Mataio 20
20
Parabole o ipi tivi karu la elita papuvita vei
1Ipi kauri ve basileia are usoso mea ve papuvita feare, miori soa kofa voa te vine forōva ari tivi karu eli vei. 2Aea sare farakeka ve tivi tava silva moni koru farakeka are tivi karu ita otoare lōri a’ roroka lei, are erero areve vine oti voa itapōpe. 3Sare koko haekao leipe soa are tivi auke karu hea la karikara pisiri voa aipepeiape la ofae eovi, 4are erero mō ōpe, E ta vine oti teraia, aea ara seseōvaita lea tava haura ara lōfeare ero miarai roi. Soka ere terōpe reha. 5Are sare haro arori voa aeata sare mafu soa voa maria voa ta lōfeare ata leiape. 6Aea are sare isei misoseōpe soa voa ata maria voa terōpe lea mea, are aipepeiape karu hea ta ofae eovi, erero mō ōpe, E sare savori mōvoa tivi auke aipepeipeta ipi levea? 7Ere arero mō ōpe, Ipi elaro tivi miarai haikaeaipeta karu kasirau. Are erero mō ōpe, E ta vine oti voa teraia.
8Sare sukapōpe soa, lea vine oti ve papuvita are areve tivi kiva vita la mō ōpe, Tivi karu la isa koti kokoruka tava erero miaraia; aite kofa karu la omopa miaraia, tetete omopa kofa karu voa.#Levi 19:13; Deut 24:15 9Sare isei misoseōpe soa tivi vei itapōpe karu kotipe lea mea, ere farafarapo silva moni koru farafarapo ovōpe. 10Omopa kofa karu koti, ereve haiiri ere tava arori voa ovai roi; a—, ere ta silva moni koru farafarapo ovōpe. 11Tava lōri ovi ovi, ere uvi ve papuvita la o vituvitu a’ mō ōpe, 12Mea aite kofa karu tivi ora farakeka haria loi, a—, a erero lei tava ela ita usoso loi, tivi ve pasou sare ve siahu ita taiovaita karu ela meha. 13A—, are tava o ereve karu farakeka aea la mō ōpe, Moraitai e, ara aro kaiae leiti kao. A ara ita tava silva moni koru farakeka vei otoare ari kao ie? 14Ave etau ovi teraia. Ara aro miaraita lea koru farakeka vei otoare ari kao ei? Ave etau ovi teraia. Ara aro miaraita lea tava feare, mea aite kofa karu ta miarai, arave haikaeaita haiiri reha. 15Ara arave elore etau kofa la ovi ara haikaeaita lea mai la leiti vei, ara lōfeare levi leiti roi ei? Ara moni la au miaraita lea vei a hilisi ei? 16Lōfeare aite kofa karu, omopa kofa karu lei meava roi, aea omopa kofa karu aite kofa karu lei meava roi.#Mat 19:30; Mak 10:31; Luk 13:30
Iesu areve opi ata itoi vei oroisoria soa o moipe
(Mareko 10:32–34; Luka 18:31–34)
17Soka Iesu Ierusalema voa pataipe soa, are satiriaraita karu twelve itai voa murufa lariōvi, aea otiharo voa erero mō ōpe, 18Mapaia, ereita Ierusalema voa la patai meha; aea Karu ve Atute la maso harofave karu aeata Safu Karoro ore karu la miōri, ere arero seseōvi tava paeai o arero o mei, 19arero toruipi haria karu la miarai roi, ere arero area sa vutea a’, arero teavi sa’, arero satauro sa paeai vei; a—, oroisoria sare voa arero opai voa ata moravi itoi roi.
Iakobo auke Ioane ita sa loki leipe o
(Mareko 10:35–45)
20Aite Sebede ve atute oraka ve lou, areve atute oraka ita arero tai foreri sukakoka avi, etau aea vei arero loki leipe. 21Lei Iesu arero mō ōpe, A lekōru la haikaeaipea? Lou arero mō ōpe, A o mei arave mea atute oraka, farakeka ave mai toare itai voa, farakeka aea ave mai ava itai voa, ave basileia ve soa voa avai vei. 22A—, Iesu tava o arero mō ōpe, A loki leipeta lea etau ve eite a ore kao. Ara sa lari vei leipeta lea kōkuveisa euka larita ore ei? 23Ereuka arero mō ōpe, Elaka larita ore. Are ereukaro mō ōpe, Okofa euka arave kōkuveisa la lari roi, a—, arave mai toare voa aea arave mai ava voa avai vei miaraita lea arave kao, a—, lea itai itai oti arave Oa sa ereuka vei lei kekese leita lea karu oraka ve oti reha.
24Soka ten karu lea o la mapi, ere lea paua ita marehari ita la kitou leipe. 25Lei, Iesu erero arero tai isa mō ōpe, E ore toruipi haria karu ve harofave karu ere voa papukaru mai leititore, aea ereve karu metameta sa erero tivi irori ita miara vovea.#Luk 22:25–26 26A—, e voa omopa kofa leiti haikaeaita lea vita, karu foromai ve sarufa merava leiti vei;#Mat 23:11; Mak 9:35; Luk 22:26 27aea e voa omopa kofa leiti haikaeaita lea vita, karu foromai ve sarufa merava leiti vei. 28Ipi Karu ve Atute karu areve sarufa leiti vei koti kao, a—, are karu ve sarufa leiti vei, aea areve makuri la karu rauapo la paraeaita tava vei miarai vei.
Ofae kuku karu orakoria
(Mareko 10:46–52; Luka 18:35–43)
29Soka ere Ieriko kiripōpe lea mea, karu sitavu rovaea arero aitetai vovo roroaiape. 30Soka ofae kuku karu oraka otiharo peto voa avi, ereuka Iesu sa foapōpe o la mapi, ereuka auka i mō isa moipe, Papuvita, Davida ve Atute e, elakaro rapi maeaforoe leitia. 31Lō isa isa lea karu sitavu ereukaro o erere a’ o isoka o ape; a—, ereuka i rovaea ata mō isaiape, Papuvita, Davida ve Atute e, elakaro rapi maeaforoe leitia. 32Iesu sukatai pōvi ereukaro isa koti mō ōpe, Ara eukaro leiti vei haikaeaipeta etau larelekōru? 33Ereuka arero mō ōpe, Papuvita e, elakave ofae lei ovava leiti vei. 34Lō mei Iesu maeaforoe lei, ereukave ofae mai sa mopi, ereukave ofae utohoa ata ovava lei eovi, ereuka ta arero aitetaipe.
Iliyochaguliwa sasa
Mataio 20: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
