Ioane 16
16
1Ara mea etau ero omoi eve sukaerereaita haiiri oai ave. 2Ere ero sunako voa sukavutea e maria karu leiti roi; okofa, soa forerai vei la roi lea mea ero paea opaita lea karu hai mō seseōvai roi, are lōfeare voa Ualare sa haikaeaita tivi la leiti roi. 3Ere lea etau ero leiti roi, ipi ere elaka Oa ita la ore leiti sore. 4A—, ara lea etau ero omoi, ipi ereve eite sa aite voa foreraita lea soasoa voa, e arave mea o la ata haikaeai vei.
Safu Arahoha Lareva sa leita mai
Ara omopa soa voa mea etau ero omoi kao, ipi ara e ita farehoria peiape eavia. 5A—, faitora ara araro itapōpe Ualare tai terai vei la leipea; a—, e karu farakeka aeata araro lalasi mōri leitia kao, A leavoa terai roi? 6A—, ipi ara sa mea etau ero omoita eavia, e haiiri eae foromai la leipea. 7Etau farakeka, ara okofa ita ero o la moi; ara ero kiripi teraita, a—, e lareva la sukaeai roi; ipi ara terai auke leitita, a—, Toaraita Vita ero tai levi koti roi; a—, ara teraita, a—, ara arero ero tai itapai roi. 8Are foreraita lea mea, are mearovaeka la iri kaiae vei aeata mai haura vei aeata seseōvi tava miaraita soa vei pisiri muia lei ore kofa leiti roi. 9Are ereve iri kaiae la pisiri muiai roi, ipi ere araro sukaerereai auke eavia. 10Are mai haura la pisiri mōri muiai roi, ipi e araro ofae ata eavai auke leita soa ara sa Oa tai teraita eavia. 11Are seseōvi tava miaraita soa la pisiri mōri muiai roi, ipi mea mearovaeka ve papuvita la seseōvi tava miōri roroka loita eavia.
12Ara etau rauapo hea ta ia ero omoi vei, a—, e lea la faitora mapai vei rofo usoso kao. 13A—, Okofa ve Arahoha sa foreraita soa, are okofa foromai voa ero lariōvai roi; ipi are areve elore siahu sa o levi moi roi, a—, are mapi ore leita lea o foromai la omoi roi, aea aite forerai vei leita etau ta ero everori omoi roi. 14Are araro lei sosorusosoru leiti roi, ipi are ara voa mapaita lea o la ovi ero omoi roi. 15Arave Oa ve etau foromai arave; lea vei ara o mō aipea, Are ara voa mapaita lea o la ovi ero omoi roi. 16Soa taheka la eaea aea e araro ofae ata levi eavai roi, aeata soa taheka la eaea aea e araro ofae eavai roi.
Haiiri eae aeata hailareva
17Soka areve satiriaraita karu hea elore elore mō ōpe, Are ereitaro moipeta mea o lekōru, Soa taheka la eaea aea e araro ofae levi eavai roi, aeata soa taheka la eaea aea e araro ofae eavai roi, aeata areve o ta meha, Ipi ara Oa tai terai vei leipeta eavia. 18Ere elore elore ata lalasi lei mō ōpe, Are moipeta lea o, Soa taheka ve eite lekōru? Are moipeta lea o ve eite ereita ovava leitia kao.
19Iesu ere sa arero lalasi leiti haikaeōpe lea la ore lei, erero mō ōpe, E elore elore lalasi leipeta ipi arave o mōfeare ei? Soa taheka la eaea aea e araro ofae ata levi eavai roi, aeata mōfeare, soa taheka la eaea aea e araro ofae eavai roi, ei? 20Okofa ita ara ero o la moi, E ovororo sisapi fi ari roi, a—, mearovaeka hailareva la leiti roi. E haiiri eae leiti roi, a—, eve haiiri eae toarōrisa hailareva la leiti roi. 21Ua avasa pataita hehea leitita lea mea, are haisora ia, ipi areve soa foreraita eavia; a—, mere mi a’ roroka leitita, are hehea la ata levi seseōvai roi, ipi areve hailareva karu áre la mearovaeka voa miarita lea vei. 22Soka e ta lōfeare, faitora e haisora ia, a—, ara ero ofae ata eovi, eve hai ta lareva leiti roi, aea karu eve hailareva e voa levi fareovai roi.
23Lea sare voa e etau taheka aea vei araro lalasi levi leiti roi. Okofa ita ara ero o la moi, e etau aea la Oa voa arave rare vei loki leitita, a—, are ero au miarai roi. 24Itiiti faitora e etau aea arave rare vei loki leitia kasirau. Loki leitia, aea e ovai roi, eve hailareva foromai la lei kekese leiti vei.
Iesu mearovaeka la ovi aierōpe
25Mea etau vei ara hohore o ita ero moi, a—, soa forerai vei la roi lea mea ara hohore o ita ero ata levi moi roi, a—, ara Oa vei o pisiri ero omoi roi. 26Lea sare voa e etau arave rare vei loki leiti roi, ara Oa la e vei loki leiti roi, ara lea la ero omoia kao; 27ipi Oa are kofa ero haikakare araitore, ipi e araro haikakare ari aea ara Oa voa pea forerōpe, e lea la sukaererea vovo roroaita eavia. 28Ara Oa voa pea forerai, aea ara mearovaeka voa foreri la mea; a—, ara mearovaeka la kiripi Oa tai ata terai roi.
29Areve satiriaraita karu mō ōpe, Mea faitora soa a o pisiri aipea, hohore o ita moia kao. 30Ela faitora etakofa ore, a etau foromai ore, aea karu aea aro lalasi leiti vei lea eite kao. Elave sukaerereaita haiiri, a Ualare voa pea foreri la me meha.
31Iesu tava o erero mō ōpe, E faitora sukaerereai ei? 32Mapaia, ora la kotipea, a—, foreraita meha, lea mea ero liōvea, e elore elore oti voa fu a’, araro hariakao kiripai roi. Eite ara hariakao peia kao, ipi arave Oa ara ita fareho peipeta eavia. 33Ara mea etau etau ero la moipea ipi e tairu ara voa ovai vei. Mearovaeka voa e haisora ia, a—, hailareva leitia, ara mearovaeka la ovi aieri la mea.
Iliyochaguliwa sasa
Ioane 16: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
