Aposetolo 7
7
Setefana ve itoro o
1Soka maso harofave vita rovaea mō ōpe, Lea o okofa ei? 2Setefana mō ōpe, Maraiosu, oa‐ita e, mapaia. Sosorusosoru ve Ualare, ereitave papa Abrahama tai forerōpe, are Mesopotamia voa Harana voa foreri pavai auke leipe lea soa voa.#Gen 12:1 3Are arero mō ōpe, Ave mea ave paumarehari ita la kiripi, maea lei ara aro muiai vei leita lea mea voa pavaia. 4Soka are Kaladea karu ve mea kiripi, Harana voa kei peiape. Pepe areve oa sa opōpe soa ve aite voa, Ualare arero lōvoa fareōvi mea mea, e faitora pepeipeta mea oti voa lariōvi koti forerōpe.#Gen 11:31; 12:4 5A—, are hasu mōvoa arero miarai kasirau, mora posa ve pisasa seseōvaita mea taheka ta miarai kao; a—, are arero areve meavumōla ita la aite miarai vei otoare ta ōpe, eite are lea soa mere farakeka aea ta kasirau.#Gen 12:7; 13:15; 15:18; 17:8 6Ualare arero o mōri moipe, Ave meavumōla mea haria voa pōvi, ere lōvoa fasaita tivi merava lei aea erero lei haisora leiti roi sisoro 400 voa.#Gen 15:13–14 7Ualare ta mō ōpe, Ara sa erero fasaita tivi merava miōri leita lea toruipi karu la seseōvi tava miarai roi, aea lea ve aite voa ere lea oti la kiripi, araro mea oti kofa voa maso toai roi.#Eso 3:12 8Are peritome otoare peise ta arero miarōpe. Lea vei Abrahama Isako la epōpe soa ve aite sare eight voa arero peritome leipe. Isako are Iakobo la epōpe, aea Iakobo ereitave maiape‐ape papa‐ita twelve la epaiape.#Gen 17:10–14; 21:2–4; 25:26; 29:31—35:18
9Mea maiape‐ape papa‐ita ere Iosefa la hilisi lei, Egupto voa fasaita sarufa leiti vei itaea lei miarōpe. A—, Ualare are ita fareho lei,#Gen 37:11, 28; 39:2, 21 10areve haisora etau foromai voa arero fareovōpe. Iosefa are Faro Egupto ve king ve omopa voa forerōpe lea mea, Ualare arero haiore miōri, Faro arero haikaeai ovi, Egupto mea voa aea king ve uvi karu voa harofave vita leiti vei vipōpe.#Gen 41:39–41 11Soka aite voa posera haisora rovaea ita Egupto mea aeata Kanana mea foromai voa forerōpe. Ereitave papa‐ita larietau la eli eli eavai kao.#Gen 42:1–2 12A—, Iakobo larietau Egupto mea voa siseiape o la mapōpe lea mea, are areve irave, ereitave papa‐ita la lōvoa itapōpe, omopa kofa sariva soa reha. 13Orakori sariva soa voa Iosefa areve pauita la lei ere arero ore lei, aea Iosefa ve paumarehari ta Faro sa ore leipe.#Gen 45:1, 16 14Lea mea Iosefa karu la itapōpe, areve oa Iakobo aea areve paumarehari foromai la mei koti vei, ere karu 75.#Gen 45:9–10, 17–18; 46:27 15Soka Iakobo Egupto voa isei forerōpe. Aite are lōvoa opōpe aea ereitave papa‐ita ta reha.#Gen 46:1–7; 49:33 16Lea mea ere erero Sekeme voa taiovi kei viopaiape, Abrahama moni sa Hamoro ve susumori voa itaea lei ovōpe lea tapu oti voa.#Gen 23:3–16; 33:19; 50:7–13; Iosu 24:32
17Soka Ualare sa Abrahama ita ōpe otoare ve soa la lei okofa leiti vei haekao leipe lea soa, ereitave karu Egupto voa totavi rauapo leipe.#Eso 1:7–8 18Lei lei Iosefa la ore auke leipe king Egupto voa basileia ve siahu ovōpe. 19Ovi are ereitave toruipi‐ipi karu la maeahahauhahau lei, ivara eokere mai ita ereitave papa‐ita la lei, ere ereve atute popora popora maria voa mutapaiape, ere makuri levi leiti vei.#Eso 1:10–11, 22 20Lea soa voa Mose la epōpe, are atute opape foromai lareva kofa. Papare oroisoria voa arero oa ve uvi voa savuaiape.#Eso 2:2 21Savua savua arero maria voa mutapōpe soa, Faro ve mori sa arero areve elore atute vei ovi kiva leipe.#Eso 2:3–10 22Mose Egupto ve haiore foromai voa satiriōri malasa lei, are moiape o voa aeata leiape etau foromai voa rofo rovaea lei vovo meiape.
23A—, areve sisoro forty leipe soa, are areve paumarehari Israela ve susumori la sukaeai vei haikaeōpe.#Eso 2:11–15 24Haikaea are ereve karu farakeka aea la Egupto karu sa hasiavōpe la ofae eavōpe. Eōvi are lea karu la toari Egupto karu la toa au paeōpe, lea karu la leipe haisora ve tava vei. 25Areve haiiri areve elore karu haiiri fapi ore mōri leita varo, Ualare sa arero ovai ipi erero paraea fareovai vei; a—, ere haiiri fapai kao. 26Lea aite sare voa are Israela karu oraka sosori toaiape la ofae eovi, ereukaro totoeai vei seseōvi mō ōpe, Karu e, euka paumarehari; euka elore maea kaiae leipeta ipi levea? 27A—, ereuka elore maea karu la kaiae leipe lea heavita aea, Mose la itai voa sukavutea lalasi mō leipe, Aro elave harofave vita aeata seseōvaita vita leiti vei leisa vipaita? 28A araro ta paeai haikaeaipea, usoso a lea Egupto karu la area paeaia feare leiti vei ei? 29Lea o la mapi, Mose soea kei Midiana ve mea voa foreri pavōpe. Lōvoa are atute orakoria la epaiape.#Eso 18:3–4
30Soka sisoro forty kaleipe soa, aneru aea tola meke ve aru a‐uri voa arero tai forerōpe, Sinai raepa ve furuka merava voa.#Eso 3:1–10 31Soka Mose lea la ofae eovi haihava lei, te lea tola meke ve haekao leipe arero metakao eavai vei. A—, are Papuvita ve i la mapi mō ōpe, 32Ara ave papa‐ita ve Ualare, Abrahama aea Isako aea Iakobo ve Ualare. Mose maea oriri a’ tore foromai lei, ofae kofa eavai vei usoso leiti kao. 33Soka Papuvita arero mō ōpe, Ave tamaka ave mora voa fareovaia, ipi a soi peipeta mea oti safu ia. 34Ara Egupto voa pepeipeta arave lea karu ve haisora la ofae eovi aea ereve fi ta mapi, aea ara fauka la me meha erero toari fareovai vei. Lea vei faitora kotiria, ara aro Egupto voa itapi isei vei.
35Soka mea Mose Israela karu sa haiarara lei mō ōpe, Aro leisa leipe a elave harofave vita aeata seseōvaita vita leiti vei ei? Eite Ualare arero tola meke voa muiōpe lea aneru ve mai sa arero harofave vita aeata lei makuri leita vita lei itapōpe.#Eso 2:14 36Are Israela karu la Egupto kiripi maria voa lariōvi, Egupto voa aea Makaikara Mohari voa aeata furuka merava voa haihava leita etau, siahu ve peise rauapo ita la leiape sisoro forty voa.#Eso 7:5; 14:21; Num 14:33 37Mea Mose are ta Israela karu la mō ōpe, Ualare eve paumarehari voa peroveta karu aea la e vei moravai roi, are sa araro moravōpe lōfeare.#Deut 8:15, 18 38Mea Mose ta Israela karu ita fareho leiape ere furuka merava voa taototori roroaiape lea mea; are lōvoa ereitave papa‐ita fareho lei, aea Sinai raepa voa are ita laua sukavōpe lea aneru ta fareho lei meiape. Are makuri ve o ta ovōpe ereitaro miarai vei.#Eso 19:1—20:17; Deut 5:1–33 39A—, ereitave papa‐ita arero kakeva leiti haikaeai kao. Ere arero sukavutea Egupto voa ata kerori vei haikaea, 40Aarona la mō ōpe, Ereita vei ualare hea la pisosia, ere sa ereitave omopa voa terai vei; mea Mose, ereitaro lei Egupto kiripi maria voa lei forerōpe lea vita, are leafeare loloi, ereita lea la ore leitia kao.#Eso 32:1 41Lea soa voa ere boromakao mere ve ove la pisosi, aea maso etau lea ove voa omopa posasea, aea ereve mai sa pisosipe lea etau vei hailareva leipe.#Eso 32:2–6 42A—, Ualare kerori erero kiripi, ere kauri koru sitavu la maso toaiape, peroveta karu ve buka voa uka siseita o fefeare,
E furuka merava voa roroaiape lea sisoro forty voa,
e ara vei animala savi omopa posaseai kasirau.#Amos 5:25–27
43E Moloka ve maso puta uvi la moravi, aeata eve ualare Refana ve koru ve ove ita la taiovi roroaipe;
e maso toai vei pisosipe maso ove oraka reha.
Lea vei ara ero lei fareōvi Babulono ve hōi kiriape voa itapi kavai roi.
44Ereitave papa‐ita otoare oroasi ve lea harotōvu ere ita fareho furuka merava voa lei vovo roroaiape. Ualare sa Mose la satiriarōpe mai aea usoso arero muiōpe ove feare, are lea harotōvu la lōri pisosipe.#Eso 25:9, 40 45Aite voa ereitave papa‐ita ere lea harotōvu ereve oa‐ita ve mai voa ovi taiovi, ere Iosua ita fareho roroaiape. Ere Ualare sa ereve omopa voa sukavutea larivatōpe torutoru karu ve mea voa oropi ovōpe soa, ere lea harotōvu ta taiovi oropōpe. Lōfeare lei lei pepe Davida ve sare sare voa.#Iosu 3:14–17 46Ualare Davida la haikaeōpe lea vei are arero loki leipe, arero lei peita oti Iakobo ve Ualare vei moravai vei.#2 Sam 7:1–16; 1 Basil 17:1–14 47A—, eite Ualare ve uvi la turōpe vita kofa Solomono reha.#1 King 6:1–38; 2 Basil 3:1–17
48Okofa, Koakoa‐eiteapo Ualare karu sa pisosita uvi voa pei sore; usoso peroveta karu sa moipe o mōfeare,
49Iehova o mō auai, Kauri arave terona,
aea mearovaeka arave mora sa pavaita posa.
E ara vei uvi lekōru la moravi turai roi,
aea arave haioraita oti ta leavoa?#Isa 66:1–2
50Mea etau etau foromai la arave mai sa pisosi kao ei?
51E ōvafae kere toruipi e, haiiri voa ōvauta ita voa e usoso Ualare la haveva karu fefeare, e soa foromai Safu Arahoha Lareva la sukavutea vovea, usoso eve papa‐ita sa leiape lea mai fefeare.#Isa 63:10 52Eve papa‐ita sa lei haisora auke leipe peroveta karu leisa? Ualare ve haura kofa Vita ve forerai soa la everori moiape lea peroveta karu la ere paeaiape. E ta kivaia lei, arero paea opi la roroa meha. 53Ualare aneru sa mei miarōpe lea safu o la e ovi, a—, kakeva leiti auke karu e reha.
Setefana la ere fave sa toa paeōpe
54Ere lea o la mapi, kitou foromai lei, tao iri kekeapi Setefana la muiōpe. 55A—, are Safu Arahoha Lareva sa areve iri voa soa’, ofae kauri voa misilei, Ualare ve sosorusosoru Iesu ita la Ualare ve mai toare voa peiape la ofae eovi mō ōpe, 56Ara kauri la ofae la eavaipea, are fapi, Karu ve Atute ta ara la eavaipea, are Ualare ve mai toare itai voa soi laipea. 57A—, ere i rovaea isa, ereve ōvauta mai sa sasauka, haiiri farakeka lei, arero tai oroavi, 58arero karikara maria voa paitaravi foreri, arero fave sa toaiape. Havara paraeōpe karu ereve maea puta la foōvi, harokou aea, rare Saulo, ve mora ve ipi voa miavōpe. 59Soka ere Setefana la toaiape lea mea are i mō isōpe, Papuvita Iesu e, arave ove la ovaia. 60Soka are sukakoka avi i rovaea ita mō isōpe, Papuvita e, kaiae tava mea etau vei erero levi miaraia. Are lea o mei ivutu iavōpe reha.
Iliyochaguliwa sasa
Aposetolo 7: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
