မာကု 3
3
ဘီဘ်ုပ်တီဇ်ုမ်အူခေါန်
(မဿဲ ၁၂.၉–၁၄; လုကာ ၆.၆–၁၁)
1ဟွည်ႇဒီန် အခိင်ယေဆု ႎီရ်လီပ်ထဲင် တကျောင်ရဆောန်ဒဲႈတရာ၊ ယိူဝ်ဘီဘ်ုပ်တီဇ်ုမ် အူခေါန် ဂွည်က်ုရ်တောဒီန်။ 2ဘီပ်ုရ်ဒီဂဲ ဒဲႈဒေဘိူန်ဒေ အတွတာင်အပေတ် တယေဆု၊ ဂဲရဲ့ဒိုည်ႇဒေငိူပ် အ်ုန်ဒီရ်ုရ်ဒဲႈကော အီကူဒီန် ချံမ်ဆာ၊ ကာချံမ်ဆာ တန်ုဆငီဆဒါင်။ 3ယေဆု ဒါႈတဘီဘ်ုပ်တီဇ်ုမ် အူခေါန်ဒီန်၊ “လာ်ႈဇံင်ပွံတ်မီ တရအာတ်ဘီဂဲတည်။” 4ဟွည်ႇဒီန် အ်ုန်ဆ်ုရ်မွံတ်ဘီဂဲ၊ “ခိူည်န်ုထုင်တရာအယ် တဆငီဆဒါင်အီုဝ် မှိူမ်ဇောည် က်ုန်ကာမိူဝ်ႈ မှိူမ်ဒဲႈဒုခအဲႈ။ မှိူမ်ပ်ုန်လောတ်ဒဲႈ အဆာႇဘီအူကူအူဆိူဝ် က်ုန်ကာမိူဝ်ႈ မှိူမ်ပျံမ်ပဲတ်အဲႈ။”
ကောည်လိုည် ဂဲဒီန် ညာဂွည်ညိမ်ဒိုည်ႇပွံတ်ဒေ။ 5အခိင်ယေဆု က်ုရ်ပံတ်ဒေငိူပ်ပွံတ် က်ုရ်ႎျံရ်ဒေ၊ ဘိူည်ဒေါဆလေႈဂံတ်တဂဲ ယာမ်ဒီန်၊ ကောပ်မိူဝ်ႈဂဲဖိူမ်ခေါ အတွဂဲက်ုရ်လူတ် ဖိူမ်အ်ုန်ကာပျော။ အ်ုန်ဒါႈတအီကူဒီန်၊ “ဆာတ်ပွံတ်တီမီ။” အီကူဒီန်မိူဝ်ႈ ဆာတ်ပွံတ်တီဒေ၊ တီအ်ုန်ႎီရ်ညာပွံတ်ခိူည်ပြီမ်။ 6ဘံန်ညာခိူည်ဒီန် ဖာရိရှဲဂဲ လေႈပွံတ်ဒေ ဒိုရ်ကျောင်ရဆောန်ဒဲႈတရာ အူဒီန်တောအူဒီန်၊ ဂဲလာ်ႈက်ုရ်မိုန်ဇောမ် ဘီလီပ်ဖုင် တာပ်ုရ်မာင်ဟေရုဒ်ဂဲ ပ်ုရ်ဒီ၊ အတွခိူည်မောဂဲ ဒီဘိူန်ဒေခြီုမ် ပ်ုန်လူပျံမ်ပဲတ်ယေဆု။
ဘီက်ုရ်စု တပြောအိုမ်ဆက္လုင်
7ဟွည်ႇဒီန် ယေဆု စွလာ်ႈရူမ်ဇောမ် တဘဲႇဒေဂဲ လ်ုပ်အိုမ်ဆက္လုင်ဂါလိလဲ၊ ဘီဘာ့်ဘာ့်ဘိူဝ်ဘိူဝ်ဂဲ ယိူဝ်ႇဒိုရ်အရာပ် ကပီုန်ကုင်ဂါလိလဲဒီန် ဇောမ်လာ်ႈဒိုည်ႇရဘံန်အ်ုန်။ ဆဲႈဒီန် ယိူဝ်ႇဒိုရ်ကပီုန်ကုင်ယုဒ၊ 8ဒိုရ်ကုင်ယေရုရှလင်၊ ဒိုရ်ကပီုန်ကုင်ဣဒုမဲ၊ စပည် ဒိုရ်ဆဲႈပြါအိုမ်ယော်ဒန် လ်ုပ်လေႈဆငီ၊ ကုင်တုရုဂါရ် က်ုရ်ႎျံရ်ကုင်ဇိဒုန်၊ ကောပ်ဘီဂဲဒီန် ယိူဝ်ဒိုည်ႇဒေဆတီုင် ခံင်ပ်ုန်ရ်ုရ်ယေဆု ဂဲလာ်ႈပေါဒိုည်ႇဒေတအ်ုန်။ 9#မာ ၄.၁; လု ၅.၁–၃ဘံန်ဖုင်ဘီက်ုရ်စုဂဲ ကီုန်လူတ်လာည်၊ ယေဆုဒါႈ တတဘဲႇဒေဂဲ ရဲန်အူန်ရိူဝ်အူကြောင် ဒဲႈယိူဝ်ပဲတ်ဆေဆေ အတွအ်ုန်၊ မာည်ဒဲႈဘီဂဲက်ုရ်အီဒေ တိူဝ်တိုအ်ုန်။ 10ကောပ်မိူဝ်ႈအ်ုန်ဆန်ုမ်ဒဲႈ ရောဂါဘီဘာ့်ဘာ့်ဘိူဝ်ဘိူဝ်ဂဲ ချံမ်ဆာဟြာည်၊ ဘ်ုရ်ယိူဝ် ဘီဘ်ုပ်ရောဂါႎိုည်ဒနာဂဲအီုဝ် က်ုရ်ညဲတ်ဒေလီပ်ဒိုည်ႇ အတွဒဲႈဂဲဘိူန်ဒေ တိူဝ်ထိအ်ုန်။ 11အခိင်ဘီ ကီုရ်နံမ်ကာကျကာလ လီပ်စံပ်ဒီန် ယိူဝ်ဒေငိူပ်အ်ုန်၊ ဂဲမာ့်ဆကူပ်ပွံတ် တရအာတ်အ်ုန်၊ ပြိုႈဒေဒါႈ၊ “မီမိူဝ်ႈညှိုႈ ကွံန်ဖြာယာ့်။”
12ယေဆု ပိင်ငျှံပ်ရံတ်ရံတ်အူန် တကီုရ်နံမ်ချှိုဒီန် မာည်ဒဲႈဂဲဂြည် အကျံင်ဒေ တအဆေ။
ယေဆု ရံရ်ႈတမန်ဇ်ု ကိူရ်အာရ်ကူ
(မဿဲ ၁၀.၁–၄; လုကာ ၆.၁၂–၁၆)
13အခိင်ဒီန် ယေဆု လာ်ႈဟာ့်တဆိုရ် ဘံန်အ်ုန်တောႇ ဘီအ်ုန်ဇူႈနွံရ်ႈဒေ၊ ဂဲလာ်ႈပေါရောတ်ဒိုည်ႇ တအ်ုန်။ 14အခိင်ဒီန် အ်ုန်ရံရ်ႈဂဲ ကိူရ်အာရ်ကူ၊ တာင်ဒဲႈဂဲဇီုဝ် တမန်ဇ်ု။ အ်ုန်ဒါႈတဂဲ၊ “အောရံရ်ႈ ဒဲႈပဲဂွည်ရူမ်ဇောမ်အောအီုဝ် မိူဝ်ႈအတွဟောဂြည်တရာ အောဒီပ္လေါည်လာ်ႈပဲ၊ 15ဆဲႈဒီန် အောဒဲႈပဲဘိူန် အခွါင်အာဏာ ဘဲဒေရူပ်လေႈ ကီုရ်နံမ်ချှိုဂဲ။”
16ပ်ုန်ရံရ်ႈအူန်အ်ုန် ကိူရ်အာရ်ကူဒီန်၊ မိူဝ်ႈရှိမုန် (အီကူအီုဝ်မိူဝ်ႈ ယေဆု တာင်ဒဲႈအ်ုန်ဇီုဝ် ပေတရု)၊ 17ကွံန်အီမဲဇေဗေဒဲ ယာကုပ်ဂါရ် ယောဟန်၊ (ယေဆုတာင်ဒဲႈဂဲဇီုဝ် ဗောနေရဂက်၊ အိုမ်ငဲအ်ုန်မိူဝ်ႈ ကွံန်ကနံမ်ကဆံရ်ႈ)၊ 18အန္ဒြေ၊ ဖိလိပ္ပု၊ ဗာသောလမဲ၊ မဿဲ၊ သောမ၊ ကွံန်အီမဲအာလဖဲ ယာကုပ်၊ သဒ္ဒဲ၊ မိူဝ်ႈအီရံက်ခြိူဝ်ဘီကာနနိတ် ရှိမုန်ဂါရ် 19ယုဒရှကာရုတ်၊ ကူအ်ုန်ယာႈဆေတ်စာ တယေဆု။
ယေဆုဂါရ် ဗေလဇေဗုလ
(မဿဲ ၁၂.၂၂–၃၂; လုကာ ၁၁.၁၄–၂၃; ၁၂.၁၀)
20ဟွည်ႇဒီန် ယေဆု စွလီပ်တန်ုဂါင်။ ဘံန်ဖုင်ဘီက်ုရ်စုဂဲ ႎီရ်လာ်ႈဇူထဲင် တယေဆုဂါရ် တဘဲႇအ်ုန် ဂဲကာယိူဝ်ပဲတ် အခိင်ဟောမ်ပ်ုန်ဟောမ်။ 21ဘံန်ခြိူဝ်မျိုႎါႎည်အ်ုန်ဂဲ ယိူဝ်ဒေဆတီုင် အကျံင်ငဲပ်ုန်ဂြည် ဘီဂဲဒါႈ၊ “ဖိူမ်အ်ုန်ဟွည်ႇဖောက်ပျန်၊” ကောပ်ခိူည်ဒီန် ဂဲဒါႈဒေတိုည်တုအ်ုန် ဂဲလာ်ႈဇူဒိုည်ႇ။
22 #
မ ၉.၃၄; ၁၀.၂၅ တာဆရာနံပ်ဘေဲႇကျံမ်ဂဲ ပ်ုရ်ဒီ ယိူဝ်ႇရောတ် ဒိုရ်ကုင်ယေရုရှလင် ဂဲဒါႈ၊ “အ်ုန်အီုဝ် မိူဝ်ႈဗေလဇေဗုလ လီပ်စံပ်တအ်ုန်၊ မိူဝ်ႈအ်ုန်ဒါ တီုင်ဂို တာဒါင်ကီုရ်နံမ်ချှို အ်ုန်တဘဲဒေရူပ်လေႈ ကီုရ်နံမ်ချှိုဂဲ။”
23အခိင်ဒီန် ယေဆုတောႇဒေဂြည် ငဲပုင်တဲႇ တဂဲ၊ “စာတန်အီုဝ် ခိူည်မောအ်ုန်ဒီညာဒေ ဘဲဒေရူပ်လေႈ စာတန်အဲႈ။” 24“ကပီုန်ကုင် အူကုင်အီုဝ် က်ုန်က်ုရ်ခံတ် ဇောမ်တန်ုဖုင်ဒေ ဒီကာဘဲစိဒေတဲ။ 25ဂါင်အီုဝ် က်ုန်လာည်နွံရ်ႈလာည်ဖိူမ် တန်ုဒေ၊ ဂါင်ဒီန် ဂဲကာဘဲစိဒေဇံင်မြဲ။” 26“ကောပ်ခိူည်ဒီန် ကပီုန်ကုင် စာတန်ဂဲအီုဝ် က်ုန်က်ုရ်ခံတ် ဇောမ်ဖုင်ဒေ၊ ဂဲကာဘဲစိဒေဇံင်မြဲ မောဂိူပ်ပေါ တအခိင်ဟာဆူတ်။”
27က်ုန်ကာတုဘိူဝ် ဘီႎါဝ်ဒီန် ရအာတ်၊ အဆေကာဘိူန်စိဒေ လီပ်တန်ုဂါင် တိူဝ်ႈဂြူအုဇာအ်ုန်၊ က်ုန်ဟွည်ႇတုဘိူဝ် ဘီႎါဝ်ဒီန် ဒီဘိူန်ဒေ လီပ်တန်ုဂါင် တိူဝ်ႈဂြူအုဇာအ်ုန်။
28“အောဂြည်ညှိုႈတပဲ၊ ဘီဂဲအီုဝ် ဒီဘိူန်ဒေခါမ်ဇာ ပ္လိုတ်ခွါင် အပေတ်ဒေတွံန်နဲဂါရ် ဘ်ုရ်ယိူဝ်ငဲပ်ုန်ဘဝ်ဒေဂဲဒီန်။#၃.၂၈ ဘ်ုရ်ယိူဝ်ငဲပ်ုန်ဘဝ်ဒေဂဲဒီန်၊ က်ုန်ကာမိူဝ်ႈ ငဲပ်ုန်ဘဝ်ဂဲ ခံင်ကာကျ က်ုရ်ခံပ် တဖြာ။ 29ကောည်လိုည် အဆေမိူဝ်ႈဟွည်ႇ#လု ၁၂.၁၀ က်ုန်ဂြည်ငဲပ်ုန်ဘဝ် တႎိငျံန်ဆပဲ ယာမ်မောမိူဝ်ႈဟွည်ႇ ဒီကာဘိူန်စိ ပ္လိုတ်ခွါင် ဒိုရ်အပေတ်ဒေ၊ ကောပ်မိူဝ်ႈအ်ုန်လူတ်ဘိုန် ဘ်ုပ်ဒေက်ုရ်တူႈ တာမ်တန်ုအပေတ်ထာဝရ။” 30(ကောပ်ယေဆု ဒါႈဒေငဲခိူည်ဒီန် ဘီပ်ုရ်ဒီဂဲဒါႈ၊ “အ်ုန်အီုဝ် မိူဝ်ႈကီုရ်နံမ်ကာကျကာလ လီပ်ဂွည်တန်ုတိုအ်ုန်။”)
မာယေဆုဂါရ် ႎါအ်ုန်ဂဲ
(မဿဲ ၁၂.၄၆–၅၀; လုကာ ၈.၁၉–၂၁)
31အခိင်ဒီန် မာယေဆုဂါရ် ႎါအ်ုန်ဂဲ ရောတ်ပေါ။ ဘံန်ဂါရ် ဒါ့်ဇံင်ဒေရရိူဝ့် ဂဲပ္လေါည်ဘီအူကူ လာ်ႈတောႇအ်ုန်။ 32ဖုင်ဘီက်ုရ်စု ဒါ့်မာ့်က်ုရ်ႎျံရ် ယေဆုဒီန် ဒါႈတအ်ုန်၊ “ငိူပ်မေန်၊ မာမီ၊ ႎါအီမဲဂါရ် ႎါရပျာမီဂဲ လာ်ႈလဲမ်မီ ဒါ့်ဂွည်ဒိုည်ႇဒေရရိူဝ့်။”
33ယေဆု ႎီရ်ဒါႈ၊ “အဆေမိူဝ်ႈ မာအောဂါရ် ႎါအောဂဲအဲႈ။” 34ဟွည်ႇဒီန် အ်ုန်ငိူပ်ပွံတ်ဘီမာ့် တပြောက်ုရ်ႎျံရ်ဒေဂဲ အ်ုန်ဒါႈ၊ “ငိူပ်မေန်၊ ဘီဂဲအီုဝ် မိူဝ်ႈဒိုည်ႇမာအောဂါရ် ႎါအောဂဲယာ့်။” 35“ဘီအ်ုန်ရ်ုရ် ဇောမ်နွံရ်ႈဖိူမ်ဖြာအီုဝ် မိူဝ်ႈဒိုည်ႇႎါအော၊ ႎါရပျာအော၊ မာအောဂဲယာ့်။”
Iliyochaguliwa sasa
မာကု 3: SPBT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word for the World International and The Shwe Palaung Bible Translation Reviewer Committee.
