Tegagia 18
18
Pokorosoano dandi inule ndi Burahima ka i Sara
18:1-15
1Ondae i Ue mepopokita ndi Burahima umpeda a ngkeu tarabantino i Mamere, tempono onae mentoro a mpewowa kemano i tempo mokula ntu'u oleo. 2#Ibr. 13:2Onae mengkita ngkoraane, ka ikitao otolu mia mpentade, nahi olai inso ndi onae. Hangano ikita ira, onae melulu inso a mpewowa kemano tumotowo ira, ka i'amba menggolontu mesomba hawe a wita. 3Motae i Burahima, ”Ueku, tewala ipehohawa aku, ku'emao si laloo atamiu andio. 4Po'ineeomo ka i'inala uwoi tedei, iwo'ohiomo karumiu ka impenaa-naa a ntoto ngkeu andio. 5Aku mo'ala te'asa mpole roti ka iwali memoroso mbo'u, ka i'amba mpotilaloakono pelempaamiu. Hangano onaemo atuu ka ime'aiwa a mpo'iangano atamiu andio.” Mesangki ira, ”Weweuomo kana anu pinaumu atuu.” 6I Burahima mompari-pari lumako a ngkemano tepohaweakono i Sara, ipotae, ”Turako, alao otolu ponsa'u tarigu anu moiko ntu'u! Saloomo, ka u'amba weweuo roti bonggoli!” 7Ka i'amba i Burahima melulu a bawaano sapino, i'alao asa ana nsapi mewalo ka moiko, ka iweeakono asa mia atano, ka i'amba mia andio mompari-pari numahuo. 8Ka i'amba umalao susu anu baku ka susu saru bauno ana nsapi anu ninahuomo atuu, ka ipatindao i arodo mia atuudo. Onae mentade umpeda ndi ondae a ntoto ngkeu atuu kontongaado mpongkaa. 9Ka do'amba mpotaeakono, ”Isuake i Sara, beinemu?” Sumangki, ”Ira'i, a larono ngkema.” 10#Rom. 9:9Mepau Ira, ”Menteeano, Aku wali tepohaweakomu ta'u ramai, i tempomo atuu i Sara, beinemu tamohina anano asa ana ntama.” Ka i Sara merorongeakono inso i asambalino tondono kema anu i bungku-Do. 11I Burahima ka i Sara mota'u iramo ka tende ntinuwu. I Sara nami haweo mbo'u wulano. 12#1Pet. 3:6Mengingisiomo i Sara i laro aroano, ipotae, ”Tedoa akumo mota'u, da takoa haweakoke aroaku, ondae mbo'u ueku mota'u iramo?” 13Ka i'amba mepau Iramo i Ue ndi Burahima, ”Tembio i Sara ka ipengingisi, ka ipotae: Mentee ntu'uke aku me'ana, ka hinaano mota'u akumo? 14#Luk. 1:37Hinaoke te'asa anu nahi ta gagi ndi Ondae i Ue? A tempo anu pinakosiomo atuu, ta'u ramai, Aku wali tepohaweakomu. A tempomo atuu i Sara hinao anano asa ana ntama.” 15Sine i Sara mehapu, ipotae, ”Komba kupengingisi,” hangano doito. Sine mepau Ira i Ue, ”Naahi, omue lano mengingisi hieno!”
Po'emano i Burahima tiano Sodomo
18:16-33
16Ka i'amba mpelungka iramo mia atuudo inso i ra'ai, ka mpengkita te'aro i Sodomo. I Burahima melempa meronga saru ondae, lumako moronto ira. 17Mompewowolo Iramo i Ue, ”Nde Aku mewuniakonoke inso ndi Burahima hapa anu Aku weweuo? 18Kombake i Burahima ta gagi tongku anu langkai ka pabawa, ka hangano onae luwuno tongku i tolino ira mpohawe ronso? 19Hangano Kubinikiomo, ka iparenta ira anano ka inuleno ka dokongko mentondao sala-Do i Ue saru mpoweweu menteea ka moleoa; ka Dopoweeakono mbo'u i Ue i Burahima hapa anu dinandi-Do ndi onae.” 20Mepau Iramo i Ue, ”Peraali mongkona Sodomo ka Gumora, hadio ntu'u ka tedoa ntu'u mobea halano. 21Moikoopo Kupetii ka kumitao, ba mentee ntu'u mpelelu iramo kana peraali anu hawe ndi Ongkue; tewala naahi, Aku koa tumo'orio.”
22Ka i'amba mia atuudo mebintao po'ianga atuu, ka mpelempa melako i Sodomo, sine i Burahima da kongkono mentade mpiha i aro-Do i Ue. 23I Burahima aiwa umpeda, ka ipotae, ”Nde Komiu mokotampula irake mia mentee meronga saru mia mosa'o gaudo? 24Kana'umpe tewala hinao lima pulu mia mentee a laro ngkota atuu? Nde Komiu mokotampulaoke po'ianga atuu ka nahi ampunio hangano lima pulu mia mentee anu kongko i larono? 25Nahi kupompe'ala-ala Komiu moweweu kanandio, mompepate mia mentee saru mia mosa'o gaudo, ranta mia mentee pinongkena saru mia mosa'o gaudo! Anu kanatuu nahi Komiu weweuo! Kana'umpemo Puu Mpobitara asa wawontolino mohuku nahi moleo?” 26Mepau Ira i Ue, ”Tewala mohawe Aku lima pulu mia mentee a laro ngkota Sodomo, Aku umampunio luwuno po'ianga atuu, hangano ondae.” 27Sumangki i Burahima, ”Menteeano mompemosia akumo mepau ndi Omiu Ue, maupo ongkue andio pampawu ka awu. 28Kana'umpe tewala makura olima mia inso anu lima pulu mia mentee atuu, nde Komiu koa mokotampulaoke luwuno kota atuu hangano olima mia atuu?” Mepau Ira, ”Nahi Aku mokotampulao, tewala mohawe Aku pato pulu ka olima i ra'ai.” 29I Burahima motilaloakono mbo'u pauno ndi Ondae, ”Kana'umpe tewala pato pulu anu hinawe i ra'ai?” Mepau Ira, ”Nahi Aku weweuo kanatuu, hangano anu pato pulu atuu.” 30Motae i Burahima, ”Si tekudaakune Ue, tewala mepau aku mbo'u tepohona. Kana'umpe tewala tolu pulu anu hinawe i ra'ai?” Mepau Ira, ”Nahi Aku weweuo kanatuu, tewala mohawe Aku tolu pulu i ra'ai.” 31Mepau i Burahima, ”Menteeano mompemosia akumo mepau ndi Omiu Ue. Kana'umpe tewala rua pulu anu hinawe i ra'ai?” Mepau Ira, ”Nahi Aku mokotampulao, hangano anu rua pulu atuu.” 32Motae i Burahima, ”Ku'emao ndi Omiu Ue, si tekuda tewala mepau aku mbo'u pohonamo koa ndio. Kana'umpe tewala hopulu anu hinawe i ra'ai?” Mepau Ira, ”Nahi Aku mokotampulao, hangano anu hopulu atuu.” 33Ka i'amba Ondae i Ue lumako Iramo, mansa-Do umari mepau ndi Burahima; ka i Burahima mekule a mpo'iangano.
Iliyochaguliwa sasa
Tegagia 18: XMZ
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia