ᤗᤢᤁᤠ 21
21
ᤔᤣᤔᤣᤍᤢᤔᤠᤸᤗᤧ ᤁᤢᤜᤢᤰᤛᤥᤕᤠᤱ
(ᤔᤳᤋᤡ ᥇᥈:᥊᥇-᥊᥊)
1ᤕᤧᤛᤢᤖᤧ ᤔᤠᤱᤜᤡᤶᤔᤥ ᤜᤢᤰᤛᤥᤕᤠᤱ ᤋᤥ᤺ᤶᤔᤠᤍᤧᤴᤏᤥ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤛᤥᤕᤠᤱᤅᤡᤴ ᤔᤧᤃᤣ᤺ᤳᤋᤢᤖ ᤔᤧᤒᤳᤇᤧᤒᤠᤴ ᤀᤥᤔᤧᤳᤋᤢᤛᤡᤖ ᤕᤢᤅᤧ॥ 2ᤂᤧᤵᤔᤥ ᤗᤳᤇᤠ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤎᤡᤰᤗᤧ ᤕᤠᤱᤏᤧᤳᤇᤡ#᥈᥇:᥈ ᤕᤠᤱᤏᤧᤳᤇᤡ ᤃᤪᤡᤁ ᤐᤠ᤺ᤴᤍᤠᤱᤅᤥ “ᤏᤧᤳᤇᤡ ᤗᤧᤵᤋᤥᤴ॥” ᤁᤴ ᤕᤜᤢᤍᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤧᤖᤧᤰᤏᤢ᤺ᤸᤗᤧ ᤁᤢᤔᤧᤸᤗᤢᤱ ᤛᤢ᤺ᤸᤗᤡᤰᤐᤠ ᤕᤠᤱ ᤘᤕᤧ॥ ᤁᤣ᤺ᤳᤋᤢᤒᤠ ᤏᤡᤛᤢᤀᤠᤱ 3ᤐᤠ᤺ᤳᤋᤢ. “ᤛᤧᤰᤂᤠᤀᤣ ᤁᤴ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤸᤗᤧ ᤘᤣ᤹ᤜᤠ᤹ᤏᤢ᤺ᤸᤗᤧ ᤕᤖᤡᤰ ᤜᤢᤰᤛᤥᤕᤠᤱ ᤁᤣ᤺ᤳᤋᤢᤀᤠᤱ ᤘᤠ᤹ᤖᤥ. 4ᤌᤣᤀᤠᤱᤓᤧᤸᤗᤧ ᤁᤴ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤖᤧᤃ ᤂᤢᤏᤡ᤹ ᤁᤧᤕᤥᤒᤠᤀᤠᤱ ᤁᤧᤏᤶᤒᤠ ᤕᤠᤱᤜᤠ᤹ᤀᤣ ᤔᤧᤕᤠᤰᤋᤢ. ᤁᤖ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤸᤗᤧᤃ ᤂᤢᤏᤧ᤹ ᤁᤢᤕᤠᤱᤛᤠ᤹ᤔᤥ ᤁᤳᤋᤢᤒᤠ ᤆᤠᤔᤠ ᤌᤢᤱᤔᤠᤗᤠᤶ ᤕᤠᤰᤋᤢᤀᤠᤱ ᤘᤠ᤹ᤖᤥ॥”
ᤀᤡᤏᤥᤃᤧᤴ ᤋᤢᤰᤂᤣᤴ ᤏᤢ ᤏᤡᤱᤄᤢᤶ
(ᤔᤳᤋᤡ ᥈᥊:᥉-᥇᥊; ᤔᤷᤁᤢ ᥇᥉:᥉-᥇᥉)
5ᤜᤧᤰᤁᤩᤠᤱ ᤁᤢᤓᤠ ᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤠᤱᤜᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤴ ᤏᤢ᤺ᤒ᤻ᤏᤢ᤺ᤒᤠ ᤗᤢᤱᤜᤠ᤹ ᤏᤢ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤍᤥᤴᤍᤢᤒᤠ ᤁᤧᤄᤧᤶᤒᤠ ᤁᤧᤗᤠ᤹ᤒᤠ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤒᤠ᤺ᤳᤋᤢᤖᤥ॥ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. 6“ᤂᤡᤏᤡ᤹ ᤀᤠᤸᤗᤥ ᤁᤧᤏᤡᤛᤢᤶᤒᤠᤴ ᤌᤡᤰ ᤗᤢᤱᤛᤶᤍᤠᤱ ᤘᤣ᤹ ᤗᤢᤱᤎᤡᤰᤁᤠᤱ ᤔᤧᤴᤏᤧᤀᤣ ᤕᤔᤠ ᤕᤧᤶ ᤋᤠᤖ ᤐᤳᤗᤥ॥”
7ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢᤴ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤁᤴ ᤀᤠᤵᤑᤠᤸᤗᤧ ᤐᤥᤱᤒᤠᤒᤣ᥅ ᤁᤴ ᤐᤥᤱᤔᤠᤏᤢ᤺ᤸᤗᤧ ᤋᤃᤡ ᤌᤣ ᤔᤡᤰᤛᤣᤴ ᤐᤥᤱᤒᤣ᥅”
8ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤀᤠᤳᤋᤡᤸᤗᤧᤀᤠᤱ ᤂᤡᤏᤡ᤹ ᤀᤡᤱᤃᤧᤴᤗᤧᤰᤋᤡᤸᤗᤖᤥ. ᤌᤣᤀᤠᤱᤓᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤀᤡᤱᤃᤠ᤹ ᤀᤠᤔᤡᤱᤅᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤀᤡᤱᤃᤠ᤹ᤀᤣᤖᤥ. ᤜᤧᤰᤁᤩᤠᤱ ᤀᤠᤸᤗᤥ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢ᤹. ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹ᤀᤥ॥ 9ᤜᤧᤰᤁᤩᤠᤱ ᤂᤡᤏᤡ᤹ ᤌᤱᤜᤠ᤹ ᤏᤢ ᤁᤧᤈᤡᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤁᤧᤄᤧᤵᤛᤢᤶ. ᤁᤖ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ॥ ᤁᤱᤜᤠ᤹ᤃ ᤐᤥᤱᤔᤠᤀᤣ ᤐᤥᤱ. ᤁᤖ ᤒᤠ ᤂᤧᤴ ᤕᤧᤶᤔᤥᤀᤣᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴ ᤔᤧᤍᤠᤏᤧᤴᤗᤥ॥”
10ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤗᤠᤈᤣ᤹ᤜᤠ᤹ ᤗᤢᤶᤔᤥ ᤌᤱ ᤐᤥᤰ॥ 11ᤜᤧᤰᤁᤩᤠᤱ ᤕᤖᤡᤰ ᤋᤧᤴᤏᤥ ᤐᤕᤶ ᤕᤶᤒᤠ ᤗᤢᤵᤗᤡ ᤌᤠᤱ. ᤕᤶᤒᤠ ᤛᤠᤰ ᤐᤥᤰ ᤜᤧᤰᤁᤩᤠᤱ ᤕᤶᤒᤠ ᤔᤡᤴᤍᤣ᤹ᤜᤠ᤹ ᤐᤥ᤺ᤰᤁᤠᤱ ᤁᤡᤵᤔᤠ ᤁᤧᤄᤢᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤋᤠᤱᤛᤠᤰᤐᤥ ᤔᤧᤎᤠ᤺ᤵᤗᤥ॥
12“ᤁᤴ ᤐᤥᤱᤔᤠᤏᤢ᤺ᤸᤗᤧ ᤋᤃᤡᤃ ᤂᤡᤏᤡ᤹ ᤜᤢᤰ ᤁᤧᤶᤕᤠᤰᤋᤡᤀᤠᤱ ᤏᤡᤱᤄᤢᤶ ᤁᤧᤶᤔᤧᤳᤋᤡ᤹ᤖᤥ॥ ᤜᤧᤰᤁᤩᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤂᤠᤛᤧᤴ ᤁᤧᤶᤗᤥ᤺ᤴᤍᤡᤀᤠᤱ ᤐᤢᤱᤗᤠᤜᤡᤶᤔᤥ ᤁᤧᤶᤎᤧᤰᤋᤡ᤹ᤖᤥ॥ ᤀᤠᤔᤡᤱᤅᤡᤸᤗᤧ ᤆᤥᤃᤢᤸᤗᤧ ᤜᤠᤱᤜᤠ᤹ ᤏᤢ ᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤧᤶᤕᤧᤵᤛᤡ᤹ᤖᤥ॥ 13ᤁᤱᤃ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤐᤠ᤺ᤵᤔᤠ ᤁᤧᤄᤥᤛᤢᤶᤒᤠ ᤛᤢᤕᤧᤶᤗᤥ॥ 14ᤜᤧᤰᤁᤩᤠᤱ ᤂᤡᤏᤡ᤹ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤌᤧᤔᤠ ᤐᤠ᤺ᤵᤔᤠᤒᤣ ᤑᤠ᤹ᤀᤠᤱ ᤋᤃᤡᤛᤠ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥ 15ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤂᤡᤏᤡ᤹ ᤐᤠ᤺ᤵᤔᤠ ᤁᤧᤒᤥᤱᤒᤠ ᤛᤢᤳᤗᤠᤜᤠ᤹ ᤏᤢ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤐᤡᤏᤡᤱᤗᤥ॥ ᤜᤧᤰᤁᤣ᤺ᤸᤗᤧ ᤀᤠᤳᤋᤡᤴᤏᤠᤱ ᤂᤡᤏᤡ᤹ ᤒᤡᤑᤩᤢᤱᤜᤠ᤹ᤖᤧ ᤀᤵᤔᤠ ᤏᤢ ᤐᤠ᤺ᤴᤎᤰᤔᤠ ᤔᤧᤴᤇᤢᤰᤋᤢᤴᤗᤥ॥ 16ᤂᤡᤏᤡ᤹ ᤐᤠᤔᤠᤜᤠ᤹. ᤑᤢ᤹ᤏᤢᤛᤠ᤹ᤜᤠ᤹. ᤁᤠ᤹ᤀᤡ ᤛᤥ᤹ᤎᤥ᤺ᤰᤜᤠ᤹ ᤏᤢ ᤋᤣ᤺ᤱᤈᤢᤶᤜᤠ᤹ᤖᤧ ᤀᤡᤱᤃᤧᤶᤗᤧᤰᤋᤡᤀᤠᤱ ᤋᤧᤶᤔᤠ ᤁᤧᤶᤒᤠᤱᤄᤡ᤹ᤖᤥ॥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤢᤓᤠᤃ ᤁᤧᤶᤛᤧᤖᤡ᤹॥ 17ᤂᤡᤏᤡ᤹ ᤕᤠᤵᤔᤡ ᤏᤛᤠᤴ ᤁᤧᤈᤥᤃᤡᤒᤠᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤈᤡ᤺ᤳᤋᤡ᤹. 18ᤜᤧᤰᤁᤣᤛᤠᤱ ᤂᤡᤏᤡ᤹ ᤌᤧᤃᤣ᤺ᤰᤀᤡᤎᤡᤰᤁᤠᤱ ᤔᤰᤔᤧᤎᤠᤏᤧᤴᤗᤥ॥ 19ᤂᤡᤏᤡ᤹ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤎᤖᤢᤶᤔᤡᤸᤗᤧᤀᤣ ᤂᤡᤏᤡ᤹ ᤜᤡᤱᤔᤴᤏᤡᤴ ᤋᤠᤱᤗᤥ॥”
ᤕᤖᤢᤛᤗᤧᤶᤔᤡᤸᤗᤧ ᤁᤢᤔᤧᤰᤔᤠᤴ
(ᤔᤳᤋᤡ ᥈᥊:᥇᥋-᥈᥇; ᤔᤷᤁᤢ ᥇᥉:᥇᥊-᥇᥏)
20ᤀᤠᤸᤗ ᤕᤖᤢᤛᤗᤧᤶᤔᤡᤴ ᤏᤡᤱᤔᤡ ᤌᤰᤛᤢᤒᤠᤜᤠ᤹ᤖᤧ ᤔᤧᤃᤒᤢᤒᤠ ᤁᤧᤏᤡᤛᤢᤶᤔᤡᤸᤗᤧ ᤀᤠᤸᤗ ᤁᤢᤔᤧᤰᤔᤠᤴ ᤏᤡ᤺ᤳᤋᤠᤱᤅᤣ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥ 21ᤜᤧᤰᤁᤩᤠᤱ ᤕᤜᤢᤍᤡᤕᤠᤒᤠ ᤔᤏᤠᤜᤠ᤹ ᤁᤥ᤺ᤰᤔᤠ ᤑᤠᤱᤈᤱ ᤜᤧᤱᤄᤠᤳᤋᤡ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗ. ᤕᤧᤰᤕᤰᤁᤥ ᤁᤧᤘᤠ᤹ᤒᤠᤜᤠ᤹ ᤗᤠ᤺ᤰᤁᤠᤳ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗ. ᤜᤧᤰᤁᤩᤠᤱ ᤐᤠᤱᤓᤣ᤹ᤀᤥ ᤁᤧᤕᤢᤱᤒᤠᤜᤠ᤹ ᤕᤠᤶᤔᤥ ᤕᤧᤰᤕᤰᤁᤥ ᤔᤧᤴᤍᤠᤏᤧᤴᤗᤖᤥ॥ 22ᤌᤣᤀᤠᤱᤓᤧᤸᤗᤧ ᤛᤠᤶᤕᤥ ᤛᤠᤵᤗᤠᤀᤥ ᤁᤴ ᤛᤠᤵᤋᤧᤀᤠᤱ ᤐᤵᤐᤠ ᤐᤠ᤺ᤴᤏᤡᤴ ᤁᤧᤳᤗ ᤑᤠ᤹ᤀᤠᤱ ᤁᤱᤃ ᤂᤢᤶᤍᤡᤱᤗᤧᤴ ᤕᤧᤴᤜᤠ᤹ ᤐᤥᤱᤗᤥ॥ 23ᤁᤴ ᤕᤧᤶᤔᤡᤱᤃ ᤔᤧᤴᤇᤢᤰᤔᤠ ᤁᤧᤘᤠ᤹ᤔᤠ ᤏᤢ ᤛᤠᤘᤠᤔᤠᤜᤠ᤹ᤖᤧ ᤗᤠᤃᤡ ᤀᤠᤰᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤐᤥᤱᤅᤡ᥄ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤶᤒᤠ ᤋᤢᤰᤂᤣ ᤌᤠ᤺ᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤅᤡᤴ ᤁᤴ ᤔᤏᤠᤜᤠ᤹ᤀᤥ ᤆᤢᤰᤗᤥ॥ 24ᤂᤧᤱᤜᤠ᤹ ᤋᤠᤓᤣ᤺ᤸᤗᤧ ᤔᤧᤈᤧᤵᤋᤢ ᤔᤧᤛᤧᤖᤢᤛᤡ᤹ ᤜᤧᤰᤁᤩᤠᤱ ᤕᤖᤡᤰ ᤗᤠᤈᤣ᤹ᤀᤥ ᤐᤢᤱᤗᤠᤎᤠᤒᤠ ᤔᤧᤒᤥᤱᤅᤠᤱ ᤔᤧᤒᤣ᤺ᤰᤗᤥ॥ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤕᤧᤶ ᤔᤧᤱᤃᤧᤳᤋᤣ ᤌᤠᤖᤡᤰ ᤂᤧᤱᤜᤠ᤹ᤖᤧ ᤕᤖᤢᤛᤗᤧᤶᤔᤡᤴ ᤔᤧᤍᤥ᤹ᤖᤢ ᤔᤧᤛ᤹ᤖᤢ᤹ᤖᤥ॥
ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢᤔᤠᤴ
(ᤔᤳᤋᤡ ᥈᥊:᥈᥏-᥉᥇; ᤔᤷᤁᤢ ᥇᥉:᥈᥊-᥈᥍)
25“ᤜᤧᤰᤁᤩᤠᤱ ᤏᤠᤶ. ᤗᤠᤒᤠ ᤏᤢ ᤂᤣ᤺ᤶᤛᤡᤰᤜᤠ᤹ᤀᤥ ᤕᤶᤒᤠ ᤔᤡᤰᤛᤣ᤺ᤴᤜᤠ᤹ ᤔᤧᤎᤠ᤺ᤵᤗᤥ॥ ᤜᤧᤰᤁᤩᤠᤱ ᤘᤠᤜᤱᤅᤡᤸᤗᤧ ᤁᤢᤛ᤺ᤰᤔᤠᤴ ᤏᤢ ᤕᤶᤒᤕᤶᤒᤠ ᤘᤠᤓᤧᤸᤗᤧᤱᤅᤡᤸᤗᤧ ᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤛᤠ᤹ᤖᤡᤰ ᤁᤡᤔᤠᤀᤥ ᤏᤢ ᤏᤡᤱᤛᤠᤶᤔᤥ ᤔᤧᤎᤠᤖᤥ॥ 26ᤀᤠᤸᤗ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤍᤠᤒᤠᤖ ᤁᤧᤒᤵᤐᤠ ᤀᤡᤏᤥᤃᤧᤴ ᤋᤢᤰᤂᤣᤴ ᤔᤧᤀᤡ᤺ᤳᤋᤢᤀᤠᤱ ᤔᤏᤠᤜᤠ᤹ ᤂᤢᤏᤡ᤹ ᤛᤠᤶ ᤔᤡᤰᤁᤡᤸᤗᤧ ᤐᤰᤌᤛᤡ. ᤌᤣᤀᤠᤱᤓᤧᤸᤗᤧ ᤋᤠᤱᤛᤠᤰᤐᤥᤒᤠ ᤔᤢᤰᤛᤠᤶᤜᤠ᤹ ᤏᤢ ᤂᤣ᤺ᤶᤛᤡᤰᤜᤠ᤹ ᤔᤧᤕᤱᤗᤥ॥ 27ᤜᤧᤰᤁᤩᤠᤱ ᤔᤧᤴᤇᤠᤶᤛᤠᤴ ᤂᤠᤵᤔᤡ᤺ᤳᤋᤥ ᤕᤶᤒᤠ ᤔᤢᤰᤛᤠᤶ ᤜᤧᤰᤁᤩᤠᤱ ᤔᤡᤔᤡᤍᤡᤱᤏᤢ ᤕᤢᤖ ᤐᤵᤐᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤏᤡᤛᤢ᤹ᤖᤥ॥ 28ᤀᤠᤸᤗ ᤁᤴ ᤁᤧᤖᤧᤰ ᤐᤥᤱᤅᤡᤸᤗᤧ ᤂᤡᤏᤡ᤹ ᤌᤧᤃᤣ᤺ᤰᤐᤧᤴ ᤑᤥ᤺ᤰᤂᤧᤶᤔᤧ᤹ᤀᤠᤱ ᤌᤠ᤺ᤱ ᤀᤥᤔᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤧᤴᤗᤵᤐᤡᤴ ᤏᤡ᤺ᤳᤋᤠᤱ ᤋᤠᤖ ᤐᤳᤗᤥ॥”
ᤐ᤺ᤳᤇᤣ᤹ᤒᤢᤱᤔᤥᤗᤠᤶ ᤏᤡᤛᤠᤶ
(ᤔᤳᤋᤡ ᥈᥊:᥉᥈-᥉᥋; ᤔᤷᤁᤢ ᥇᥉:᥈᥎-᥉᥇)
29ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤂᤧᤍᤠ᤹ᤀᤡᤴ ᤔᤧᤳᤋᤢᤛᤡ. “ᤀᤠᤸᤗ ᤐ᤺ᤳᤇᤣ᤹ᤒᤢᤱᤔᤠᤴ ᤏᤢ ᤘᤣ᤹ ᤛᤡᤱᤒᤢᤱᤜᤠ᤹ ᤀᤥᤔᤧᤳᤋᤧᤶᤔᤧ᤹॥ 30ᤀᤠᤸᤗ ᤁᤢᤛᤱ ᤁᤢᤓᤧᤰᤘᤠ ᤗ᤺ᤴᤏᤡᤸᤗᤧ ᤜᤠᤱᤘᤠ᤺ᤶᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱ ᤋᤠᤖ ᤐᤳ ᤑᤠ᤹ᤀᤠᤱ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ 31ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤴ ᤁᤠᤰ ᤐᤠ᤺ᤴᤜᤠ᤹ ᤁᤧᤳᤗ ᤐᤣ᤺ᤰᤐᤠ ᤁᤧᤏᤡᤛᤢᤶᤔᤡᤸᤗᤧ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤏᤡ᤺ᤳᤋᤠᤱ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥
32“ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤶᤒᤥᤱᤅᤣ ᤌᤠᤖᤡᤰ ᤁᤴ ᤔᤧᤴᤇᤠᤶ ᤌᤠ᤺ᤰᤜᤠ᤹ ᤔᤧᤴᤇᤡᤏᤧᤴᤗᤥ॥ 33ᤋᤠᤱᤛᤠᤰᤐᤠᤴ ᤏᤢ ᤂᤠᤶᤒᤣ᤺ᤰᤔᤠᤴ ᤗᤧᤰᤁᤠᤱ ᤐᤣᤰ. ᤁᤖ ᤀᤡᤱᤃᤠ᤹ ᤀᤠᤒᤠ᤺ᤴᤈᤠᤰᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤰᤏᤧᤴ ᤔᤧᤒᤣ᤺ᤰᤏᤧᤴᤗᤥ॥
34“ᤂᤡᤏᤡ᤹ ᤕᤠᤶᤍᤠᤍᤠ ᤛᤢᤰᤂᤣᤘᤠ ᤏᤢ ᤆᤠᤔᤠ ᤌᤢᤱᤔᤠ ᤜᤧᤰᤁᤩᤠᤱ ᤁᤴ ᤜᤡᤱᤔᤴᤗᤧᤴ ᤏᤡᤱᤛᤠᤶ ᤆᤥ᤺ᤰᤔᤥ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤔᤣ᤺ᤴᤏᤣ ᤑᤠ᤹ᤃᤪ ᤜᤰᤆᤄᤳ ᤌᤰᤛᤠᤐᤢᤛᤠ ᤀᤡᤈᤥᤀᤥ ᤔᤧᤎᤠᤒᤠ ᤜᤧᤰᤁᤣ ᤁᤴ ᤕᤧᤴᤜᤠ᤹ᤀᤥ ᤂᤡᤏᤡ᤹ᤀᤠᤱ ᤁᤧᤎᤩᤧ᤹ᤀᤡᤖᤥ॥ 35ᤌᤣᤀᤠᤱᤓᤧᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ᤏᤢᤀᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤐᤥᤱᤗᤥ॥ 36ᤁᤧᤖᤧᤰ ᤕᤧᤶᤔᤥ ᤀᤠᤵᤑᤠᤸᤗᤧᤛᤠᤱ ᤁᤴ ᤁᤧᤍᤠᤒᤠ ᤐᤠ᤺ᤴᤏᤥᤗᤠᤶ ᤂᤧᤳᤇᤡᤱᤔᤠ ᤐᤣ᤺ᤰᤔᤠ ᤔᤢᤰᤛᤠᤶ ᤁᤧᤄᤥᤛᤢᤶᤗ ᤜᤧᤰᤁᤩᤠᤱ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤍᤃᤡ ᤕᤧᤵᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤖ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥”
37ᤜᤧᤰᤁᤩᤠᤱ ᤕᤧᤛᤢᤖᤧ ᤌᤡᤰᤕᤠ᤺ᤴᤎᤰ ᤔᤠᤱᤜᤡᤶᤔᤥ ᤜᤢ᤹ᤖᤢᤛᤡᤖ ᤘᤕᤧ. ᤁᤖ ᤛᤧᤴᤍᤡᤰ ᤕᤠᤱᤎᤥ᤺ᤰᤛᤧ ᤈᤤᤋᤢᤏ ᤁᤥ᤺ᤰᤔᤠᤀᤥ ᤐᤣᤖ ᤘᤕᤧᤖᤥ॥ 38ᤜᤧᤰᤁᤩᤠᤱ ᤋᤠᤏᤠᤶᤛᤠ ᤔᤠᤱᤜᤡᤶᤔᤥ ᤂᤢᤏᤧ᤹ ᤁᤢᤒᤠ᤺ᤴᤈᤠᤰ ᤂᤧᤶᤛᤧ ᤔᤏᤠᤜᤠ᤹ ᤔᤧᤍᤩᤧᤖᤥ॥
Iliyochaguliwa sasa
ᤗᤢᤁᤠ 21: LIFOTNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009, 2023, Wycliffe Bible Translators, Inc. All rights reserved.
