लुका 3
3
बप्तिस्मा बयो युहन्नाको प्रचार
(मति ३:१-१२; मर्कुस १:१-८; युहन्ना १:१९-२८)
1रोम देसको माहाराजा तिबेरियसइ राज्य जाह्ङो पन्र बर्स स्यावो खेतो। ओउबेलाहाङ पन्तियस पिलातस यहुदिया छेत्रको ताह्ङो हाकिमि खेतो। हेरोद एन्तिपासइ#३:१ हेरोद एन्तिपास येसु नाःसास्याउधार्ना यहुदिहाङ राज्य जाह्ङो हेरोद एन्तिपास त तोओखे राजा हेरोदको चोः खेना। गालिल छेत्रहाङ राज्य जाह्ङुतो र ओउको हउ फिलिपइ इतुरिया र त्राखोनितिस छेत्रहाङ राज्य जाह्ङुतो, अनि लिसानियस त तोओ मान्ताइखे अबिलेने त तोओ छेत्रहाङ राज्य जाह्ङुतो। 2अनि हन्नास र कय्याफाखे ताह्ङो पुजारि खेचतो। ओउबेलाहाङले सुमा याक्मालो थाउहाङ परमेस्वरइ जकरियाको चोः युहन्नाकाय प्रचार जाह्ङ्साको लागि तोसास्यावा। 3युहन्नाइ यर्दन त तोओ खोलाको वरिपरिको जुदा थाउहाङ आल्ति मान्तालमकाय एतदाह्य्ति प्रचार जाह्ङाकान, “ल-लयको पापकाय चिःति पस्ताप जाह्ङ्नु र बप्तिस्मा लेःनु, अनि परमेस्वरइ निङको पाप छेमा जाह्ङ्ति बइतेनय।” 4एतहाइति यसय्या अगमबक्ताको कितापहाङ लेखओ नोःराय पुत्लाङ वाङा—
“सुमा याक्मालो थाउहाङ ताह्ङो हाउनयहाङ यातचाक नोःधय मुना,
‘प्रभु वाङ्साखेओ ल्याम तयार जाह्ङ्नु,
ओउ वाह्साखेओ ल्यामलम धेङ्ताक्नु।
5जुदा घोदुङ-याह्दुङलम पाह्म्सा परना,
जुदा दान्दा-कान्दा र वारलम लेङताक्सा परना।
गोःङ्तो मुओ ल्यामलम धेङताक्पाना,
र दुको ल्याम वाह्साकाय पेतो जाह्ङ्सा परना।
6अनि जुदा मान्तालमइ परमेस्वरको मुक्ति च्यउनानि।’#यस ४०:३-५”
7नाःतो मान्तालम युहन्नाकसय बप्तिस्मा लेःलाङ ओउकहाङ वाङाकाय। तर युहन्नाइ ओउमयकाय तोआथास, “अ बिखालु रुको सन्तानलम! ‘परमेस्वरइ जाह्ङ्साखेओ न्यायसय बेनसा खाइनातह्य्नि’ त दाह्य्ति निङकाय सुइ स्यान्तेआकाय? 8निङइ दोङ्सिले ल-लयको पापकाय चिःति फेआक्तिको लयको मन परमेस्वरकताङ द्याःन्तेनानि त खेया, ओउ अनुसारले वाह्न। तर ‘नि अब्राहामको सन्तान खेनातहि’ त दाह्या भन्दयहाङ निङ बेन्नातहि त म्हर्लाम। निङकाय ङाइ तोनेनाङ्स, परमेस्वरइ इ बाङलमसयमा अब्राहामको लागि सन्तान नाःताक्सा खाइसास्याउना। 9रुतहाङसयले ओल्ताक्साकाय सिङको तुङहाङ वसराय अःउति खायो मुना। पेओ साय साइमालो जुदा सिङकाय ओल्ति म्हेःहाङ काति वाइनानि।”
10“ओउतखेया, निइ दोह हाइसा परना?” त दाह्य्ति मान्तालमइ युहन्नाकाय ह्वताकानि।
11ओउ त्याङा, “यदि निङकुस निसज्यो लावनाय मुना त खेया, यातज्योमा नाःमालोलमकाय बइनु। र यदि निङकुस प्रसस्त जेःगालम मुना त खेया, योङक्रायोलमकाय बइनु।”
12तिरो लेःओ मान्तालममा बप्तिस्मा लेःलाङ वाङाकाय र युहन्नाकाय ह्वताकानि, “गुरु, निइखे दोह हाइसा परनाङ्सु त?”
13“सरकारइ तोओसय नाःतो तिरो लेःलाम” त दाह्य्ति युहन्ना त्याङा।
14सिपाहिलमइमा ओउकाय ह्वताकानि, “निइ दोह जाह्ङ्सा परना त?”
युहन्नाइ ओउमयकाय तोआथास, “कर जाह्ङ्ति अथबा अरुकाय स्याताहा नोःति सुकुसमा थेपो लेःलाम। बरु लयको तलब ह्येःउमात त्याक्नु।”
15मान्तालम मुक्ति बइसास्यावो ख्रिस्तकाय ल्युह्ङ्तिमुओ खेइतो अनि ओउमयइ लयमयको ल्हुङतुकहाङ “युहन्नाले ख्रिस्त खेना या?” त म्हरधय खेइतो। 16ओउत चिःति युहन्नाइ जुदाकाय तोआथास, “लउ, ङाइपाय निङकाय तिःको बप्तिस्मा बइनेनाङ्स, तर ङासय ताह्ङो यातचाक वाङ्सास्याउधय मुना। ङापाय ओउको जुत्ताको तुनुला फान्सामा ज्योङल। ओउइ निङकाय पबित्र ग्वालाम र म्हेःको बप्तिस्मा बइसास्याउलेना। 17परमेस्वरको अन्न क्रापो रा ओउइ लयको क्रुतइ चुम्सास्यावो मुना, क्रापाक्तिको पेओ अन्नलमखे भकारिहाङ त्युह्म्सास्याउना, तर पेमालो रोकलमखे गलमा म्हेत्मालो म्हेःहाङ काति फुःति वाइसास्याउना।”
18युहन्नाइ नाःतो अर्थिलम बइधय ओउमयकाय नाःतो तरिकासय परमेस्वरको पेओ खबर प्रचार जाह्ङाकान। 19राजा हेरोद एन्तिपासइ लयको पुःकमा हेरोदियासकाय लयको माचा जाह्ङोझ्यान्ते युहन्नाइ ओउकाय थत्ति जानाकान र ओउको जुदा पापलममा छ्यान्ति बयाकान। 20ओउत चिःति हेरोदइ युहन्नाकाय झेलकनहाङ कुङ्ति झन् पेमालो काम जाह्ङाकान।
येसुको बप्तिस्मा
(मति ३:१३-१७; मर्कुस १:९-११; युहन्ना १:३२-३४)
21यात दिन जुदा मान्तालमइ बप्तिस्मा लेःधय जाह्ङ्धार्ना येसुइमा बप्तिस्मा लेःसास्यावा। जब येसुइ प्राथना जाह्ङ्सास्याउधय खेतो, फेलबाङ फोला, 22अनि धुकुर वाःको रुपहाङ पबित्र ग्वालाम येसुकहाङ ग्ल्युह्ङ्ति वाङ्सास्यावा। अनि लाङकासय एतदाह्यो हाउनय वाङा, “नाङ ङाको राप्तो चोः खेतेना। ङा नाङकुस आन आसओ मुनाङ।”
येसु ख्रिस्तको पुर्खालम
(मति १:१-१७)
23जब येसुइ लयको पेओ खबर प्रचार जाह्ङ्सा थाल्सास्यावा, ओउको उमेर तिस बर्सच्युक स्यावो खेतो।
येसु योसेफको चोः खेना त दाह्य्ति मान्तालमइ चिःनितो।
योसेफ एलिको चोः खेना।
24 एलि मत्तातको चोः खेना।
मत्तात लेबिको चोः खेना।
लेबि मल्किको चोः खेना।
मल्कि यान्नाको चोः खेना।
यान्ना योसेफको चोः खेना।
25 योसेफ मत्ताथियासको चोः खेना।
मत्ताथियास आमोसको चोः खेना।
आमोस नहुमको चोः खेना।
नहुम इसलिको चोः खेना।
इसलि नग्गयको चोः खेना।
26 नग्गय माथको चोः खेना।
माथ मत्ताथियासको चोः खेना।
मत्ताथियास सेमिनको चोः खेना।
सेमिन योसेखको चोः खेना।
योसेख योदाको चोः खेना।
27 योदा योआननको चोः खेना।
योआनन रेसाको चोः खेना।
रेसा यरुबाबेलको चोः खेना।
यरुबाबेल सालतिएलको चोः खेना।
सालतिएल नेरिको चोः खेना।
28 नेरि मल्किको चोः खेना।
मल्कि अद्दिको चोः खेना।
अद्दि कोसामको चोः खेना।
कोसाम एलमादमको चोः खेना।
एलमादम एरको चोः खेना।
29 एर यहोसुको चोः खेना।
यहोसु एलिएजरको चोः खेना।
एलिएजर योरिमको चोः खेना।
योरिम मत्तातको चोः खेना।
मत्तात लेबिको चोः खेना।
30 लेबि सिमियोनको चोः खेना।
सिमियोन यहुदाको चोः खेना।
यहुदा योसेफको चोः खेना।
योसेफ योनानको चोः खेना।
योनान एल्याकिमको चोः खेना।
31 एल्याकिम मलेआको चोः खेना।
मलेआ मिन्नाको चोः खेना।
मिन्ना मत्ताथाको चोः खेना।
मत्ताथा नातानको चोः खेना।
नातान दाउदको चोः खेना।
32 दाउद यिसयको चोः खेना।
यिसय ओबेदको चोः खेना।
ओबेद बोअजको चोः खेना।
बोअज सल्मोनको चोः खेना।
सल्मोन नहसोनको चोः खेना।
33 नहसोन अम्मिनादाबको चोः खेना।
अम्मिनादाब एदमिनको चोः खेना।
एदमिन आरामको चोः खेना।
आराम हेस्रोनको चोः खेना।
हेस्रोन फारेसको चोः खेना।
फारेस यहुदाको चोः खेना।
34 यहुदा याकुबको चोः खेना।
याकुब इसाकको चोः खेना।
इसाक अब्राहामको चोः खेना।
अब्राहाम तेरहको चोः खेना।
तेरह नाहोरको चोः खेना।
35 नाहोर सरुगको चोः खेना।
सरुग रेउको चोः खेना।
रेउ पेलेगको चोः खेना।
पेलेग एबेरको चोः खेना।
एबेर सेलहको चोः खेना।
36 सेलह केनानको चोः खेना।
केनान अर्पछेदको चोः खेना।
अर्पछेद सेमको चोः खेना।
सेम नोआको चोः खेना।
नोआ लेमेखको चोः खेना।
37 लेमेख मतुसेलहको चोः खेना।
मतुसेलह हनोकको चोः खेना।
हनोक येरेदको चोः खेना।
येरेद महलालेलको चोः खेना।
महलालेल केनानको चोः खेना।
38 केनान एनोसको चोः खेना।
एनोस सेतको चोः खेना।
सेत आदमको चोः खेना।
आदम परमेस्वरको चोः खेना।
Iliyochaguliwa sasa
लुका 3: CHEP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2024 (Active), Mother Tongue Translators Society and Wycliffe Bible Translators, Inc. All rights reserved.
