Mataio 18
18
Iesu areve satiriaraita karu la kureōpe
(Mareko 9:33–50; Luka 9:46–50)
1Lea ora voa satiriaraita karu Iesu tai koti mō ōpe, Kauri ve basileia voa rovaea vita leisa?#Luk 22:24 2Soka are atute seika la isa koti arero ereve aru voa vipi 3mō ōpe, O kofa ara ero o la moi, e haiiri kerori auke lei, atutemori ve mai feare ovai auke leitita, a—, e kauri ve basileia voa levi oropai roi.#Mak 10:15; Luk 18:17 4Areve haiiri la lei ipi lei, mea atute seika feare leitita, a—, kauri ve basileia voa rovaea vita kofa leiti roi. 5Atute seika mōfeare la arave rare vei maeafukapaita lea karu, araro ta maeafukapai roi.
6Uiti fare rorokea faihohōroaita fave rovaea karu ve kōvōrehau voa suka makaikara voa toapi ma isoita, lōfeare mai lea karu vei lareva ia; a—, are araro sukaerereaita mea karu kaekae aea lei kaiae leita lea mai lareva kakaeite kofa. 7Ahai‐e mearovaeka vei! ipi Ualare la sukaerereaita haiiri la lei heafo leita etau etau forerai roi, a—, ahai‐e ipi lōfefeare etau la lei foreraita lea karu vei!
8Soka ave mai ō ave mora sa aro lei kaiae leitit’ oria, arero sarapi mutapaia. Makuri voa mai kui ita ō mora kui ita oropaita, a vei lareva ia, a—, mai orakoria ita ō mora orakoria ita futai auke a voa toapaita lea lareva kao.#Mat 5:30 9Aea ave ofae aro lei kaiae leitita, a—, arero suka fareōvi mutapaia. A makuri voa ofae farakeka ita oropaita, a vei lareva ia; a—, ofae orakoria ita saroroapaita oti ve a voa toapaita lareva kao.#Mat 5:29
Parabole o veverapōpe mamoe vei
(Luka 15:3–7)
10Kiva leitia, e mea karu seika farakeka aea la levi sukavuteaia; ipi ara ero o la moi, ereve kauri voa pepeita aneru sa arave kauri voa peita Oa ve soso la ofae fofoisa vovea. 11Ipi Karu ve Atute veverapi roroaita karu la eli maravi lei makuri leiti vei forera mea.#Luk 19:10
12Eve haiiri leafeare? karu aea mamoe 100 ia, a—, farakeka furuka voa veverapai oria, are 99 kiripi, raepa otioti voa patei lea veverapaita farakeka la eli roi, ōta? 13Eli eli arero eavait’ oria, okofa ara ero o la moi, are lea mamoe vei hailareva rovaea kofa leiti roi, veverapai auke leitita 99 vei hailareva lōfeare levi leiti roi. 14Lōfeare eve kauri voa peita Oa mea karu seika farakeka la veverapai haikaeai sore.
15Ave marehari sa aro kaiae leitit’ oria, arero o erere aria, euka auka hariakao pavaita lea soa voa; are ave o mapai oria, a ave marehari ve haiiri la lei haura loita reha.#Luk 17:3 16A—, are mapai haiarara leitit’ oria, a karu farakeka ō orakoria a ita fareho lariōvi foreraia, ipi laua foromai la ore lei moita karu orakoria ō oroisoria ve o sa okofa leiti vei.#Deut 19:15 17A—, are ereve o ta mapai haikaeai auke oria, ekalesia la omoia, aea are ekalesia ve o ta mapai auke oria, arero toruipi haria karu feare leitia ō takis fareovaita karu feare leitia.
18Okofa ara ero o la moi, E sa mearovaeka voa fasaita lea etau, kauri voa ta fasai roi; aeata e sa mearovaeka voa felaukea paraeaita lea etau, kauri voa ta felaukea paraeai roi.#Mat 16:19; Ion 20:23 19Ara o aeata ero o la moi, E karu orakoria sa mearovaeka voa haiiri farakeka ita etau aea vei loki leiti oria, arave kauri voa peita Oa sa lea etau la leiti roi. 20Ipi karu orakoria ō oroisoria arave rare vei kokorukaita lea oti voa, ara ereve aru voa ta peava roi.
Parabole o ipi abitorea karu vei
21Aite Petero arero tai foreri mō ōpe, Arave marehari araro kaiae leitita voa, soa leafere ara areve kaiae la sasukai vei? Soa seven ei?#Luk 17:3–4 22Iesu arero mō ōpe, Ara aro o la moi, soa seven kao, a—, soa seventy‐seven.#Gen 4:24 23Lea vei kauri ve basileia are usoso lohio karu rovaeka feare areve moni areve sarufa karu ita muti haikaeōpe. 24Are erero seseōvi mutipe soa, karu farakeka aea la arero tai lariōvi kotipe, areve abitorea moni foromai rovaekapo kofa. 25Ipi are miarai moni auke eavia, areve papuvita ve o meha, ere arero aea areve ua aea atutemori ita, aea areve ovi meita etau foromai ita la karu haria sa erero itaea lei maravaia, ipi abitorea moni lōri sukaeai vei. 26Lō mei lea sarufa vita arero sukakoka avi arero taivotei mō ōpe, Papuvita e, au pavaia; araro rapi maeaforoe leitia aea ara ave moni foromai la aro miarai roi. 27Soka lea sarufa ve papuvita arero maeaforoe lei, arero paraea aea areve abitorea foromai la au sasukōpe.
28A—, lea sarufa vita maria voa terōpe lea mea, are areve maeapavora sarufa karu farakeka aea la sukaeōpe, are voa kina ten abitorea lei ovōpe lea vita sukaea, are arero kōvōre faeri ovi mō ōpe, Arave moni araro miaraia. 29Areve maeapavora sarufa vita areve omopa voa sukakoka avi arero loki mō leipe, Au pavaia, araro rapi maeaforoe leitia aea ara ave moni aro miarai roi. 30A—, are haiarara lei te, arero dibura uvi iri voa fasai vei itapōpe, tetete are areve abitorea tava miaraita soa voa. 31Soka are ita farehoria sarufa leiape karu lea leipe mai la ofae eovi, ere kitou ita haisora rovaea lei, ere te lea leipe mai foromai la ereve papuvita rovaea la omoipe. 32O mei lea papuvita arero koti vei isa mō ōpe, Sarufa vita maealolo e, ara ave abitorea foromai la au sasukai ipi a sa araro loki loita lea vei. 33Usoso ara aro maeaforoe loita lōfeare a ta ave lea maeapavora karu la maeaforoe lōfeare leiti vei lea sa haura. 34Areve papuvita arero kitou rovaea lei, arero dibura voa itapōpe kaiae tava arero miarai vei tetete are areve lea abitorea foromai la miōri kaleitita soa voa. 35Soka e eve haiiri foromai ita elore elore paumarehari ve kaiae la sasukai auke leitita, a—, arave kauri Oa ero ta lōfeare leiti roi.
Iliyochaguliwa sasa
Mataio 18: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
