Pinongoorapan 11

Tuturan ni Pitrus so lobuw poimaid

so Yirusalim

1Norongou-o sono nu pinongoorapan ni Yisus om lobuw poimaid so pilolongkop nu Yudia, nu nopoimaid-o ongo lobuw okon ko Yaudi nu tinongaran nu Kinoringan. 2Nokopululi' yo po si Pitrus so Yirusalim kiat so Kaisaria, ininsala' sono iyo nu lobuw Yaudi iri nopoimaid-o so si Yisus om kakal po mongowaid nu adat nu sunat iiri nu, 3“Nokuro ka su masuw ko so waloi nu lobuw dai po nosunatan-o, om murung so nosiro mongokan?” koo. 4Nga tuturani yo sono ni Pitrus kiawi' nourug iiri kiat so timpuun sampai so pongoowi'an nu,

5“Laid ku mogdu'a so Yupa, nokosorou aku nu kumut olaab niuluw so riniba tu, so tiningkuangon ku ri, mawid-tawid opat pupijuan-i. 6Potongi ku yo iri om nokosiou aku so dilalom-i nu koginisan nu kulos-kulos opat akod ongo sisiau, lulumoloi, om bombolog ongo sisiau. 7Mutongaro yo sono Kinoringan so aku nu, ‘Oo Pitrus, undii yo, goraso yo ono, om okano yo!’ koo, 8nga sombuti ku yo nu, ‘Dai, Tuhan! Dai po su insan mongokan nu osabul intawa osaim,’ k'aku. 9Mutongaro yo Kinoringan so aku nu, ‘Kiawi' inurug nu Kinoringan, adang-o pokosobulon,’ koo. 10Intolu minuuli'-uli' nosorou ku iiri, om pinudik-o sono koimbagu so langit. 11Iya ya iiri, linumoga' tolu koyuwan so waloi inintoronan ku so Yupa ri ungkiat so Kaisaria, sinuu' poponogina so aku. 12Pudi pona okon ko lobuw Yaudi nosiro, pinowaid aku ya nu Atod nu Kinoringan so nosiro om dai ya su maa'-laa' nu iri. Onom koyuwan lobuw Yaudi nopoimaid so Yupa ri nga, minaid-a so aku mian so Kaisaria, om mosuwo kai yo so waloi ni Kurnilius. 13Minonuturan sono si Kornilius nu nokosorou iyo nu susuu'on nu Kinoringan minundii so asuw nu waloi niyo ri, om minutangar nu, ‘Ponuu' yo nu lobuw mian so Yupa, monogina so si Simun Pitrus. 14Potuturan iyo so kou nu abar koponapul so kou, om kiawi' lobuw so waloi mu no,’ koo susuu'on-i. 15Laid ku montuduk so nosiro ri, lumogaa yo sono Atod nu Kinoringan mogkuasa so nosiro, soko iri nourug so toko nu Runat Pintakusta ri. 16Noondoman ku sono tangar ni Yisus gulu ri nu, ‘Mongodiu' si Yuanis gulu ri, sungoi-a su pokayon, nga dai yo olaid om Atod nu Kinoringan-o su mogkuasa so kou,’ koo ri.#P'rapan 1:5 17Indadi, otolang-o sobana nu Kinoringan-o su monaak so lobuw okon ko Yaudi nu soko iri nitaak so toko, iri tinorima' toko nu iya toko poimaid so si Yisus gulu ri. Pagka soko ono, dai su kopomogos nu Kinoringan!” koo si Pitrus.

18Pagka soko iri yo tinangar ni Pitrus, dai yo sono ininsala' iyo nosiro. Minongorayou sono nosiro nu Kinoringan, om mutongaro yo nu, “Bang soko ono, lobuw okon ko Yaudi nga kikosiwatan-a rumorogo momaal nu koraayan, om miau sono musingkolaid maid so Kinoringan,” koo.

Lobuw poimaid so Antiukia

19Nopatoi-o po si Stipanus, tumimpuun-o sono raai-raayon lobuw poimaid so si Yisus. Nokoputotondiang nosiro om minulaiw so wonuo nu Punisia, Siprus, om so bandar Antiukia, om tinuturanan nosiro lobuw Yaudi nu abar kiat so Kinoringan.#P'rapan 8:1-4 20Nga tinu-tinu koyuwan wokon poimaid so si Yisus, kiat so Siprus om Kirini, minian so Antiukia, om nopotuturan nu Abar Owarong suat so si Tuhan Yisus so lobuw okon ko Yaudi. 21Waid-waidon nosiro nu kuasa nu Tuhan sampai osuang sono lobuw nopoimaid om mululi' so Tuhan Kinoringan.

22Norongou-o po nu lobuw poimaid so Yirusalim abar suat so lobuw poimaid dii so Antiukia, niapit sono nosiro si Barnabas dii. 23Nokologa' yo po si Barnabas, om nosiou niyo nu binorokatan nosiro nu Kinoringan, sobana ko nosudu'an iyo. Mutongaro yo sono iyo so nosiro nu subai tumatap poimaid so Kinoringan, dai musio-sio om otoroido inawo. 24Si Barnabas oono sobana ko owarong kogoyaan, kinuasa nu Atod nu Kinoringan om opiot koimaidan, om osuang lobuw noingolan niyo poimaid so Tuhan.

25Nopupus iri, miano yo iyo so Tarsus modium so si Saulus. 26Nooyangan-o po niyo si Saulus, owito yo niyo mululi' so Antiukia. Sontoun laid nosiro muimpug maid nu lobuw poimaid, om montuduk nu lobuw suang. Om dii yo so Antiukia su pinonimpuunan mongingaran nu ongo lobuw poimaid so si Yisus nu Kristian.

27Iya iiri, tinu-tinu poo'abar nu Kinoringan ungkiat so Yirusalim minian so Antiukia. 28Ido koyuwan so nosiro ingoranan so si Agabus kinuasa nu Atod nu Kinoringan. Mundiio yo sono iyo momirasat nu kilikop so pilolongkop nu wonuo tu. (Likop iiri nourug nu laid ni Raja Maayo Klaudius mogkuasa.)#P'rapan 21:10 29Minuupakat sono kiawi' mompomaid ni Yisus dii ri nu poowit nu tulungan ombo kuwai so nosiro so inong poimaid so wonuo nu Yudia ri. 30Notuman-o sono pinuupokatan iiri, om suuo yo nosiro si Barnabas om si Saulus paapit nu tulungan-i so wowaidon nu lobuw poimaid so Yudia.

Iliyochaguliwa sasa

Pinongoorapan 11: TomPWPgLgPn

Kuonyesha

Shirikisha

Nakili