Bi tɨ Tomni na cida 1
1
Jesu ha̰w gṵ tɨ Lal ɓari tomni
1Ən ɓun Tehopil, tɨ ən maktub tɨ toni mani hul#1.1 Luk 1.1-4, ən ja jaa tuna mum gun ne Jesu ka la ɓla gɨ bi ɓagcagri tɨ mum lɔ ɗula, 2marway tɨ ɗa̰y ne Ndɨla ɗɔl na ər tɨ ndal. Toni barita ər ɗɔl, ər ja jaa ne, na Ndɨla Lal dwari, gɨ bi tɨ wa̰y edɨ ne ər ɛr ka a ti ər bi tɨ ər ja jaa. 3Tɨ ər ulu bəgri, ər ɓla gɨ a ər ndula na ul mu dɨbla ɓə ər ti jili kuri. Tɨ ɗa̰y duk so hul, ər wag tɨ a sul la ər ɓla gɨ a mum tuna Ndɨla na waan sul la#1.3 Luk 24.36-42; Ja̰ 20.19-20,26-27. 4Ɗa̰y ɓudu, gorne ər wo wa̰y tudi mu na a gɨna, Jesu naa gɨ a gṵ ne: «Yḭ ka saal ɓag na lɔr ɗəng tɨ Jerusalɛm lo, lɛ ī ti ī a̰y wa̰y ne ən ba ha̰w gṵ tɨ gɨ ī naa, wa̰y ne yin maan kaw ən ja gɨ ī toni#1.4 Luk 24.49. 5Ja̰ ka bi batɛm na ndu, lɛ yḭ gɨna gə̰y ndog, a ɓə gɨ i batɛm kar na Lal ɓari.#1.5 Mat 3.11; Mrk 1.8; Luk 3.16; Ja̰ 1.33»
Jesu ɗɔl tɨ ndɨlasul
6Jesu na bi tɨ wa̰y edɨ ne tay peer tɨ ər sul ɓiri ər jaa kuna paa ne: «Baali, pay tɨ ɗa̰y ɗay jo əm ɓə waan tɨ Israhel kula gɨ a naa a?»
7Ər duga gɨ a: «Lula sul la ɗa̰y ne mum ne ɓə paa kar tɛr i tɨ una lo, kəysul tɨ ən ba jo kay lula sul ne na may dwari. 8Lɛ yḭ ɓə dwari tina, gorne Lal ɓari ɓə jir tɨ i sul, gɨna yḭ ɓə duga bi tɨ ən ja jaa tɨ Jerusalɛm la, tɨ lɔr nəgri sul tɨ Jude la, Samari la marway tɨ lɔr mu tɨ tong.» 9Gorne ər ja jaa ne tong gɨna, ər ɗɔl tɨ ndɨlasul tɨ a ji, la ndɨla goblə kubgɨ ər nɨ a lɛm ər ləg lo. 10Gorne a wo Jesu lɔ ləg tɨ ndal ɗang gɨna, bi tɨ ndidi ton wur sər bor wag tɨ a sul, 11la ja gɨ a: «Yḭ bi tɨ Galile, kəyja i mugla ndɨlasul ləg lo a? Jesu ne i ləg ər na ɗɔl tɨ ndal ɓə duga hina kuna paa ne la.»
Jesu na bi tɨ wa̰y edɨ
12Gɨna Jesu na bi tɨ wa̰y edɨ o̰ tɨ nan tɨ olibe sul a duga a hina tɨ Jerusalɛm. Nan tɨ olibe ne ti ndog na Jerusalɛm, lɛm ndog na kelengɨ ɓudu. 13Gorne a an tɨ Jerusalɛm gɨna, a ɗɔl tɨ li ne ti tɨ paa sul, ne tɨ a un tɨ paa tina. Tɨ Piyɛr la, Ja̰ la, Jak la, A̰dre la, Pilip la, Tomas la, Bartelemi la, Matyo la, Jak Alpe na ɓa̰ la, Simo̰ wo tɨ muna lɔr jaa la, Jud Jak na ɓa̰ la. 14A ji gun a tay peer tɨ un ne na ɗa̰ysul tɨ Ndɨla soon, na aa tapeer la, na Mari, Jesu na na̰ la, na Jesu na ɓungɨ la.
15Ɗa̰y paa, bi tɨ hul kula tay paa, a lɛm ndog na aru na dug sap gɨna, Piyɛr o̰ tɨ ndal tɨ a daan la ər jaa gɨ a ɓə: 16«Ən ɓungɨ, ka jaa ne Ndɨla na Lal ja toni tɨ maktub hul, na Dabid na mu, tuna Judas, wo ne jul bi kwi tɨ Jesu par ti jaa kuri. 17Judas tɨ wo ɓudu tɨ i daan la ər ten wa̰y tɨ daa sul ne tuna ər cida sul. 18Na gursu ne a naa gɨ ər tɨ ər daasul tɨ wo humna, Judas si ər huna waal: Ər tɨba tɨ waal ne hul, ər sul toy nəgri la, ər hul ɓɛrgɨ tɨ paa daan la ər gəngɨ gun wag tɨ bayri. 19Bi gun tɨ Jerusalɛm una wa̰y ne ka paa nejo a soon waal ne na a gṵ “Hakeldama” ne ji ɓə “waal tɨ hima.” 20Lɛ jaa ne a kya̰ tɨ maktub tɨ Kwan hul jo le:
“Ka bi ɓini ər gə̰y
la wo ɓudu in ka tɨm tɨ ər gor lo.”
La kya̰ cam:
“Ka wo paa ko ər gor tɨ cida kar.”
21-22Ndini ne wo paa ɓə wur tɨ i daan tɨ gɨ bi Baali Jesu na wag tɨ ngalɨm jaa lɔ jul. Wo ne ɓə wag tɨ bi ton si na i na ɗa̰y sul ne Jesu yang na i tɨ lwargɨ sul. Ɗolɔ tɨ lula sul ne Ja̰ ka gɨ bi batɛm marway na lula sul ne a jul Jesu tɨ ī daan.»
23A wag na bi tɨ ndidi: Josep ne a soon ər Barsabas, ne a wur ər ndil jak ɓə Justus la, Matiyas la. 24Gɨna, a soon Ndɨla a ja ɓə: «Baali, yim ne əm una bi nirimu gun, ɓla gɨ i bi tɨ ndidi ne daan, jaa jo əm kay əm daa tɨ ər sul a? 25Ər ɓə tɨm Jesu na wo tɨ tomni, tɨ cida ne Judas ka lɛ ər nɨm ər si tɨ un ne tuna ər sul.» 26Gɨna a ka mbara la mbara tɨba tɨ Matiyas sul. Ər hari ər ndula na Jesu na bi tɨ wa̰y edɨ dɔkɔmɛ kar kede.
Iliyochaguliwa sasa
Bi tɨ Tomni na cida 1: nie
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2023, ATALTRAB
