Pulim 12
12
Wɛ bwoŋi Abaram
1 Baŋa Wɛ ma ta de Abaram we, “Yage n teo kom fase, de n chorro tem, de n kwo sɔŋɔ tiina bam maama, se n daare n vo tega kalo amo na wó bere‑m to.
2Amo wó swɛ nmo swolim,
ye a pa se n dwi tiina ji te-zɔŋɔ.
Amo wó pa se n yere dem zaŋe de taa ye yere-zɔŋɔ.
Nmo wó pa se nɔɔna na zaane amo tei ne.#Galatia 3:8-9
3Balo maama na wó sɔɔle lam ba yage nmo yuu ne to,
amo de wó swɛ ba swolim.
Wolo maama nam na wó sɔɔle lwarem o yage nmo yera ne to,
amo de wó sɔɔle lwarem a yage kotu de baŋa ne.
Amo nam wó da nmo baŋa ne mo
a swɛ logo baŋa dwi maama swolim.”
4Abaram ma nwoŋi Haran teo kom ne se o vo jeiga kadwoŋi, nenɛɛne Baŋa Wɛ na tage tei ded‑o to. O déem jege bena fuserepɛ-yanu mo. O choro bu Lot de ma tɔge o vo. 5O ma ja o kaane Sarai o woli da, dedaane Lot. O ta ma kwei jejegero telo maama o na nɛa Haran ne to, de nɔɔna balo maama na toŋa ba pa‑o to o ja nwoŋi o maa viira. Ba déem kwei chwoŋa mo ba maa vei Kanaan teo kom. Ba ma vo ba yi da.
6Abaram maa vei logo kom ne taa o vo o yi Morɛ tei-zɔŋɔ kom na wo Sɛkɛm ne to. Maŋa kam konto ne, Kanaan tiina bam déem mo ta zoore jei sem konto ne. 7Abaram na wora konto to, Baŋa Wɛ ma ba o tei o we, “A lage a kwei tega kanto mo a pa n dwi dem se ba taa tei.”#Pulim 13:15-16; Nia Gulim 34:4; Galatia 3:16 O ma tigisi kandwa dáane se o ma zuli Baŋa Wɛ, o na tu o tei to ŋwaane.
8O ma zege dáane o vo zwonnu laŋa na wo Bɛtel wɛ-puli seeni to. O laam ma pu o vwei da. Ayi de Bɛtel tetare ne mo konto. Bɛtel déem wo wɛ-zoore jei ne mo, Ayi de maa wo wɛ-puli jei ne. O ma lɔ bimbini o pa Baŋa Wɛ ye o zuli o yere.
9Abaram laam ma zege dáane o kwei chwoŋa kalo na maa tu tega-kuri seeni ka zoore kagoa kam to o maa kɛa.
Abaram vei Ejipti
10Kana déem tiini ka to teo kom ne. Abaram ma zaŋe o vo Ejipti se o taa zoore da maŋa fenfee se kana yé ja-ba ka go. 11Ba na twɛ Ejipti se ba zo teo kom to, o ma ta de o kaane Sarai o we, “Nmo seene n ye kaane wolo na tiini o lamma to mo. 12Konto to, Ejipti teo tiina bam ná nɛ‑m, ba wó ta we ‘O kaane wom mo tento.’ Ba laam maa wó ja-ne ba go ba daare nmo se n ta‑n wora. 13Nam ta n bere-ba nenɛɛne n ye a nakɔ mo, se ba tɔge nmo ŋwaane ba ke-ne lanyerane, ba daare ba yage a ŋwea kam ba pa-ne.”#Pulim 20:2
14Ba na vei ba yi Ejipti teo kom to, Ejipti tiina bam ma na we kaane wom tiini o lamma. 15Teo kom nakwa na nɛ‑o to, ba ma tiini ba tei‑o ba Pa-faro wom yiga ne. O ma pa se ba ja‑o ba zo pɛ sɔŋɔ kom wone. 16O ma da Sarai ŋwaane o ke Abaram lanyerane. O ma pa Abaram na peeni de bone de naane de bona-bɛ dedaane bona-chwa. O ma kwori o na tontoŋe-baara de tontoŋe-kana, dedaane kona.
17Se ko ná ye Pa-faro wom de o sɔŋɔ tiina bam, Baŋa Wɛ ma kwei jawe-chɛɛro o ke ba yera ne. Ko maa ye Pɛ wom na jege Abaram kaane Sarai ŋwaane to mo ba nɛ cham dem konto. 18Pɛ wom ma bwoŋi Abaram ye o bwei‑o we, “Bɛ mo ye nmo ke-ne konto? Bɛŋwaane mo ye n wo tage n bere amo we wonto ye nmo kaane mo? 19Bɛ mo ye n ta we, o ye n nakɔ, pa se a kwei‑o se o taa ye a kaane? N ke chega na? Konto, nii n kaane wom. Ja‑o se á viiri!” 20Pa-faro wom ma pa o nɔɔna bam ni se ba zeili Abaram, de o kaane wom, de kolo maama o déem na jege to se ba viiri.
Iliyochaguliwa sasa
Pulim 12: KBG
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2020, Ghana Institute of Linguistics, Literacy and Bible Translation (GILLBT)