Markus 3
3
Yeso pa ɓǝs a lib wuusyid la Yahudawa
1I mǝs maan ki Yeso mud ban ɓeer, she i ko ɓaal nda ban raam la Yahudawa, ɓo maan nga bana ma ɓu'i kyam. 2Ɓoɓaan i bana mak mus ya ɓe sun, ko Yeso ɓi paan ɓǝs si ɓoma ɓuk kyaman ma, i lib Asabar, lib wuusyid la Yahudawa lama, ɓe kumban shap ɓiɓin kun nga muɗi, na i sun bil nzu la Yahudawa ma mud Asabar ra. 3Yeso shappi ɓoma ɓu'i kyam ma na, “Lwak ɓu jaam i dum koyab ɓo.”
4She Yeso maas ya na, “Mala nzu ɓi yad ɓi su pak i lib ma wuusyid? Ɓi su pak ɓwaɗan gǝr ko ɓiɓin gǝr, ɓi yak mud ko ɓi wal ɓo ɓe wu?” Ama ɓoɓa mwad a sun shap kun ɗa. 5Ɓaas wuli la ya, i dwangal ban la mushi i ki sun ya. Ɓaali suk shangmi la ya, la tǝr ban wak kid laya, she i shappi ɓoma na, “Naat ɓu'u.” Ɓoma yak tiʻi, i naat ɓu'i, ɓu'i kad ka ndii tǝk-tǝk. 6She Farisawa ɓa bana pur i nza, a bwal ban kud kunya la ɓoɓa ki kudtak ɓi rangan Hiridus, i mud woma ye wal Yeso ɓi wu gha.
Bǝlǝn ɓo yu ban Yeso.
7Yeso la ɓoɓa ki bili ɓeer i kun shiim Galili, ɓoɓa bǝl a bana bili. 8Ɓoɓa pur i nzaal Yahudiya la Urshalima la nzaal Edom la dalan sal Urdun la ban ɓa dwangal Taya la Sida yu bǝni ma a wak gǝrɓa i ki pak. 9Lakunla ɓi bǝlǝn ɓoɓa ɓa, gan gaʻaɗi ɓa, she i shappi ɓoɓa ki bili ɓa na, ɓe shik mwala kurlukbiin mwak ɓi. 10Ma Yeso mak ɓi bǝlǝn ɓoɓa yidkwanan kum ɓǝs, she ɓoɓa yidkwanan ɗangɗang ki tud ban ɓe kumban yu tuu la yi, a paʻani, ɓi yidkwanan le ɓwar ra. 11Ɓiɓin kwaʻar la ki sunum Yeso ye ki tuko na nzaal i dumi, a ki ngam, a ki shappi na, “Wu Munɓo la Koǝl na.” 12Ama yi ɗak ya na, ɓe gin li dum la ban shap yi yanna ɓa.
Yeso tar ɓoɓa ki bili lum ko rwap
13Takwad wa, Yeso yab i mudtaal, i tuʻul ɓoɓa i yadte bili, she a yu bǝni. 14She i tar muntum ɓali lum ko rwap, ɓe nǝk la yi, lakunla ɓi ki tum ya ɓe shap kun la Koǝl. 15I dab ban pa nggur kun ban purun ɓiɓin kwaʻar i yid ɓo ɓe. 16Ɓo lum ko rwap ɓa na:
ɓi Siman ( ma i mak lwak ɓi na Bitrus); 17Yakubu ɓola Zabadi la ngy imi Yohana ( ma i mak lwak ɓe na Buwanarjis, mun ɓa la haradu lama). 18She Andarawus, la Filibus, la Batolamawus, la Matiyu, la Toma, la Yakubu ɓola Halfa, la Taddawus, la Siman ma ɓoma ngangan, 19la Yahuda Iskariyoti ma pa nggur kun Yeso.
Yeso la Ba'alzabul
20Ma Yeso kad i la, bǝlǝn ɓo raam i bana, she ma yi la ɓoɓa ki bili gha gamban li gǝrliin ɗa. 21Woma ɓi nggali Yeso la ɓi ngyimi wak kun mi, she a ɓeer ɓe buli gha, la a na, “Muɗi pilǝp ma.” 22She ɓoɓa shik ɓo la nzu la Musa ɓa pur i Urshalima kwad a na, “Ɓiɓin kwaʻar Ba'alzabul koma ɓaal yiɗi! La ngyap la Ba'alzabul rangan la ɓiɓin kwaʻar la yi ki purun ɓiɓin kwaʻar ra.” 23She Yeso tuʻul ya i ɓaal sak, i shappe na, “Wake la Shetan ɓi purun Shetan na? 24Ɓoɓa nzaal ma kun ya sun gus ɗik ɓa, nzaal ma ɓi masak na. 25Lana ɓoɓa la maan la wal lo la biib ya, ɓoɓa lama ɓi masakna. 26La wa, lana sheɗan ɓi walyid la ɓiɓin kwaʻar ɓa bili, ban tuko li yuum laama. 27Mamiin, ɓomaan na gamban ko i ɓaal la la ɓoma nyaɓa ɓi pak nggippi ɓa, she yi la ngyap i taanɗi ɓoma nyaɓa ma, i kud mi, kasa ki pwan gǝrɓa la li . 28Mi la shap kun mamiin ɗi wun mi, Koǝl ɓi zuɓun mbuk ɓi ɓiɓo i mud ɓǝsǝn kun la ban sang Koǝl ɓa la wun pyang. 29Ama koyab ɓoma sang Wuus la Koǝl, gusum wa ɓǝsǝn kun li ma badbad na, ka zub mbuk ɓi mud ɓǝsǝn kun li ɓa.” 30I shap wami, lakunla, a na “Yi gha la ɓiɓin kwaʻar.”
Nggala Yeso la ɓi ngyimi
31Takwad wa, she ɓi nggala Yeso la ɓi ngyimi yu lama yi gha ma. A jaam i nza, la a tum ɓomaan ɓi tuʻuli. 32Bǝlǝn ɓoɓa nǝk i nzaal dwangal ma yi, she a shappi na, “Nggu la ɓi ngimu gha nza, ye yad ban shap kun la wu.” 33Yeso maas ya na, “Yala nggaa, la ɓi ngyama?” 34She i sun ɓoɓa nǝk a dwangali ɓa, la i na, “Nggaa la ɓi ngyama la ɓi! 35Koyab ɓoma pak gǝrma Koǝl ɓi yad, yina ngyama ma bid la ma nggalap la nggaa.”
Iliyochaguliwa sasa
Markus 3: JGK
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2023 Seed Company in collaboration with Language Developers and Bible Translators Association
