ಅಪೊಸ್ತಲೊ 7
7
1ತೆಳಾಮಾ ಮ್ಹೊಟೊ ಯಾಜಕ ಸ್ತೆಫನನೆ"ಎ ಸಂಗತಿಯೊ ಕ್ಹರಿ ವ್ಹೈಸು? ಕೈನ ಪುಚ್ಯೊ. 2ತೆ ವಾತೆ ಸ್ತೆಫನ ಅಮ್ಮ ಉತ್ತರ ದಿದ್ಯೊ; "ಮಾರಾ ಬಾವೊ, ಭಾಯೊ, ಮಿ ಕವಾನು ಧ್ಯಾನ ದಿನ್ನ ಐಕೊ. ಅಪ್ನೊ ಪಿತೃ ಥಯಲ ಅಬ್ರಹಾಮನೆ ಸ್ವರ್ಗಮಾತೊ ಕ್ಹುದಾ ದಿಕ್ಹ್ಯೊ. ಅಬ್ರಹಾಮ ಹಾರಾನಮಾ ರ‍್ಹವಾತಿ ಅಗ್ದುರ ಮೆಸಪೊಟೆಮಾ ವ್ಹತ್ತೊ. 3ಕ್ಹುದಾ, ಅಬ್ರಹಾಮನೆ ತಾರು ದೆಶ ತಾರಾ ಮನಕ್ಹೊನೆ ಛೊಡಿನ ಮಿ ತುನೆ ದೆಕಾಡಾನಾ ದೆಶೆ ಜಾ಼’ ಕೈನ ಕದ್ಯೊ. 4ತಿನಾಹುತಿ ಅಬ್ರಹಾಮನೆ ಖಾಲ್ದಿಯಾ ದೆಶ ಛೊಡಿನ ಹಾರಾನ ಕವಾನಾ ಗಾಮೆ ಗೈನ ರ‍್ಹವಾನೆ ಗಯೊ. ವರಿ ತಿನಬಾ ಮರೆಲಪರ ತುಮೆ ರಹವಾನಿ ಜ಼ಗಾ ಬಲೈ ಲಾಯೊ 5ನ್ಯ್ಹಾತಿನೆ ಪಗ ಮ್ಹೆಲಾ ಅಕ್ಲಿಬಿ ಜ಼ಗಾ ಕ್ಹುದಾ ತಿನಾ ಹಕ್ಮಾ ದಿದ್ಯೊ ನೈ. ತುಪರತೊ ತಾರಿ ಸ್ವಂತ ಸಂತತಿನೆ ದ್ಯುಸ ಕವಾನಿ ವಾಗ್ದಾನ ಯಕ್ಕಜ಼ ವ್ಹತ್ತಿ. ತೆಳಾಮಾ ಅಬ್ರಹಾಮನೆ ಬಚ್ಚಾ಼ಬಿ ನ್ಹೊತಾ. 6ತೆನೈಸೊ ಕ್ಹುದಾ ಅಬ್ರಹಾಮನೆ, ತಾರಾ ಸಂತತಿಯೊ ಬಿಜಾ಼ ದೆಶಮಾ ಜಾ಼ವಸ ವರಿ ತ್ಯುನಾ ಗುಲಾಮೊ ಥಾವಸ ವರಿ ಚ್ಯಾರಕ್ಹೊ ವರಕ್ಹ ತ್ಯಾನಾ ಮನಕ್ಹೊ ತ್ಯುನೊನೆ ಘನ್ನಾ ತ್ರಾಸ ಕರಸ. 7ತೆನೈಸೊ ತ್ಯುನೊನೆ ಗುಲಾಮ ಕರಿಲಿವಾಲಾ ಜ಼ನಾಂಗನೆ ಮಿ ಶಿಕ್ಷಾ ದ್ಯುಸ. ತ್ಯಾಂತಾ ತ್ಯುನೆ ಭಾರಾ ಐನ ಮನೆ ತೆ ಜ಼ಗಾಪರ ಆರಾಧನಾ ಕರಸ ಕೈನ ಕದ್ಯೊ. 8ಕ್ಹುದಾ ಅಬ್ರಹಾಮನಾ ಕ್ಹಾತೆ ಯಕ್ಕ ವಡಂಬಡಿಕೆ ಕರ್ಲಿದ್ಯೊ. ತೆ ವಡಂಬಡಿಕೆ ವಳಕ ಖತ್ನಾ ವ್ಹೈ. ಇಮ್ಮ ರ‍್ಹತಾಮಾ ಅಬ್ರಹಾಮನೆ ಯಕ್ಕ ಪಟ್ಟೊ ಥಯೊ. ತೆ ಪಟ್ಟಾನೆ ಆಟ್ವಾ ದಿನ್ನೆ ಖತ್ನಾ ಕರ‍್ಯಾ. ತಿನಾ ದಿಕ್ರಾನು ನಾಮ ಇಸಾಕ ವ್ಹೈ. ಇಸಾಕಬಿ ತಿನಾ ದಿಕ್ರಾನೆ ಖತ್ನಾ ಕರ್ಯೊ. ವರಿ ಯಾಕೊಬ ತಿನಾ ಕ್ಹಾರಾ ಪಟ್ಟಾವೊನೆ ಖತ್ನಾ ಕರಾಯೊ. ಎಜ಼ ಬಾರಾ ಪಟ್ಟಾವೊಖು ಬಾರಾ ಕ್ಹಾಂದಾನೊ ಥಯಾ. 9ಯಾಕೊಬನಾ ದಿಕ್ರಾ ಯೊಸೆಫಪರ ಸಂಗಟ ಘಾಲ್ಲಿನ ತಿನೆ ಇಜಿಪ್ತವಾಲಾವೊನೆ ಇಕ್ಕಿಪಾಡ್ಯಾ. ತೆನೈಸೊ ಕ್ಹುದಾ ಯೊಸೆಫನಾ ಕ್ಹಾತೆ ವ್ಹತ್ತೊ. 10ಯೊಸೆಫನೆ ತ್ಯಾ ಘನ್ನೊ ತ್ರಾಸ ಆಯೊ. ವರಿಬಿ ಕ್ಹುದಾ ತೆ ಕ್ಹಾರಾ ತ್ರಾಸೊಕ್ಹು ತಿನೆ ವಚಾ಼ಡ್ಯೊ. ತೆಳಾಮಾ ಫರೊಹನ ಇಜಿಪ್ತನೊ ರಾಜೊ಼ ವ್ಹತ್ತೊ. ಕ್ಹುದಾ ಯೊಸೆಫನೆ ದಿದಲ ಗ್ಯಾನಕ್ಹು ಫರೊಹನ ಯೊಸೆಫನೆ ತಿನಾ ರಾಜ್ಯಪರ ಅದಿಕಾರಿ ವರಿ ಘರನಾ ಮನಕ್ಹೊಪರಬಿ ಅದಿಕಾರಿ ಕರ್ಯೊ. 11ಇಜಿಪ್ತ ವರಿ ಕಾನಾನಮಾ ಬರಗಾಲ ಆತಾಮಾ ಮನಕ್ಹೊ ತ್ರಾಸೊಮಾ ಪಡ್ಯಾ ಅಪ್ನಾ ಪುರವಿಕೊಬಿ ಅನ್ನ ಮಳೆ ನೈಸೊ ಭುಕ್ಕಾ ರ‍್ಹೈ ಗಯಾ. 12ಇಜಿಪ್ತ ದೆಶಮಾ ಅನಾಜ಼ ಛೆ ಕವಾನು ವಳಕಿನ ಯಾಕೊಬ ತಿನಾ ದಿಕ್ಕರಾವೊನೆ ಪಸ್ಟ ಸಲಾ ತ್ಯಾ ಮೊಕಲ್ಯೊ. 13ತೆ ಥಯಲ್ಪರ ತ್ಯುನೆ ತ್ಯಾ ಬೆವಾ ಸಲಾ ಗಯಾ. ಎ ಸಲಾ ತೆ ಕುನ್ನ ವ್ಹೈ ಕೈನ ಕವಾನು ಯೊಸೆಫ ತಿನಾ ಭಾಯೊನೆ ಕದ್ಯೊ. ವರಿ ಯೊಸೆಫನಾ ಘರದಾನಾ ಹುತಿ ಫರೊಹನನೆ ಗ್ವತ್ತ ಥಯು. 14ಪಾಚಲ್ತೊ ಯೊಸೆಫ ತಿನೊ ಬಾ ಥಯಲ ಯಾಕೊಬನೆ ವರಿ ತಿನಾ ಪುರಾ ಘರದಾನಾವಾಲಾ ವರಿ ಸತ್ತರಪರ ಪಾಂಚ಼ ಜ಼ನಾವೊನೆ ಇಜಿಪ್ತನೆ ಬಲೈಲಿದ್ಯೊ. 15ತಿನಾಹುತಿ ಯಾಕೊಬ ಇಜಿಪ್ತೆ ಐನ ತೆ ವರಿ ತಿನಾ ಬಚ್ಚಾ಼ ಮರೆ ಲಕ್ಕಾ ತ್ಯಾಜ಼ ವ್ಹತ್ತಾ. 16ತ್ಯುನಾ ಮುರ್ದಾವೊನಾ ಹಡ್ಕಾ ಫರಿನ ಶೆಕೆಮನೆ ಲಿನ ಗಯಾ. ತ್ಯಾ ಹಮೊರ ಕವಾಲಾನಾ ಬಚ್ಚಾ಼ವೊಕ್ಹು ಅಬ್ರಹಾಮ ರೊಪ್ಪೊ ಲಿದಲ ಮಜಾ಼ರೊಮಾ ಮ್ಹಲ್ಯಾ. 17"ಕ್ಹುದಾ ಅಬ್ರಹಾಮನೆ ದಿದಲ ವಾಗ್ದಾನ ಪುರಾ ಥಾವಾನು ದಿನ್ನ ನಜಿಕ ಆಯು. ಯಕ್ಲಾಮಾಜ಼ ಇಜಿಪ್ತ ದೆಶಮಾ ಅಪ್ನಾ ಮನಕ್ಹೊನಿ ಸಂಖ್ಯಾ ಘನ್ನಿ ಬೆಳದಿತಿ. 18ಲಾಸ್ಟಮಾ ಯೊಸೆಫನಿ ವಳಕ ನೈ ರ‍್ಹಯಲ ರಾಜೊ಼ ಇಜಿಪ್ತ ಆಳಾನೆ ಶುರು ಕರ್ಯೊ 19ಎ ರಾಜೊ಼ ಹಮಾರಾ ಮನಕ್ಹೊನೆ ಮೊಸ ಕರ್ಯೊ. ತೆ ಅಪ್ನಾ ಪಿತೃವೊನೆಬಿ ಕೆಟ್ಟ ಕರ್ಯೊ. ತ್ಯುನಾ ನ್ಹಾನಾ ಬಚ್ಚಾ಼ ಮರು ಕೈನ ತ್ಯುನೊನೆ ಭಾರೊ ನಾಕ್ಯೊ. 20ಎಜ಼ ಟೈಮಾ ಮೊಶೆ ಹುಟ್ಯೊತೊ. ತೆ ದೆಕಾನೆ ಘನ್ನೊ ಚಂದ ವ್ಹತ್ತೊ. ವರಿ ತೆ ತನ್ನ ಮ್ಹೈನಾ ಲಕ್ಕಾ ಘರಮಾಜ಼ ಬೆಳದ್ಯೊತೊ. 21ಪಾಚಾ಼ತಾ ತಿನೆ ಘರ್ಮಾತಾ ಭಾರಾ ಮ್ಹೆಲ್ತಾಮಾ, ರಾಜಾ಼ನಿ ದಿಕ್ರಿ ತೆ ಪಟ್ಟಾನೆ ಲಿನ ತಿನಾ ಸ್ವಂತ ದಿಕ್ರಾ ಲಿಂಗತ ಜ಼ತ್ತನ ಕರಿ. 22ತೆ ಇಜಿಪ್ತ ರಾಜ್ಯನಿ ಕ್ಹಾರಿಜ಼ ವಿದ್ಯಾ ಶಿಕ್ಯೊ. ವರಿ ಮನಕ್ಹೊನಾ ಕ್ಹಾಮೊ ಬೊಲಾನೆ ವರಿ ತಿವ್ನಾ ಕ್ಹಾತೆ ರ‍್ಹವಾನೆ ಘನ್ನೊ ಶಾಣ್ಯೊ ಥಯೊ. 23ಮೊಶೆ ಚಾ಼ಳಕ್ಹ ವರಕ್ಹನೊ ಥಯಲ್ಪರ ತೆ ತಿನಾ ಭಾಯೊನೆ ಮಳು ಕೈನ ಮನಸ ಕರ್ಯೊ. 24ತೆಳಾಮಾ ತ್ಯಾ ಯಕ್ಲೊ ಇಜಿಪ್ತವಾಲಾನಾ ಹತೆ ಘನ್ನೊ ತ್ರಾಸ ಖಾವಾನು ಮೊಶೆ ದೆಕಿನ ತಿನೆ ಮದದ ಕರಾನೆ ಗೈನ ಶೆಡ ಮ್ಹೆಲ್ಲಿನ ಇಜಿಪ್ತವಾಲಾನೆ ಖಲಾಸ ಕರಿ ಪಾಡ್ಯೊ. 25ತಿನಾ ಸ್ವಂತ ಮನಕ್ಹೊನೆ ಕ್ಹುದಾ ತಿನೆ ನೆಮಶ್ಯೊಸ ಕೈನ ತಿನಾ ಮನಕ್ಹೊ ವಳಕಿ ಲೆಸ ಕೈನ ಮೊಶೆ ತಿಳ್ದಿಲಿದ್ಯೊತೊ. ತೆನೈಸೊ ತ್ಯುನೆ ತಿನೆ ತಿಳ್ದಿಲಿದ್ಯಾ ನೈ. 26ಮರ್ನಾ ದಿನ್ನೆ ಇಸ್ರೆಲನಾ ಬೆ ಜ಼ನಾ ಲಡೈ ಕಾಡಾನು ಮೊಶೆ ದೆಕ್ಯೊ. ತ್ಯುನೊನೆ ಸಮಾಧಾನ ಕರಾನೆ ಕೊಶಿಶ ಕರ್ಯೊ. ತ್ಯುನೊನೆ ಭಾಯೊ ತುಮೆ ತುಮೆ ಅನಾ ಲಿಂಗತ ಲಡೈ ಕಾಡಾನು ತುಮೊನೆ ಚೊ಼ಕುಲಾಗ ಸು? 27ತೆನೈಸೊ ತ್ಯುನೊಮಾನೊ ಅನ್ಯಾಯ ಕರಾಲೊ ಯಕ್ಲೊ ಮೊಶೆನೆ ಪಾಚೊ಼ ಢಕ್ಲಿನ ಹಮಾರೊ ಫೈಸ್ಲೊ ಕರಾನೆ ಅದಿಕಾರ ಕುನ್ನ ದಿದ್ಯುಸ? ಕೈನ ಪುಚ್ಯೊ. 28ವರಿ ತೆ ಕಾಲ ಇಜಿಪ್ತವಾಲಾನೆ ಖಲಾಸ ಕರಲಲಿಂಗತ ಮನೆ ಬಿ ಖಲಾಸ ಕರು ಕೈನ ಛೆ ಸು? ಕೈನ ಪುಚ್ಯೊ. 29ಎ ಕದಲ ಐಕಿನ ಮೊಶೆ ಇಜಿಪ್ತ ಛೊಡಿನ ನ್ಹಾಟಿನ ಗೈನ ಮಿದ್ಯಾನ ಕವಾನಾ ಗಾಮ್ಮಾ ಗೈನ ಬಿಜಾ಼ ದೆಶವಾಲಾ ಲಿಂಗತ ರ‍್ಹವಾಡ್ಯೊ. ತ್ಯಾ ತಿನೆ ಬೆ ಪಟ್ಟಾ ಹುಟ್ಯಾ. 30ಚಾಳಕ್ಹ ವರಕ್ಹ ಥಯಲ್ಪರ ಯಕ್ಕ ದಿನ್ನ ಮೊಶೆನೆ ಸಿನಾಯಿ ಕವಾನಾ ಡೊಂಗರಪರ ಝಾಡಮಾ ಆಗ ಲಾಗಲ ದೆಕ್ಯೊ ವರಿ ತಿಮಾ ಯಕ್ಕ ದೆವ ದುತ ದಿಕ್ಹ್ಯೊ 31ಎ ಕ್ಹಾರು ಮೊಶೆ ದೆಕಿನ ಆಶ್ಚರ್ಯ ಥೈನ ತಿನೆ ನಜಿಕ ಗೈನ ದೆಕು ಕೈನ ಜಾ಼ತಾಮಾ ತ್ಯಾ ಪ್ರಭು ಝೊರ ಅವಾಜ಼ಕ್ಹು; 32‘ಮಿ ತಾರಾ ಪಿತೃವೊನೊ ಕ್ಹುದಾ ವ್ಹೈ; ಅಬ್ರಹಾಮ, ಇಸಾಕ ವರಿ ಯಾಕೊಬ್ನೊ ಕ್ಹುದಾ ವ್ಹೈ’ ಕೈನ ಕತಾಮಾ ಮೊಶೆ ಥರ ಥರ ಕಾಪ್ತೊ ಪಾಚೊ಼ ಸರಕಿ ಗಯೊ ವರಿ ಡೊಳಾ ಉಚೈನ ದೆಕ್ಯೊಬಿ ನೈ. 33ಕರ್ತಾ ತಿನೆ"ತು ಘಾಲ್ಲಿದಲ ಕಾರಮಲಿಯೊ ದುರ ಮ್ಹೆಲ. ಕಾಕದ್ಯಾಮ ತು ಹುಬ್ರಯಲ ಜ಼ಗಾ ಪವಿತ್ರ ವ್ಹೈ. 34ಇಜಿಪ್ತಮಾ ರ‍್ಹಯಲ ಮಾರಾ ಮನಕ್ಹೊನಿ ಕೆಟ್ಟ ಸ್ತಿತಿ ಮನೆ ಗ್ವತ್ತ ಛೆ. ತ್ಯುನೆ ನೆಳ್ಳಾನು ದೆಕಿನ ತ್ಯುನೊನೆ ಬಿಡುಗಡೆ ಕರಾನೆ ಹೆಟೊ ಉತ್ರಿನ ಆಯೊಸ. ಆ, ಮಿ ತುನೆ ಇಜಿಪ್ತೆ ಮೊಕ್ಲುಸ ಕದ್ಯೊ. 35ಅಪ್ನೊ ಫೈಸ್ಲೊ ಕರಾನೆ ಅದಿಕಾರ ತುನೆ ಕುನ್ನ ದಿದ್ಯೊಸ? ಕೈನ ಇಸ್ರಾಯಲೊಕ್ಹು ತಿರಸ್ಕಾರ ಥಯಲಜ಼ ಎ ಮೊಶೆ ವ್ಹೈ. ಆಗ ಲಾಗಲ ಝಾಡಮಾ ದಿಕ್ಹಲ ದುತನಾ ಮುಲಕ ಕ್ಹುದಾ ಅದಿಪತಿ ಕರಿನ ವಿಮೊಚ಼ಕ ಕರಿನ ನೆಮ್ಸಲ ಇನೆಜ಼ ವ್ಹೈ. 36ಇಜಿಪ್ತಮಾ ಲಾಲ ಸಮುಂದರಮಾ ಚಾ಼ಳಕ್ಹ ವರಕ್ಹ ಉಸುಕನು ಗಾಮ್ಮಾ ಅದ್ಭುತ ಕಾಮೊ ವರಿ ಸುಚಕ ಕಾಮೊ ಕರಿನ ಇಸ್ರೆಯಲೊನೆ ಬಿಡುಗಡೆ ಕರಲವಾಲೊಜ಼ ಎ ವ್ಹೈ. 37ಕ್ಹುದಾ ಮನೆ ಮೊಕ್ಲಲ ಲಿಂಗತ ತುಮಾರಿ ಜನಾಂಗ್ತೊಜ಼ ಯಕ್ಕ ಪ್ರವಾದಿನೆ ಮೊಕಲ್ಯೊಸ ಕೈನ ಇಸ್ರೆಲೊನೆ ತಿಳಸಲ ಎಜ಼ ಮೊಶೆ ವ್ಹೈ. 38ಇಸ್ರಾಯಲೊ ಉಸುಕನಾ ಗಾಮ್ಮಾ ಸಬೆ ಮಳ್ತಾಮಾ ತ್ಯುನಾ ಕ್ಹಾತೆ ರ‍್ಹೈನಜ಼ ಸಿನಾಯಿ ಡೊಂಗರಪರ ಬೊಲಲ ದೆವ ದುತನಾ ಕ್ಹಾತೆ ಅಪ್ನಾ ಪಿತೃವೊನಾ ಕ್ಹಾತೆ ಸಂಭಾಶಣೆ ಕರಲ ವಾಲೊಜ಼ ಎಜ಼ ವ್ಹೈ. ಜ಼ಲಮ ರ‍್ಹಯಲ ತೆ ವ್ಹಂದಿಲಿನ ಅಪೊನೆ ದಿದ್ಯೊ. 39ತೆನೈಸೊ ಅಪ್ನಾ ಪಿತೃವೊ ತಿನೆ ವಿದೆಯ ಥಾವಾನೆ ಇನ್ಕಾರ‍್ಯಾ. ವರಿ ತ್ಯುನೆ ಇಜಿಪ್ತ ದೆಶ ಜಾ಼ವಾನೆ ಮನಸ ಕರ‍್ಯಾ. 40ಅಪ್ನಾ ಪಿತೃವೊ ಆರೊನನೆ, ‘ಮೊಶೆ ತುಮೊನೆ ಇಜಿಪ್ತ ದೆಶತೊ ಲಿನ ಆಯೊ. ತೆನೈಸೊ ತಿನೆ ಸು ಥೈಯು ಹಮೊನೆ ಗ್ವತ್ತ ನತ್ತಿ. ತಿನಾಹುತಿ ಹಮಾರಾ ಕ್ಹಾಮೊ ಜಾ಼ವಾನೆ ವರಿ ಹಮೊನೆ ಚ಼ಲಾವಾನೆ ದಕ್ಹಾ ದೆವಸ್ಥಾನೊ ಕರ’ ಕದ್ಯಾ. 41ತಿನಾಹುತಿ ಮನಕ್ಹೊ ಬೈಲನಾ ಬಚ಼್ಚಾನು ಯಕ್ಕ ಮುರ್ತಿ ಕರಿನ, ತಿನೆ ಬಲಿ ದಿದ್ಯಾ. ತೆ ಮನಕ್ಹೊ ತ್ಯುನಾ ಹತೊಕ್ಹು ಕರಿಲಿದಲ ಮುರ್ತಿನಾ ವಿಷಯಮಾ ಘನ್ನಾ ಖುಶಿ ಕರ‍್ಯಾ! 42ತೆನೈಸೊ ಕ್ಹುದಾ ತ್ಯುನೊನೆ ವಿರುದ್ದ ಥೈನ, ಹಬಾಳನಾ ರ‍್ಹಯಲ ಸುರ‍್ಯಾನೆ ವರಿ ಚ಼ಂದಪ್ಪಾನೆ ಚುಕ್ಕಿಯೊನೆ ಪುಜಾ ಕರೆ ಲಿಂಗತ ತ್ಯುನೊನೆ ಛೊಡಿ ಪಾಡ್ಯೊ. ಇನಾಹುತಿ ಪ್ರವಾದಿಯೊನಾ ಪುಸ್ತಕೊಮಾ ಅಮ್ಮ ಬರ್ದಲ ಛೆ; ಕ್ಹುದಾ ಅಮ್ಮ ಕವಸ, ‘ಯೆಹುದಿನಾ ಮನಕ್ಹೊ ಥಯಲ ತುಮೆ ಚ಼ಾಳಕ್ಹ ವರಕ್ಹ ಲಕ್ಕಾ ಉಸುಕನಾ ಗಾಮಮಾ ರ‍್ಹತಾಮಾ ಮನೆ ಯಜ್ಞ ದಿದ್ಯಾ ನೈ? 43ತುಮೆ ತುಮಾರಾ ಕ್ಹಾತೆ ಮೊಲೊಖನ ಗುಡಾರ ವರಿ ತುಮಾರಾ ರೆಫಾ ದೆವಸ್ಥಾನ ಚಿಕ್ಕಿನು ರುಪ ಉಚೈಲಿನ ಗಯಾ ಪುಜಾ ಕರಾನಾ ಹುತಿ ತುಮೆ ಕರಿಲಿದಲ ಮುರ್ತಿಯೊ ಎಜ಼ ವ್ಹೈ. ತಿನಾಹುತಿ ಮಿ ತುಮೊನೆ ಬಾಬಿಲೊನನಾ ಹತ್ಮಾ ದಿಪಾಡುಸ. ಅಮ್ಮೊಸಾ 5:25-27 44ಕ್ಹುದಾ ಅಪ್ನಾ ಪಿತೃವೊನಾ ಕ್ಹಾತೆ ಕಯಾ ಗುಡಾರಮಾ ಬೊಲ್ಯೊತೊ ತೆ ಗುಡಾರ ಎ ಯೆಹುದಿಯೊನಾ ಕ್ಹಾತೆ ಉಸುಕನಾ ಗಾಮಮಾ ವ್ಹತ್ತು. ಎ ಗುಡಾರ ತಯ್ಯಾರ ಕರಾನಿ ನಿಯಮ ಕ್ಹುದಾ ಮೊಶೆನೆ ಕೈನ ದಿದ್ಯೊ. ಕ್ಹುದಾ ತಿನೆ ದೆಕಾಡಲ ರುಪ ಲಿಂಗತ ಮೊಶೆ ತೆ ತಯ್ಯಾರ ಕರ್ಯೊ. 45ಪಾಚಲ್ತೊ ಬಿಜಾ಼ ಜನಾಂಗನಾ ಗಾಮೊನೆ ವಶಮಾ ಕರಿಲಿವಾನೆ ಯೆಹುಶುವಾ ಅಪ್ನಾ ಪಿತೃವೊನೆ ಅಗೊ ಚ಼ಲಾಯೊ. ಅಪ್ನಾ ಮನಕ್ಹೊ ತೆ ದೆಶೊನೆ ಗಯಲ ಪರ, ಕ್ಹುದಾ ಬಿಜಾ಼ ಮನಕ್ಹೊನೆ ತ್ಯಾಂತೊ ವಳೈ ಪಾಡ್ಯೊ. ಅಪ್ನಾ ಮನಕ್ಹೊ ತೆ ನವಾ ದೆಶಮಾ ಗಯಲ ಪರ ಎ ಗುಡಾರ ತ್ಯುನಾ ಕ್ಹಾತೆ ಲಿನ ಗಯಾ. ಅಪ್ನಾ ಮನಕ್ಹೊ ಎ ಗುಡಾರನೆ ತ್ಯುನಾ ಪಿತೃವೊ ಕಂತು ಸ್ವಿಕಾರ ಕರಿಲಿನ ದಾವಿದನಾ ಕಾಲ ಲಕ್ಕಾ ತೆ ಮ್ಹೆಲ್ಲಿದ್ಯಾತಾ. 46ಕ್ಹುದಾ ದಾವಿದನೆ ಘನ್ನೊ ಮೆಚ಼್ಚೊ. ‘ಯಾಕೊಬನಾ ಕ್ಹುದಾ ಥಯಲ ತಾರಾ ಹುತಿ ಯಕ್ಕ ಆಲಯ ಭಾಂದಾನೆ ಮನೆ ಮೌಕೊ ದೆ’ ಕೈನ ದಾವಿದ ಕ್ಹುದಾ ಕನ ಮಾಂಗಿಲಿದ್ಯೊ. 47ತೆನೈಸೊ ಪ್ರಾಥನಾನಿ ಆಲಯ ಭಾಂದಲ ದಾವಿದನೊ ದಿಕ್ರೊ ಸೊಲೊಮೊನಜ಼ ವ್ಹೈ. 48"ತೆನೈಸೊ ಮನಕ್ಹೊ ತ್ಯುನಾ ಹತೊಕ್ಹು ಕರಲ ಘರೊಮಾ ಮಹೊನ್ನತ ರ‍್ಹತೊ ನೈ. ಪ್ರವಾದಿ ಅಮ್ಮ ಬರ್ದ್ಯೊಸ; 49ಪ್ರಭು ಅಮ್ಮ ಕವಸ, ಸ್ವರ್ಗ ಮಾರಿ ಸಿಂಹಾಸನ ವ್ಹೈ. ಜಿಮಿನ ಮಾರಿ ಪಗೊ ಮ್ಹೆಲಾನಿ ಜ಼ಗಾ ವ್ಹೈ. ತುಮೆ ಮಾರಾ ಹುತಿ ಕಯಾ ತರಾನಿ ಘರ ಭಾಂದ ಸಕೊಶಿ? ಮಿ ಅರಾಮ ಕರಾನಿ ಜ಼ಗಾ ಕಿಜ್ಗಾ ಛೆ? 50ಶೆಂ ರ‍್ಹವಾದೆ, ಎ ಸಾಮನೊ ಕ್ಹಾರು ಕರಲವಾಲೊ ಮಿಜ಼ ವ್ಹೈ! ಯೆಶಾಯ 66:1-2 51ಜಿದ್ದಕರಾಲಾವೊ, ತುಮಾರು ಮನಸ್ಸ ವರಿ ಹತೊ ಚೊ಼ಕಾ ನೈ ರ‍್ಹಯಲಕ್ಹು ತುಮೆ ತಿನಿ ವಾತ ನೈ ಐಕಲಖು ವರಿ ಪವಿತ್ರಾತ್ಮ ತಮನೊನೆ ತಿಳಸಾವಾನಿ ವಿಷಯಮ್ಮಾ ತುಮೆ ಕೆಳಾಮಾಬಿ ವಿರುದ್ದ ಥೈನ ವ್ಹತ್ತಾ. ತಮಾರಾ ಪಿತೃವೊ ಅಮ್ಮಜ಼ ಕರ‍್ಯಾ ವರಿ ತುಮೆ ತ್ಯುನಾಲಿಂಗತ ಛೆ! 52ಜುವತ್ತಾ ರ‍್ಹಯಲ ಪ್ರವಾದಿಯೊಮಾ ಹರಯಕ್ಲಾನೆ ತಮಾರಾ ಪಿತೃವೊ ತ್ರಾಸ ಕರ‍್ಯಾ. ನಿತಿವಾಲೊ ಯಕ್ಲೊ ಆವಸ ಕೈನ ಘನ್ನಾ ಟೈಮನಾ ಪಚಾ಼ಜ಼ ತೆ ಪ್ರವಾದಿಯೊ ಕದ್ಯಾ. ತಿನಾಹುತಿ ತಮಾರಾ ಪಿತೃವೊ ತೆ ಪ್ರವಾದಿಯೊನೆ ಖಲಾಸ ಕರಿ ಪಾಡ್ಯಾ. ಹಮ್ನಾ ತಿನಾಲಿಂಗತ ಸುಜ಼ ತಪ್ಪ ನೈ ಕರಲವಾಲಾ ಯೆಸು ಕ್ರಿಸ್ತನಾ ವಿರುದ್ದ ಥೈನ ತಿನೆಬಿ ಖಲಾಸ ಕರಿ ಪಡ್ಯಾ. 53ಕ್ಹುದಾ ತಿನಾ ದುತೊನಾ ಮುಕಾಂತರ ದಿದಲ ಮೊಶೆನು ಧರಮಶಾಸ್ತ್ರ ಲಿನ ತುಮೆಜ಼ ತಿನೆ ವಿಧೆಯ ಥಾತಾ ನೈ! 54ಸ್ತೆಫನಾ ಆ ವಾತೊ ಐಕಿನ ತೆ ಯೆಹುದಿಯೊನಾ ಮ್ಹೊಟಾ ಶ್ಯಾನ್ಯಾ ಘನ್ನಾ ಶಿಟ್ಟ ಥಯಾ. ತ್ಯುನೆ ಶಿಟ್ಟಕ್ಹು ಸ್ತೆಫಾನಾ ಉಪ್ಪರ ದಾತೊ ಕ್ಹಾವಾಡಾತ್ತಾ. 55ತೆನೈಸೊ ಸ್ತೆಫನ ಪವಿತ್ರಾತ್ಮಕ್ಹು ಭರಿನ ತೆ ಸ್ವರ್ಗನೆ ದೆಕಿನ ಕ್ಹುದಾನಿ ಮಹಿಮಾ ವರಿ ಕ್ಹುದಾನಾ ಬಾಜು಼ಮಾ ಬೈಟೆಲ ಯೆಸುನೆ ದೆಕ್ಯೊ, 56ದೆಕೊ ಸ್ವರ್ಗ ಖುಲ್ಲಾ ಥಯಲ ಮನಕ್ಹನೊ ದಿಕ್ರೊ ಕ್ಹುದಾನಾ ಶಿದಾ ಬಗಲ ಹುಬ್ರಯೆಲ ಮಿ ದೆಕಾಡೊಸ! ಕದ್ಯೊ. 57ತೆಳಮಾ ಯೆಹುದಿಯೊನಾ ನಾಯಕೊ ಜೊ಼ರ ವದ್ರಿನ, ತ್ಯುನಾ ಕಾನೊ ಹತ್ತೊಕ್ಹು ಝಾಕಿಲಿದ್ಯಾ. ತ್ಯುನೆ ಕ್ಹಾರಾ ಸ್ತೆಫನ ಕನ ಮಳಿನ ನ್ಹಾಟತ್ತಾ, 58ತಿನೆ ಗಾಮ್ತಾ ಭಾರಾ ಎಳದಿನ ಲೈನ ತೆ ಮರೆಲಕ್ಕಾ ತಿನಾ ಉಪ್ಪರ ದಗ್ಡಾ ನಾಕ್ಯಾ ಸ್ತೆಫಾನೆ ವಿರುದ್ದ ಥೈನ ಸುಳ್ಳ ಕದಲ ಮನಕ್ಹೊ ತ್ಯುನಾ ಅಂಗ್ಡಾ ಕಾಡಿನ ಸೌಲಾ ಕವಾಲಾನೆ ದಿನ, 59ಸ್ತೆಫನನೆ ದಗ್ಡಾ ನಾಕ್ಯಾ ತೆನೈಸೊ ಸ್ತೆಫನ ಪ್ರಾರ್ಥನಾ ಕರತೊ "ಪ್ರಭು ಥಯಲ ಯೆಸು ಮಾರಿ ಆತ್ಮಾನೆ ಒಪ್ಸುಸ" ಕದ್ಯೊ. 60ತೆ ಉಂದಾಘುಡಗಾ ಘಾಲಿನ "ಪ್ರಭು ಆ ಪಾಪ ತ್ಯುನಾ ಉಪ್ಪರ ಘಾಲು ನಕೊ! ಕೈನ ಜ಼ಲಮ ಛೊಡ್ಯೊ.
Iliyochaguliwa sasa
ಅಪೊಸ್ತಲೊ 7: NTSrr23
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament in Sikkiligar Language © The Word for the World International and Sikkiligar Bhasha Samiti, Madhya Pradesh, 2023
