Ioane 18
18
Iesu Getesemane voa
(Mataio 26:47–56; Mareko 14:43–52; Luka 22:47–53)
1Iesu lea o mei roroka lei, are areve satiriaraita karu ita maria voa foreri Kidirono ve lorara voa ufōpe. Forōva oti farakeka aea lōvoa eaeiape. Iesu areve satiriaraita karu ita lōvoa oropōpe. 2Iudasi, kivaia lei arero paeai vei miarai vita lea oti ta ore, ipi Iesu areve satiriaraita karu ita lōvoa haelarehaelare kei kokorukaiape eavia. 3Soka Iudasi maola karu firu, aea maso harofave karu Farisea karu ita sa itapōpe tivi karu hea ita la lōvoa taravi, lamepa ita, sasae‐a ita, aea maola etau ita, lōri kavōpe. 4Iesu, are voa forerai etau foromai la ore lei, pisiri voa foreri erero mō ōpe, E sa elipeta karu leisa? 5Ere tava o arero mō ōpe, Iesu Nasareta karu. Are erero mō ōpe, Ara meha.
Iudasi, kivaia lei arero paeai vei miarai vita, ere ita farehoria soi peiape. 6Soka Iesu sa ara meha o moipe soa, ere aite oti sukatei, mea voa putoipe. 7Soka are erero lalasi soa aea ta mō leipe, E elipeta karu leisa? Ere mō ōpe, Iesu, Nasareta karu. 8Iesu tava o erero mō ōpe, Ara ero mō moi, Ara meha. E araro eli oria, mea karu hea la paraea ere terai vei. 9Are lōri moipe lea o la okofa leiti vei, A araro miarōpe lea karu voa ara farakeka la lei veverapai kao.
10Soka Simona Petero, are marehaukaita soi ia, aea are lea soi la paitaravi, maso harofave vita rovaea ve fasaita sarufa karu la toa, areve kirori toare la elori fareovōpe. Lea sarufa karu ve rare Malako reha. 11A—, Iesu are Petero la mō ōpe, Ave soi oroa voa vifaia, Oa sa araro miaraita kōkuveisa la ara levi lari roi ei?#Mat 26:39; Mak 14:36; Luk 22:42
Iesu Anasi ve omopa voa
12Soka lea maola karu firu, ereve kapena vita ita, aea Iuda karu ve tivi karu ita Iesu la sukafori fasi, 13arero omopa Anasi tai lariōvi isaipe. Ipi Anasi are Kaiafasi ve ōva, lea sisoro ve maso harofave vita rovaea. 14Lea Kaiafasi are Iuda karu la o mōri moipe vita reha, Karu farakeka karikara karu vei opaita, a—, ero lei lareva leita mai reha.#Ion 11:49–50
Petero Iesu la avoa ōpe
(Mataio 26:69–70; Mareko 14:66–68; Luka 22:55–57)
15Soka Simona Petero aea satiriaraita karu farakeka aea ita fareho Iesu la aitetei isaipe. Lea satiriaraita karu aea are maso harofave vita malasa; lea vei are Iesu ita maso harofave vita ve uvi iri‐aru‐pisiri oti voa oropōpe; 16a—, Petero otiape maria voa soi peiape. Maso harofave vita la malasa leipe lea satiriaraita karu aea, are maria voa te, utape kiva leita morihōva la o mei, are Petero la iri voa lariōvōpe. 17Lea utape kiva leita sarufa morihōva Petero la mō ōpe, A ta lea vita ve satiriaraita karu farakeka aea ei? Are mō ōpe, Ara kasirau.
18Mea vevekoko leipe lea vei tivi karu aea sarufa karu ita akoela a sukea haekao popōvi maea a siahu toaiape. Soka Petero ta ere ita fareho pōvi maea a toaiape.
Maso harofave vita ve lalasi o
(Mataio 26:59–66; Mareko 14:55–65; Luka 22:66–71)
19Soka maso harofave vita are Iesu la lalasi leipe ipi areve satiriaraita karu vei aea areve satiriaraita o vei. 20Iesu tava o arero mō ōpe, Ara laua pisiri karikara karu la sukōvi, ara sunako uvi voa aeata Maso Uvi voa satiriara vovea; aea ara laua murufa sukavai kasirau. 21A araro lalasi leipeta ipi levea? Araro mapavota lea karu la ara erero moivota lea o vei lalasi erero leitia. Lea karu ara moivota o ore. 22Are lea o mei, haekao soi peiape tivi karu farakeka aea Iesu la mai posa sa toa mō ōpe, A maso harofave vita la tava o lōfeare moi ei? 23Iesu tava o arero mō ōpe, Ara o kaiae arit’ oria, lea o kaiae vei o pisiri moia: a—, haura oria, a araro toaita ipi levea?
24Soka Anasi arero fasōpe ita Kaiafasi tai itapōpe.
Petero Iesu la avoa ata ōpe
(Mataio 26:71–75; Mareko 14:69–72; Luka 22:58–62)
25Soka Simona Petero maea a siahu toai vei soi peiape. Pea karu hea arero mō ōpe, A ta areve satiriaraita karu farakeka aea ei? Are lea la avoa a’ mō ōpe, Ara kasirau. 26Soka maso harofave vita ve tivi karu farakeka aea, are Petero sa toa kirori elori fareovōpe lea vita ve paumarehari, are ta mō ōpe, Ara aro are ita fareho forōva oti voa eavai kao ei? 27Lō mei Petero avoa ata ōpe. Soka kokora vita utohoa fi ōpe reha.
Iesu Pilato ve omopa voa
(Mataio 27:1–2, 11–14, 15–31; Mareko 15:1–5, 6–20; Luka 23:1–5, 13–25)
28Lea mea ere Iesu la lariōvi, Kaiafasi ve uvi kiripi Roma gavana ve uvi rovaea voa te forerōpe. Mea ōpōpe soa reha. Soka Iuda karu ere lea uvi voa oropai kao, ere ereve maea ve safu la levi lei hasiavai vei, ipi ere Foapaita Sosoka la lari vei leipe eavia. 29Soka Pilato erero tai maria voa foreri mō ōpe, E mea vita voa havara lekōru la paraeai? 30Ere tava o mō ōpe, Mea vita kaiae auke oria, a—, ela arero aro tai levi lariōvi forerai lare. 31Soka Pilato erero mō ōpe, E haria sa arero ovi, eve safu o feare arero seseōvi tava miaraia. A—, Iuda karu arero mō ōpe, Ela siahu kao karu la seseōvi arero paeai vei. 32Lōfeare voa Iesu sa moipe o okofa leipe, are leafeare opai vei moipe lea o voa.#Ion 3:14; 12:32
33Soka Pilato areve uvi rovaea voa ata oropi, Iesu la isa arero mō ōpe, A Iuda karu ve king ei? 34Iesu mō ōpe, A ave elore o sa moi, ō karu haria sa o ara vei aro mei moi ei? 35Pilato tava o mō ōpe, Ara Iuda karu ei? Ave toruipi karu aea maso harofave karu ita aro ovi araro miarai. A lekōru leipe? 36Iesu tava o mō ōpe, Arave basileia mea mearovaeka voa kasirau. Arave basileia mea mearovaeka voa leitita, a—, arave toaraita karu marehaukai lare, araro lei Iuda karu la levi miarai vei. Etau farakeka, arave basileia mōvoa kao. 37Soka Pilato arero mō ōpe, King aea a kofa reha ei? Iesu tava o mō ōpe, Ara king, ave o reha. Araro epi mearovaeka voa forerōpe ipi okofa la mei pisiri muiai vei. Okofa ve karu foromai arave ape o la mapa vovea. 38Pilato arero mō ōpe, Okofa ve eite lekōru ei?
Are lea o mei roroka lei, are Iuda karu tai maria voa ata foreri erero mō ōpe, Ara areve kaiae eavaia kasirau. 39Soka e leita mai ia, ara Foapaita Sosoka soa voa dibura karu farakeka la ero tai paraeai vei. Soka e haikaeaipeta, ara Iuda karu ve king e voa paraeai vei ei? 40Lea mea, ere i rovaea mō isa moipe, Lea karu kao, a—, Barabasi. Soka Barabasi are irori ita torea leita karu reha.
Iliyochaguliwa sasa
Ioane 18: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
