Bi tɨ Tomni na cida 2
2
Ndɨla Lal na jir
1Gorne ɗa̰y tɨ pantekot#2.1 Lév 23.15-21; Deu 16.9-11 an gɨna, bi tɨ hul kula taygɨ gun tɨ un ɓudu. 2Tɨ daamu, wa̰y paa o̰ tɨ ndɨlasul cḛy wuu kuna saaw ɗəng nig, la ər sir li ne a ti tɨ nin. 3Wa̰y wag tɨ a sul kuna laa ndila la ər ɓaan peer ɓudu na ɓudu tɨ jakaw sul.#2.3 Mat 3.11; Luk 3.36 4Ndɨla na Lal sir a hul gun la, a ɗolɔ tɨ ja jaa na gṵ jak jak kuna Ndɨla na Lal naa gɨ a ul mu tɨ ja. 5Tɨ Jerusalɛm, Juyb kalɔ gun ne a yabu Ndɨla a wo nin, a o̰ tɨ lwərgɨ gun ne tɨ dunya̰ hul. 6Gorne a laa wa̰y paa na nig cḛy gɨna, a taygɨ dɨbla. Wa̰y ne ɓɔr a ji nari, kəysul jakaw laa bi tɨ hul kula ja jaa na a gṵ tɨ twila. 7Ɓɔr a ji nari gun la, a una wa̰y ne ka paa ji lo, la a ja ɓə: «Bi ne wo ja jaa gun le tɨ bi tɨ Galile lo a? 8Ka waa ta jakaw tɨ i daan laa a jaa na ər gṵ tɨ twila a? 9Tɨ ī daan, bi ne o̰ tɨ lɔr nəgri sul tɨ Partɛs la, tɨ Mɛdɛs la tɨ Elam la. Bi tɨ lɔr nəgri sul tɨ Mesopotami la, Jude la, Kapados la, Po̰ la, tɨ nəgri taal tɨ Asi la, 10Priji la, tɨ Pampili la, tɨ Ejipt la tɨ lwərgɨ tɨ Libi ne tɨ ndog na Siren la, Bi tapeer o̰ tɨ nəgri sul tɨ Rom la, 11Bi tɨ Krɛt la bi tɨ Arabi la, ton a toy a tɨ Juyb-a la ton ka a ndula tɨ Juyb-a la wo nin, lɛ jakaw tɨ yi daan laa a jaa na ər gṵ tɨ twila. Yḭr ne, tɨ Ndɨla na wa̰y ɗəng tɨ kar.» 12Ɓɔr a ji gun la a una wa̰y ne a wo ilgɨ tɨ sul lo. A ja gɨ peer tɨ a daan: «Wa̰y ne ji ɓə kəy a?» 13Lɛ bi tapeer ka bi tɨ hul kula siri la a ja ɓə: «Tɨ ham jo ka a ji!»
Piyɛr na jaa tɨ ja
14Gɨna Piyɛr o̰ tɨ ndal na Jesu na bi tɨ wa̰y edɨ dɔkɔmɛ kar kede. Ər ja gɨ bi ja na dwari ɓə: «Yḭ Juyb la bi gun ne ti tɨ Jerusalɛm, i kay i tulɔ tɨ ən jaa laa ɓari la i una wa̰y ne ka paa ji la. 15Ham ka bi ne ji kuna yi ilgɨ lo, kəysul ɗang tɨ lula bṵra̰#2.15 Na lula ne ham o bi tɨ Juyb-a maan ji kar lo ɗang kəysul a twi wa̰y gorne a tong Ndɨla soon tɨ gaan ne tɨ lula tɨ unasaal.. 16Lɛ ndogle, tɨ jaa ne Ndɨla na nebi Johel ja ər toni jo an ara. Ər ja ɓə:
17“Ndɨla ja ɓə wa̰y ne ɓə an na ɗa̰y lɔ tɨ tong jo le:
Ən ɓə ən Lal ɓaan tɨ bi gun sul,
i ɓimi tɨ ɓərgɨ la i ɓimi tɨ aa la, a ɓə duga tɨm ən nebi,
i bi korgɨ ɓə mum ne wo hina ləg tɨ a ilgɨ hul
la nenɨm ɓə i bi nii kar la.
18M, na ɗa̰y ne ən ɓə ən Lal ɓaan tɨ ən bi tɨ cida ton ɓərgɨ la aa la sul,
a ɓə duga tɨm ən nebi-a.
19Ən ɓə mum ne ɓɔrji kar tɨ ndal tɨ ndɨlasul,
la mum ne ka ayri ɓə wag tɨ nəgri sul la:
Hima la, laa la, seem ɓə gurga la.
20Lula ɓə duga tɨm ɗoyri la, pya̰ ɓə duga hiina kuna hima la.
Toni barita Baali na ɗa̰y ɓə hina. Ɗa̰y ne, tɨ ɗa̰y ɗəng la tɨ ɗa̰y tɨ taan la.
21Gɨna, bi ton soon Ndɨla ɓə nina tina.”
22«Bi tɨ Israhel, i laa jaa ne ən ɓə gɨ i ja ɓari: Jesu, wo tɨ Najarɛt, ɓər ne ko Ndɨla ji. Na ul mu tɨ yḭr ndɔ, Ndɨla ɓla gɨ i mum la, ər ka mum ne ɓɔrji la mum ne ka ayri la tɨ ī daan kuna yḭ may una ɓari. 23A nɨm ɓər ne tɨ i daa kuna Ndɨla so ər gṵ toni la wa̰y ne ər par ɗa̰ysul toni tɨ kar la. Yḭ hun ər na ul mu tɨ bi ne una Ndɨla ɓari lo, nɨ a ɗɨb ər tɨ tɨla tərgɨ sul. 24Lɛ Ndɨla tung ər sul wag na ər tɨ pɛw tɨ ulu hul, kəysul ulu dwari lɛm ər bunga lo. 25Dabid ja jaa tuna ər sul:
“Ən ləg Baali tɨ ən kwi yɔd,
ər wo tɨ ən lɨma sul, nɨ ən kɔbgɨ lo.
26Nejo ən hul laar ən nari la, ən mu wag na jaa laar mani la,
tɨ ngalɨm hul kaw, ən ulu ɓə loom na hul kay,
27kəysul, əm ɓə ən ndo̰yngɨ nɨm tɨ ulu daan lo la əm ɓə yin, əm wo ndeeri nɨm lɔr tɨ ngalɨm hul lo la.
28Əm ɓla gɨ ən ul tɨ tɨm jili,
la əm ɓə gɨ ən ndula laar ɗəng naa tɨ əm kwi la.”
29«Ən ɓungɨ, ən taam gɨ i ja jaa tɨ bayri tuna i kaa tɨ Dabid sul: Ər uy, a bili ər la. Ər ngalɨm sul kakam kaw wo nin tɨ i daan. 30Lɛ toni, yḭr tɨ Ndɨla na nebi la, ər una ɓə Ndɨla naa gɨ ər gṵ tɨ bayri ɓə wo paa tɨ ər kalɔ ɓə waan tudi tɨ ər gor. 31Dabid una Mesi na wag tɨ ngalɨm toni nejo ər ja jaa tuna ər sul ɓə:
“Ndɨla ɓə ər ulu nɨm tɨ bi tɨ ulu daan lo la,
ər ɓə ər ulu nɨm lɔr tɨ ngalɨm hul lo la.”
32Ndɨla wag na Jesu ne ən ja jaa tuna ər sul tɨ ngalɨm hul la yḭ gun i ləg ər ɓari na i ji la. 33Ndɨla uma ər tɨ ndal la ər kay ər tɨ ər lɨma sul, la ər naa gɨ ər Lal ɓari ne ər ha̰w gṵ tɨ naa la. Ər ɓaan Lal ɓari ne tɨ i sul. Nejo tɨ wa̰y ne yḭ ləg la yḭ laa ndogle la. 34Kuri Dabid ɗɔl tɨ ndɨlasul lo, lɛ ər ja:
“Baali tɨ Ndɨla ja gɨ ən Baali ɓə:
Hina əm ti tɨ ən lɨma sul,
35Ən ɓə na əm peer tɨ pɛni hina nɨ a ha̰wni a ɗa̰y tɨ əm kwi.”
36Ka bi gun tɨ Israhel una ɓari ɓə Jesu ne yḭ ɗɨb tɨ tɨla tɨ tərgɨ sul jo Ndɨla duga na ər Baali la Mesi la!»
37Gorne bi laa jaa ne gɨna, a sul tɨ tugla lo, la a ja gɨ Piyɛr la bi tɨ wa̰y edɨ tapeer la ɓə: «Ɓungɨ, i ɓə kar waa a?» 38Piyɛr duga gɨ a: «Yḭ nɨm i ɓijim tɨ kar la ka jaa kaw ka batɛm na Jesu Krist ndil, nɨ ka Ndɨla hul ɗina ər tɨ i ɓijim sul. Nejo Ndɨla ɓə gɨ i Lal ɓari naa kede. 39Kəysul Ndɨla ha̰w gṵ ti gɨ yḭ la i ɓimi la, bi ne ti ɓag ne i Baali tɨ Ndɨla ɓə a soon la.»
40Piyɛr ja gɨ a ja jak dɨbla cam tɨ gɨ a mum dɨbla lɔ jul la tɨ ɓər wur tɨ a hul la. Ər ja gɨ a ɓə: «Yḭ yey ɓag na bi kalɔ ne ndogle ɓə Ndɨla ɓə i nina!» 41Bi dɨbla tɨ a daan ko Piyɛr na jaa la a ka batɛm la. Na ɗa̰y ɗay bi ji ti ndog na aru minga ɗɔl tɨ bi tɨ hul kula sul.
Bi tɨ hul kula na tɨm
42Ɗolɔ na ɗa̰y ne hul, bi tɨ hul kula hina na ɗa̰ysul, a laa bi tɨ wa̰y edɨ na wa̰y tɨ ɓla la, a ko peer hul la, a ɓaan gɨ peer tudi la a soon Ndɨla la. 43Jakaw oy gɨ Ndɨla la, kəysul Jesu na bi tɨ wa̰y edɨ ka mum ne ɓɔrji la mum ne ka ayri la dɨbla na Ndɨla na dwari. 44Bi tɨ hul kula gun kay ndɔ tɨ paa. A tay a mum tɨ tina gun tɨ un ɓudu. 45A huna a wərgɨ la a mum tɨ tina la, a ɓaan gursu tɨ a daan gun na ul mu tɨ jakaw na pɛw. 46Na ɗa̰ysul a ten peer tɨ Ndɨla li jaal mu, a twi wa̰y tɨ peer gə̰y na ndula laar la na hul ɓudu la. 47A teen Ndɨla, la bi gun ka a kum la. Na ɗa̰ysul Ndɨla ɗɔl bi gun ne ər nen ji tɨ paa sul la.
Iliyochaguliwa sasa
Bi tɨ Tomni na cida 2: nie
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2023, ATALTRAB
