Matius 27
27
Yesus herle wusogo ʼgain Pilatus wogosu wegesa wene
(Markus 15:1; Lukas 23:1-2; Yohanes 18:28-32)
1Asogo tigisarik oruakma, hubet siaksogo is ap Allah eiye aʼge onuelak ʼgaindek aʼge ebano emin, enarluedek ebano emin, ʼberlegat en e, Yesus woruogoluk obok ʼbaligisarik e, 2eʼgik herle wusogoat Pilatus ebe gubernur ʼgain oruakma woluk wegesarik e, wogegisa.
At Yudas uʼgwarek en ebe ʼbeʼgi wathwerlesi wene
(Peragenebesi 1:18-19)
3Yesus asogo wene ebam poluk demat woruogoluk tugukhwe, at Yudas en woruagoluk yoʼgo laga aʼge ano il yerontoluk e, ede en e,
“An wiak tegis o,” oluk ede heberlegei. Ede heberlegeirik e, oʼgo uang perak aʼge 30 wogegisa aʼge ano pobuk uak wokho wogentaigoluk, is ap Allah eiye aʼge onuelak ʼgaindek ebano emin, enarluedek ebano emin, oruakma wagarik wogentasulat e, disogo moʼgulentesi,
4“Eige! Ap ai wiak tu erlakmayat de, woruagoluk yoʼgo wegi ai o. Holuk e, wiagat tegismu hegi o,” oluk moʼgulentesimu, is ebano en e,
“Wene ai nis nenebam agama en de egen? Erlak o. Ai hat homuat o,” oluk moʼgulegisema re, 5at Yudas en uang perak aʼge 30 wogegisa ano Allah owi werikmu ebano hwikholuk e, uʼgwarek en oʼgorlop herle erlilogo ebe ʼbeʼgi waraga.
6Asogo tegeimu, is ap Allah eiye aʼge ʼgaindek ebano en uang perak aʼge 30 ano wegesarik e,
“Uang yu ap emep oʼgo ʼbaligisarikmu re, Allah paget uang pogumu eba po modok mia o,” oluk egesarik e, 7aphwami ap ʼbok aʼge waragaiam ʼgwiang salonobogulomma, ap mesik ʼgwiang domul sogoluak aʼge heleʼgiso aʼge oʼgwiangma re, at ebam oʼgo ʼbaligisa. 8Asogo tigisa ai en e, ʼgwiang ai onuk ap emep ʼbegeimu oluk tualigisarikmu re, hwerli ai en ʼbekhit yogodak ogo ogwiat. 9-10Ai tigisa ai re, ap Yeremia Allah iak moʼgulentasu laga aʼge ano en eselat e,
“Nenaik ʼgain Onuk Logo aʼge en moʼgulnesi hegitsogoat, is aphwami Israel aʼge en,
Ap ano ebe oʼgo yu o, oluk egesarik e,
uang perak aʼge 30 wik-wok e, ap sogoluak ʼgwiang domul aʼge heleʼgiso aʼge ano oʼgwiang oʼgo wogegisa,” (Zakharia 11:12-13)
oluk pelal wokho pesi ano ebe ai erligeat, hegit aga.
At ʼgain Pilatus en Yesus emdema wesi wene
(Markus 15:2-5; Lukas 23:3-5; Yohanes 18:33-38)
11At Yesus ap Pilatus gubernur ʼgain aʼge ano eʼbek woluk wegesema orogolema inlai lagama re, at en hin ebam wasulat e, disogo moʼgulesi,
“Aphwami Yahudi aʼge onue ʼgain onuk logo aʼge ano harat a?” oluk moʼgulesimu, at Yesus en e,
“Hat egen aiat o,” oluk moʼgulesi aʼgeat de, 12is ap Allah eiye aʼge onuelak ʼgaindek ebano emin, enarluedek ebano emin, enemin en, wene Yesus ebam aʼbik pegesa aʼge re, at en e, pobuk wene mesik oʼgo moʼgulonto erlakma en mo egei. 13Oʼgo u erlak mo egeimu, at ʼgain Pilatus en e,
“Di wene yu wene aʼbik hebam pogwi yema hesaʼgo hwelise legen erlak?” oluk moʼgulesi aʼgeat de, 14oʼgo mesik lagaksogo u erlagat mo egeimu re, at ʼgain gubernur ano en e,
“Nogorlok o!” oluk erliktegei.
At Yesus ebe modok woruagoluk wene ebam pegesa wene
(Markus 15:6-15; Lukas 23:13-25; Yohanes 18:39–19:16)
15Is aphwami Yahudi aʼge seni Paskah lok sakho noʼgulat, is en e,
“Aphwami eneʼgik herle werak aʼge ai at ai ʼgelaʼge, hebilogo woknentemen o,” oluk ʼgonu ogwiam e, at gubernur en hebilogo wogentasu laga. 16Asogo wogentasu lagarikmu no oluk e, ai erlige re, ap mesik onuk Yesus Barabas,
Wiak tiso aʼge, oluk obok modok sagarak pobu legesa aʼge eʼgik herle werak ebano oruakma, 17-18aphwami aʼbik odoktugukhwe, at ʼgain Pilatus ano il holuk e,
“Is yema re, Yesus ebam ʼbousogo enat woluk wegesa ani o,” oluk, pobi tegeitigat de, disogo moʼgulentesi,
“His henede en e, ap onuk sa hebilogo woknontouwagoluk opogu legep. Yesus Barabas a? Ye, at e, Yesus onuk mesik Kristus ogwi aʼge ano a,” oluk, moʼgulentesirik e, 19wene edip ʼbeloʼgogumu eriano hweriogo oruakma, at ʼgain Pilatus ugwe en ap mesik wene wusogo perakpou waga. Perakpou wagalat e, disogo egei,
“An hup nogosoma ap ai ebagerat nabi wiaksogo hegi o. Holuk e, at ebabut op aʼge ai hat hemin wene ebam pagup o,” oluk egeimu moʼgulosu wegesa aʼgeat de, 20is ap Allah eiye aʼge onuelak ʼgaindek ebano emin, enarluedek ebano emin, enemin enat, aphwami esan ebano enede ʼgagalugulat e,
“Barabas ai eʼgik herle hebilnontugulat e, Yesus ai nak e, werip o, oluk moʼgulomup,” oluk moʼgulentigisema re, 21at gubernur ano en,
“Ap enebe ʼbiren ya re, at ap sa ʼgelaʼge herle hebilnontouwagoluk ogu legep,” oluk moʼgulentesimu is en e,
“Barabas ai herle hebilnentemen o,” oluk moʼgulegisa. 22Asogo moʼgulegisema, at Pilatus en e,
“Holuk e, Yesus onuk mesik Kristus yu re, noʼgosogo tik,” oluk moʼgulentesimu, is ebano en e,
“E pam edikpoluk werip o,” oluk moʼgulegisa. 23Asogo moʼgulegisema, at en e,
“At no wiak tegeimu en,” oluk moʼgulentesimu re, is en eniak ningsogoat,
“E pam edikpoluk werip o,” oluk moʼgulegisa. 24Asogo moʼgulegisema, at Pilatus en e,
“Is aphwami yema enat,
Worulat, oluk eniak ningsogoat ogulat ologunmu wiak omon paget, an niak ʼburlat almasogo ese legi hegi,” oluk, ik neʼgak aʼge mesik wesirik e, aphwami ebano enil oruakhwe eʼgik petne horagalat e, disogo moʼgulentesi,
“Ap yu emep e, an nebam ema erlak o. Hisat henebam ema o,” oluk, moʼgulentesimu, 25is ebano is eniak ningsogo ogulat e,
“At emep ai re, nis nenemalik neneminat nenebam welemak o!” oluk moʼgulegisema re, 26at Barabas ano eʼgik herle hebilogo wogentasulat e, at Yesus nak e, ʼgoʼbu lagalʼbisok wusogo re, e pam edikpoluk woruagoluk wogentesi.
Is ap tentara aʼge en Yesus eniak esegen yagegisa wene
(Markus 15:16-20; Yohanes 19:2-3)
27Pilatus en Yesus ebe wogentesimu re, at osi tentara aʼge ebano en wene edip ʼbeloʼgogumu woluk ʼgwigisarik e, at ebe ʼburl eriano poluk, enarilak esan mesik emin logologu legesa aʼge enebe ʼberlegat eragam waliʼgogo odoktigisarik e, 28at osum noʼgorlogo poluk e, sum orogole wibeʼgen werak ʼgelaʼge mesik ʼbuktak pogulat, 29ap ʼgaindek aʼge eneʼgare-ʼgare ʼbuktogwi aʼge ai ʼgelaʼge, orlok wiak aʼge hwanesogo aʼgul pam ʼbuktak pogulat, ʼbon ʼgoʼbu ʼbalogo eʼgik ʼbekhit akhit wogogulat, tugulat e, enebe ondogorlu pam huregesarik, eida aʼbik obogu legesa,
“Eige! Aphwami Yahudi aʼge onue ʼgain onuk logo aʼge ano harat hegi o,” oluk eniak esegen yagugulat e, 30was ebam topuksogo pei lagalat, ʼbon ʼgoʼbu ano delogo re, aʼgul ʼgoloksogo worugulat, tigisa. 31Asogo til legesarik e, sum orogole wibeʼgen werak aʼge ano noʼgorlogo at uʼgwarek osum aʼge ʼbuktak pogulat, tigisarik e, e pam edikpoluk woruogoluk woluk liplau wegesa.
Yesus ebe e pam edikpoluk werigisa wene
(Markus 15:21-32; Lukas 23:26-43; Yohanes 19:17-27)
32Yesus ebe woruogoluk woluk, o selimu en arat liplau wegesarik, wagaimu, ap mesik onuk Simon, owi o Kirene aʼge emin sarlok tigisarik e, eniak ningsogoat disogo moʼgulegisa,
“Yesus e pam edikpoluk worua aʼge e yu hat wemen o,” oluk moʼgulegisa. 33Asogo moʼgulegisema, wesimu re, dom aʼgul onuk nis neniak pam Enaʼguluak ʼBelak duk pam u ʼgelaʼge, is eniak pam Golgota duk pam eba wegesa. 34Wegesarik e, anggur eʼgen aʼbosu emin, wam omotukhwe ʼgelaʼge esik wiak aʼge aʼbosu emin, emin neʼgerlak-heʼgerlak takpoluk, at nouwagoluk wogegisema, nekhesi ʼgal e, no ebit agama, ukpesi. 35Asogo tigisarik e, at ebe e pam edikpoluk osum noʼgorlak ebano,
“Salak ʼgelaʼge horlouwa,” oluk helebeʼgen hwikhai lagalat hwikhau wagalat, tigisarik e, helebeʼgen enebam aga aʼge holuk sum ano soʼbusogo hwerlegesa. 36Arat soʼbusogo hwerlegesarik e, Yesus eragam eriano ʼgagalak welegesa. 37Welat e,
“Ap yu re, wene edip yu pam pegerik en werige o,” oluk u ʼgelaʼge, “YESUS APHWAMI YAHUDI AʼGE ONUE ʼGAIN ONUK LOGO AʼGE EBE YUAT O,” oluk pelal wokho e pam aʼgul hegitsogo dopnorak pegesa.
38Yesus ebe asogo e pam ʼburl edikpegesarik e, is ap enebe ʼbiren aphwami enaʼge yogorlia wogu legesa aʼge mesik eʼgik ʼbekhit akhit, mesik eʼgik hware akhit, edigonoboluk eminat warenebegisa. 39Asogo edigenebegesema oruakhwe, aphwami ebela ai oʼgwe lak-wak ogulat at Yesus ano disogo moʼgulegisa,
40“Eige! Hat en, disogo egen epegi,
Allah owi werik aʼge yu moluksogo poluk e, agauwa ʼbirenam werise leiktik agauwa henaganak aʼge en arat ologun ʼbalogo werik o, oluk egen ano re, hebe Allah omlogo holuk e, huʼgwarek en hebe e ai pam en hagap delogo ʼbi suk da!” oluk enaʼgul ʼgwani hogulat eniak esegen yagogu legesa. 41Asogo tugukhwe re, is ap Allah eiye aʼge onuelak ʼgaindek ebano emin, Allah iak pelal wogo eiye aʼge ebano emin, enarluedek ebano emin, enemin eniak esegen yagogulat e,
42“At en e, is aphwami muon elirat delenebise laga aʼgeat de, uʼgwarek en nak e, delhorlo mia hegi. E ai pam en delogo ʼbu ago holuk e, nenil holuk, at ai nis aphwami Israel aʼge nonue ʼgain onuk logo aʼge demat o, oluk, pobi tul en oluk, ʼbumak da! 43Ede Allah ebam heʼberik welat,
An Allah omlogo yo, oluk ese laga ano re, at Allah enat delik epesi holuk e, doluak e,” oluk egesa. 44Ye, is ap yogorlia wogwi en warenebegisa aʼge eriano en ogo Yesus eniak esegen asogoat yagegisa.
Yesus ebe waraga wene
(Markus 15:33-41; Lukas 23:44-49; Yohanes 19:28-30)
45Asogo moʼgulogwi oruakma re, o erlige ʼburl jam 12 pam o hik egeitik e, o eba ʼberlegat hwerli jam 3 hiktak welaga. 46Hiktak oruakhwe, jam 3 arat lai lagama re, at Yesus en aik Allah disogo moʼgulesi. Nis neniak pam e,
“Naik Allah! Naik Allah! An nopaget uknebegen,” oluk u ʼgelaʼge,
“Eli, Eli, lama sabakhtani,” (Mazmur 22:1)
oluk iak ʼberaksogoat moʼgulesi. 47Asogo moʼgulosoam, is aphwami nin pema eba welegesa aʼge enesaʼgo hweligisarik e,
“Ap yu Elia worlhasu,” oluk egesema 48ap is aʼge mesik pungtak lagarik e, hwali sabus ʼgelaʼge pam anggur eʼgen aʼbosu esik wiak aʼge udalogo nouwagoluk e paiyo pam dongsogo wogesimu re, 49is nin pema en e,
“A! At Elia en deluma ya? I a. Nenil wolomok,” oluk egesa. 50Asogo egesema, at Yesus pobuk iak mesik erlige loksogo egeitik e, arat lebeksogo waraga. 51Waragoam e, Allah owi werikmu sum kain aʼge o ogorlirak dit akhit oʼgwe ʼbelak welaga aʼge erabu en ʼburl heisogoat ʼbak ʼbak ʼbu agalat, mouk erlanghasulat, helep ʼbageselat, tegeimu re, 52aphwami werak aʼge ʼgwiangma salonobogwi aʼge ebano omuat ʼgoduk huretil lasulat e, Allah eiyagai waregesa aʼge enebe esanat salenebigisaʼgwe en enelaluk egesarik inetil legesa. 53At Yesus ebe elaluk agama re, is enelaluk egesa aʼge ai, o kota Yerusalem Allah uʼgwarek owi ogwi ano ʼgwigisema re, aphwami enebe aʼbik enat enil entigisa. 54Ye, ap tentara aʼge onue ʼgain aʼge emin, osi pema akhit Yesus eragam ʼgagalak welegesa aʼge ebano emin, mouk erlanghasulat, di bele yu bele tagalat, tegei ano enil hegesarik onogorlok aʼbik egesarik e,
“Ap yu re, Allah omlogo demat o,” oluk egesa. 55Asogo tugukhwe, is hwami Yesus lethogu legesa aʼge ebano o Galilea en ʼbi legesarik Yesus ebe e pam edikpegesema enil walekma en yetharok welegesa. 56Is hwami eria re, mesik Maria owi Magdala aʼge. Ye, mesik e, hwe Maria Yakobus o, Yusuf o, enia ano. Ye, mesik e, Zebedeus eiyagai enia ano o, hwami muon logon eneminat welegesa.
Yesus ebe werak owikmu pei legesa wene
(Markus 15:42-47; Lukas 23:50-56; Yohanes 19:38-42)
57O arat hup agama re, ap eʼgik oruak aʼge owi Arimatea aʼge onuk Yusuf, at Yesus eragam ʼgoluk iak wasu laga aʼge en, 58Pilatus eʼbek lagarik, Yesus werak ʼgonu moʼgulesimu re, at Pilatus ano osi en wogemagoluk moʼgulentesi. 59Ye, arat wogegisema re, sum kain ʼget lenan aʼge pam eʼgirlogo re, 60at Yusuf owik uʼgwarek en ʼgerat heleʼgegeimu ai pei lagarik e, helep ʼgoduk ebak lok aʼge erlebilogo pou wagarik dopnosogo lerak poluk laga. 61Aʼge re, at hwe Maria owi Magdala aʼge ano o, hwe Maria agaikhen ano o, hweriogo welat Yesus werak pegesema enil welegesa.
Ap pema Yesus werak pegesema ʼgagalak welegesa wene
62Is aphwami Yahudi aʼge loruk oʼgwe agauwa sabiren Allah paget weat wolomogoluk e, yogodak ʼgelaʼge di aʼge yu aʼge nomologo poluk, is ap Allah eiye aʼge onuelak ʼgaindek ebano emin, is ap Farisi aʼge emin, enebe odoksogo Pilatus eʼbek legesarik e,
63“Nonue. Aphwami lalenebil nese laga aʼge ano, elaluk welat moʼgulentasulat e,
Agauwa ʼbiren werak weleiktik e, henaganak aʼge en e, nelaluk eik o, oluk egei ano en e, 64at osi ebano en werak ano hisogo pei louwarik aphwami moʼgulontogulat,
At Yesus ai waragama Allah en elalugaptegeimu, oluk ogu lemano. At naduk aphwami lalenebil denaga laga ano wei ʼgelaʼge. Aʼgeat de, pobuk asogo tumu re, loksogoat lalonobuano oluk e, agauwa henagan ya paget ʼgagalak welemagoluk e, ap logon yoʼgo enebemen o,” oluk moʼgulegisema, 65at Pilatus en e,
“Gagalak welema aʼge enebe ya. Holuk e, werak pegesema eba opsogo ʼgagalak welemagoluk, wogonoboluk lit o,” oluk moʼgulentesi. 66Asogo moʼgulentesimu, is ebano wogonoboluk wegesarik e, aphwami en ʼgoduk horogumuno oluk, werak oruakma helep ʼgoduk dopnosogo larigisema ano ebam silo pogwi ai ʼgelaʼge aʼbosu werak poluk, is ap ʼgagalak wolom aʼge ebano ʼgagalak onoboluk legesa.
Iliyochaguliwa sasa
Matius 27: WUL
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
