मर्कुस 1
1
बप्तिस्मा देलाहार युहन्नाइ सुसमचार प्रचार कर्ल
(मति ३:१-१२; लुका ३:१-१८; युहन्ना १:१९-२८)
1परमेसोरक छावा येसु ख्रिस्टक सुसमचार यस्के सुरु भइत। 2परमेसोरेइ कहिकेभइल कुरा यसइया अगमबक्ताइ यस्के लेख्ल बाटत,
“सुनुक्, तेर पइडा तयार पारिके कइकुन
मोइ मेर दुतके तेर आघु-आघु पाठाते बाटम।
3उजाड-ठाउयँ एक जेनाइ बड्क सोरेइ कहतिन् बाटत,
‘परमप्रभुक पइडा तयार पारुक्,
ओनेन् हिठ्लाहार पइडासब सोझो बानाउक्!’”
4बप्तिस्मा देलाहार युहन्ना उजाड-ठाउयँ देखार पोरिकुन मानुससब्के यस्न कइकुन प्रचार कर्ल, “तोहेसब पाप छेमा पाइके लागि आफुइ कर्ल पाप छाडिकुन बप्तिस्मा लेओ हसे परमेसोरेइ तेउह्रसब्क पाप छेमा करिदेताहात्।” 5उहइ बेलाके यहुदिया इलाका र यरुसलेम सहरक सभइ मानुससब युहन्नालघि आइकुन, आफुइ कर्ल पाप सुइकारिकुन युहन्नासे यर्दन नदियँ बप्तिस्मा लेल।
6युहन्नाइ उटक रउसे बिन्ल लुगा लागाते रहइ कने, बेकोडोचाहिँ छालाक पटुकाइ बान्ते रहइ। उहाइ बोन मह र फटेङ्रा खइते रहइ। 7उहाइ मानुससब्के यस्न कइकुन प्रचार कर्ल, “जोनो मोइकते पाछु अइताहात् ओनेन् मोइकते सक्तिसालि बाटत, मोइ त अन्धिकरिकुन ओनेन्क जुत्ताक तोनो फुच्काइके लायक पुनु नइजे बाटम। 8मोइ तेह्रासब्के पानिइ बप्तिस्मा देल बाटम, तर ओनेनेइ तेह्रासब्के पबित्र आत्माइ बप्तिस्मा देताहात्।”
येसुक बप्तिस्मा र जाँच
(मति ३:१३—४:११; लुका ३:२१-२२; ४:१-१३)
9युहन्नाइ प्रचार करिराख्ल बेलाके येसु गालिलक नासरत सहरकमाटे आइकेभइल, हसे ओनेनेइ युहन्नासे यर्दन खोलायँ बप्तिस्मा लेइकेभइल। 10येसु पानिसे बाहार निस्कल बिथिकइ सोर्ग उघ्रल र ढुकुरि जस्नइ पबित्र आत्माके आफ्न उप्र झर्ते देखिकेभइल। 11हसे सोर्गकमाटे यस्न आबाज अइल, “तोइ मेर मायालु छाहोम् हखस, मोइ तेरसाङ एकदमइ खुसि बाटम।”
12हसे ओख्निहिँ पबित्र आत्माइ येसुके उजाड-ठाउयँ लेजिकेभइल, 13सइतानेइ उजाड-ठाउयँ चालिस दिनसमन ओनेन्के पापयँ फासाइके जाँच कर्ल। उछिका बोनक जनावरसब पुनु रहइ, र सोर्गदुतसब आइकुन ओनेन्के मानमन्ता कर्ल।
येसुइ चार जेना जालहारिसब्के बोलाइकेभइल
(मति ४:१२-२२; लुका ४:१४-१५; ५:१-११)
14युहन्ना झेलखानायँ थुनिल बेलाके, येसु गालिलयँ जाइकुन परमेसोरक सुसमचार प्रचार करिके लाग्ल। 15ओनेनेइ कहिकेभइल, “परमेसोरेइ तोकिकेभइल बेला पुरा भइल, परमेसोरक राज्जे नजिकइ आइपुग्ल बाटइ। पस्चताप करिकुन पापसब छाडिकुन सुसमचारयँ बिस्वास करउ।”
16येसु गालिल तालक छेओ-छेओ जइतेखना, ओनेनेइ सिमोन र उक्र भाहिक अन्द्रियासके जाल खेपिराख्ते देखिकेभइल, किकेकने उसब जालहारि रहत। 17हसे येसुइ उसब्के कहिकेभइल, “आओ, मेर पाछु लागउ, मोइ तेह्रासब्के मानुसके धर्लाहार जालहारि बानातम।” 18इसे कुरा सुन्ल बिथिकइ उसब आफ्न जालसब छाडिकुन येसुक पाछु लाग्ल। 19चुत्कि ओताहाँ जइलपाछु, ओनेनेइ जब्दियाक छाहोकसब याकुब र उक्र भाहिक युहन्नाके डोङायँ बोसिकुन जाल साङिराख्ते देखिकेभइल। 20हसे येसुइ उसब्के ओख्निहिँ बोलाइकेभइल, र आफ्न बुबा जब्दियाके काम कर्लाहारसबसाङ डोङायँ छाडिकुन उसब पुनु येसुक पाछु लाग्ल।
येसुइ भुत लाग्ल मानुस निक पारिकेभइल
(लुका ४:३१-३७)
21येसु आफ्न चेलासबसाङ कफर्नहुम सहरयँ जाइकेभइल, हसे नात्लिक दिनयँ सभाघर भितर पोसिकुन ओनेनेइ सिछ्या देइके थालिकेभइल। 22उछिका येसुक सिछ्या सुन्लाहार मानुससब छक्कइ पोर्ल, किकेकने ओनेनेइ धर्मगुरुइ जस्न नइजे, तर बड्क अधिकारसाङ सिखातिन रहत।
23उसे सभाघरयँ एक जेना भुत आत्मा लाग्ल मानुस पुनु रहइ। उहाइ चिच्चेतिन् कहल, 24“हे नासरतक येसु, तोहे हाम्राके किति कारिके लाग्ल? किति तोहे हाम्राके मासिके आइकेभइल हखउ? मोइ पाउके परमेसोरेइ पाठाइकेभइल पबित्र जन हखउ कइकुन चिन्तम्।”
25तर येसुइ उख्राके हप्कातिन कहिकेभइल, “चुप्ला, र इसे मानुसकमाटे निस्किकुन जाउक्।” 26ओख्निहिँ उसे मानुसके लछारपछार पारिकुन भुत आत्मा बड्क सोरेइ चिच्चेतिन् निस्किकुन जइल। 27इसे देखिकुन उछिका भइल सभइ मानुससब छक्कइ पोर्तिन एक-अर्कसे कहिके थाल्ल, “नइजे, इसे किति हखइ? इसे त लउठा सिछ्या रलाहाइ, इहाइ त अधिकारसाङ भुत आत्मासब्के पुनु आग्या कर्ते रलाहाइ, हसे उसबेइ पुनु इक्र आग्या मान्ते रलाहाइ।” 28हसे येसुक चर्चा ओख्निहिँ गालिलक चारिओर फइलिल।
येसुइ धेरइ मानुसके निक बानाकेभइल
(मति ८:१४-१७; लुका ४:३८-४१)
29उपाछु येसु ओख्निहिँ सभाघरसे निस्किकुन याकुब र युहन्नासाङ सिमोन र अन्द्रियासक घरयँ जाइकेभइल। 30उछिका सिमोनक सासुक् जोरोइ कर्तेखना ठावाहिँ थल पोर्लि रहि, जोनो कुरा उसबेइ ओनेन्के पुग्ल बिथिकइ सुनाल। 31हसे येसु नजिकइ जाइकुन उक्र हाथ धरिकुन उठाइकेभइल र उख्राके जोरोइ छाडिहाल्ल, उपाछु उहाइ ओनेन्सब्क मानमन्ता कर्लि।
32घाम बुडिसक्लपाछु उसे ब्यार मानुससबेइ मन्देल र भुत लाग्लसब्के येसु लघि आन्ल। 33हसे सहरभरिक मानुससब उसे घरक केवारिहिँ जम्मा भइल। 34उछिका येसुइ धेरइ थरिक रोग भइल मन्देलसब्के निक बानाइकेभइल। ओनेनेइ धेरइ भुतसब पुनु निस्काइकेभइल, येसुइ उसे भुतसब्के बोराइके नइजेदेइकेभइल किकेकने ओनेन्के उसबेइ चिन्ल रहइ।
येसुइ गालिलयँ प्रचार करिकेभइल
(लुका ४:४२-४४)
35कालुपल्ट बेहेन उजुङ भइलाहारकते आघु येसु उठिकुन घरसे बाहार सुनसान ठाउयँ पार्थाना करिके जाइकेभइल। 36उहइ बेलाके सिमोन र उक्र साङ्घातिसब ओनेन्के खोज्तिन जइल, 37जब येसुके भेट्ल तब उसबेइ कहल, “तेउह्राके सभुनि खोजिराख्ते बाटत।”
38इसे सुनिकुन येसुइ कहिकेभइल, “आओ, हामे नजिकइक अरु गाउयँ जाहुँ। मोइ उछिका पुनु प्रचार करिके पोरित, किकेकने मोइ इहइ कामक लागि अइल हखम।” 39उपाछु येसु गालिलयँ भइल उसब्क सभइ सभाघरयँ प्रचार कर्तिन र भुतसब निस्कातिन हिठिकेभइल।
येसुइ कोररोगिके निक बानाइकेभइल
(मति ८:१-४; लुका ५:१२-१६)
40एक जेना कोररोगि मानुस येसुलघि आइकुन ठेउनो धसिकुन बिन्ति कर्ल, “तेउह्र इच्छा भइने मेह्राके निक बानाइके सक्ताहाउ।”
41इसे कुरा सुनिकुन ओनेन्क मन दयाइ भरिल, र आफ्न हाथेइ उख्राके छिउतिन कहिकेभइल, “मोइ चाहातम तोइ निक भउक्।” 42ओख्निहिँ उक्र कोररोग हेराइकुन निक भइहाल्ल। 43हसे ओनेनेइ उख्राके कडा आग्या देतिन् पाठाइकेभइल, 44“सुनुक्, तोइ इसे कुरा कोख्राहुके पुनु झुनकहुक, तर जाइकुन पुजेहेरिके देखाइकुन, आफु निक भइल कुरा मानुससब्के गवाहि देइके लागि मोसाक आग्या अनुसार भोक चाढाउक।” 45तर उसे मानुस उछिकमाटे निस्किकुन जइल, आफ्नि निक भइल कुरा सभइ मानुससब्के सुनाइके थाल्ल, जोक्र कारनसे येसु फेरि मानुससबेइ देख्लाहार करिकुन सहरयँ आइके नसकिकुन सुनसान ठाउयँ बोसिके जाइकेभइल, तर उछिका पुनु मानुससब चारिओरसे ओनेन्कलघि अइल।
Iliyochaguliwa sasa
मर्कुस 1: DRY
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2024 (Active), Mother Tongue Translators Society and Wycliffe Bible Translators, Inc. All rights reserved.
