Chan 7
7
Chisʋs ʋt luma chohmi hosh a̱yʋt Chelusalem a̱ ona ma, Chu ʋhleha hʋt yʋmmak ash pisa bʋnnʋt aiasha mʋt, nan isht anukfilli kʋt im ilaiyukʋt aiasha, 1, 14 Chisʋs ʋt tempel a̱ ont chukowa cha, nan ithʋnanchit ahanta. 37 Hatak ʋt itukshila hokʋto, ilap ak o̱ im ai onʋt nan ishka hi a̱, ahnit Chisʋs ʋt hoyo.
1Nana kʋt ai yakohmi ha ya, Chisʋs ʋt Kalili yakni ak o̱ ahanta tok: Chu okla hash osh yʋmmak ash ʋbi ka bʋnnʋt ma̱ya hatuk o̱, Chu i̱ yakni yokʋno ahanta he ik ahno ha tok.
2Mihma Chu okla chisha̱ko ʋlhtipo nuta ai impa holitopa yoh chatuk nitak ʋt a tikeli tok.
3Yohmi hatuk o̱ i̱ kanomi ʋhleha hʋt yʋmmak ash o̱, Ilʋppa issʋt iʋt, Chutea yakni yak o̱ ish ona na nan chim ai ithʋna ʋhleha hak kia na‐fehna puta ish ai yʋmihchi ka pisashke.
4Ilapo ʋt otʋni achukmʋt annoa hi a̱ ahni hokʋt, hatak ʋt ai aluma̱ka ho̱ nana ka yʋmihchi chatuk ʋt iksho hoke. Ilʋppak oka a chi yʋmohmi mʋhli chatuk okmʋt, yakni a̱ ish il ai im otʋninchashke, okla im achi tok.
5I̱ kanomi ʋhleha hak kia ik i̱ yimmo hatuk osh.
6Mihma Chisʋs ash ot, Ʋno ʋt ia la he ai ʋlhpiesa kʋto ik ai ono ki̱sha hoke; amba hʋchishno ʋto hʋsh ia hi ʋt hʋchim ʋlhpiesa bieka hoke.
7Yakni ʋt hʋchishno yokʋno hʋchi̱ nukkilla he keyu: amba ʋno ʋto yʋmma nana a kaniohmi kʋt ai ʋlhpiesa keyu ka atokolit anoli li hatuk o̱, ʋno yokʋno a̱ nukkilli hoke.
8Ai‐impa holitopa a̱sha ilʋppa hʋsh iashke; ʋno yokʋto ai ʋlhpesa kʋt ai ona fehna keyu ki̱sha hoka, ai‐impa holitopa a̱sha ilʋppa himonasi kʋno ia la chi̱ keyu hoke, im achi tok.
9Anumpa ilʋppa puta ka im ahanchit in taha mʋt, Kalili yakni akinli ho̱ anta tok.
10Yohmi tuk kia i̱ kanomi ʋhleha hash ot iʋt taha tuk o̱, ilap ash kia ile haiakʋchi fehna keyu, amba luma chohmit a̱yʋt, ai‐impa holitopa a̱sha kash ona tok.
11Yohmi ma Chu okla hʋt yʋmmak ash ai‐impa holitopa a̱sha ka hoyot, Mih mʋto katima yak o̱ hikia cho? achi tok.
12Mihmʋt kanimi kʋt, Yʋmmʋt hatak achukma hoke, achi ma, inlaka yokʋto, Keyu, amba okla ha̱ haksichi yoke, achi hatuk o̱ yʋmmak ash lumasit isht anumpulit, ilap bi̱ka itachowa fehnʋt ma̱ya tok.
13Yohmi kia Chu okla ha̱ i̱ nukshopa hatuk osh, hatak nana kia haiakʋchit yʋmma isht anumpuli kʋt iksho ki tok.
14Atuk o̱ ai‐impa holitopa a̱sha ka iklʋnnʋt taha foka ma, Chisʋs ash ot tempel a̱ pit chukowa cha, nana ithʋnanchi tok.
15Mihma Chu okla hʋt nukhlakancha cha, Hatak ilʋppʋt katiohmi kak osh ithʋna tok keyu kʋto, holisso ha̱ imponna hoh chishba? achi tok.
16Chisʋs ʋt afalaminchi mʋt, Nan isht ai ithʋnanchi li kʋt ʋno ʋmmi ho̱ keyu, amba auet sa kanchi tok ak o̱ immi hoke.
17Hatak nana hosh, yʋmmʋt nana ai ahni tok mak o̱ ahninchit yʋmihchi hokmʋt, nan‐isht‐ithʋnanchi ka Chiho wa ak o̱ a minti hokmá, keyukmʋt peh ʋno ahni li hosh anumpuli li hokmá, nana hatuk ma akostinincha hi oke.
18Kʋna kia peh ilap ahni hosh anumpuli hokʋto ilap isht a holitopa he ak o̱ aiahni chatuk; amba auet kanchi tok ʋt nan‐isht a‐holitopa he ak o̱ aiahni hokʋto, yʋmmak osh aia̱hli, mikma nana ik ai ʋlhpeso nana kia ai a takali keyu hoke.
19Moses ʋt ʋba‐nan‐ʋlhpisa ya̱ hʋch ima tok keyu ho̱? a tok ak o̱ hʋchi achʋfona kia ʋba‐nan‐ʋlhpisa mʋno hʋch ik holitobloshke. Nanta katiohmi ho̱ sʋbi bʋnnʋt hʋsh itʋnowa cho?
20Okla hash ot afalaminchi mʋt, Nan‐isht‐ahullo okpulo yo̱ il ai eshi chia hoka, kʋta hosh chibi bʋnnʋt itʋnowa hoh cho? okla achi tok.
21Chisʋs ʋt afalaminchi mʋt, Nana achʋfa ho̱ ai yʋmihchi li, yʋmohmi ma momʋt okokko! hʋsh ahnishke.
22Yohmi ka Moses ʋt hakshup tʋpa ka hʋchim apesa tok. Moses ak osh yʋmma tikbanlichi tok keyu, amba in tikba ʋhleha ak a tok: a tok kia hʋchishno ʋto nitak hullo nitak o̱ hatak hakshup hʋsh in tahamblishke.
23Moses i̱ nan‐ʋlhpisa yut ik kobafo ka chi̱ ka, hatak ʋt nitak hullo nitak o̱ hakshup in tʋptoho̱wa ma, ʋno ʋto nitak hullo nitak o̱ hlakofichit kaiyanchi li kak o̱, hʋs sa̱ nukkilli cho?
24Nana kʋt a kaniohmi ahoba kak o̱ isht ik hʋchim anukfilo kashke; amba nana kʋt isht ʋlhpisa kʋt ai‐ʋlhpiesa mak o̱ isht hʋchim anukfilashke.
25Mihma Chelusalem a̱ a̱sha tuk ʋt kanimi kʋt, Okla ʋbi bʋnnʋt ma̱ya beka tuk a̱ ilʋppak osh mih mak o̱ keyu̱?
26Yohmi kia nukwa̱ya iksho hosh anumpohonli ma, nan ok ik im achoshke. Ilʋppak osh Klaist fehna mak o̱ mʋhli kʋno, hatak pehlichi ʋhleha hʋt akostininchi hoh chishba?
27Yohmi kia hatak ilʋppʋto kanima yo̱ a minti ka iloh im ithanʋshke; amba Klaist ak osh ʋla hokma, kanima yo̱ a minti ka hatak nana hosh akostinincha he keyu hoke.
28Mihma Chisʋs ʋt tempel anu̱kaka ya̱ nana ai ithʋnanchi hosh anta tuk ash osh chitolit, Ʋno a̱ hʋs sʋthana mʋt, anonti kanima yo̱ a minti li tuk ma hʋsh ithanʋshke; yohmi ka ʋno akinli ahni li hosh a̱ya li keyu, amba auet sa kanchi tok yʋmmak osh aia̱hli mak atuk o̱ yʋmma chik ithanoshke.
29Amba ʋno ʋto yʋmmak o̱ a minti li tuk okʋt, yʋmma ithana li hoke; yʋmmak osh auet sa kanchi tok mak oke, achi tok.
30Mihma okla ishi bʋnna tok; yohmi kia hʋshi kanʋlli isht ai im ʋlhpisa kʋt ik ai ono ki̱sha hatuk oka, hatak nana kia ibbak a̱ ik onocho ki tok.
31Mihma okla la̱wʋt yʋmmak ash i̱ yimmi mʋt, Klaist ak osh ʋla hokmʋto, na‐fehna puta ka yʋmihchi kʋt, hatak ilʋppʋt ai yʋmihchi tuk puta ka i̱ shahlicha hinla ho̱? okla achi tok.
32Okla hʋt lumasit yakohmichit yʋmma isht anumpulit ma̱ya ka, Falisi ʋhleha hʋt haklo tok; micha Falisi ʋhleha, mikmʋt na‐holitompa isht a̱sha pehlichi ʋhleha aiena kash ot yʋmmak ash isha chi̱ ka, tishu ʋhleha ha̱ pit tihleli tok.
33Mihma Chisʋs ash ot, Chekosi itintakla kak o̱ hʋchi takla anta li moma chi̱; atuk mʋt anonti auet sa kanchi tok a̱ im ia la chi̱ hoke.
34Hʋs sa hoyo kia, hʋch ik sa peso ka chi̱; mikmʋt kanima yo̱ ai ahanta likma, yʋmma hʋsh ai ona he keyu hoke, im achi tok.
35Mihma Chu okla hash osh ilapo bi̱ka it im achit, Katima ko̱ ia chi̱ hokak o̱, keho pesa ka chi̱ hoh chishba? ita‐timimpʋt Chentail okla ibʋlhkahʋt a̱sha hak o̱ im a̱yʋt, Chentail okla ha̱ nan ithʋnancha chi̱ ho̱?
36Ilʋppak osh anumpa nanta mak o̱, Hʋs sa hoyo kia, hʋch ik sa peso ka chi̱; mikmʋt kanima yo̱ ai ahanta likma, vʋmma hʋsh ona he keyu hoke, achi tok.
37Nitak ont ishtaiyopi na holitoblit ai‐impa nitak chinto yʋmmak fehna Chisʋs ʋt hikia cha, tahpahanla mʋt, Hatak nana hosh itukshila hokmʋt, ʋno ak o̱ ʋm ai ʋlʋt ik ishkó.
38Kʋna hosh ʋno a̱ a̱ yimmikma, yʋmmak o̱, Holisso Holitopa yʋt achi hatuk oka, oka okcha̱ya okhina yʋt chu̱kʋsh a̱ a yanʋllit a kokoncha chi̱ hoke, achi tok.
39Yohmi kia ilapa̱ i̱ yimmi ʋhleha hʋt Shilombish a̱ habena he yʋmmak o̱ isht anumpuli hosh ilʋppa miha tok: Chisʋs ʋt ont ik a holitopo ki̱sha hatuk o̱, Shilombish Holitopa yʋt ik a̱yo ki̱sha ha tok.
40Yohmi hatuk o̱ anumpa ilʋppa haklo mʋt, okla hash ot lauʋt, Ilʋppak osh hopaii mih mak o̱ fehna ho mʋhlishke, achi tok.
41Kanimi mʋt, Ilʋppak osh Klaist mak oke, achi ma, amba kanimi kʋto, Klaist ʋt Kalili yakni a̱ ʋttʋt a kohchʋt a̱ya hinla ho̱?
42Klaist ʋt Lewi Ushi ai isht atiaka ho̱, micha Behlehem tʋmaha Lewi ʋt ai ahanta tok mak o̱ ai ʋtta ahpa hi a̱, Holisso Holitopa yʋt achi hatuk keyu̱? achi tok.
43Yohmi hatuk o̱ yʋmmak atuk mak o̱ okla hʋt isht ai ta kashapʋt ma̱ya tok.
44Mihma kanimi kʋt yʋmmak ash ishi ka ahni tok; yohmi kia hatak nana hosh ibbak a̱ ik onocho ki tok.
45Yohmi ma tishu ʋhleha hash osh na holitompa isht a̱sha pehlichi ʋhleha, micha Falisi ʋhleha aiena kash im ai ona tok; mihma yʋmmak ash osh, Nanta katiohmi ho̱ yʋmmak ash isht hʋch ik lo cho? im achi tok.
46Mihma tishu ʋhleha hash ot, Hatak nana hosh anumpuli kʋt hatak ilʋppa chohmi chatuk keyushke, achi tok.
47Mihma Falisi ʋhleha hash ot afalaminchi mʋt, Hʋchishno ak kia hʋsh i̱ haksi hotuma?
48Hatak hochitoka, keyukmʋt Falisi ʋhleha aiena kʋt kanimi mʋt, yʋmma i̱ yimmi tuk o̱?
49Yohmi ka nan‐ʋlhpisa kia ithana keyu okla ilʋppʋto nan isht i̱ palʋmma he ʋlhpesʋshke, achi tok.
50Nikotemʋs, yʋmmʋt ninak o̱ a̱yʋt Chisʋs a̱ im ona tok ash ot, yʋmma ai ibachʋfa hatuk osh,
51Nan ʋlhpisa pin tonla kʋt hatak a̱ ai i̱ haponaklot, nana ho̱ a kaniohmi hatuk ma ai akostininchi keyu ki̱sha kʋt, nan im apesa chatuk oh cho? im achi tok.
52Mihma okla afalaminchi mʋt, Chishno ak kia Kalili hatak chia hatuk o̱? achukmalit hoyot pisá: hopaii ʋt Kalili yakni a̱ ai ʋttʋt kohchʋt a̱ya hi ʋt iksho hoka, im achi tok.
53Yohmi ma hatak ash ot momʋt in chuka aiyuka ilhkolit taha tok.
Iliyochaguliwa sasa
Chan 7: CHH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the American Bible Society 1848-1886, reprinted 1913
