Mataio 15
15
Iuda karu sa satiriaraita papa mai
(Mareko 7:1–23)
1Soka Farisea karu aea Safu Karoro ore karu Ierusalema voa kiripi fafuka Iesu tai foreri mō ōpe, 2Ave satiriaraita karu ere papa karu sa leiape mai feare leiti auke leipeta ipi levea? Ipi ere mai maukai auke ita larietau laritore. 3Are tava o erero mō ōpe, E Ualare ve Safu O la eve papa mai vei kiripaipeta ipi levea? 4Ipi Ualare mō ōpe, Oa ita lou ita la meaforoe lei taivotaia; aeata meha, areve oa varo lou varo o maealolo arita lea karu la etakofa paeaia.#Eso 20:12; 21:17; Deut 5:16; Levi 20:9 5A—, e mō aritore, Areve oa varo lou varo mō arita lea karu, A sa ara voa ovai haikaeaita lea etau Ualare vei toutea miavaita etau reha; lōfeare voa are areve oa la maeaforoe lei levi taivotai roi. 6Lōri leita mai voa e Ualare ve o la eve papa ve mai sa sukavutea vovea. 7Aiera‐aiera karu e, Isaia okofa ita peroveta o e vei mōri moipe:
8Mea karu ereve ape poe sa maeatitore,
a—, ereve haiiri araro sukavutea ára‐ita roroa vōvea.#Isa 29:13
9Ere araro auraka maso toaitore,
karu sa moita o la ere usoso Ualare ve safu o feare satiriara vōvea.
10Aite are karu sitavu arero tai isa koti erero mō ōpe, Mapaia, aeata ore leitia. 11Areve ape iri voa oropaita lea etau karu ve haiiri la lei maealolo leitita ore kao; a—, karu ve haiiri voa pea, ape voa pisiri voa foreraita lea etau arero lei maealolo leititore.
12Lea mea areve satiriaraita karu arero tai forera mō ōpe, A ore ei? Farisea karu ere lea o la mapi ere haiiri heafo la leipea. 13A—, are tava o erero mō ōpe, Arave kauri Oa sa vipai auke leitita lea tola foromai la ipi ita aruovi farai roi. 14Ere kaka roroa; ere lariōvaita karu ofae kuku. Soka ofae kuku karu farakeka ofae kuku karu aea la lariōvaita, a—, ereuka orakoria mea‐uta voa oai roi.#Luk 6:39
15Petero tava o arero mō ōpe, Lea parabole ve eite elaro omoia. 16Lō mei, Iesu mō ōpe, E ta haiiri ovava leiti kao ei? 17E mapai kao ei? Ape voa oropaita lea etau foromai ére horou voa fauka, aea aite pisiri voa e lei paitore. 18A—, ape iri voa foreraita lea etau haiiri voa pea patei maria voa foreraitore, aea ere sa karu la lei maealolo leititore.#Mat 12:34 19Ipi haiiri voa pea maria voa patei foreraita etau meha, seseōvaita haiiri kaiae, karu la paeai, ua torea, herei mai, etau torea, havava apeva paraeai, o eokere. 20Lea etau etau sa karu la lei maealolo lei vovea. A—, larietau la mai maukai auke ita larita, lea sa karu la lei maealolo leiti sore.
Iesu Turo aea Sidono ve soa voa
(Mareko 7:24–30)
21Soka Iesu lōvoa kiripi maea lei Turo aea Sidono ve soa voa isaipe. 22Aea Kanana ua aea lea oti voa pea koti mō isa moipe, Papuvita, Davida ve Atute e, araro rapi maeaforoe leitia! Arave mori harisu sa toa are maealolo kofa lei mea vōvea. 23A—, Iesu tava o arero omoi kasirau. Areve satiriaraita karu arero tai koti arero o mōri moipe, Arero lei soeaita leafeare, ipi are ereitave aite voa fi ita mea. 24Are tava o mō ōpe, Ara foreri meipeta ipi karu haria vei kao, a—, Israela ve veverapaita mamoe vei haria. 25A—, lea ua koti arero sukakoka avi taivotei mō ōpe, Papuvita e, araro rapi toaraia. 26A—, Iesu tava o mō ōpe, Atutemori ve larietau la fareōvi, ave voa toapaita lea mai lareva kasirau. 27Are mō ōpe, Okofa, Papuvita e, a—, posa hiairi voa roroaita lea ave ta ereve papukaru ve posa voa sisapaita larietau eloe‐eloe la lalō vovea. 28Lea mea Iesu tava o arero mō ōpe, Ua e, ave sukaerereaita haiiri rovaeka. Usoso a haikaeaipeta haiiri feare a vei leitia. Soka lea ora kofa voa areve mori la lei lareva leipe.
Iesu eka karu rauapo la lei lareva leiape
(Mareko 7:31–37)
29Soka Iesu lea oti la kiripi, Galilea Sitoi ve miri voa kei foreri, raepa aea voa patei avōpe. 30Karu sitavu rovaea arero tai foreri, ere ereve mora kaiae karu, aea ofae kuku karu, aeata okuku karu, eka hariaharia karu rauapo ita la ere ita farehoria lariōvi patei, ere lea karu la areve mora ipi voa vipaiape. 31Vipi are ereve eka la lei lareva leiape; lōfeare voa lea karu sitavu, ere okuku karu laua sukōvi, mora kaiae karu mora kerori, aeata ofae kuku karu ofae eavaiape la eovi ere haihava lei, Israela ve Ualare la maeatipe reha.
Iesu larietau karu 4,000 la miarōpe
(Mareko 8:1–10)
32Soka Iesu areve satiriaraita karu la arero tai isa koti erero mō ōpe, Ara mea karu sitavu la maeaforoe leipea, ipi ere ara ita fareho roroaia sare oroisoria loita meha, aea ere lari larietau kasirau, aea ara erero paraea eroa ita ereve elore elore voa itapai haikaeai kao, ere otiharo voa maea‐uti pui leiti ave. 33A—, areve satiriaraita karu arero mō ōpe, Ereita mea furuka oti voa larietau leavoa ovai roi, mea karu sitavu la lei ére popai vei? 34Iesu erero mō ōpe, E faloa korukoru leafere maravi sisea? Ere mō ōpe, Seven haria, ekaka kaekae farafarapo ta reha. 35Soka are lea karu sitavu la mea voa ava puavai vei omoipe. 36Aite are lea faloa korukoru seven aea ekaka ita la mai sa maravi, are Ualare la maeati roroka lei erero fofi, satiriaraita karu la ere karu sitavu la omopa posaseai vei miarōpe. 37Soka ere foromai larietau la’ la’ ére popōpe; aea ere lea larietau hohoi maravi posea seven la lei soōpe. 38Lea larietau lalape karu mai muti muti ere heavita 4,000, uamori aea atutemori ita ta reha.
39Soka are karu sitavu maea leiti vei itapi, are oroti voa forea ufi Magadana ve mea voa pavōpe.
Iliyochaguliwa sasa
Mataio 15: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
