଡ୍ନଇ। 25ଚେଲା ନିଜାର୍ ଗୁରୁ ଆର୍ ଦାସ୍ ନିଜାର୍ ମାଲିକ୍ ଅଇଲେକ୍ ସେମ୍ନ୍କାର୍ ଗିନେ ସେରି ବ୍ଲ୍। ମ୍ତର୍ ସେମ୍ନ୍ ଜ୍ବେ ଗ୍ର୍ ମାଲିକ୍କେ ବାଲ୍ଜିବୂଲ୍ ଶଇତାନ୍ ବ୍ଲି କଇଲାଇ ଆତ୍ତି, ତ୍ବେ ଗ୍ରାର୍ ଲକ୍କେ ଆରେକ୍ ବେସି କ୍ରାପ୍ କ୍ଉତି।”
ଡିରାନାଇ
(ଲୁକ ୧୨:୨-୭)
26“ତ୍ବେ ମାନାଇମ୍ନ୍କେ ଡିରାନାଇ। କାଇତାକ୍ ମାନାଇର୍ ଲ୍ଗେ ଜାଇରି ହେଁ ଲୁକି କ୍ରିଆଚେ ସେରି ଇଶ୍ୱର୍ ଜାଣ୍ଉତାର୍ ଗିନେ ଲୁକି କ୍ରିଆଚେ। ଜୁଇରି ସ୍ବୁ ବିଷୟ୍ ଡାହି ଅଇଲିଆଚେ ସେ ସ୍ବୁ ଇଶ୍ୱର୍ ଉଜାଳ୍କେ ଡାହି ଅଇଲିଆଚେ। 27ମୁଇ ଜୁଇରି ତୁମୁକ୍ ଲୁକ୍ଣେ କଇଲେନି, ସେରି ତୁମିମ୍ନ୍ ଲକ୍ମ୍ନ୍କାର୍ ଲ୍ଗେ ଜାଇ କ୍ଉଆ, ଆର୍ ଜୁଇସ୍ବୁ କ୍ତା ଗ୍ର୍ ବିତ୍ରେ କଇଲେନି, ସେ ସ୍ବୁ ଗ୍ରାର୍ ଚାତ୍ ଉହ୍ରେ ଟିଆ ଅଇକ୍ରି ସ୍ବୁ ଲକ୍ମ୍ନ୍କେ କ୍ଉଆ। 28ଆର୍ ଜୁଇ ଲକ୍ମ୍ନ୍ ଗ୍ଗାଳ୍କେ ନ୍ଷ୍ଟ କ୍ରୁହାର୍ତି, ମ୍ତର୍ ଆତ୍ମାକେ କାଇକ୍ରୁ ନାହାର୍ତି, ସେମ୍ନ୍କେ ଡିରାନାଇ। ଯେ ଗ୍ଗାଳ୍ ଆର୍ ଆତ୍ମାକେ ନ୍ର୍କେ ନ୍ଷ୍ଟ କ୍ରୁହାରେ, ସେ ଇଶ୍ଵର୍କେ ଡିରା। 29ଜଳେକ୍ ଜ୍ଟିଆ ଚେଳେ କାଇରି ଗଟେକ୍ ଟ୍କାଇ ବିକ୍ତି ନାଇ? ଆର୍ ସେମ୍ନ୍କାର୍ ବିତ୍ରେ ଗଟେକ୍ ହେଁ ତୁମାର୍ ଉବା ଇଶ୍ଵରାର୍ ଇଚା ନଇତେ ବୁଇଁଏ ଅଦ୍ରି ନ୍ମେର୍ତି। 30ସେନ୍କାର୍ ଇଶ୍ୱର୍ ତୁମାର୍ ଜୀବନାର୍ ସ୍ବୁ କ୍ତାକେ ଜାଣେ, ଜନ୍କ୍ରି କି ତୁମାର୍ ମୁଣ୍ଡେ କେତେକ୍ ବାଳ୍ ଆଚେ, ସେରି ହେଁ ଜାଣିଆଚେ। 31ସେତାକ୍ ଡିରାନାଇ, ତୁମିମ୍ନ୍ ଇଶ୍ଵରାର୍ ମୁଏ ଜ୍ଟିଆ ଚେଳେ ମ୍ନ୍କାର୍ ତ୍ଇହ୍ଣି ଅଦିକ୍ ବ୍ଡ୍।”
ଯୀଶୁକେ ମାନାସ୍ କି ନ୍ମାନାସ୍
(ଲୁକ ୧୨:୮,୯)
32“ଆର୍, ଯେ କେ ଲକ୍ମ୍ନ୍କାର୍ ଆଗେ ମୁଇ ମାନାଇ ହିଲାର୍ ଚେଲାବ୍ଲି କ୍ଉତି, ମୁଇ ହେଁ ମର୍ ସ୍ର୍ଗାର୍ ଉବାର୍ ଆଗେ ତାକେ ମର୍ ଚେଲାବ୍ଲି କଇନ୍ଦ୍। 33ମ୍ତର୍ ଯେ ଲକାର୍ ଆଗେ ମର୍ ଚେଲାନଇ ବ୍ଲି କ୍ଉତି, ତ୍ବେ ମୁଇ ହେଁ ମର୍ ସ୍ର୍ଗାର୍ ଉବାର୍ ମୁଏ ତାକେ ମର୍ ଚେଲା ନ୍ଇ ବ୍ଲି କଇନ୍ଦ୍।”
ଶାନ୍ତିର୍ ବାଦୁଲେ କ୍ଣ୍ତା
(ଲୁକ ୧୨:୫୧-୫୩; ୧୪:୨୬,୨୭)
34“ମୁଇ ଇ ହୁର୍ତିବି ତ୍ଇ ଲକ୍ମ୍ନ୍କାର୍ ବିତ୍ରେ ଶାନ୍ତି ଦେମ୍କେ ଆସିଆଚେ ବ୍ଲି ବାବାନାଇ। ମ୍ତର୍ ମୁଇ ଲକ୍ମ୍ନ୍କାର୍ ବିତ୍ରେ ବାଗ୍ ବାଗ୍ କ୍ରୁକେ ଆଇଲେଆଚି। 35କାଇତାକ୍ ମ୍ର୍ଗିନେ ହଇସି ଉବାସିର୍ ସ୍ଙ୍ଗ୍ ବିରଦ୍ ଅଇଦ୍ ଆର୍ ଜିସି ଆଇସି ସ୍ଙ୍ଗ୍ ବିରଦ୍ ଅଇଦ୍, ଆରେକ୍ ବୁଆର୍ସି ସ୍ତୁର୍ସି ସ୍ଙ୍ଗ୍ ବିରଦ୍ ଅଇଦ୍, 36ସେତାର୍ଗିନେ ତୁମାର୍ ନିଜାର୍ ଗ୍ରାର୍ ଲକ୍ ହ୍କା ତୁମାର୍ ବ୍ଡ୍ ଶ୍ତ୍ରୁ ଅଉତି। 37ଯେ ମ୍ର୍ ତ୍ଇହ୍ଣି ତାର୍ ନିଜାର୍ ଆଇସି ଉବାସିକେ ବେସି ଲାଡ୍ କ୍ରେଦ୍, ତ୍ବେ ସେ ମ୍ର୍ ଚେଲା ଅମ୍କେ ଯଗ୍ୟ ନାଇ, ଆର୍ ଯେ ହେଁ ତାର୍ ହଇସି ଜିସିକେ ମ୍ର୍ ତ୍ଇହ୍ଣି ବେସି ଲାଡ୍ କ୍ରେଦ୍, ତ୍ବେ ସେ ହେଁ ମର୍ ଚେଲା ଅମ୍କେ ଯଗ୍ୟ ନାଇ। 38ଆର୍ ଯେ ତାର୍ ନିଜାର୍ ଦୁକ୍କ୍ଷ୍ଟ ହର୍ କୁର୍ଶକାଟ୍କେ ବଇକ୍ରି ମର୍ହ୍ଚେ ହ୍ଚେ ଆସିନ୍କେରେ, ତ୍ବେ ସେ ମର୍ ଚେଲା ଅମ୍କେ ଯଗ୍ୟ ନାଇ। 39ଯେ ତାର୍ ନିଜାର୍ ଜୀବନ୍କେ ଉଦାର୍ କ୍ରୁକେ ଚେଷ୍ଟା କ୍ରେଦ୍, ସେ ତାର୍ ନିଜାର୍ ଜୀବନ୍କେ ଆରାଇଦ୍, ଆର୍ ଯେ ମର୍ଗିନେ ତାର୍ ନିଜାର୍ ଜୀବନ୍କେ ଆରାଇଦ୍, ତ୍ବେ ସେ ତାର୍ ଜୀବନ୍କେ ସ୍ତ୍କ୍ରି ଉଦାର୍ କ୍ରେଦ୍।”
ଇନାମ୍ ବିଷୟେ ଶିକ୍ୟା
(ମାର୍କ ୯:୪୧)
40“ଯେ ତୁମୁକେ ମାନ୍ତି, ସେ ମକେ ମାନ୍ତି, ଆର୍ ଯେ ମକେ ମାନ୍ତି, ତ୍ବେ ସେ ମକେ ହ୍ଟାଇରିଲା ଇଶ୍ଵର୍କେ ହେଁ ମାନ୍ତି। 41ଯେ ଗଟେକ୍ ବବିଶତ୍ କ୍ତା କ୍ଉତା ଲକ୍କେ ମାପ୍ରୁର୍ କ୍ବର୍କାରିଆ ବ୍ଲି ତାକେ ଆଦର୍ କ୍ରେଦ୍, ତ୍ବେ ସେ ବବିଶତ୍ କ୍ତା କ୍ଉତାଲକ୍ ହାଉତା ଇନାମାର୍ ସ୍ମାନ୍ ଇନାମ୍ ଇଲକ୍ ହେଁ ହାଇଦେ, ଆର୍ ଯେ ଗଟେକ୍ ଦ୍ରମ୍ ଲକ୍କେ, ଦ୍ର୍ମାର୍ ଲକ୍ବ୍ଲି ଆଦର୍ କ୍ରେଦ୍, ତ୍ବେ ସେ ଦ୍ରମ୍ ଲକ୍ ହାଉତା ଇନାମାର୍ ସ୍ମାନ୍ ଇନାମ୍ ଇଲକ୍ ହେଁ ହାଇଦେ। 42ଆରେକ୍, ଯେ ହେଁ ଇ ସାନ୍ ଲକ୍ମ୍ନ୍କାର୍ ବିତ୍ରେ ଏକ୍ଲାକେ ମର୍ ଚେଲାବ୍ଲି ଗଟେକ୍ ଗିନା କାକର୍ ହାଣି କାମ୍କେ ଦେଇଦ୍, ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ ସେ କ୍ବେ ହେଁ ତାର୍ ଇନାମ୍ ଆରାଇ ନ୍କେରେ।”
Iliyochaguliwa sasa
ମାଥିଉ 10: BDVNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
