Mataio 26
26
Iesu la paeai laua
(Mareko 14:1–2; Luka 22:1–2)
1Soka Iesu lea o foromai mei mei kaleipe soa, are areve satiriaraita karu la mō ōpe, 2E ore i’so sare voa Foapaita Sosoka forerai roi, aea Karu ve Atute la satauro sa paeai vei miarai roi.#Eso 12:1–27 3Lea soa maso harofave karu aea karikara ve opasora‐sora karu ita ere maso harofave vita areve rare Kaiafasi ve uvi voa kokoruka, 4aea elore elore laua sukōvi, ere maeahahauhahau lei Iesu la sukafori paeai vei otiharo seseōvōpe. 5A—, ere mō ōpe, Sosoka soa voa levi leitia, karikara karu kitou lei lavukakaeai ave.
Ua aea sa Iesu la vevetipe
(Mareko 14:3–9; Ioane 12:1–11)
6Soka Iesu Betania voa, Simona pokea eka karu ve uvi voa peiape lea mea, 7ua aea are tava rovaea‐rovaea‐eite muramura muforoe sa soōpe fave kavapu ita arero tai koti, aea muramura muforoe areve harofave voa sisōvōpe.#Luk 7:37–38 8Sisōvi, satiriariata karu lea la ofae eovi, ere kitou lei mō ōpe, Lea muramura muforoe auraka sisōvaita ipi levea? 9Arero itaea lei miōri moni tava rovaea lōri ovi, merava karu la miaraita ore leiti lare. 10A—, Iesu lea o la mapi, are erero mō ōpe, E arero lei haisora leipeta ipi levea? Are sa araro loita mea mai lareva kofa. 11Ipi merava karu e ita farehoria pepea vovea; a—, ara e ita soa foromai levi peava roi.#Deut 15:11 12Are arave maea la muramura muforoe sa sisōvai araro viopai soa vei everori lei kekese loita reha. 13Okofa ara ero o la moi, Ovoro Lareva la mearovaeka foromai voa itoro arita lea soasoa voa, mea ua sa loita mai ta moi peava roi arero haikaeai vei.
Iudasi ve otoare
(Mareko 14:10–11; Luka 22:3–6)
14Soka lea twelve karu farakeka aea, Iudasi Isakariota rare aravōpe lea vita, maso harofave karu tai te, 15mō ōpe, E tava araro lekōru la miarai roi, ara kivaia lei arero ero miarai vei ei? Soka ere silva moni korukoru thirty ve pasou are vei seseōvōpe.#Seka 11:12 16Soka lea soa ve aite voa are kivaia lei arero paeai vei miarai vei soa kofa la taiape.
Iesu areve satiriaraita karu ita ve Foapaita Sosoka
(Mareko 14:12–21; Luka 22:7–23; Ioane 13:21–30)
17Soka Fefesi auke Faloa ve Sosoka ve oarehōva sare, Iesu ve satiriaraita karu arero tai forera mō ōpe, A haikaeaipeta oti leavoa ela te Foapaita Sosoka a lari vei lei kekese leiti vei? 18Lō mei, are mō ōpe, Karikara voa teraia, karu aea tai foreri, arero mō aria; Satiriaraita Papuvita mō auai, Arave soa haekao loi, ara arave satiriaraita karu ita Foapaita Sosoka ave uvi voa leiti roi. 19Soka satiriaraita karu Iesu sa ereukaro omoipe mai feare lōri lei Foapaita Sosoka pisosipe.
20Sare sukopi mea viriviri soa Iesu areve satiriaraita karu twelve ita larietau posa voa avi, 21aea ere larietau lalape soa are mō ōpe, Okofa ara ero omoi, Eve karu aea kivaia lei araro paeai vei miarai vei la roi meha. 22Ere haiiri eae foromai lei, aea ere farafarapo arero lalasi mō leiape, Papuvita e, arao ei? 23Lei lei, are tava o mō ōpe, Ara ita saesa voa sukopi hivaipeta vita araro kivaia lei paeai vei miarai roi.#Sal 41:9 24Ipi Karu ve Atute usoso o are vei uka siseita feare opai voa terai roi; a—, kivaia lei Karu ve Atute la paeai vei miaraita lea vita vei, ahai‐e! Arero mi ari auke oria, are lareva leiti lare. 25Iudasi, kivaia lei arero paeai vei miarōpe lea vita sa tava o arero mō ōpe, Satiriaraita Papuvita e, arao ei? Are arero mō ōpe, Ave o reha.
Papuvita ve Areto
(Mareko 14:22–26; Luka 22:14–20; 1 Korinito 11:23–25)
26Soka ere larietau lalape soa, Iesu faloa la mai paea, Ualare la maeatita o mei roroka lei, arero fofi, satiriaraita karu la miōri mō ōpe, Ovi lalō puavaia; mea arave maea. 27Are kōkuveisa ta mai paea, Ualare la maeati roroka lei erero miōri mō ōpe, Arero lalō puavaia. 28Mea arave otoare ve ovo karu rauapo vei sisapai ereve iri kaiae la felaukea mutapai vei.#Eso 24:8; Iere 31:31–34 29Ara ero omoi, mea soa ve aite voa ara mea vine ve opu la ata levi lari roi tetete ara arero opu áre la e ita farehoria Oa ve basileia voa lari roi.
Olive Raepa voa pataipe otiharo voa
(Mareko 14:27–31; Luka 22:31–38)
30Aite ere Ualare la maeatita fara feri roroka lei, ere maria voa foreri Olive Raepa voa papatavi kavōpe. 31Soka Iesu erero mō ōpe, Mea faita voa e foromai araro haiarara lei kiripai roi, ipi o mō uka sisea, Ualare mamoe kiva vita la toa paea, mamoe ta fu ari roi.#Seka 13:7 32A—, araro makuri voa ata moravaita soa ara eve omopa voa Galilea voa kavai roi.#Mat 28:16 33Petero tava o arero mō ōpe, Karu foromai aro kiripait’ oria, ara lōfeare levi leiti roi. 34Iesu arero mō ōpe, Okofa ara aro omoi, mea faita kofa voa, kokora vita fi ari auke leitita lea soa voa, a araro soa oroisoria avoa ari roi. 35Petero arero mō ōpe, Ara a ita fareho opaita, a—, ara aro ore leitita o la avoa levi ari roi. Ere foromai ta o lōfeare ōpe.
Iesu Getesemane voa
(Mareko 14:32–42; Luka 22:39–46)
36Soka Iesu ere ita fareho oti aea rare Getesemane voa patei foreri, are areve satiriaraita karu la mō ōpe, Mōvoa avi taia, ara lōvoa te Ualare la loki leiti ao. 37Lō mei are Petero aea Sebede ve atute oraka ita la lariōvi, aea are haitutu a’ haiiri eae foromai leipe. 38Lei are mō ōpe, Arave haiiri voa eae foromai leipea, usoso opaita soa feare; mōvoa seseravi taia ara ita ovoako leitia. 39Lō mei are taheka omopa voa te, mea voa sosorakapi iavi, Ualare la loki mō leipe, Arave Oa e, usoso oria, mea kōkuveisa la ara voa fareovaia; a—, ara sa haikaeaipeta lōfeare levi leitia, a—, a sa haikaeaipeta lōfeare leitia.
40Aite are ata kerori satiriaraita karu tai iti, erero ivutu siseiape la ofae eovi, are Petero la mō ōpe, Simona e, a ora farakeka aea voa ara ita fareho ovoako lei rofo leiti kao ei? 41E ovoako lei Ualare la loki leitia, e vuteaita mea voa oai ave; e haiiri kakeva ia, a—, eve maeasarōva sa patoita.
42Lō mei are erero ata kiripi, te orakoria soa Ualare la loki mō leipe, Arave Oa e, ara mea kōkuveisa la lari auke lei arero fareovaita ore auke leiti oria, a—, a sa haikaeaipeta haiiri la lōfeare leitia. 43Soka are ata kerori iti erero ivutu siseiape la ofae eavōpe, ipi ereve ofae pasou foromai leipe eavia.
44Soka are erero ata kiripi, te oroisori soa Ualare la loki lei, lea omopa leipe loki o la ata moipe. 45Aite are satiriaraita karu tai ata kerori iti erero mō ōpe, E ata ivutu la iroropi sisea ei? e hai la oraipea ei? 46Itotea, ereita maea leiti roi; ofae eavaia, araro kivaia lei miōri paeai vei leipeta vita foreraita meha.
Iesu la sukafōrope
(Mareko 14:43–50; Luka 22:47–53; Ioane 18:3–12)
47Are laua sukavaiape lea soa kofa voa, Iudasi lea twelve karu farakeka aea, aeata karu sitavu rovaea marehaukaita soi ita poti ita, maso harofave karu aea karikara opasora‐sora karu sa itapi, are ita farehoria kotipe. 48Soka kivaia lei arero miōri paeai vei leipe lea vita peise lea karu sitavu la everori satiriōri mōri moipe, Ara sa evera sisita lea vita are reha; arero sukaforaia. 49Soka Iudasi forerōpe soa are Iesu tai utohoa te mō ōpe, Satiriaraita Papuvita e, a eapo meha ei! aea are arero evera sisipe. 50Iesu arero mō ōpe, Moraitai e, ave etau leitia. Soka ere koti mai sosoropi Iesu la sukaforōpe reha. 51A—, Iesu ita farehoria meiape karu farakeka aea areve mai sa areve marehaukaita soi sa paitaravi, maso harofave karu ve sarufa aea la toa, areve kirori la elori fareovōpe. 52Lea mea Iesu arero mō ōpe, Ave soi areve oroa voa vifaia, ipi marehaukaita soi la mai paeaita lea karu marehaukaita soi sa paeai roi. 53Aita! Ave seseōvaita haiiri ara arave Oa la loki leitia siahu kao ei, are faitora aneru firu twelve aea hea ta topiari, araro toarai vei itapai vei ei? 54A—, ara lōri leitita, a—, mea mai leiti vei ukōpe Safu Karoro la lei okofa leafeare leiti roi ei?
55Lea mea Iesu karu sitavu la mō ōpe, E soi ita poti ita araro usoso torea karu la sukaforaita feare koti ei? Sare sare foromai ara Maso Uvi voa avi satiriaravota, a—, e araro sukaforai kao.#Luk 19:47; 21:37 56A—, mea etau foromai la leipea peroveta karu ve karoro la lei okofa leiti vei.
Lea mea areve satiriaraita karu foromai arero kiripi fu ōpe.
Iesu maso harofave karu ve omopa voa
(Mareko 14:53–65; Luka 22:54–55, 63–71; Ioane 18:12–14, 19–24)
57Soka ere Iesu la mai sa sukafori, arero Kaiafasi maso harofave vita tai lariōvi terōpe, Safu Karoro ore karu aea karikara opasora‐sora lōvoa kokoruka aipepeiape. 58Petero arero ára‐ita aitetei meiape tetete maso harofave vita rovaea ve uvi iri‐aru‐pisiri oti voa forerōpe. Foreri are uvi karu ita fareho avi, maea la a toaiape.
59Soka maso harofave karu aea lea kaunsila karu foromai ita Iesu la seseōvi paeai omoi vei havara apeva la eliape. 60Havara apeva karu rauapo foreraiape, a—, ere arero paeai vei ipi sukaeai kasirau. A—, aite kofa voa karu orakoria forera, 61mō ōpe, Mea vita mō ōpe, Ara Ualare ve Maso Uvi la toa foforukaita ore, aea sare oroisoria aite voa, ata turai roi.#Ion 2:19
62Soka maso harofave vita rovaea itei arero mō ōpe, A tava o kao ei? Mea karu sa aro paraeaipeta havara ve eite lekōru? 63A—, are huale kavuōpe. Soka maso harofave vita arero mō ōpe, Ara Ualare ve rare ita aro haisa moi a elaro omoi vei, a Keriso, Ualare ve Atute ei? 64Iesu tava o arero mō ōpe, A sa moipeta o reha; a—, ara o aeata ero omoi roi, Aite soa voa e Karu ve Atute Rofo Rovaekapo ve mai toare voa aisesea, kauri ve mea‐e voa foreraita la ofae eavai roi.#Dan 7:13 65Lō mei maso harofave vita rovaea areve maea puta la torerapi mō ōpe, Are o kaiae moita reha! Ereita havara paraeaita karu la haikaeaipeta ipi levea? Soka e areve o kaiae la mapi roroka loita meha.#Levi 24:16 66Eve seseōvaipeta haiiri leafeare? Ere tava o mō ōpe, Arero tava paeaita lea sa haura.
67Aite ere areve soso la pea sa soea soea, karu hea ta arero mai kupa sa toatoa,#Isa 50:6 68mō ōpe, Keriso e, peroveta o ela vei aura moi, aro toaipeta karu lavea?
Petero Iesu la ore voa avoa ōpe
(Mareko 14:66–72; Luka 22:56–62; Ioane 18:15–18, 25–27)
69Soka Petero uvi iri‐aru‐pisiri voa aisesea, sarufa mori farakeka aea iti mō ōpe, A ta lea Galilea karu Iesu ita fareho mea vovea. 70A—, are ere foromai ve omopa voa avoa a’ mō ōpe, Ara ave o ve eite ore kao. 71Soka are maria voa te utape tao lalava voa soi pōvi, sarufa mori aea ata arero ofae eovi, haekao karu la mōri moipe, Mea vita ta lea Nasareta karu Iesu ita fareho mea vovea. 72Are o maealolo ita ata avoa a’ mō ōpe, Ara lea vita ore kao. 73Soa taheka aite voa lea soi pepeiape karu Petero tai koti arero mō ōpe, Etakofa a ta areve karu aea, ipi ave ape ve o sa aro muiai. 74Lea mea are o kere ita mō ōpe, Ara okofa la moi auke leitit’ oria, kaiae tava Ualare sa araro miaraia: e moipeta lea vita ara ore kakaeite kofa. Lea soa kofa voa kokora vita fi ōpe reha. 75Soka Petero Iesu sa arero moipe mea o la haikaeōpe, Kokora vita sa fi ari auke soa voa, a soa oroisoria araro ore voa avoa omopa ari roi. Soka are maria voa te ovororo sisapi fi kakosa ita ōpe.
Iliyochaguliwa sasa
Mataio 26: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
