Matius 8
8
At Yesus en e, ap mesik ou hwenaʼgo ʼgelaʼge onogorlok aʼge oruakma obaptegei wene
(Markus 1:40-45; Lukas 5:12-16)
1At Yesus dom pam en ʼbu agama re, aphwami esan aʼbigat eʼberlik legesa. 2Lagaimu re, ap mesik yebil hwenaʼgo ʼgelaʼge onogorlok aʼge ebam welaga aʼge eʼbek wagarik e, odogorlu pam hweriogo welat, disogo moʼgulesi,
“Yesus nue. Hat en obapnebagun epegen holuk e, elirat obapnoboat o,” oluk moʼgulesi. 3Asogo moʼgulesimu re, at Yesus en ap ano eʼgik tenak pesirik e,
“An en obaphebaigoluk taga legi o. Holuk e, hebam op emen o,” oluk moʼgulosokhwe erianoat yebil hwenaʼgo ʼgelaʼge onogorlok aʼge ano modok erlak agarik e, ebe obat aga. 4Op agama re, at Yesus en, disogo moʼgulesi,
“Hat en e, Yesus en disogo obapnebegei, oluk, aphwami pema modok moʼgulentagun o. We, ap Allah eiye aʼge en il hiouwagoluk eʼbek laguntik disogo tin o. At Musa en eselat e,
Aphwami enebe op otluk, Allah paget disogo po yo, oluk egei ano hegitsogoat pasumu pobi hobuagoluk, mesik pei lak o,” oluk moʼgulesi.
Yesus en ap tentara Roma aʼge onue eragam aʼge mesik ou obaptegei wene
(Lukas 7:1-10)
5Asogo moʼgulotluk e, o Kapernaum ʼgwisoma re, ap tentara Roma aʼge onue ʼgain mesik Yesus eʼbek wagarik e, disogo mo gulesi,
6“Nue! An neragam aʼge mesik eʼgik oyuk soborak aʼge olema ʼbourak welat e, nonouk aʼbik tiso yo,” oluk moʼgulesimu, 7at Yesus en e,
“An en obaptu weik o,” oluk moʼgulesimu re, at ap tentara aʼge onue ʼgain ano en e,
8“Eige! Nue. An nebe malik wei aʼgeatma, hat an nowi pam ʼgwi lo mia o. Holuk e, hebe ya en hiak nak hwelak pagunmu re, an neragam aʼge ai op ema o. 9An ogo re, nuelak ʼgaindek eneragam welat eniak hweliselat, ye, an nosi tentara aʼge neragam welat niak holugulat, tugumu re, an en at ap mesik,
Lak o, oluk moʼguloso holuk e, lasuat o. Ye, ap mesik,
Hat suk o, oluk moʼguloso holuk e, wagoat o. Ap an neragam aʼge mesik,
Yu aʼge tin, moʼguloso holuk e, tisoat o,” oluk moʼgulesimu 10at Yesus esaʼgo hwelegeirik e, aphwami at eʼberlik legesa aʼge ebano disogo moʼgulentesi,
“Eige! Ap yu ede demat nebam heʼberegei ai ʼgelaʼge, is aphwami Israel aʼge mesik enede asogo heʼberik pogwiam entasu legi erlak ai nogorlok o, oluk demat moʼgulhentegis o.
11Ye, mesik e, yu moʼgulhentaik. Aphwami enebe aʼbik orogobu akhit en, erabu akhit en, Allah eragam ʼgoluk e, Abraham emin, Ishak emin, Yakub emin, enemin seni nouwogoluk odoktuma o. 12Aʼge re, is aphwami Israel aʼge ai re, o eba isat eiye om aʼgeat de, oʼborloma o hiktakma eba peragonoboma re, eniak ʼgerlit marogulat nge togwi modok welema o,” oluk moʼgulentesi. 13Asogo moʼgulentesirik e, ap tentara aʼge onue ʼgain ano disogo moʼgulesi,
“Hebe lak o. Hat hede nebam heʼberik poluk, hogola en e,
Disogo obapnobua oluk epegen ai hegitsogoat emak o,” oluk moʼgulosokhwe erianoat, at eragam aʼge ano ebam op aga laga.
Hwe Petrus iemalhwe emin, aphwami pema emin, Yesus en ou obabenebegei wene
(Markus 1:29-34; Lukas 4:38-41)
14Asogo tegeirik e, at Yesus ano Petrus owi pam lagarik il ʼgwelakhesi ʼgal, hwe Petrus iemalhwe ebam aganhan aʼbik en e, ʼbourak oruakma il hesi. 15Hesirik e, at Yesus en, hwe ano eʼgik tenak pesi ʼgal e, ebam aganhan aʼbik welaga aʼge ano erlak aga. Erlak agama, hwe ano inagarik e, at enat soʼboru wogesi laga.
16Asogo tisokhwe, o arat hopmu agama re, aphwami muʼgat enebabut wiak aʼge onogola ʼgwigisarik welegesa aʼge wogonoboluk Yesus eʼbek wegesema re, at iak mesik erligeat osokhwe eriano muʼgat wiak aʼge onogola ʼgwigisarik oruakma henokho lebikpasulat, ou wiak aʼge ʼberlek obabenebiselat, tegei. 17Asogo tegei ai re, at Yesaya Allah iak moʼgulentasu laga aʼge ano en pelal wasulat e,
“Nis di ou yu ou wogu lege aʼge ai at en wokho erlagap pasulat,
nenanni erlik-erlak agalat mia aga lege aʼge ai obabenebiselat, tegei o,” (Yesaya 53:4)
oluk egei ai hegitsogoat tegei ai o.
Aphwami Yesus eʼberlik lagai wene
(Lukas 9:57-62)
18Aphwami aʼbigat Yesus ilem wegesema il yerentesirik e, at osi iak wogu legesa aʼge ebano disogo moʼgulentesi,
“Nis ik so wusogo etle akhit libomok o,” oluk moʼgulentesi. 19Asogo moʼgulentesirik oruakma, is ap Allah iak pelal wogo eiye aʼge mesik Yesus eʼbek wagarik e, disogo moʼgulesi,
“Nue. An e, hat ʼgebane lagun holuk e, heʼberlik modok denaga leik ani o,” oluk moʼgulesi. 20Asogo moʼgulesimu, at Yesus en e,
“Orlomene ai re, owi wusogo ogolayat welago yo. Ye, sue darak denago aʼge ai ogo, owi wusogoat welago yo. Aʼgeat de, an abat daklau wegi ai nak e, nogosoma nowi werik e, modok erlak o,” oluk moʼgulesi. 21Asogo moʼgulesimu re, ap at iak wogu legesa aʼge ebano mesik en e, disogo moʼgulesi,
“Yesus nue o. An naduk naik werak aʼge ʼgwiangma sali laigoluk, hat en,
I o. Lak o, oluk moʼgulnorogun en moʼgulhegis o,” oluk moʼgulesi. 22Asogo moʼgulesimu re, at Yesus en e, oʼgo disogo moʼgulesi,
“Ukpoluk e, an neʼberlik suk o. Werak aʼge holuk e, is aphwami enebe werak aʼge ʼgelaʼge oruak aʼge eba enat salonobogu lemak o,” oluk moʼgulesi.
Yesus en ik hererimtak wago aʼge haʼbugaptegei wene
(Markus 4:35-41; Lukas 8:22-25)
23Asogo oluk e, at Yesus ebe ik so pam ʼgwegeimu re, at osi iak wogu legesa aʼge ebano eneminat ʼgwigisa. 24ʼGwigisarik ik so pam lagaimu re, yasobu annisogo punhau wagama ik oborlogouk en so weriselat ogola yeʼgelisokhwe, at Yesus e, nogo ese laga. 25Nogosokhwe, osi eragam wegesarik elaluk emagoluk erlelhogulat e, disogo moʼgulegisa,
“Yesus. Nis ik lul yema re, delnonobogunmu re,” oluk moʼgulegisa. 26Asogo moʼgulegisema, at Yesus en e,
“Nopaget honogorlok hogu legep? Henede an nebam heʼberik welegep erlak yema re!” oluk iak il il inagarik e, yasobu ano emin, ik oborlogouk aʼbik aʼge ano emin,
“Hoborlogouk,” oluk wene yagesimu re, ik oborlogouk ano modok haʼbuk egei. 27Asogo tegeimu re, is osi iak wogu legesa aʼge ebano en erliktugulat e, disogo egesa,
“Eige! Ap yu sa epegep. Yasobu emin, ik hererimtak wago aʼge emin, at iak hologo erlak aga yu nonogorlok o!” oluk erliktigisa.
Ap enebe ʼbiren muʼgat enebabut wiak aʼge onogola ʼgwigisarik oruakma Yesus en henokho lebikpesi wene
(Markus 5:1-20; Lukas 8:26-39)
28Pobuk, ik etle akhit aphwami o Gadara aʼge onowi pam lebegesa ʼgal e, is ap enebe ʼbiren aʼge muʼgat enebabut wiak aʼge onogola ʼgwigisema welegesa aʼge, owik aphwami werak aʼge onobugumu eba en Yesus eʼbek wegesa. Is ap ai enebabut modok wiak en, aphwami is onogorlok en ebelaʼgwe ai modok laga legesa erlak aʼgeat de, Yesus wagama re, eʼbek liplau wegesarik e, 29eniak loksogoat disogo moʼgulegisa,
“Allah omlogo yu. Hat en e, nis noʼgosogo taknenebaigoluk wegen. Nis watnonobu hegit owan oruakhweat de, hat naduk watnenebigoluk wegen yema re!” oluk moʼgulegisa. 30Ai erlige o eba eragam horogat wam esan aʼbik mugwa wogu legesa. 31Wogwi oruakma, muʼgat enebabut wiak aʼge is ap enebe ʼbiren erianoat onogola welat e, disogo moʼgulegisa,
“Yesus. Hat e, nenebe lebiknenebaigoluk holuk e, wam esan aʼbik mugwa wogumu etleba onogola yagatla ʼgwi lul en e, peraknenebemen o,” oluk eniak lobuksogoat moʼgulegisa. 32Asogo moʼgulegisema, at Yesus en,
“Holuk e, lit o,” oluk moʼgulentesi. Moʼgulentesimu, is muʼgat enebabut wiak aʼge ebano ap eriano onogola en henokho liplau wegesarik e, wam esan aʼbik mugwa wogu legesa aʼge ebano onogola yagatla ʼgwi legesema, wam ebano modok perlengsogo ik iak yatma en ʼbule lulasogo ik olomu ʼgwigisarik ik modok legesa. 33Asogo legesema re, is aphwami wam tenak welegesa aʼge ebano onogorlok agarik,
“Disogo aga o,” oluk yoʼgo pungtak o kotama ebano legesarik e, is ap enebe ʼbiren eriano en e, onobok eminat ʼbeliʼgogo moʼgulentigisa. 34Asogo moʼgulentai legesema re, is aphwami o eba welegesa aʼge Yesus hau wegesarik e,
“Hat hebe o yema wolorogun erlak ani o. Lagunat ai o,” oluk eniak lobuksogo moʼgulegisa.
Iliyochaguliwa sasa
Matius 8: WUL
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
